Zaburi 112 - Digo Bible

Baraka za mwenye haki

¹ Haleluya. Mwenyezi Mlungu naatogolwe. Baha mutu amuogophaye Mwenyezi Mlungu, mutu ahamirwaye ni malagizoge.

² Chivyaziche chindakala chivyazi cha mkpwotse kpwenye tsi, chivyazi cha atu ahendao haki chindajaliywa.

³ Mali na utajiri vi mwao nyumbani na hakiye inadumu hata kare na kare.

⁴ Hata kuchikala na jiza chisha mwanga undamungʼarira mutu ahendaye sawa, Mwenyezi Mlungu ana mbazi, huruma na haki.

⁵ Manono gandamwedzera iye ariye na mbazi na aaphasaye atu, ahendaye mamboge kpwa njira ya haki.

⁶ Mana mutu wa haki kandakakamiswa ni utu andatambukirwa hata kare na kare.

⁷ Kandaogopha kusikira habari mbii, moyowe u imara, anamkuluphira Mwenyezi Mlungu.

⁸ Moyowe u imara, kandaogopha hadi aone gara aazirago maaduige gakatimiya.

⁹ Anaganya vituvye moyo kutsuka kuganyira achiya, hakiye inadumu hata kare na kare, andakala na nguvu nyinji na ishima.

¹⁰ Mutu mui achiona mwenye haki anaongokerwa nkutsukirwa, nkusaga meno na kuangamika, mipango ya mutu mui taikala.