Yõaannẽ 2 - ꞌBuuk cĩ Thõõth cĩ Nyekuci

Ũũhũ Yeesu maam hĩĩ mẽrtĩ

¹ Ma baa urutaa cĩ waathinniook iyyio, baa aaĩ Maria aattĩ Yeesu nyahũũtaawa umwaanĩ õlõõ ꞌcĩ haĩ Kana looccaa cĩ ꞌGalileea.

² Baa avva eeta Yeesu hĩ nuyyiook cĩgĩnnĩg buúk, hiita nyahũũtaawa nĩĩcĩ.

³ Ma baa edeccia mẽrta cĩ viinoo, ikia uduhaak Maria Yeesu ĩĩnnĩk, “Edecciaak eeta niccieeg mẽrtĩ cĩ viinoo.”

⁴ Ẽdẽcĩ Yeesu aattĩnnĩ anneek, “Morwahit, nga hõdõlan ꞌthaa ꞌcĩ occa hadticanĩĩ naa thõõth umwa. Ma haduhaakaa dtiic ꞌcĩ occa hadticani.”

⁵ Nĩngĩtĩ aduhaakĩ Maria dticcianniook nĩngaata annẽẽkĩ, “Ĩdĩmanit nẽẽ niig ꞌgii vẽlẽk ꞌcĩ aduhaakuung nẽẽnĩ.”

⁶ Baa aattĩg ijjioꞌnya tõrkõnõn ꞌcĩg abbĩꞌthĩĩ maama obokii nĩngaata, ꞌcĩg baag occa ũũnyẽnĩ eeta, hĩcĩ aduha nyattalĩ cĩ ꞌJudeei. Aꞌnyak ijjio hõdẽĩ lotorroꞌnya ꞌcĩg obbitig cĩg occa ũũppan ĩĩn ꞌwec hode tõrkõnõn.

⁷ Ma nĩngaata, uduhaak Yeesu dticcianniook ĩĩnnĩk, “Otogooccik ijjioꞌnya niccig maam hĩbbĩtĩt.” Nĩngĩtĩ õgõõcĩkĩ nẽẽg maam hĩbbĩtĩt dhũk. Ma baa ĩbbĩtĩt ijjioꞌnya ẽlẽk,

⁸ uduhaak Yeesu dticcianniook ĩĩnnĩk, “Idtiillia maam ũgĩ nẽ aꞌnyaktoothihu jayyio.” Iita ĩdĩmanit nẽẽg hĩcĩ aduhaak Yeesu ho.

⁹ Nĩngĩtĩ atarrĩ jayyiõõĩ maam iccig utuhuyyi ĩĩtõ mẽrtĩ cĩ viinoo, ꞌcĩ ahahat dtum. Baa hõllõngaa aga nẽẽ ꞌgõõl ꞌcĩ akuuni mẽrta niccieeni, tananga aga dticcianniooha baag adtĩĩla maam niccig. Ma ho, ũtũvva jayyiõõĩ nyattaraan ngadiiha

¹⁰ nẽ ĩĩnnĩk, “Gõõng hakatĩ mẽrtĩ cĩ viino ꞌcĩ ahahatĩĩ ĩcĩ oou. Ma ũũppattĩ hẽẽrõnĩ, nẽẽthĩ, aꞌnyakta ꞌteeddiaha. Agunyuthi hinnia hatĩ nii mẽrtĩ ꞌcĩ ahahatĩĩ ĩꞌthõng hĩĩ noho inni?”

¹¹ Thõõth ꞌcĩ baa adtican Yeesu ĩĩcĩ oou, ꞌcĩ ĩnaat eeta ho cieeni. Baa adtican nẽẽ thõõth icci, õlõõ cĩ Kana, looccaa cĩ ꞌGalileea. Ikia ẽtẽrẽtha Yeesu bulẽẽnĩt cĩnnĩ õlõõ nĩĩca nẽ iita elemit nuyyiooha cĩgĩnnĩg ĩnõõnnõ, hĩnĩngĩtĩ thõõth icci.

¹² Ma urutaa cĩ, ĩtĩngaacõ Yeesu hĩ aattĩnnĩ hĩ ꞌgõtõõnõgĩ hĩ nuyyiook cĩgĩnnĩg, õõt ĩĩcĩ ꞌtaaũn cĩ Kapernaumĩ nẽ õõt aauto waathinniook ꞌcĩg abadtẽc nĩngaata.

Iiggia Yeesu tũjaarriok ꞌCieethaa cĩnnĩ

¹³ Ma baa õbõhĩ Kõrra cĩ Haangittõõ, ikia ũũk Yeesu ĩĩcĩ ꞌJeruꞌthalẽmĩ.

¹⁴ Ma halangatõõ cĩ ꞌCieeth cĩ Nyekuci, ũmmũdoothĩk Yeesu eet ꞌcĩg ũũtẽnĩ tĩĩn, hĩ aꞌtha, hĩ ngabuuthiꞌnya ꞌcĩg occa ũũtĩ hĩĩ ꞌbaaninit cĩ Nyekuci, hĩ eet ꞌcĩg appak ꞌrabbẽẽt, iccioloongan tẽrẽmẽẽjĩtĩ loota.

¹⁵ Nĩngĩtĩ akũmanaanĩ Yeesu halli umwa ꞌlõõrõngĩtĩ nẽ itiggiaeek ĩhõõggõ hõdẽĩ hĩ aꞌtha hĩ tĩĩn vẽlẽk, hõõt battaala ꞌCieethaa cĩ Nyekuci. Ebelluukan nẽẽ tẽrẽmẽẽjĩt cĩg eet ꞌcĩg appak ꞌrabbẽẽt ko nẽ ĩꞌthaan ꞌrabbẽẽt cĩggĩĩng ꞌcĩg kũtũrĩg.

¹⁶ Ma nĩngaata, uduhaak eet ꞌcĩg ũũtẽnĩ ngabuuthiꞌnya ĩĩnnĩk, “Ootti ngabuuthiꞌnya niccig battaala! Ma haarru ꞌCieeth cĩ Baaba hĩĩ ꞌcuuk!”

¹⁷ Nĩngĩtĩ ammuhaanĩ nuyyiooha cĩgĩnnĩg thooꞌthiok baag eheeddi ꞌBuuhaa cĩ Nyekuci aĩ, “Hammĩnani naa ꞌcieeth cunni gẽrrẽẽt ũdũt.”

¹⁸ Ma ho, iita ijinit makayyiooha cĩg ꞌJudeei Yeesu ĩĩttĩk, “Thõõth iina ꞌcĩ ĩnaat eeta ꞌcĩ occa eterꞌtheekeet nii ngagĩĩt makaaꞌthĩt ꞌcĩ adticanĩĩ thooꞌthiok iccig vẽlẽk ko?”

¹⁹ Ẽdẽcĩ Yeesu ĩhõõggõ anneek, “Ĩꞌthaanit ꞌCieeth icci Nyekuci ho, nẽ hatĩ hẽtẽhẽnya naa waathinnioohĩĩ ꞌcĩg ĩĩn iyyio hĩbĩl tarĩ.”

²⁰ Ẽdẽcĩ makayyiooha cĩg ꞌJudeei ĩnõõnnõ anneek, “Ẽhẽnytĩ ꞌCieeth ciee Nyekuci ho irkiꞌnyia hẽẽn ꞌwec hĩ tõrkõnõn. Ne ꞌcĩ aaꞌnyi nganiit ꞌmuuk ĩĩ, occa ehenyiti tarĩ waathinnioohĩĩ ꞌcĩg ĩĩn iyyio thõng ko?”

²¹ Nẽẽthĩ, ꞌCieeth cĩ Nyekuci ꞌcĩ õthõõth Yeesu ho, ĩĩn ẽlẽ cĩnnĩ.

²² Ma baa ũrũga Yeesu daahĩtha, iita ummuktõõthĩ nuyyiooha cĩgĩnnĩg thõõth baa aduha nẽẽ aĩ, hehenyiti hatĩ naa ꞌCieeth nicci waathinnioohĩĩ ꞌcĩg ĩĩn iyyio haaga. Nĩngĩtĩ au ẽlẽmmĩ nuyyiooha cĩgĩnnĩg thõõth ꞌcĩ eheeddi ꞌBuuhaa cĩ Nyekuci, hĩ thõõth baa aduha nẽẽnĩ.

Aga Yeesu eet vẽlẽk

²³ Ma baa nga aaĩ Yeesu Kõrraa cĩ Haangittõõ ꞌJeruꞌthalẽma, baa mẽẽlĩg eeta ꞌcĩg acĩn thooꞌthiok ꞌcĩg ĩnaat eeta ꞌcĩg adtican nẽẽnĩ, nĩngĩtĩ ẽlẽmmĩ ĩnõõnnõ.

²⁴ Nẽẽthĩ, baa aga Yeesu thooꞌthiok ꞌcĩg ꞌthinneeti cĩggĩĩng nẽ hõllõngaa ẽlẽmaakĩ ĩhõõggõ hĩllõõanit ĩnõõnnõ.

²⁵ Baa hõllõngaa adiim Yeesu eet umwa huduhaak ĩnõõnnõ thõõth cĩ eetu, hĩnĩngĩtĩ baa aga nẽẽ muhẽẽnĩt cĩnĩĩng vẽlẽk.