Yõaannẽ 9 - ꞌBuuk cĩ Thõõth cĩ Nyekuci

Aaꞌnyĩk Yeesu eet ꞌcĩ rubenĩ hũbũna

¹ Ma baa nga ovvooyyia Yeesu ꞌgõõla, ikia udtuuha eet umwa ꞌcĩ baa rubenĩ nganĩngĩtĩ arrittiaanĩ.

² Ma nĩngaata, ijinit nuyyiooha cĩgĩnnĩg ĩnõõnnõ ĩĩttĩk, “ꞌLimmannioohit, inni baa hittirria ẽẽtĩ ciee hĩĩ ruben ko? Ẽꞌthẽcan nẽẽnĩ, hode ẽꞌthẽcan maaꞌnyia hĩ aattĩnnĩ?”

³ Ẽdẽcĩ Yeesu ĩhõõggõ anneek, “Aitiõõ hõllõngaa ẽꞌthẽcan ẽẽtĩ cieeni hode maaꞌnyia hĩ aattĩnnĩ! Adiim Nyekuci, hátĩ hedeeꞌnyia dtiici cĩnnĩ rũgẽtaa cĩ eet icci.

⁴ Hĩcĩ nga ĩĩn lõõcĩ waathĩn ko, hidticanit thõõth cĩ eet baa ĩꞌthõõannaa nganĩĩta. Ma ikia baalini, iittiõõ eet ꞌcĩ adticanni tõõ.

⁵ Nẽ hĩcĩ nga haaĩ naa loota nĩnga ho, hĩĩnĩ naa lanyit cĩ looc nicci.”

⁶ Ma baa urutaa cĩ uduhaaĩ Yeesu thõõth icci ẽlẽk, ikia ũttũũrĩk ammũt looc nẽ õꞌngõnya doob ammũtĩ nẽ uudik hẽbẽrẽẽnnĩĩ cĩg eet ꞌcĩ rubenĩ ho.

⁷ Nĩngĩtĩ aduhaakĩ rubenniaahit annẽẽkĩ, “Bĩĩt tũũnya doob nicci bõrrõõhaa cĩ ꞌThiloamĩ.” Nĩngĩtĩ õkõ ũũnyanĩ rubenniaahiti doob nẽ ĩcĩnĩ. Aĩ thõõth ꞌcĩ haĩ ꞌThiloam ko, eet ꞌcĩ ĩꞌthooyyia.

⁸ Ma ho, ijitto eeta aagõõng aarõõ hĩ rubenniaahit hĩ eet gõõng adtuuha ngaatĩ alaĩ nẽẽ eet ĩĩtõ, “Eet nẽẽꞌthẽk gõõng iccioloongan nẽ ala eet cieeni?”

⁹ Baa aĩ eeta ũgẽẽgĩ, “Ĩnõõnnõ ꞌthẽk!” Nẽ ĩĩtõ ũgẽẽgĩ, “Aitiõõ, aaĩ nẽẽꞌthẽk kĩ nẽẽnĩ!” Ma ho, uduha ẽẽtĩ nicciee ẽlẽ ẽmmẽn ĩĩ, “Nganĩĩt ꞌthẽk naana.”

¹⁰ Nĩngĩtĩ ajini eeta ĩnõõnnõ annẽẽkĩ, “Nẽ ĩcĩnĩ hutuno?”

¹¹ Ẽdẽcĩ nẽẽ ĩhõõggõ anneek, “Õꞌngõnya eet umwaa ꞌcĩ anneek eeta Yeesu doob nẽ uudika hẽbẽrĩ cĩgannĩg. Ma ho, ĩnnĩhaa, ‘Bĩĩt tũũnya doob nicci bõrrõõhaa cĩ ꞌThiloamĩ.’ Nĩngĩtĩ hõkõ hũũnyanĩĩ nẽ ꞌyioko hĩcĩnĩ dĩdĩ.”

¹² Ma ho, ijinit nẽẽg ĩnõõnnõ ĩĩttĩk, “Aaĩ ꞌyioko Yeesu tĩho ngaana?” Ẽdẽcĩ ẽẽtĩ nicciee aĩ, “Ẽrẽkaanĩ.”

Ijinit Variꞌtheei Yeesu

¹³ Ma nĩngaata, aꞌnyaktaak eeta niccieeg eet ꞌcĩ rubenĩ ho, Variꞌtheei.

¹⁴ Baa ĩĩn kõrra ꞌcĩ õꞌngõnyaanĩ Yeesu doob nẽ aaꞌnyĩk rubenniaahit hĩcĩnĩ ho, Kõr cĩ ꞌYiommaanõ.

¹⁵ Ma ho, ijinit Variꞌtheei rubenniaahit ꞌgõõl ꞌcĩ baa acĩnẽẽnĩ nẽẽ ho. Baa ẽdẽcĩ nẽẽ ĩhõõggõ anneek, “Õꞌngõnya Yeesu doob umwa ammũtĩĩ cĩgĩnnĩg nẽ uudika hẽbẽrĩ, ma baa hũũk hũtũũnya doob nicci, hikia hĩcĩnĩ.”

¹⁶ Nĩngĩtĩ aĩnnĩ Variꞌtheei ũgẽẽgĩ, “Aitiõõ ẽẽtĩ ciee hõllõngaa aku hĩ Nyekuc, hĩnĩngĩtĩ hõllõngaa aꞌthũũnnĩ nẽẽ Kõr cĩ ꞌYiommaanõ.” Baa hinnia õthõõth Variꞌtheei ũgẽẽgĩ aĩ, “Aga gõõng ẽẽtĩ ꞌcĩ ĩĩn ꞌthẽccannioohit ngaatĩ adĩmanĩ thooꞌthiok ꞌcĩg ĩnaat eeta hutuno?” Nĩngĩtĩ eꞌngeriini lothippiti cĩ Variꞌtheei.

¹⁷ Ma ho, utuhuyyioothĩk nẽẽg rubenniaahit tarĩ nẽ ĩĩttĩk, “Aini ꞌyioko nii thõõth cĩ eet tĩho ne? Baa hẽbẽrĩ cugunnig ꞌcĩg aaꞌnyĩk nẽẽ hũbũttaathõ ho.” Ẽdẽcĩ ẽẽtĩ nicciee anneek, “Ĩĩn nẽẽ põrõvẽtaac.”

¹⁸ Baa aalla hõllõngaa ẽlẽmĩ makayyiooha cĩg ꞌJudeei ngaatĩ ĩĩnnĩ baa ẽẽtĩ nicciee ruben, nĩngĩtĩ avvaanĩ maaꞌnyĩ hĩ aattĩ eet nicci,

¹⁹ nẽ ijinit ĩhõõggõ ĩĩttĩk, “Loholeec cunuung cieeni? Ĩnõõnnõ baa ainnu niig arrittiaa ruben? Nẽ ꞌyioko ikia ĩcĩnĩ hutuno?”

²⁰ Baa ẽdẽcĩ maaꞌnyia hĩ aattĩnnĩ anneek, “Hagayya ngaatĩ ĩĩnnĩ loholeec cĩnaang nẽ hagayya baa arrittiaa ruben.

²¹ Nẽẽthĩ, hõllõngaa hagayya aku acĩnĩ nẽẽ hutuno, hode eet iina ꞌcĩ aaꞌnyĩk ĩnõõnnõ hĩcĩnĩ ho. Ijinit ĩnõõnnõ. Ĩĩ nẽẽ maka, aꞌnyĩĩk huduhaahuung nẽẽnĩ.”

²² Baa õthõõth maaꞌnyia hĩ aattĩnnĩ hoti, hĩnĩngĩtĩ baa iꞌngolli nẽẽg eet cĩg ꞌJudeei, hĩnĩngĩtĩ baa aarrik nẽẽg thõõth ꞌcĩ iiggiaẽẽkĩ eet ꞌcĩ ẽlẽmĩ aĩ ĩĩn Yeesu Krĩstõ ho, ꞌCieethaa cĩ Laiitto battaala.

²³ Ĩnõõ ꞌcĩ õthõõthĩ maaꞌnyia hĩ aattĩnnĩ aĩnnĩ, “Ĩĩ nẽẽ maka, ijinit ĩnõõnnõ ho.”

²⁴ Ma nĩngaata, utuvuyyia makayyiooha cĩg ꞌJudeei eet nicci tarĩ nẽ ĩĩttĩk, “Bũtan Nyekuc duha thõõth ꞌcĩ ĩĩn dĩdĩ! Hagayya naag ngaatĩ ĩĩnnĩ Yeesu ꞌthẽccannioohit.”

²⁵ Ẽdẽcĩ nẽẽ aĩ, “Hõllõngaa haga naa ngaatĩ ĩĩnĩ Yeesu ꞌthẽccannioohit hode aitiõõ. Thõõth hõdẽẽthõng ꞌcĩ haga naana, baa hĩĩnĩ ruben nẽ ꞌyioko hĩcĩnĩ!”

²⁶ Ẽdẽcĩ makayyiooha ĩnõõnnõ anneek, “Adĩmaneeki baa ꞌthẽk nẽẽ nganiit ne? Aaꞌnyi baa nẽẽ nganiit cĩnĩ hutuno?”

²⁷ Ẽdẽcĩ rubenniaahiti aĩ, “Iyyia huduhaahuung ẽlẽk. Ne ꞌcĩ nga adiimmu niig athiknu hĩ nganĩĩt tarĩ ho? Idiimtu niig buúk iittu nuyyiook cĩgĩnnĩg?”

²⁸ Nĩngĩtĩ õdõõmĩ makayyiooha ĩnõõnnõ annẽẽkĩ, “Nganiit ꞌcĩ ĩĩnĩ nuyyioohit cĩ Yeesu! Hĩĩgĩnna naag nuyyiook cĩg Mũũꞌtha.

²⁹ Hagayya naag baa othoothĩk Nyekuci Mũũꞌtha nẽ erekeet ngagĩĩt aku Yeesu ĩĩna?”

³⁰ Ẽdẽcĩ ẽẽtĩ ĩhõõggõ anneek, “Thõõth ꞌcĩ abulanneet niccia! Erekuung ngagiit nĩngĩtĩ akuuni nẽẽnĩ. Nẽẽthĩ, aaꞌnyĩk nẽẽ hẽbẽrĩ cĩgannĩg hĩcĩttĩ.

³¹ Hagayya naag hõllõngaa athĩhĩ Nyekuci ꞌthẽccanniook. Athĩhĩ nẽẽ eet ꞌcĩ aꞌthũũnnĩ thõõth cĩnnĩ nẽ ĩdĩman tabiinit cĩnnĩ.

³² Nganĩngĩtĩ ẽhẽnytaanĩ lõõcĩ, nga hĩthĩhĩt eeta eet ꞌcĩ aaꞌnyĩk eet ꞌcĩ arrittiaa ruben hĩcĩnĩ.

³³ Má baa hiittiõõ ẽẽtĩ ciee hõllõngaa aku hĩ Nyekuc, occa baa hõllõngaa aaꞌnya hĩcĩnĩ.”

³⁴ Ẽdẽcĩ makayyiooha anneek, “Ĩĩnĩ baa nii ꞌthẽccannioohit nganĩngĩtĩ arrittiaanĩ! Occa ꞌyioko allimanneet nii ngagĩĩta?” Nĩngĩtĩ iiggiaẽẽkĩ ĩnõõnnõ battaala.

Rubeꞌthẽẽt cĩ loriio

³⁵ Ma ho, ikia ĩthĩk Yeesu ngaatĩ iiggiaẽẽkĩ Variꞌtheei rubenniaahit battaala, ma baa ikia ũmmũda Yeesu ĩnõõnnõ, ijin ĩnõõnnõ ĩĩnnĩk, “Elemi nii Ngeertĩ Eeto?”

³⁶ Ẽdẽcĩ rubenniaahiti nicciee anneek, “Makayyioohit, duhaahaa eet tĩho, hátĩ hẽlẽm ĩnõõnnõ.”

³⁷ Nĩngĩtĩ aĩnnĩ Yeesu, “Icinu nii kõr icci eet tĩho ẽlẽk. Ĩnõõnnõ ꞌcĩ othoothonnu ho.”

³⁸ Ma ho, ĩĩnnĩk rubenniaahiti Yeesu, “Makayyioohit, helemmii naa nganiita!” Nĩngĩtĩ alaĩ nẽẽ Yeesu nĩngaata.

³⁹ Nẽ ĩĩnnĩk Yeesu ĩnõõnnõ, “Baa hakuu hetteedi naa thooꞌthiok cĩg looc nicci, hátĩ hĩcĩttĩ eeta ꞌcĩg rubettĩg nẽ ĩĩtõ rubettĩg eeta ꞌcĩg acĩnĩ.”

⁴⁰ Ma baa athĩhĩ Variꞌtheei ꞌcĩg baag abĩlĩ nĩngaata thõõth icci ho, iita ijinit nẽẽg Yeesu ĩĩttĩk, “Ma naag, hĩĩgĩnna naag buúk rubettĩg?”

⁴¹ Ẽdẽcĩ Yeesu ĩhõõggõ anneek, “Má baa ĩĩtõ rubettĩg, occa ꞌyioko baa hõllõngaa iiginnu ꞌthẽccanniook. Nẽẽthĩ ꞌyioko, ma ainnu acĩneennu ho, aalla iiginnu ꞌthẽccanniook noho.”