Ezekieli 27 - Digo Bible

Wira wa kusononekera Tiro

¹ Mwenyezi Mlungu wagomba nami achiniamba,

² “Uwe mwanadamu, imbira Tiro wira wa sonono.

³ Uambire mudzi wa Tiro, yo bandari, ye muhendadzi bishara wa atu a tsi nyinji za pwani, ‘Mwenyezi Mlungu anaamba hivi: Uwe Tiro unaamba, “Mimi ni mnono takuna.”

⁴ Miphakayo i kahi-kahi ya bahari adzengadzio akamilisha unonoo.

⁵ Atengeza kuta za meliyo kuhumira mbao za misonobari kula Seniri. Achitengeza mlingoti kuhumira muerezi kula Lebanoni.

⁶ Akutengezera makafi kuhumira mbao za mialoni kula Bashani na achikutengezera seemu ya dzulu ya kusagala mo melini kuhumira mbao za miteashuru kula pwani ya Kupuro. Mbao hizo zapambwa na pembe za ndzovu.

⁷ Tangaro kala ni ra katani swafi chiyoshonwa marembo kula Misiri, yokala dza bendera na vyandaruwavyo kala ni vya rangi ya buluu na zambarau kula pwani ya Elisha.

⁸ Apigio a makafi kala ni Asidoni na Aarivadi maderevao a meli kala ni atu enye ujuzi kula Zerimeri.

⁹ Mafundi mangungu kula Gebali enye ujuzi wa kutosha kala a kpwako anarekebisha myanya. Meli kula chila tsi zakpwedza na vitu kukakanizana na vitu urivyokala navyo.

¹⁰ “ ‘Atu a Pashia, Ludi na Puti ahumika dza asikari mwako jeshini. Aho agbwadzika ngao na kofiya za chuma mwako kutani, nao achionyesa unonoo.

¹¹ Atu a Arivadi na Heleki kala a dzulu ya kutazo pande zosi, nao atu a Gamadi kala a dzulu ya minarayo. Aho agbwadzika ngao zao mo mwako kutani pande zosi, achihenda unonoo ukamilike.

¹² “ ‘Tarishishi yahenda bishara nawe kpwa sababu ya utajirio munji wa vitu. Aho akupha feza, chuma, bamba na aina ya chuma chiihwacho risasi nawe uchiapha vitu urivyokala navyo.

¹³ Wahenda bishara na Javani, Tubali na Mesheki, aho akupha atumwa na vitu vya shaba nawe uchiapha vitu urivyokala navyo.

¹⁴ Uwe wakakanizana na atu kula Bethi-Togarima, aho akupha farasi a kuvweha magari kuhendera kazi, farasi a viha na nyumbu nawe uchiapha vitu urivyokala navyo.

¹⁵ Wahenda bishara na atu a Dedani. Tsi nyinji za pwani zakala agulio, aho akurehera pembe za ndzovu na mphingo dza maripho.

¹⁶ Aramu yahenda bishara nawe kpwa sababu ya vituvyo vinji uguzavyo, akakanize vituvyo na zumaridi, nguwo za katani swafi, za zambarau, za kushonwa marembo, marijani na akiki.

¹⁷ Juda na tsi ya Iziraeli zahenda bishara nawe, aho akakaniza vituvyo na nganu kula Minithi, muhama, asali, mafuha na dawa ya mavune.

¹⁸ Atu a Damasikasi ahenda bishara nawe kpwa sababu ya vitu vinji urivyokala navyo, mana kala una utajiri wa vitu vinji vya chila aina, achireha uchi kula Heliboni na nyoya za mangʼondzi kula Sahari.

¹⁹ Wedani na Javani zirizo phephi na Uzali akakanizana nawe, aho areha chuma, mdalasini na vilungo vyokakanizwa na vituvyo.

²⁰ Dedani wahenda bishara nawe kpwa vitu vya kuhandikira dzulu ya farasi au punda.

²¹ Warabuni na vilongozi osi a Kedari kala ni agulio. Aho akukakanizira ana ngʼondzi, maturume na ndenje.

²² Ahendadzi-bishara a Sheba na Raama ahenda bishara nawe. Aho akakaniza vituvyo na vilungo vinono zaidi, na aina zosi za mawe ga samani na zahabu.

²³ Wahenda bishara na Harani, Kane, Edeni, Sheba, Ashuru na Kilimadi.

²⁴ Aho ndio ariokuguzira mavwazi manono, nguwo za buluu na nguwo zoshonwa marembo, mazuliya ga rangi-rangi na nyugbwe zophalazwa ngingingi.

²⁵ Meli za Tarishishi zahumirwa kukutsukurira vituvyo. Uwe u dza meli iriyoodzazwa mizigo minji ko kahi-kahi ya bahari.

²⁶ Apigio a makafi akuphirika kure na pwani. Ela phuto ra mlairo wa dzuwa rindakuvundza vipande-vipande ko kahi-kahi ya bahari.

²⁷ Utajirio, vitu uguzavyo, mabahariyao na maderevao a meli, mafundigo ga kurekebisha meli, achuuzio na anajeshio, yani atu osi mo melini andazama kahi-kahi ya bahari yo siku ya kuangamizwako.

²⁸ Maderevao a meli ndiphorira kpwa wuoga ko kanda-kanda ya pwani kundakakama.

²⁹ Na osi apigao makafi, mabahariya na madereva a meli andaricha meli zao aime langbwani.

³⁰ Andakota kululu na kukuririra kpwa utsungu. Andadzimwagira vumbi mwao vitswani, na agalegale ivuni.

³¹ Andadzinyola mabato mwao vitswani kpwa sababuyo na avwale nguwo za magunia. Andakuririra na utsungu mwao mioyoni na kukala na chiriro cha sonono.

³² Phahi wakati anakuririra andatunga wira wa sonono nao andakusononekera: “Ni ani ariyesiswa dza Tiro kahi-kahi ya bahari?”

³³ Vyo vitu uguzavyo viriphosafirishwa baharini, waahenda anji atosheke na utajirio munji na vituvyo watajirisha atawala a dunia.

³⁴ Vivi meliyo ikaangamizwa mo madzini na kuzama chivwani ko baharini vituvyo na atuo osi akaangamika phamwenga nawe.

³⁵ Osi asagalao tsi za pwani akaangalazwa ni go chigokuphaha. Na atawala aho anakakama kpwa wuoga, akakundza nyuso zao kpwa wasiwasi.

³⁶ Nyo ahendadzi-bishara kahi ya atu anakukpwinya, ukamarigiza komakoma, na kundakalako tsona ta kare na kare.’ ”