Yõõna 2 - ꞌBuuk cĩ Thõõth cĩ Nyekuci

Ala Yõõna Makayyioohit

¹ Ma hẽẽngatõõ cĩ ulugooco, ala Yõõna Makayyioohit Nyekuc cĩnnĩ.

² Baa alayyi nẽẽ aĩ, “Makayyioohit, baa haaĩ naa ꞌcannaana, baa halayyii nganiita nẽ ithihu laiinit caannĩ. Baa halayyii naa nganiit looccaa cĩ daakiahu, nẽ edecu nii laiinit caannĩ.

³ Baa adhuheekaa nii nganĩĩt ngaatĩ uuthik, bũlũcatõõ hõrggẽẽna, hũmmũlũũnyanaa ꞌtirriani cĩ maamu; ukuua ꞌtirriani cĩ maamu nganĩĩta.

⁴ Nẽ hummuha hĩĩna, itiggiawaa bẽrẽ nii nganĩĩt muumaa cunni, iittiõõ hatĩ hõllõngaa hacini ꞌcieeth cunni ꞌcĩ ẽllẽẽmĩth cĩ laiitto tarĩ.

⁵ Baa hũbũcannia haĩ hũtũdũdĩ bũlũcatõõ. Irriamaneeka maama cĩg bũlũcaak nganĩĩta. Atĩttĩĩranoothĩkaa arteeniti cĩ bũlũcõ õõ caannĩ.

⁶ Baa hiitho bũlũc hõdõlan cõrrẽẽn cĩg muurak; baa hĩĩna baabutheenit loota ꞌthẽẽmĩtõõ, baa aꞌnyũũgĩ hattũũgẽta cĩg lootu ũdũt. Nẽẽthĩ, ikia uvvucanaawaa nii nganĩĩt daahĩtha, Makayyioohit Nyekuci caannĩ.

⁷ Ma baa hĩcĩnootha õbõhĩ daahĩthĩ caannẽẽnĩ, hummuhaai nganiita nẽ edecu laiinit caannĩ ꞌCieethaa cunni ĩcĩ ẽllẽẽmĩth ĩcĩ laiitto.

⁸ Ũtũbũrĩt eeta aag gõõng ala nyekuꞌnya ꞌcĩg hõllõngaa ĩĩn dĩdĩ bũnnai ꞌcĩ occa baa aaꞌnyĩk Nyekuci ĩhõõggõ.

⁹ Nẽẽthĩ hinnianĩ, haaꞌnyii hatĩ naa nganiit ꞌgaarrieenit tẽgẽlaa cĩ dĩhĩthẽẽttõ, nẽ hattũbaneehi hatĩ lõbũtĩ caannĩ, hĩnĩngĩtĩ aku elliaanĩtĩ caannĩ vẽlẽk hĩ Makayyioohit diooni.”

¹⁰ Nĩngĩtĩ aduhaakĩ Makayyioohiti ulugooc hataꞌthahaak Yõõna battaala dẽmẽtaa cĩ bũlũcõ.