Yõõna 1 - ꞌBuuk cĩ Thõõth cĩ Nyekuci

Ĩꞌthõ Nyekuci Yõõna

¹ Kõr umwa, baa aduhaak Makayyioohiti Yõõna ngeertĩ eet ꞌcĩ haĩ Amittai,

² hũũk ꞌtaaũnaa cobbi ĩĩcĩ haĩ Nineve, hũũk huduhaak eet hĩĩnnĩk, “Udtuuha Makayyioohiti ꞌthẽccanẽẽt cugguung ꞌcĩg abathĩ dtẽc ko. Uduktoothihu niiga!”

³ Ĩꞌngaathĩ hinnia Yõõna nẽ ẽdẽc ꞌgõõl ꞌcĩ ꞌrĩĩng, aireek Makayyioohit. Baa allũũcĩ hinnia nẽẽ õkõ ĩĩcĩ ꞌtaaũn ꞌcĩ haĩ ꞌJõppa, nĩngĩtĩ abĩllĩ haahũlĩta nẽ ũmmũda haahũl ꞌcĩ õkõ ĩcĩ ꞌtaaũn cĩ Tarthithi. Ma ho, ũũk ũtũũwa waraga ꞌcĩ weeto nẽ õtõd haahũl cobbi, aĩ hivvireek Makayyioohit ngaatĩ õkõõĩ ꞌtaaũnaa cĩ Tarthithi.

⁴ Ma nĩngaata, ĩꞌthõõa Makayyioohiti ngõõt ꞌcĩ attiran gẽrrẽẽt, huuhan bũlũc hiꞌngoꞌthia maama hĩcĩ aĩ halibba haahũl cobbi hĩꞌthaanĩ.

⁵ Ma ho, iita abarritit dticcianniooha cĩg haahũl cobbi ho gẽrrẽẽt, nĩngĩtĩ alaĩ nyekuꞌnya cĩggĩĩng. Nẽ tarĩ udhukteek ijjio cĩggĩĩng ũgĩ bũlũcatõõ, aĩ hátĩ hõõlõl haahũlĩ. Kõr tĩho, ĩko nẽẽ hinnia atangu Yõõna ngaamwaanĩ haahũlatõõ loota.

⁶ Ma nĩngaata, ĩtĩnga makayyioohiti ꞌcĩ aꞌthuhan haahũl nẽ ũũk ijin ĩnõõnnõ ĩĩnnĩk, “Oongiyyi gõõng nii ne pĩĩrnattaa ꞌcĩ aaĩ hoti ho? Tĩnga nẽ alau nyekuꞌnya cugunnig. Horoong hatĩ ammaannĩkeet nẽ eelliaeet hiittiõõ hõllõngaa hadũddĩ.”

⁷ Ma baa ho, ulutti dticcianniooha cĩg haahũlaak nẽ ĩĩtõ “Huruhit da tooto, hátĩ hummuddia eet ꞌcĩ ahĩĩnakeet pĩĩrnanĩt ꞌcĩ aaĩ hoti ho.” Ma baa aruk tooto ho, appulana hinnia tooto Yõõna.

⁸ Nĩngĩtĩ ajini nẽẽg Yõõna annẽẽkĩ, “Nganiit ꞌcĩ aĩnanaakeet ngagĩĩt bathi icci ho? Dtiic cunni nii? Akuu ꞌyioko nii looccaa ĩĩna? Ĩĩnĩ nii eet cĩ looc iina? Haĩ eet cugunnig nganĩ?”

⁹ Nĩngĩtĩ ẽdẽcĩ Yõõna ĩhõõggõ annẽẽkĩ, “Hĩĩnĩ naa Ebereeinit nẽ hala Makayyioohit Nyekuc cĩ hẽẽtkujjieen baa ẽhẽnyta bũlũc hĩ looc.”

¹⁰ Ma baa athĩhĩ nẽẽg thõõth icci ho, iita abarritit hĩnĩngĩtĩ baa uduhaak Yõõna ĩhõõggõ ẽlẽk ĩĩnnĩk, baa aireek nẽẽ Makayyioohit. Nẽ ijinit ĩnõõnnõ ĩĩttĩk, “Inni dĩman noho ho?”

¹¹ Nẽ baa aalla uuhan ngõõtĩ cobbi gẽrrẽẽt bũlũc noho. Nĩngĩtĩ ajini nẽẽg Yõõna annẽẽkĩ, “Hogoonni ꞌyioko naag nganiit hutuno, hátĩ hemmeethĩk bũlũca?”

¹² Ẽdẽcĩ Yõõna ĩhõõggõ anneek, “Udhukteehaangu bũlũcatõõ, nẽẽthĩ hatĩ ĩbĩl ngõõtĩ. Haga naa nganĩĩt ꞌthẽk ꞌcĩ haĩnanaakuung ngagiit ngõõt icci abathĩ dtẽc ko.”

¹³ Baa arrĩcana ꞌthukanniooha cĩg haahũlaak aĩ huꞌthuhattootha haahũl ĩꞌthõng hõdõlan dẽmẽt. Nẽẽthĩ hinnia baa hõllõngaa ũũlũ, nĩngĩtĩ ittoorini bũlũc habathõõthĩ gẽrrẽẽt.

¹⁴ Ma hoti ho, iita alaacõ nẽẽg Makayyioohit ĩĩttĩk, “Makayyioohit, ma haaꞌnyeet ngagĩĩt hadaakta, ngaatĩ haruka eet icci. Ma nuun haaꞌnyeet ngagĩĩt heteheellia daahĩth cĩ eet icci ammĩrĩ ho, hĩnĩngĩtĩ aku thõõth ciee hĩcĩ ꞌthẽk atabi niina.”

¹⁵ Nĩngĩtĩ õdõngaanĩ nẽẽg Yõõna nẽ udhukteek bũlũcatõõ noho paappuu, nĩngĩtĩ abĩllĩ ngõõtĩ buúk hĩdĩĩkoothong.

¹⁶ Ma ho, iita itingolli eeta cĩg haahũlaak thõõth icci gẽrrẽẽt, nĩngĩtĩ ĩbbõõrĩkĩ nẽẽg Makayyioohit ꞌgaarrieenit nẽ ũbũtanit ngaatĩ adticanõõthĩkĩ ĩnõõnnõ.

¹⁷ Ma ngaati, ĩꞌthõõa Makayyioohiti ulugooc cobbi hikia huku Yõõna. Nĩngĩtĩ aayyi Yõõna hẽẽngatõõ cĩ ulugooc tĩho, waathinniook iyyio hĩ baalinniook iyyio.