Isaya 28 - Digo Bible

Aiziraeli anatiywa adabu

¹ Shaka hiro kpwa alevi a Efuraimu enye ngulu; hinyo ambao unono wao ni dza maruwa ndigo nyala, maruwa gophandwa dete renye rutuba, dzulu ya vilongozi achiogbwa photsi kpwa a tele uchi.

² Lola, Mwenyezi Mlungu ana mmwenga ariye jasiri, mwenye nguvu dza phuto ra mvula ya mawe, phuto ribanangaro dza madzi manji gafurikago, iye andagabwaga.

³ Iyo tadzi ya alevi a Efuraimu anayoihendera ngulu indavyogbwa-vyogbwa.

⁴ Mudzi hura urio dza ruwa nono, urio dete renye rutuba undaangamizwa dza mazao ga mwandzo ga tini, ambazo mutu nkuziona akazidola na akazirya.

⁵ Siku iyo Mwenyezi Mlungu, Mlungu wa majeshi andakala dza tadzi ya nguma na chiremba chinono kpwa atue ariosala.

⁶ Andaapha aamuli moyo wa kulavya uamuli wa haki, na kuatiya nguvu anaokanira mudzi ryangoni.

⁷ Alavyadzi-sadaka na manabii anadedeleka, na kuzuwa-zuwa kpwa sababu ya uchi. Anazuwa-zuwa kpwa sababu ya uchi, anadedeleka wakati wa kuona ruwiya, na anadzikpwala wakati wa kuhenda uamuli.

⁸ Meza zosi zi tele maaphika, taphana phaswafi hata phadide.

⁹ Aho anaamba, “Andamfundza ani marifwa? Andamusemurira ani ujumbewe? Kpwani swino hu ana atsanga achiorikiswa, yani achiouswa linyahoni?

¹⁰ Mana iye anahuamuru: kano henda hiri, kano henda rira, dzambo mwenga-mwenga avi hu anache.”

¹¹ Ichikala tamundaniphundza, Mwenyezi Mlungu andagomba namwi kutsupira luga ya chijeni, na kpwa chigugumizi.

¹² Aho waambira kukala, “Hipha ndipho phatu pha kuoya, achioremwa naaoye. Hipha ndipho phatu pha kuphoza marenda.” Ela nyo taayagaphundza.

¹³ Kpwa hivyo sambi neno ra Mwenyezi Mlungu kpwao rindakala hivi, kano henda hiri, kano henda rira, dzambo mwenga-mwenga avi hu anache. Ili aphiye akagbwe na kogo, arumire, agbwirwe ni muhambo na ahalwe mateka.

¹⁴ Phahi phundzani neno ra Mwenyezi Mlungu mwi atu a chibero mtawalao atu hinya asagalao Jerusalemu.

¹⁵ Mwimwi munadzikarya, munaamba, “Hukahenda chilagane na chifo, hukaphahana na kuzimu. Shaka kulu richitsupa, tarindahuguta, mana hukahenda handzo rikale chimbiriro rehu. Na kuchenga kukale phatu pha kudzifwitsa.”

¹⁶ Kpwa sababu hiyo, Mwenyezi Mlungu anaamba hivi, “Lola, ninaika dziwe ra msingi hiko Sayuni, dziwe ambaro rapimwa. Dziwe ra pembeni ra samani ra kudzenga msingi urio imara. Yeyesi ndiyekuluphira kandaaibika.

¹⁷ Nami ndahumira uamuli wa haki ikale chipimo na kuhenda haki ikale kabiro. Mvula ya mawe indausa chimbiriro renu, yani handzo na madzi gandafurika hipho phatu phenu pha kudzifwitsa.

¹⁸ Chilagane chenu mrichoika na chifo, chindavundzwa na kuphahana kpwenu na kuzimu, kundafutwa. Shaka kulu ndirokpwedza rindakuphahani rikubwageni.

¹⁹ Rorosi ndirokpwedza rindakuphahani, chila siku, ikale mutsi, ikale usiku rindakuphahani.” Muchielewa ujumbe uhu mundatishirwa.

²⁰ Mundakala avi mu atu achiodziambalaza kpwenye chidzitanda chidide, na kudzibwiningiza shuka ndide ambayo taigota.

²¹ Mana Mwenyezi Mlungu andavamia dza arivyovamia Mwango wa Perazimu. Andatsukirwa dza arivyoatsukirirwa hiko Dete ra Gibioni ela andahenda utu wa kuangalaza utu ambao tamuyautarajiya.

²² Kpwa hivyo msimnyetere sedze silisili zenu zikakuremererani zaidi. Mwenyezi Mlungu, Mlungu wa majeshi akanibaza kukala akakusudiya kuangamiza tsi ndzima.

²³ Hegani masikiro musikire sauti yangu. Phundzani higa nigombago.

²⁴ Dze, yuno mkurima achitayarisha utseru ili aphande, nkpwenderera kurima vivyo kpwa vivyo? Dze, nkpwenderera kutsimba na kuvundza madongolowa?

²⁵ Iye achimala kuvundza madongolowa, nkuphanda kunde na kukumbira bizari nyembamba. Alafu akaphanda nganu phatuphe na mere phatuphe.

²⁶ Mlunguwe nkumlagiza na kumfundza irivyo sawa.

²⁷ Kunde taziwagbwa na rungu ziho, wala bizari nyembamba kutsupizirwa gurudumo ra rukpwama dzuluye. Kunde ziwagbwa na gongo, na bizari nyembamba ikawagbwa na chigongo.

²⁸ Mtsere ni usagbwe ukale unga ndipho utengezwe mkpwahe, kpwa hivyo tauwagbwa tu kpwenderera. Dzagbwe mutu nkutsupiza magurudumo ga garire ra kuwagira, ela farasie taandausaga.

²⁹ Higa gosi gala kpwa Mwenyezi Mlungu, Mlungu wa majeshi, ambaye ana ushauri wa ajabu na ikima ya hali ya dzulu.