Yõaannẽ 3 - ꞌBuuk cĩ Thõõth cĩ Nyekuci

Yeesu hĩ Nikodemo

¹ Baa aaĩ eet umwaa ꞌcĩ haĩ ꞌthaar cĩgĩnnĩg Nikodemo, ꞌcĩ baa ĩĩn Variꞌtheenit nẽ baa ĩĩn nẽẽ buúk eet ꞌcĩ aku makayyioohĩĩ cĩg ꞌJudeei.

² Ma kõr umwa baal, ũũk ũmmũdoothĩk nẽẽ Yeesu nẽ ĩĩnnĩk, “ꞌLimmannioohit, hagayya naag ĩĩnĩ nii ꞌlimmannioohit ꞌcĩ ĩꞌthõõannii Nyekuci, aĩ ijjia ꞌlimmaneet ngagĩĩta. Aitiõõ ẽẽtĩ ꞌcĩ occa adĩman thooꞌthiok ꞌcĩg ĩnaat eeta ho, hatĩ aitiõõ Nyekuci hĩ ĩnõõnnõ tõõ.”

³ Ẽdẽcĩ Yeesu Nikodemo anneek, “Haduhaakii dĩdĩ, aitiõõ ẽẽtĩ ꞌcĩ occa aduhun habuccieet cĩ Nyekuci, hatĩ nga hittirria nẽẽ tarĩ tõõ.”

⁴ Ma nĩngaata, ijin Nikodemo Yeesu ĩĩnnĩk, “Ĩcca occa gõõng arrittiaa ẽẽtĩ cobbi tarĩ hutuno? Dĩdĩ occa hõllõngaa aduhun nẽẽ hẽẽngatõõ cĩ aattĩnnĩ nẽ ittirria tarĩ!”

⁵ Ẽdẽcĩ Yeesu ĩnõõnnõ anneek, “Haduhaakii thõõth dĩdĩ, aitiõõ ẽẽtĩ ꞌcĩ aduhun habuccieet cĩ Nyekuci, hatĩ nga hittirria maamĩ hĩ Loriiaa ꞌcĩ Ẽllẽẽmĩth tõõ.

⁶ Arrita eeta lõhõlĩ cĩggĩĩng, nẽẽthĩ, Lori cĩ Nyekuci diooni ꞌcĩ occa ũũhũyyii nganiit ĩĩ loholeec cĩ Nyekuci.

⁷ Ma hakuleehi ꞌjieen hatĩ hanneekii naa, adiim arrittiaannu niig vẽlẽk tarĩ.

⁸ Lori cĩ Nyekuci diooni, ꞌcĩ aaꞌnyuung rũgẽt ꞌcĩ ĩĩn ngeju. Aaĩ Lorii hĩ ngõõtĩ ꞌcĩ uuhan õkõ ĩĩcĩ adiim nẽẽnĩ. Occa athiknu niig ngõõt nẽ hõllõngaa agayyu aku ĩĩna hode õkẽẽna.”

⁹ Nẽ ijin Nikodemo Yeesu tarĩ ĩĩnnĩk, “Ĩcca occa gõõng aaĩ thõõth hoti hutuno?”

¹⁰ Ẽdẽcĩ Yeesu ĩnõõnnõ anneek, “Ĩĩnĩ nii ꞌlimmannioohit cĩ Ĩꞌthĩraẽlĩ nẽ erekti thooꞌthioha cieeg nganiit hutuno?

¹¹ Haduhaakii thõõth dĩdĩ, haduhaanna naag thõõth ꞌcĩ hagayyia, hĩnĩngĩtĩ hĩcĩtta hẽbẽrẽẽnnĩĩ cĩggaang. Nẽẽthĩ hinnia, hõllõngaa elemmu thõõth ꞌcĩ haduhaanna naag ko ũdũt.

¹² Má hõllõngaa athĩknaangu niig nganĩĩt hatĩ haduhaakuung thooꞌthiok ꞌcĩg aattĩg loota nĩnga, occa hatĩ elemmu ngaatĩ haduhaakuung thooꞌthiok cĩg õlõ cĩ Nyekuci hutuno?

¹³ Nga hõdõlan ẽẽtĩ umwaa õlõ cĩ Nyekuci hẽẽtahujjieen, nganĩĩt dioo Ngeertĩ Eeto, ꞌcĩ baa halluuccia hakuu loota nĩnga, ꞌcĩ hõdõlana õlõ cĩ Nyekuci.

¹⁴ Nẽ adiim odoꞌngi Ngeertĩ Eeto hẽẽtahujjieen, haau hĩ baa õdõng Mũũꞌtha hũkaat ꞌcĩ ĩĩn ꞌthiihit, horrwatõõ umwaanĩ ĩĩcĩ õdõhõhĩĩ kak.

¹⁵ Nẽẽthĩ hatĩ ummuddia eeta vẽlẽk ꞌcĩg aꞌnyak lemiinit hĩ Ngeertĩ Eeto, rũgẽt ꞌcĩ aalla ooo.

¹⁶ “Hĩnĩngĩtĩ baa ammĩnan Nyekuci eet cĩg looc nicci gẽrrẽẽt ũdũt, ĩnõõ ꞌcĩ ẽlẽmanaanĩ Ngeerĩnĩ ꞌcĩ odoyyii ẽlẽ cĩnnĩ, hátĩ hiittiõõ ẽẽtĩ ꞌcĩ ẽlẽmĩ Ngeerĩnĩ hõllõngaa adaahĩ. Ammũda hatĩ ẽẽtĩ ꞌcĩ ẽlẽmĩ ĩnõõnnõ ho, rũgẽt ꞌcĩ aalla ooo.

¹⁷ Baa hõllõngaa ĩꞌthõõa Nyekuci Ngeerĩnĩ loota nĩnga, hikia huuk eet cĩg looc nicci thõng, baa ĩꞌthõõa nẽẽ ĩnõõnnõ hikia hẽẽla ĩhõõggõ thõng.

¹⁸ Hõllõngaa hatĩ uuki ẽẽtĩ ꞌcĩ ẽlẽmĩ Ngeertĩ Nyekuci, nẽẽthĩ, ẽẽtĩ ꞌcĩ hõllõngaa ẽlẽmĩ ĩnõõnnõ, ẽttẽẽdĩ thõõth cĩnnĩ ẽlẽk, hĩnĩngĩtĩ hõllõngaa ẽlẽmĩ nẽẽ Ngeertĩ Nyekuci ꞌcĩ odoyyii.

¹⁹ “Ikia lanyit loota nĩnga ẽlẽk nẽ eeta ꞌcĩg adĩman thooꞌthiok ꞌcĩg abathĩ, etteeddiothoothĩk thooꞌthioha ꞌcĩg abathĩ ĩhõõggõ ẽlẽk, hĩnĩngĩtĩ ammĩnan nẽẽg muguur hĩllõõan lanyit.

²⁰ Eeta vẽlẽk ꞌcĩg adĩman ꞌthẽccanẽẽta, aaburreek lanyit nẽ occa hõllõngaa au hĩ lanyit, hĩnĩngĩtĩ iꞌngolli nẽẽg aĩ, appulanniaa hatĩ ꞌthẽccanẽẽta cĩggĩĩng ko battaala.

²¹ Nẽẽthĩ, ẽẽtĩ ꞌcĩ adtican thooꞌthiok ꞌcĩ ĩĩn dĩdĩ, aku hĩ lanyit, hátĩ hẽtẽrẽtha hĩĩ, baa adtican nẽẽ thooꞌthiok tĩko, hĩnĩngĩtĩ athĩhĩ thõõth cĩ Nyekuci.”

Yeesu hĩ Yõaannẽ Batitta

²² Ma urutaa ĩĩcĩ, ĩtĩngaacõ Yeesu hĩ nuyyiook cĩgĩnnĩg õõt ĩĩcĩ looc cĩ ꞌJudeea, ngaatĩ baa õõ aattiyyi nẽẽg waathinniook ũgĩ nẽ õõt aggamteek eet baattithimo.

²³ Nẽ baa aggameek Yõaannẽ buúk eet baattithimo looccaa cĩ Aẽnõnĩ, ngaatĩ õbõhõõ hĩ ꞌThaalim, hĩnĩngĩtĩ baa mẽẽlĩg maama nẽ baa ariha eeta ꞌcĩg mẽẽlĩg gẽrrẽẽt, hiita haggamit baattithimo.

²⁴ Baa adĩmanni thõõth ciee baa nga haarĩhoothĩk Yõaannẽ baabuuthatõõ.

²⁵ Ma nĩngaata, ẽppẽhattõõ nuyyiooha cĩg Yõaannẽ hĩ ꞌJudeeinit umwa, hĩnĩngĩtĩ nyattal ꞌcĩ tũũnyẽttõõ.

²⁶ Ma ho, iita õõt nuyyiooha niccieeg hĩ Yõaannẽ nẽ ijinit ĩnõõnnõ ĩĩttĩk, “ꞌLimmannioohit, aggameek ẽẽtĩ baa arũmeennu hĩ nganiit ĩĩcĩ baakĩt cĩ hidioo cĩ ꞌJõrdanĩ buúk eet baattithimo nẽ õõt eeta vẽlẽk hĩ ĩnõõnnõ.”

²⁷ Ẽdẽcĩ Yõaannẽ ĩhõõggõ anneek, “Aitiõõ ẽẽtĩ ꞌcĩ occa ammũda ꞌgiimwa, hatĩ nga hẽlẽmaahĩ Nyekuci ĩnõõnnõ hũũk hẽẽtahujjieen.

²⁸ Nẽ dĩdĩ, ammuhooꞌthu niig thõõth baa hanneekuung naa, ‘Hõllõngaa hĩĩnĩ naa Krĩstõ, hĩĩnĩ naa eet ꞌcĩ ĩꞌthõõannaa Nyekuci ĩĩcĩ oou hĩ ĩnõõnnõ.’

²⁹ “Hatĩ aꞌthũwanni loholeec ꞌcĩ ngayyi nyahũũtaawa, atalĩ ꞌgoonnia ngaatĩ aayyi nĩngaata, hátĩ hĩthĩk molook cĩ nyattaraanõ. Ĩnõõ ꞌcĩ haccamanõõthĩkĩĩ naa gẽrrẽẽt ko.

³⁰ Yeesu ꞌcĩ hatĩ aku abuli hĩllõõan nẽ hikia hĩĩna naa eet umwa ꞌcĩ hidici haaga.

Ĩllõõan ẽẽtĩ ꞌcĩ aku hẽẽtahujjieen eet vẽlẽk

³¹ “Aku Yeesu hẽẽtahujjieen nẽ ĩllõõan eet vẽlẽk. Ĩĩn ẽẽtĩ ꞌcĩ aku loota nĩnga, eet cĩ looc nicci nẽ õthõõth thooꞌthiok cĩg looc nicci. Ĩllõõan ẽẽtĩ ꞌcĩ aku õlõõ cĩ Nyekuci hẽẽtahujjieen eet vẽlẽk.

³² Õthõõth nẽẽ thõõth ꞌcĩ baa ĩcĩn nẽẽ nẽ ĩthĩha. Nẽẽthĩ hinnia, aitiõõ ẽẽtĩ ꞌcĩ ẽlẽmĩ thõõth cĩnnĩ ho tõõ.

³³ Aduha ẽẽtĩ ꞌcĩ ẽlẽmĩ thõõth cĩnnĩ aĩ, õthõõth Nyekuci thõõth ꞌcĩ ĩĩn dĩdĩ.

³⁴ Hĩnĩngĩtĩ ẽẽtĩ baa ĩꞌthõõa Nyekuci, õthõõth thõõth cĩ Nyekuci, hĩnĩngĩtĩ hõllõngaa abĩlĩ Nyekuci ngaatĩ aaꞌnyĩkĩ eet Lori ꞌcĩ Ẽllẽẽmĩthĩ.

³⁵ “Ammĩnan Maaꞌnyia Ngeerĩnĩ nẽ aaꞌnyĩk ĩnõõnnõ ꞌgii vẽlẽk.

³⁶ Ammũda hatĩ eeta vẽlẽk ꞌcĩg ẽlẽmĩ Ngeertĩ Nyekuci rũgẽt ꞌcĩ aalla ooo nẽ ẽẽtĩ ꞌcĩ abũrĩ thõõth cĩ Ngeertĩ Nyekuci, hõllõngaa hatĩ ammũda rũgẽt niccia, alĩĩllĩk hatĩ Nyekuci eet tĩho nẽ uuk ĩnõõnnõ ũdũt!”