Zaburi 11 - Digo Bible

Kumkuluphira Mlungu

Kpwa chilongozi wa aimbadzi. Zaburi ya Daudi.

¹ Mwenyezi Mlungu ndiye chimbiriro rangu. Mnawezadze kuniamba, “Uruka dza nyama wa mapha uchimbirire myangoni,

² mana atu ayi akaphinda maha gao na mivi akaipharika tayari kulatsa enye haki jizani.

³ Misingi ichibanangbwa, mwenye haki undahendadze?”

⁴ Mwenyezi Mlungu a ndani ya nyumba takatifu ya kuvoya Mlungu na chihiche cha utawala chi mlunguni. Iye analola anadamu osi na anachunguza gara ahendago.

⁵ Mwenyezi Mlungu nkupima atu a haki na ayi iye anamena atu amendzao fujo.

⁶ Iye andamwagira atu ayi makala ga moho na chibiriti avi ni mvula, andaatiya adabu na phuto ra dzoho kali.

⁷ Mana Mwenyezi Mlungu ni mwenye haki na anamendza uamuli wa haki. Atu ahendao irivyo sawa andasagala phamwenga na Mlungu.