Ayubu 3 - Digo Bible

Ayubu anaamba baha kala kavyarirwe

¹ Bada ya gago, Ayubu wavugula kanwaye na kulani siku ya kuvyalwakpwe.

² Naye waamba,

³ “Nailaniwe yo siku niriyovyalwa, na usiku urioamba ‘Mwana mlume akatungbwa.’

⁴ Siku iyo naikale jiza! Mlungu ariye dzulu naasiishuulikiye, na mwanga usiingʼarire.

⁵ Naikale gigigi na chilungulungu cha jiza nachiifwinike. Maingu nagakale dzuluye na jiza ra mutsi nariiogofyere.

⁶ Chisha usiku uho, nauhende chilungulungu cha jiza! Nausiolangbwe kahi ya siku za mwaka, wala kuoneka kahi ya miezi.

⁷ Usiku uho naukale tasa na kusikirike chitseko cha furaha kula mo mwakpwe.

⁸ Hinyo alanio siku, naalani siku iyo, aho anaomanya kumlamusa Leviathani.

⁹ Nyenyezi za chimirimiriche nazifunge jiza naigodzere mwanga, ela isiuone, na isiuone mwanga wa chimirimiri;

¹⁰ kpwa kukala taufungire njira ya vyazi ra mayo, wala kunihenda nisiphahe mateso.

¹¹ Mbona siyafwa wakati wa kuvyalwa au kufwa wakati wa kutuluka ndanini?

¹² Kpwa utu wani naikpwa magoni pha mayo? Kpwa utu wani naamwiswa?

¹³ Mana ningekala nirere kpwa amani ningekala nirere, ningekala naoya

¹⁴ phamwenga na afalume na ashauri a dunia, adzenga luphya midzi iriyokala magandzo,

¹⁵ phamwenga na akulu enye zahabu arioodzaza madzumba gao na feza.

¹⁶ Au kpwa utu wani siyakala dza mimba yomwagika, dza mwana mtsanga ambaye kaonere dzuwa?

¹⁷ Mana ko kuzimu atu ayi nkuricha kuyuga, na kuko arioremwa ni kuoya.

¹⁸ Kuko afungbwa nkuoya, taasikira tsona sauti za usiru za arindzi.

¹⁹ Akulu kpwa adide akuko, na mtumwa a huru kula mikononi mwa tajiriwe.

²⁰ Kpwa utu wani mwanga ungʼazirwe alumirao, na uzima uhewe ario na sonono ya mioyo?

²¹ Aho nkuaza kufwa, ela taafwa, nkuendza chifo kuriko hazina yofwitsika.

²² Aho nkuhererwa sana afwapho na kuzikpwa.

²³ Kpwadze kumngʼazira mutu ambaye njiraye yafwitswa, yefungirwa lichigo ni Mlungu?

²⁴ Mana migumi ikakala dza chakurya changu, kuula kpwangu kunasikirika dza madzi gamwagikago.

²⁵ Mana go ganiogofyerago gakaniphaha, na go ganitishirago gakanifikira.

²⁶ Sina amani wala siweza kuhurira; sioya, mashaka garedza kpwedza.”