Yõaannẽ 5 - ꞌBuuk cĩ Thõõth cĩ Nyekuci

Aaꞌnyĩk Yeesu eet ꞌcĩ ahuuli hũbũna

¹ Ma urutaa cĩnnĩ, ikia ũũk Yeesu ꞌJeruꞌthalẽma karramaawa cĩ ꞌJudeei.

² Baa aaĩ bõrrõhĩ umwaa ꞌJeruꞌthalẽma ꞌcĩ õbõhõõ hĩ nĩngĩtĩ haĩ Hattũũg cĩ Aꞌthaannu, ꞌcĩ haĩ ꞌthaar ũgĩ Aramaayyi Beꞌthatha. Baa aꞌnyak bõrrõhĩ ciee tuggu ꞌcĩ aꞌnyak hattũũgẽt ꞌtur.

³ Tuggu ꞌcĩ baa gõõng iyyiomanĩ tuhulliaha hĩ rubenniaak hĩ eet ꞌcĩg alalliaa eleeti.

⁴ Nẽ hõdõõkõthĩ alluuccia aajĩlõ cĩ Makayyiookto hẽẽtahujjieen hikia hõtõmõõĩ maam. Nẽ ẽẽtĩ ꞌcĩ itiman udhuhoothĩk maamĩtõõ ĩĩcĩ oou ngaatĩ õꞌngõnyõõnĩ eeta ꞌgõõl ko, ikia iꞌnginõõthĩ mõõrĩthĩ cĩnnĩ hũbũna.

⁵ Baa aaĩ eet umwaa nĩngaata ꞌcĩ õbõhõõ hĩ bõrrõk, ꞌcĩ baa õmmõõrĩ irkiꞌnyia hẽẽn iyyio hĩ turkiyyio.

⁶ Ma baa adtuuha Yeesu ĩnõõnnõ ngaatĩ oongiyyi nĩngaata nẽ ũmmũda ngaatĩ ahuulẽnĩ irkiꞌnyia ꞌcĩg mẽẽlĩg ko, ikia ijin ĩnõõnnõ ĩĩnnĩk, “Adiimi nii bũna?”

⁷ Ẽdẽcĩ ꞌngoolliahiti Yeesu anneek, “Makayyioohit, aitioonna eet ꞌcĩ ẽẽlla hudhuhoothĩk bõrrõõhatõõ tõõ, hatĩ õtõmõõcõ maama. Ma nga haĩ hudhuhoothĩk naana, aku hinnia atiman eet umwaa õõa ꞌcĩ nga hudhuhõõthĩhĩĩ naana.”

⁸ Nĩngĩtĩ annẽẽkĩ Yeesu ĩnõõnnõ, “Tĩnga, dũhan lotoonu cunni bĩtõ!”

⁹ Ma hĩdĩĩkoothong, ũbũna ẽẽtĩ. Nĩngĩtĩ adũhanĩ lotoonu cĩnnĩ õkõõĩ. Baa ĩĩn lõõcĩ Kõr cĩ ꞌYiommaanõ ꞌthaa ꞌcĩ aaꞌnyĩkĩ Yeesu eet hũbũna ho.

¹⁰ Ma baa acĩn makayyiooha cĩg ꞌJudeei eet icci aꞌnyak lotoonu ho, eggerenyteek ĩnõõnnõ ĩĩttĩk, “Aꞌnyahi lotoonu Kõrraa cĩ ꞌYiommaanõ inni? Aꞌngirannii nyattaala ngaatĩ occa aꞌnyahĩ nii lotoonu cunni.”

¹¹ Ẽdẽcĩ hinnia tuhuulliahiti ĩhõõggõ anneek, “Eet aa aaꞌnya nganĩĩt hũbũna ꞌcĩ anneeka, ‘Dũhan lotoonu cunni bĩtõ.’ ”

¹² Nĩngĩtĩ ajini ĩnõõnnõ annẽẽkĩ, “Eet iina ꞌcĩ anneeki nganiit dũhan lotoonu cunni tõõ ho?”

¹³ Nẽẽthĩ, baa hõllõngaa aga tuhuulliahiti nicciee eelliaa ho Yeesu, hĩnĩngĩtĩ baa iꞌnginõõthĩ Yeesu lothippitatõõ haaga.

¹⁴ Ma baa urutaa cĩnnĩ, ũmmũdaak Yeesu eet nicci ꞌCieethaa cĩ Nyekuci nẽ ĩĩnnĩk, “Cĩĩn nõõ, ũbũnauu thĩ ꞌyioko niina. Ma nga hadĩmani ꞌthẽccan nẽ hatĩ õbõdaahi bathi ꞌcĩ ĩllõõan baa oou.”

¹⁵ Nĩngĩtĩ õkõ aduhaakĩ ẽẽtĩ nicciee makayyiook cĩg ꞌJudeei annẽẽkĩ, ĩko hatĩ Yeesu ꞌcĩ aaꞌnya nganĩĩt hũbũna ho.

Rũgẽt ꞌcĩ aku hĩ Ngeertĩ Nyekuci

¹⁶ Nẽẽthĩ, baa adĩman Yeesu thooꞌthiok iccig Kõrraa cĩ ꞌYiommaanõ. Ma ho, iita eggerenyteek makayyiooha cĩg ꞌJudeei Yeesu.

¹⁷ Nĩngĩtĩ annẽẽkĩ Yeesu ĩhõõggõ, “Nga hĩbĩl Baaba caannĩ dtiica hĩĩ kõr hĩ niccieeni, ĩnõõ ꞌcĩ hadticaniini naa buúk ko.”

¹⁸ Nẽ ꞌyioko, idiimito makayyiooha cĩg ꞌJudeei uruhit Yeesu, hĩnĩngĩtĩ thooꞌthiok ꞌcĩg ĩĩn ꞌramma, ĩĩcĩ oou, aĩ ẽꞌthẽcan Yeesu nyattal cĩ Kõr cĩ ꞌYiommaanõ. Nẽ tarĩ thõõth ꞌcĩ abathĩ gẽrrẽẽt, ꞌcĩ õthõõthĩ Yeesu aĩ, ĩĩn Nyekuci Maaꞌnyĩ, thõõth ꞌcĩ aaꞌnyĩk ĩnõõnnõ hudukto hĩ Nyekuc thõng.

ꞌTirrian cĩ Ngeertĩ Nyekuci

¹⁹ Ma nĩngaata, ẽdẽc Yeesu makayyiook cĩg ꞌJudeei ĩĩnnĩk, “Haduhaakuung dĩdĩ, aitiõõ ꞌgii ꞌcĩ adtican Ngeertĩ Nyekuci ẽmmẽn tõõ. Adĩman nẽẽ thõõth ꞌcĩ acĩna hĩ Maaꞌnyĩ. ꞌGii ꞌcĩ adĩman Maaꞌnyia, adĩman Ngeerĩnĩ buúk.

²⁰ Hĩnĩngĩtĩ ammĩnan Maaꞌnyia Ngeerĩnĩ nẽ eteretheek ĩnõõnnõ thooꞌthiok vẽlẽk ꞌcĩg adĩman nẽẽnĩ. Nẽ dĩdĩ, eterꞌtheek hatĩ nẽẽ ĩnõõnnõ thooꞌthiok ꞌcĩg obbitig ꞌcĩg abulannuung ngagiit ꞌcĩg ĩllõõan iccig.

²¹ Hĩcĩ arũgtha Maaꞌnyia daakiak nẽ aaꞌnyĩk ĩhõõggõ rũgẽt, ꞌgõõlaa cĩ buúk, aaꞌnyĩk hatĩ Ngeerĩnĩ rũgẽt eet ꞌcĩ accamana nẽẽnĩ.

²² “Hõllõngaa ẽttẽẽd Maaꞌnyia thõõth cĩ eet umwa, hĩnĩngĩtĩ baa aaꞌnyĩk nẽẽ Ngeerĩnĩ hẽttẽẽd thooꞌthiok cĩg eet vẽlẽk,

²³ hátĩ hitingolli eeta vẽlẽk Ngeerĩnĩ, hĩcĩ iꞌngolli nẽẽg Maaꞌnyĩ. Nẽẽthĩ, ẽẽtĩ ꞌcĩ hõllõngaa iꞌngolli Ngeertĩ Nyekuci, hõllõngaa iꞌngolli Maaꞌnyĩ baa ĩꞌthõõa Ngeerĩnĩ.

²⁴ Haduhaakuung dĩdĩ, ẽẽtĩ ꞌcĩ athĩhĩ thõõth caannĩ nẽ ẽlẽm eet baa ĩꞌthõõannaa nganĩĩta, ammũda hatĩ ẽẽtĩ tĩho rũgẽt ꞌcĩ aalla ooo nẽ hõllõngaa hatĩ uuki, hĩnĩngĩtĩ abaakia nẽẽ daahĩtha ikia rũgẽta.

²⁵ “Haduhaakuung dĩdĩ, õbõhĩ kõrra nẽ ꞌyioko ikia ẽlẽk, ꞌcĩ hatĩ athĩknĩ eeta ꞌcĩg adaahito molook cĩ Ngeertĩ Nyekuci. Nẽ eeta ꞌcĩg hatĩ athĩhĩ molook tĩho, arũgĩ hatĩnĩ.

²⁶ Hĩcĩ aꞌnyak Baaba rũgẽt ẽllaa cĩnnĩ, ikia aaꞌnyĩk nẽẽ Ngeerĩnĩ buúk haꞌnyak rũgẽt ẽllaa cĩnnĩ.

²⁷ Nẽ aaꞌnyĩk Maaꞌnyia ĩnõõnnõ makaaꞌthĩt ꞌcĩ ẽttẽẽdĩ thooꞌthiok cĩg eet vẽlẽk, hĩnĩngĩtĩ ĩĩn nẽẽ Ngeertĩ Eeto.

²⁸ “Ma hakuleeku ꞌjieen, hĩnĩngĩtĩ thõõth icci! Aku hatĩ kõrra ꞌcĩ athĩknĩ eeta ꞌcĩg adaahito vẽlẽk molook cĩnnĩ,

²⁹ nẽ hatĩ ũrũgta nẽẽg daahĩtha. Arũgna hatĩ eeta ꞌcĩg baag adtican thooꞌthiok ꞌcĩg abũnnaa nẽ õõt rũgẽta nẽ hatĩ ũrũgta eeta ꞌcĩg baag adtican thooꞌthiok ꞌcĩg abathĩ nẽ uukti.

³⁰ “Aitiõõ thõõth ꞌcĩ hadĩmani naa ẽmmẽn tõõ, hetteedi naa thõõth hĩcĩ hathihi hĩ Baaba nẽ thõõth ꞌcĩ hetteedi naa ho, ĩĩn dĩdĩ, hĩnĩngĩtĩ hõllõngaa hadiimi naa hadihithi ẽlẽ caannĩ, hadiimi hadihithi naa Baaba, baa ĩꞌthõõannaa nganĩĩta.

Hẽbẽrĩ ꞌcĩg aduha thõõth cĩ Yeesu

³¹ “Má hothoothi naa ẽlẽ caannĩ ẽmmẽn, aitiõõ ꞌgõõl ꞌcĩ occa agayyu ngaatĩ haduhaanĩ naa thõõth ꞌcĩ ĩĩn dĩdĩ tõõ.

³² Aaĩ eet umwaa ꞌcĩ õthõõth, hĩnĩngĩtĩ nganĩĩta nẽ haga naa thõõth ꞌcĩ aduha nẽẽ ho, ĩĩn dĩdĩ.

³³ Baa ĩꞌthooiku niig Yõaannẽ Batitta nuyyiook ũgĩ nẽ ũũk uduhaak Yõaannẽ ĩhõõggõ thõõth ꞌcĩ ĩĩn dĩdĩ.

³⁴ Hõllõngaa haallahi naa thooꞌthiok ꞌcĩg õthõõꞌtha eeta nganĩĩta, haduhaakuung naa thooꞌthiok iccig, hátĩ eellia niiga.

³⁵ Baa ĩĩn Yõaannẽ ꞌloomo ꞌcĩ aaꞌnyuung lanyit nẽ iita eberriaau niig ngaatĩ accamanoothiku hĩdĩhĩdĩĩc, hĩnĩngĩtĩ lanyit cĩnnĩ ho.

³⁶ “Haꞌnyahi naa thooꞌthiok ũgĩ ꞌcĩg aaddi ĩllõõan baag Yõaannẽ. Nẽ dtiici baa aaꞌnya nganĩĩt Baaba hẽdẽcaak hĩcĩ hadĩmani ꞌyioko ho, ẽtẽrꞌtha aĩ, ĩꞌthõõannaa nẽẽ nganĩĩta.

³⁷ “Nẽ Baaba baa ĩꞌthõõannaa nganĩĩt ko, õthõõth nẽẽ buúk, hĩnĩngĩtĩ nganĩĩta. Nga ĩthĩhĩt niig molook cĩnnĩ hode nga ĩcĩnĩt ẽlẽ cĩnnĩ,

³⁸ hode nga haau thõõth cĩnnĩ ꞌthinneetinitõõ cugguung, hĩnĩngĩtĩ hõllõngaa elemmu niig eet baa ĩꞌthõõa nẽẽnĩ.

³⁹ “Agiillu niig ꞌBuuk cĩ Nyekuci gẽrrẽẽt, hĩnĩngĩtĩ ammuku ainnu ammũdaannu hatĩ rũgẽt ꞌcĩ aalla ooo hĩ ĩnõõnnõ. Õthõõꞌtha ꞌBuuhi cĩ Nyekuci ho nganĩĩta,

⁴⁰ nẽẽthĩ, aburru hinnia niig ngaatĩ auunnu hĩ nganĩĩt, hátĩ ummuddia rũgẽt ꞌcĩ aalla ooo.

⁴¹ “Hõllõngaa haallahi naa dĩhĩthẽẽnĩt cĩ eetu,

⁴² nẽẽthĩ, hagayyuung naa ngagiita. Haga naa aitiõõ niig hõllõngaa ammĩnannu Nyekuc ꞌthinneetinii cugguung dĩdĩ.

⁴³ Baa hakuu naa ꞌthaarĩĩ cĩg Baaba nẽ hõllõngaa ẽlẽmmaangu ũdũt, nẽẽthĩ, má hikia eet umwaa ꞌcĩ ꞌrĩĩng ꞌthaarĩĩ cĩgĩnnĩg, occa hinnia elemmu eet tĩho.

⁴⁴ Occa elemiinnu niig hutuno hatĩ adiimmu dĩhĩthẽẽnĩt ꞌcĩ aku hĩ ꞌgoonogu nẽ hõllõngaa aallaku ngaatĩ ammũdaannu dĩhĩthẽẽnĩt ꞌcĩ aku hĩ Nyekuc ꞌcĩ odoyyii?

⁴⁵ “Ma hammuku hainnu nganĩĩt hatĩ ꞌcĩ habĩlluung hĩ Baaba. Mũũꞌtha baa aariku niig muhẽẽnĩt cunuung vẽlẽk, ꞌcĩ hatĩ abilluunga.

⁴⁶ Má baa elemit Mũũꞌtha, occa ꞌyioko ẽlẽmmaangu nganĩĩt buúk, hĩnĩngĩtĩ baa ẽhẽẽd Mũũꞌtha thooꞌthiok cĩgannĩg.

⁴⁷ Nẽ má hõllõngaa elemmu thooꞌthiok baag ẽhẽẽd Mũũꞌtha, occa hatĩ elemmu thooꞌthiok ꞌcĩg haduha naa hutuno?”