Yõõna 3 - ꞌBuuk cĩ Thõõth cĩ Nyekuci

Ũũk Yõõna ꞌtaaũnaa cĩ Nineve

¹ Ma ho, ikia uduhaak Makayyioohiti Yõõna tarĩ ĩĩnnĩk,

² “Tĩnga bĩĩt ꞌtaaũnaa cobbi ĩĩcĩ Nineve, bĩĩt duhaak eet nyeemuut baa haduhaakii naa nganiita.”

³ Nĩngĩtĩ aattĩ aku athĩknĩ Yõõna Makayyioohit nẽ ĩtĩnga ũũk ĩĩcĩ Nineve. Baa maka ꞌtaaũnĩ ciee gẽrrẽẽt, aꞌnyak waathinniook iyyio ngaatĩ hawaantĩ hĩcĩnĩt ĩnõõnnõ vẽlẽk.

⁴ Ma baa õtõ Yõõna waathĩn hõdẽĩ, ũũk irrioonĩk nẽẽ eet ĩĩnnĩk, “Waathinnioohĩĩ ꞌcĩg ĩĩn hẽẽn ꞌwec, iꞌthianaanĩ kõr nicci, acuddiaa hatĩ Nineve hĩĩ lõõcĩ ꞌthĩĩ!”

⁵ Ma ho, iita elemit eeta cĩg Nineve nyeemuut cĩ Nyekuci, nĩngĩtĩ aarĩkĩ nẽẽg kõr ꞌcĩ ẽdẽtaanĩ eleeti ꞌgẽẽna nẽ itihimit ceremwa ꞌcĩg põkõrĩk, hetereꞌthia mothiinit cĩnĩĩng. Baa iꞌthianaanĩ thõõth ciee eetinii ꞌcĩg obbitig, ĩꞌthõng hõdõlan ꞌcĩg kidicig.

⁶ Ma baa athĩhĩ habuui cobbi cĩ Nineve thõõth ꞌcĩ õthõõth Yõõna ho, ikia ũtũngeek nẽẽ dtaaba cĩnnĩ cĩ habuẽẽꞌthĩtõõ nẽ ũppũrũca ceremwa cĩgĩnnĩg. Nẽ itihim ceremwa ꞌcĩg põkõrĩk nẽ iccioloongan tuduhaaca.

⁷ Nĩngĩtĩ aduhaakĩ habuui hĩ eet cĩgĩnnĩg ꞌcĩg obbitig, eet cĩg ꞌtaaũn cobbi hũtũrũũr thõõth ꞌcĩ aĩ, “Aitiõõ eet umwaa ꞌcĩ occa adak hode ahũd ꞌgiimwa tõõ nẽ aitiõõ idingi ꞌcĩ occa adak hode ahũd ꞌgiimwa tõõ ũdũt.

⁸ Nẽẽthĩ, aꞌnyĩĩk eet hitihimit ceremwa ꞌcĩg põkõrĩk nẽ ubungit hẽlẽggĩ buúk ceremwaanĩĩ ꞌcĩg põkõrĩk. Aꞌnyĩĩk eet vẽlẽk halaacõ Nyekuc hĩdĩĩkoothong. Aꞌnyĩĩk eet vẽlẽk hũtũngteek thooꞌthiok ꞌcĩg abathĩ hĩ jõrẽẽna.

⁹ Nganĩ ꞌcĩ occa aduhaakeet thõõth ꞌcĩ adtican Nyekuci? Horoong hatĩ ũũhũ nẽẽ ꞌthĩnĩt cĩnnĩ, hatamaatĩheet nẽ ĩbĩlĩ liilii, hiittiõõ hõllõngaa acũdaaneeta.”

¹⁰ Ma baa ĩcĩn Nyekuci thooꞌthiok ꞌcĩg adĩman nẽẽg hĩ ngaatĩ ũũnnĩkĩ thooꞌthiok ꞌcĩg abathĩ ho, ikia ũtũhũ ꞌthĩnĩt cĩnnĩ nẽ iittiõõ hõllõngaa acũda ĩhõõggõ hĩ baa aduha nẽẽnĩ.