Yõaannẽ 8 - ꞌBuuk cĩ Thõõth cĩ Nyekuci

Ngaa ꞌcĩ aggamoothĩk hĩ eet

¹ Baa õkõ Yeesu ĩĩcĩ Muur cĩ Olivi.

² Ma baa loohoth cĩnnĩ ngerrenita, ũũk ꞌCieethaa cĩ Nyekuci, ngaatĩ baa auuni eeta vẽlẽk hĩ ĩnõõnnõ, nĩngĩtĩ aayyi loota nẽ illiman ĩhõõggõ.

³ Ma nĩngaata, aꞌnyakta Variꞌtheei hĩ ꞌlimmanniook cĩg nyattaalak, ngaa umwa ꞌcĩ aggamoothĩk hĩ eet ꞌcĩ ꞌrĩĩng. Nẽ iita aanytĩk ngaa nicci hĩbĩl hõrggẽẽnaa cĩ lothippito.

⁴ Nĩngĩtĩ aduhaakĩ nẽẽg Yeesu annẽẽkĩ, “ꞌLimmannioohit, haggameeka ngaa icci oogin hĩ eet umwa ꞌcĩ hõllõngaa ĩĩn maac cĩnnĩ.

⁵ Nyattaala, anneekeet ngagĩĩt Mũũꞌtha ohoddia ngaaĩ ꞌcĩg aattĩg noho ho thõng. Aini ꞌyioko nii ne?”

⁶ Baa ajin nẽẽg Yeesu hoti, hummuddia ꞌgõõl ꞌcĩ occa aggamĩ ĩnõõnnõ. Nẽẽthĩ, baa aggiingi hinnia Yeesu nẽ ẽtẽhẽẽd looc attiaa cĩnnĩ.

⁷ Ma baa aalla ajin nẽẽg ĩnõõnnõ noho ho, ĩtĩnga Yeesu ꞌjieena nẽ uduhaak ĩhõõggõ ĩĩnnĩk, “Má aaĩ eet umwaa hõrggẽẽnaa cunuung ꞌcĩ hiꞌthihi ꞌthẽccan, aꞌnyĩĩk hitiman hõhõda ngaa nicci!”

⁸ Nĩngĩtĩ aggiingẽnĩ Yeesu nẽ ẽtẽhẽẽd looc tarĩ.

⁹ Ma ho, iita ĩnĩhĩt eeta ꞌcĩg baag athĩhĩ thõõth icci ho hõdẽĩ hõdẽĩ, iꞌthianaanĩ eetinii ꞌcĩg obbitig ĩꞌthõng hidionganit Yeesu hĩ ngaa nicci dioo.

¹⁰ Nĩngĩtĩ ĩꞌngaannĩ Yeesu ꞌjieena nẽ ijin ngaa nicci ĩĩnnĩk, “Õõt eeta vẽlẽk ĩĩna? Iittiõõ eet ꞌcĩ nga abilli tõõ?”

¹¹ Ẽdẽcĩ ngaa nicciee Yeesu anneek, “Eei Makayyioohit, õõt eeta vẽlẽk hiꞌthihi eet ꞌcĩ nga aaĩ.” Nĩngĩtĩ aduhaakĩ Yeesu ngaa nicci annẽẽkĩ, “Aitiõõ naa buúk hõllõngaa habilli nganiita. Bĩtõ, ma nga hõkõ hẽꞌthẽcani tarĩ.”

Ĩĩn Yeesu lanyit cĩ lootu

¹² Ma baa othooꞌthio Yeesu hĩ eet tarĩ, ikia ĩĩnnĩk nẽẽ ĩhõõggõ, “Hĩĩnĩ naa lanyit cĩ looc vẽlẽk. Ẽẽtĩ ꞌcĩ anũyya nganĩĩta, aitiõõ hatĩ nẽẽ hõllõngaa õvvõ muguratõõ, ammũda hatĩ nẽẽ lanyit cĩ rũgẽtõ.”

¹³ Ẽppẽhan hinnia Variꞌtheei ĩnõõnnõ anneek, “Othoothi nii thõõth cĩ ẽlẽ cunni ẽmmẽn nẽ thõõth ꞌcĩ aduha nii ho, hõllõngaa ĩĩn thõõth dĩdĩ.”

¹⁴ Ẽdẽcĩ Yeesu anneek, “Tananga hothoothi thõõth cĩ ẽlẽ caannĩ ẽmmẽn, hothoothi thõõth ꞌcĩ ĩĩn dĩdĩ. Hĩnĩngĩtĩ haga naa nĩngĩtĩ baa hakuuni nẽ hagawa ꞌgõõl ꞌcĩ hõkõõĩ. Nẽẽthĩ, aitiõõ hõllõngaa agayyu niig nĩngĩtĩ hakuuni hĩ nĩngĩtĩ hõkõõĩ naa ho.

¹⁵ Etteeddu niig thooꞌthiok hĩ eeta cĩg looc nicci nẽ hõllõngaa hetteedi naa thõõth cĩ eet umwa.

¹⁶ Nẽẽthĩ, ma hẽttẽẽda naa thõõth, hetteedi jurrung, hĩnĩngĩtĩ hõllõngaa hetteedi ẽmmẽn, harũmeenna naag hĩ Baaba baa ĩꞌthõõannaa nganĩĩta.

¹⁷ Eheeddi nyattaalaa cunuung aĩ, adiim nyattalĩ eet ꞌramma ꞌcĩg aduha thõõth, hátĩ hagaĩ ngaatĩ ĩĩnnĩ thõõth dĩdĩ.

¹⁸ Hĩĩnĩ naa hebereec cĩ ẽlẽ caannĩ nẽ ĩĩ Baaba baa ĩꞌthõõannaa nganĩĩt hebereec umwa.”

¹⁹ Nĩngĩtĩ ajini Variꞌtheei Yeesu annẽẽkĩ, “Aaĩ maaꞌnyu ĩĩna?” Ẽdẽcĩ Yeesu ĩhõõggõ anneek, “Aitiõõ niig hõllõngaa agayyaangu nganĩĩta, hode agayyu Baaba. Má agayyaangu, occa ꞌyioko agayyu Baaba buúk.”

²⁰ Baa õthõõth Yeesu thooꞌthiok iccig baa alliman eet halaangatõõ cĩ ꞌCieeth cĩ Nyekuci, ngaatĩ õbõhõõ hĩ nĩngĩtĩ iyyangꞌthĩ eeta ꞌbaaninit. Nẽẽthĩ, baa aitiõõ ẽẽtĩ ꞌcĩ aggam ĩnõõnnõ tõõ, hĩnĩngĩtĩ baa nga hõdõlan kõrra cĩnnẽẽnĩ.

Hõllõngaa occa ooyyu niig ĩĩcĩ hõkõõĩ naana

²¹ Ma tarĩ ho, uduhaak Yeesu ĩhõõggõ ĩĩnnĩk, “Hũũha naana. Adiimmaangu hatĩ niig nganĩĩta, nẽẽthĩ, adaaknu hatĩ ꞌthẽccanẽẽtĩĩ cugguung. Aitiõõ niig hõllõngaa auunnu ĩĩcĩ hõkõõĩ naana.”

²² Baa aaꞌnyĩk thõõth ciee eet cĩg ꞌJudeei hijitto hĩĩtõ, “Aruk hatĩ ẽẽtĩ ciee ẽlẽ cĩnnĩ thõng? Ĩnõõ ꞌyioko ꞌcĩ õthõõthĩ nẽẽ aĩnnĩ, ‘Nĩngĩtĩ hõkõõĩ naa ho, hõllõngaa occa auunnu niiga’?”

²³ Ẽdẽcĩ Yeesu ĩhõõggõ anneek, “Iiginnu niig eet cĩg looc nicci nẽ hĩĩnĩ naa eet cĩ hẽẽtkujjieen. Iiginnu niig eet cĩg looc nicci nẽ aitiõõ naa hõllõngaa hĩĩnĩ eet cĩ looc nicci.

²⁴ Ĩnõõ ꞌcĩ haduhaakuung naa ngagiit hanneekuung, adaaknu hatĩ niig nga hũtũngtoothĩk ꞌthẽccanẽẽta cugguung. Má hõllõngaa ẽlẽmmaangu nganĩĩt ngaatĩ hĩĩnnĩ naa Ellioohit, adaaknu hatĩ nẽ hõllõngaa ũũnnothoothĩk ꞌthẽccanẽẽta cugguung.”

²⁵ Ma ho, ijinit eeta cĩg ꞌJudeei Yeesu ĩĩttĩk, “Nganiit nganĩ?” Ẽdẽcĩ Yeesu ĩhõõggõ anneek, “Nganĩĩt eet baa haduhaakuung baa õõa hanneekuung, nganĩĩt Naana.

²⁶ Haꞌnyahi naa thooꞌthiok ꞌcĩg mẽẽlĩg ꞌcĩg occa hetteedikuung ngagiita. Nẽẽthĩ hinnia, ẽẽtĩ baa ĩꞌthõõannaa nganĩĩt ko, ĩĩn eet ꞌcĩ aduha thõõth dĩdĩ nẽ thõõth ꞌcĩ hathĩkna naa hĩ ĩnõõnnõ, haduhaahi eet ꞌcĩg looc nicci.”

²⁷ Baa hõllõngaa aga eeta cĩg ꞌJudeei ngaatĩ aduhaakĩ Yeesu ĩhõõggõ thõõth cĩ Maacõnĩ.

²⁸ Nẽ õthõõth Yeesu tarĩ ĩĩ, “Má odongtu niig Ngeertĩ Eeto nẽ hatĩ iita agayyaangu Nganĩĩt nganĩ Naa. Nẽ hõllõngaa hadticani ꞌgiimwa ẽmmẽn, nẽẽthĩ, hothoothi thõõth baa allimaneeka Baaba.

²⁹ Harũmeenna naag hĩ eet baa ĩꞌthõõannaa nganĩĩta, nga hũtũngeeha nẽẽ nganĩĩt ẽmmẽn, hĩnĩngĩtĩ hadĩmani naa hõdõõkõthĩ thõõth ꞌcĩ accamana nẽẽnĩ.”

³⁰ Tananga baa nga õthõõth Yeesu, iita elemit eeta ꞌcĩg mẽẽlĩg ĩnõõnnõ.

Oogguung hatĩ thõõth ꞌcĩ ĩĩn dĩdĩ aaut lõꞌngõõc

³¹ Baa aduhaak Yeesu eet cĩg ꞌJudeei ꞌcĩg ẽlẽmĩ ĩnõõnnõ anneek, “Má aꞌthuunnu niig ꞌlimman caannĩ, iiginnu nuyyiook cĩgannĩg dĩdĩ.

³² Au hatĩ agayyu thõõth ꞌcĩ ĩĩn dĩdĩ nẽ hatĩ õõgauung ngagiit thõõth ꞌcĩ ĩĩn dĩdĩ ho, aaut lõꞌngõõc.”

³³ Ẽdẽcĩ eeta Yeesu anneek, “Hĩĩgĩnna naag lõhõlĩ cĩg Abũrahamĩ nẽ nga hĩĩtta appahacaaꞌnya cĩg eet umwa ũdũt. Inni ĩĩnnĩheet hooggianna hatĩ haautta lõꞌngõõc ko?”

³⁴ Ẽdẽcĩ Yeesu ĩhõõggõ anneek, “Haduhaakuung dĩdĩ, ĩĩn eeta ꞌcĩg adĩman ꞌthẽccanẽẽt appahacaaꞌnya cĩg ꞌthẽccaanak.

³⁵ Aitiõõ appahaca hõllõngaa aꞌnyak nĩngĩtĩ ꞌcĩ aallanĩ halangatõõ ũdũt. Loholeec cĩ olu dioo ꞌcĩ aꞌnyak nĩngĩtĩ aallanĩ halangatõõ ũdũt.

³⁶ Má õõgauung ngagiit Ngeertĩ Eeto, iita aauttu niig lõꞌngõõc dĩdĩ.

³⁷ Haga naa iiginnu niig lõhõlĩ cĩg Abũrahamĩ. Nẽ adiimmu hinnia arukaangu nganĩĩt thõng, hĩnĩngĩtĩ hõllõngaa elemmu niig thõõth caannĩ.

³⁸ Haduhaakuung naa ngagiit thõõth ꞌcĩ aduhaaka Baaba, haau hĩcĩ occa adĩmannu niig buúk thooꞌthiok ꞌcĩg aduhaakuung maajihu.”

ꞌThĩttaan ꞌcĩ ĩĩn maaꞌnyu cunuung

³⁹ Ẽdẽcĩ eeta cĩg ꞌJudeei Yeesu anneek, “Ĩĩn Abũrahamĩ nyakangaan cĩnaang!” Ẽdẽcĩ Yeesu ĩhõõggõ anneek, “Má ĩĩtõ lõhõlĩ cĩg Abũrahamĩ, occa ꞌyioko adĩmannu thooꞌthiok baag adĩman Abũrahamĩ.

⁴⁰ Hĩcĩ aau hoti ho, adiimmu hinnia arukaangu nganĩĩt, eet ꞌcĩ haduhaakuung thõõth ꞌcĩ ĩĩn dĩdĩ, baa hathĩkna naa hĩ Nyekuc. Baa hõllõngaa adĩman Abũrahamĩ thooꞌthiok ꞌcĩg aattĩg noho.

⁴¹ Adĩmannu niig thooꞌthiok ꞌcĩg adĩman maaꞌnyu cunuung!” Ẽdẽcĩ eeta anneek, “Hõllõngaa hĩĩgĩnna naag lõhõlĩ ꞌcĩg harrittiaanna battaala. Nyekuc dioo ꞌcĩ ĩĩn Baangeet cĩnaang.”

Lõhõlĩ cĩg habu cĩ loriẽẽt ꞌcĩg abathĩ

⁴² Nĩngĩtĩ annẽẽkĩ Yeesu eet cĩg ꞌJudeei, “Má baa hĩĩ Nyekuci Maaꞌnyu cunuung, occa ꞌyioko ammĩnannaangu nganĩĩta, hĩnĩngĩtĩ baa hakuu naa hĩ ĩnõõnnõ nẽ ꞌyioko nganĩĩt cieeni. Baa hõllõngaa hakuu naa ẽmmẽn, baa ĩꞌthõõannaa nẽẽnĩ.

⁴³ Inni hõllõngaa athiknu niig thõõth caannĩ ho? Hĩnĩngĩtĩ hõllõngaa uullu niig ngaatĩ athiknu thõõth ꞌcĩ haduha naana?

⁴⁴ Ĩĩgĩnnu niig lõhõlĩ ꞌcĩg habu cĩ loriẽẽt ꞌcĩg abathĩ nẽ adĩmannu thooꞌthiok ꞌcĩg adiim lorii ꞌcĩ abathĩ ho. Baa ĩĩn nẽẽ eet ꞌcĩ aruk eet baarkit nẽ hõllõngaa aduha thõõth ꞌcĩ ĩĩn dĩdĩ, hĩnĩngĩtĩ nga huduha nẽẽ thõõth ꞌcĩ ĩĩn dĩdĩ. Ma õõlõng lorii ꞌcĩ abathĩ, gõõng nyattal cĩnnĩ niccia, hĩnĩngĩtĩ ĩĩn nẽẽ oloꞌngiaahit ꞌcĩ ĩĩn baattĩ olongo.

⁴⁵ Nẽ hĩnĩngĩtĩ haduhaakuung naa thõõth ꞌcĩ ĩĩn dĩdĩ, hõllõngaa hinnia ẽlẽmmaangu niig nganĩĩta!

⁴⁶ Nganĩ hõrggẽẽnaa cunuung ꞌcĩ occa ammũda ꞌthẽccan hĩ nganĩĩta? Má haduhaakuung naa thõõth dĩdĩ nẽ hõllõngaa ẽlẽmmaangu inni?

⁴⁷ Ẽẽtĩ ꞌcĩ ĩĩn eet ꞌcĩ Nyekuci, athĩhĩ thõõth cĩ Nyekuci. Nẽẽthĩ, aburru niig thõõth cĩ Nyekuci, hĩnĩngĩtĩ hõllõngaa iiginnu niig eet cĩgĩnnĩg.”

Yeesu hĩ Abũrahaamõ

⁴⁸ Ma ho, edecit eeta cĩg ꞌJudeei Yeesu ĩĩttĩk, “Hẽbẽaneeka naag ngaatĩ haĩnna, ĩĩnnĩ nii Thamaritaanoc nẽ aꞌnyahi lori ꞌcĩ abathĩ.”

⁴⁹ Ẽdẽcĩ Yeesu ĩhõõggõ anneek, “Aitiõõ naa hõllõngaa haꞌnyahi lori ꞌcĩ abathĩ. Hiꞌngolli naa Baaba nẽ aburru niig ngaatĩ ingoliinnaangu niig nganĩĩt buúk.

⁵⁰ Hõllõngaa hadiimi naa bulẽẽnĩt cĩ ẽlẽ caannĩ. Nyekuc ꞌcĩ hatĩ abuluꞌthaa nganĩĩta nẽ ĩnõõnnõ ꞌcĩ ẽttẽẽd thooꞌthiok vẽlẽk.

⁵¹ Haduhaakuung dĩdĩ, ẽẽtĩ ꞌcĩ aꞌthũũnnĩ thõõth caannĩ, aitiõõ hatĩ hõllõngaa adaahĩ ũdũt.”

⁵² Ma ngaati, ĩĩtõ eeta cĩg ꞌJudeei, “Hagayyia aattĩ dĩdĩ, ngaatĩ aꞌnyahĩ nii lori ꞌcĩ abathĩ! Baa adaahito Abũrahamĩ hĩ põrõvẽtaaꞌnya vẽlẽk nẽẽthĩ hinnia, aini nii, má aꞌthũũnnĩ ẽẽtĩ umwaa thõõth cunni, hõllõngaa occa adaahĩ ũdũt!

⁵³ Ĩllõõani nii nyakangaan cĩnaang Abũrahaamõ? Baa adaak nẽẽ ẽlẽk nẽ adaahito põrõvẽtaaꞌnya buúk. Ammuhi ꞌyioko ꞌthẽk nii nganĩ nii?”

⁵⁴ Ẽdẽcĩ Yeesu ĩhõõggõ anneek, “Má hubuluth naa ẽlẽ caannĩ ẽmmẽn, occa ĩĩn thõõth niccia õlõng. Baaba ꞌcĩ ainnu niig ĩĩn Nyekuc cunuung ko, ꞌcĩ abuluꞌthaa nganĩĩta.

⁵⁵ Tananga hõllõngaa agayyu niig ĩnõõnnõ, haga naa ĩnõõnnõ. Má haini hõllõngaa haga naa ĩnõõnnõ, occa ꞌyioko hĩĩnĩ oloꞌngiaahit hĩ niiga, nẽẽthĩ, haga naa ĩnõõnnõ nẽ hũꞌthũũtĩ thõõth cĩnnĩ.

⁵⁶ Baa accamanoothĩk nyakangaan cunuung Abũrahamĩ gẽrrẽẽt ngaatĩ acĩnna nganĩĩta.”

⁵⁷ Ẽdẽcĩ hinnia eeta cĩg ꞌJudeei ĩnõõnnõ anneek, “Nga nõõ hĩĩtõ irkiꞌnyia cugunnig hẽẽn ꞌtur buúk nẽ baa icinu nii Abũrahaamõ hutuno?”

⁵⁸ Ẽdẽcĩ Yeesu ĩhõõggõ anneek, “Haduhaakuung dĩdĩ, baa nga hittirria Abũrahamĩ haau naa ẽlẽk!”

⁵⁹ Ma nĩngaata, uuratta nẽẽg biyyiẽẽn ꞌcĩg adiim õhõdaanĩ Yeesu hadaak. Nĩngĩtĩ aguꞌthẽẽnĩ Yeesu nẽ uduhuna battaala ꞌCieethaa cĩ Nyekuci.