Zaburi 116 - Digo Bible

Kumshukuru Mlungu bada ya kutivywa na chifo

¹ Nammendza Mwenyezi Mlungu, kpwa sababu anasikira chiriro changu na mavoyo gangu.

² Kpwa vira ananisikira, nindamvoya siku zosi za maisha gangu.

³ Nyugbwe za chifo zanilinga-linga, utsungu wa mbira waniphaha nágaya na mahangaiko na sonono.

⁴ Ndipho nchimvoya Mwenyezi Mlungu, “Ee Mwenyezi Mlungu, ninakuvoya unitivye.”

⁵ Mwenyezi Mlungu ni wa mbazi na wa haki, Mlungu wehu ana huruma.

⁶ Mwenyezi Mlungu nkurinda atu ambao taana mutu wa kuaterya, niriphokala hatarini, iye wanitivya.

⁷ Hurira uoye uwe roho yangu mana Mwenyezi Mlungu akanihendera manono.

⁸ Iye wativya roho yangu na chifo na achihenda nsitukpwe matsozi gangu, na kunirinda nisikpwale.

⁹ Phahi nindanyendeka mbere za Mwenyezi Mlungu, kahi ya tsi ya atu ario moyo.

¹⁰ Nákuluphira hadi wakati niriphoamba, “Mimi ninagaya sana.”

¹¹ Kahi za tabu zangu nágomba nchiamba, “Anadamu osi ana handzo.”

¹² Ndamuphani Mwenyezi Mlungu kpwa manono arigonihendera?

¹³ Nindamrehera sadaka ya uchi wa zabibu kpwa kunitivya, na nivoye kpwa dzinare ye Mwenyezi Mlungu.

¹⁴ Nindamtimizira Mwenyezi Mlungu naziri zangu mbere za atue osi.

¹⁵ Chifo cha mutu muaminifu china samani kpwa Mwenyezi Mlungu.

¹⁶ Mwenyezi Mlungu, mimi ni mtumishio, ni mtumishio mwana wa mtumishio mchetu ukanivugula silisili zangu.

¹⁷ Ndakulavira sadaka za shukurani na nivoye kpwa dzinaro uwe Mwenyezi Mlungu.

¹⁸ Nindamtimizira Mwenyezi Mlungu naziri zangu mbere za atue osi,

¹⁹ kahi za mihala ya nyumba ya Mwenyezi Mlungu, kahi-kahiyo uwe Jerusalemu. Mwenyezi Mlungu naatogolwe!