Yõaannẽ 18 - ꞌBuuk cĩ Thõõth cĩ Nyekuci

Aggamĩ Yeesu

¹ Ma baa ẽdẽcaak Yeesu laiinit, ĩtĩngaacõ hĩ nuyyiook cĩgĩnnĩg abaaktĩ lĩĩl cĩ Kidronĩ. Baa aattĩg hẽẽna cĩg olivi dhoortaa cĩ baakitu, nĩngĩtĩ adukni hĩ nuyyiook cĩgĩnnĩg nĩngaata.

² Nẽẽthĩ ꞌyioko, baa aga ꞌJuuda hoppocciaahiti nĩngĩtĩho, hĩnĩngĩtĩ baa gõõng õmmõtõõ Yeesu hĩ nuyyiook cĩgĩnnĩg hõdõõkõthĩ nĩngaata.

³ Ma nĩngaata, ikia ꞌJuuda hẽẽnĩĩ ĩtĩko, õõkõra hĩ athegereeꞌnya hĩ makayyiook ũgĩ ꞌcĩg au hĩ makayyiook cĩg paadĩrꞌnyaannu hĩ Variꞌtheei. Baa attũlla nẽẽg ꞌgwoyyiẽẽn nẽ aꞌnyaha hĩbahĩꞌnya hĩ dĩlaꞌnya.

⁴ Baa aga Yeesu thõõth ꞌcĩ hatĩ õkõ edeeꞌnyiak ĩnõõnnõ, nĩngĩtĩ ajini ĩhõõggõ annẽẽkĩ, “Nganĩ ꞌcĩ adiimmu niig ko?”

⁵ Ẽdẽcĩ nẽẽg aĩ, “Hadiimma Yeesu cĩ Naaꞌtharẽtĩ.” Ẽdẽcĩ Yeesu ĩhõõggõ anneek, “Eet tĩho naana!” Nẽ baa abĩlĩ ꞌJuuda hoppocciaahiti hĩ eet niccig hõdẽĩ.

⁶ Ma baa ẽdẽcĩ Yeesu ĩhõõggõ anneek, “Eet tĩho naa ho,” iita eejehit nẽẽg ĩĩcĩ uruto nẽ etteedito looc.

⁷ Ikia ijin Yeesu ĩhõõggõ tarĩ ĩĩnnĩk, “Adiimmu niig nganĩ?” Ẽdẽcĩ nẽẽg aĩ, “Hadiimma Yeesu cĩ Naaꞌtharẽtĩ.”

⁸ Ẽdẽcĩ Yeesu ĩhõõggõ anneek, “Iyyia huduhaahuung naa ẽlẽk hĩĩnnĩhuung eet tĩho naana. Nẽẽthĩ, má adiimmaangu nganĩĩta, aanytĩk eet iccig ũgĩ ho hõõt.”

⁹ Baa õthõõth nẽẽ hoti, hátĩ hikia thõõth baa aduha nẽẽ hĩĩ dĩdĩ baa aĩ, “Nga hudhuheek eet umwa tuu, eetinii baag aaꞌnyaa niina.”

¹⁰ Ma ho, ũvvũũca ꞌThimõõnẽ Pẽẽtũrũ nyetuboot cĩnnĩ nẽ aꞌthalacana ĩtat cĩ dticciannioohit cĩ paadĩr cobbi. Baa haĩ dticciannioohit tĩho Maalko.

¹¹ Ma nĩngaata, uduhaak Yeesu Pẽẽtũrũ ĩĩnnĩk, “Bõdẽẽhĩ nyetuboot! Ĩcca occa hõllõngaa hahudi naa hooppo baa aaꞌnya nganĩĩt Baaba ho?”

Ootti eeta Yeesu hĩ Annath

¹² Ma ho, aggamit athegereeꞌnya hĩ ꞌgaalac cĩnĩĩng cobbi hĩ makayyiook cĩg ꞌJudeei Yeesu nẽ ecebit ĩnõõnnõ thõng.

¹³ Nĩngĩtĩ nõõ õõĩ ĩnõõnnõ hĩ Annath, homoneec cĩ Kaĩava, ꞌcĩ baa ĩĩn paadĩr cobbi irkit niccia.

¹⁴ Baa Kaĩava baa irrioonĩk makayyiook cĩg ꞌJudeei anneek, “Mẽẽn ngaatĩ occa adaaknĩ ẽẽtĩ hõdẽẽthõng, hĩnĩngĩtĩ eet vẽlẽk.”

Ẽppẽhan Pẽẽtũrũ Yeesu

¹⁵ Ma nĩngaata, unuyyiõõthĩ ꞌThimõõnẽ Pẽẽtũrũ hĩ nuyyioohit umwa Yeesu. Baa ammũdeek aga paadĩrĩ cobbi ho nuyyioohit tĩho, nĩngĩtĩ anũõõꞌthĩ nẽẽ Yeesu ĩꞌthõng huduhun halang cĩ paadĩr cobbi.

¹⁶ Nẽẽthĩ, baa õkõ idiongan Pẽẽtũrũ hattũũgaa cobbi battaala. Ma ho, õbõda nuyyioohiti baa aga paadĩrĩ cobbi nẽ iita othooꞌthio hĩ loholeec umwa ꞌcĩ ngayyi, ꞌcĩ ẽbẽk hattũũg cobbi nẽ uduhunaaĩ Pẽẽtũrũ halangatõõ.

¹⁷ Ma baa ho, ikia ijin bũhẽẽcĩ nicciee Pẽẽtũrũ ĩĩnnĩk, “Hõllõngaa nooyyia ĩĩnĩ nii buúk nuyyioohit cĩ eet iccia?” Ẽppẽhan Pẽẽtũrũ anneek, “Aitiõõ tõõ, hammiri naana!”

¹⁸ Baa alalĩ lõõcĩ nẽ aaddieek dticcianniooha hĩ boliith cĩg ẽbẽk ꞌCieeth cĩ Nyekuci ꞌgwoo umwa nĩngaata, ꞌcĩ ĩrraan nẽẽgĩ. Ma ho, uppwaanothoothĩk Pẽẽtũrũ ĩhõõggõ ngaatĩ ĩrraanĩ nẽẽg ꞌgwoo ho, hũũk hĩbĩl nĩngaata nẽ ĩrraan nẽẽ buúk ꞌgwoo.

Ijin paadĩrĩ cobbi Yeesu

¹⁹ Ma nĩngaata, ijin paadĩrĩ cobbi Yeesu thõõth cĩ nuyyiook cĩgĩnnĩg, hĩ thõõth ꞌcĩ allimanĩ nẽẽ eeta.

²⁰ Nẽẽthĩ, baa ẽdẽcĩ Yeesu ĩnõõnnõ anneek, “Baa haduhaahi naa eet thõõth cũrũmũũm muumtinii cĩggĩĩng vẽlẽk. Nẽ hillimana ĩhõõggõ hõdõõkõthĩ ꞌCieethinii cĩg Laiittak hĩ ꞌCieethaa cĩ Nyekuci, nga gõõng alũtẽẽnĩ eeta cĩggaac vẽlẽk hõdẽĩ. Nẽ nga huduha thõõth umwa ĩĩcĩ burki.

²¹ Inni jinaa nii nganĩĩt ko? Hõllõngaa ajini eet gõõng athĩkna nganĩĩt inni? Aga nẽẽg thõõth ꞌcĩ baa huduha naana.”

²² Ma baa uduha Yeesu thõõth icci, ikia atabaang bolitheeniti umwaa cĩ ꞌCieeth cĩ Nyekuci ĩnõõnnõ nẽ ĩĩnnĩk, “Hõllõngaa ꞌgõõl ꞌcĩ occa ẽdẽcĩ nii paadĩr cobbi nicciaani!”

²³ Ẽdẽcĩ Yeesu anneek, “Má hẽꞌthẽcana thõõth umwa, duhaahaanĩ nẽ má nga hẽꞌthẽcan ꞌgiimwa, inni tabaangaa ho?”

²⁴ Baa nga ecebbi Yeesu noho, ikia ĩꞌthooĩk Annathĩ ĩnõõnnõ hĩ paadĩr cobbi Kaĩava.

Ẽppẽhan Pẽẽtũrũ Yeesu tarĩ

²⁵ Ma baa nga abĩlĩ ꞌThimõõnẽ Pẽẽtũrũ ĩrraan ꞌgwoo, ijin eet umwaa ĩnõõnnõ ĩĩnnĩk, “Hõllõngaa nooyyia inni nii buúk nuyyioohit cĩ Yeesu?” Ẽppẽhan Pẽẽtũrũ tarĩ aĩ, “Aitiõõ, hõllõngaa hĩĩnĩ naa nuyyioohit cĩnnĩ!”

²⁶ Baa aaĩ dticciannioohiti umwaa cĩ paadĩr cobbi nĩngaata. Baa ĩĩn nẽẽ ittioonniohit cĩ eet baa aꞌthalacana Pẽẽtũrũ ĩtat cĩnnĩ nẽ ijin dticciannioohiti nicciee Pẽẽtũrũ ĩĩnnĩk, “Nga nooyyia hicinii naa nganiit hẽẽnĩĩ cĩg Olivi hĩ eet iccia?”

²⁷ Ma nĩngaata noho, ẽppẽhan Pẽẽtũrũ tarĩ, nĩngĩtĩ õrõhĩ tũhũlũca.

Yeesu muumaa cĩ Pĩlaatõ

²⁸ Ma baa ngaalloohoth ngerrenita, ĩtĩngaayyi eeta Yeesu õlõõ cĩ Kaĩava nẽ ootti ꞌcieethaa ꞌcĩ aayyi makayyioohiti cĩ ꞌRooma. Baa ereeyyi lothippiti cĩ eetu battaala. Hĩnĩngĩtĩ ma baa huduhun eet umwaa ĩĩttõõ, occa hinnia baa aku ĩĩn ꞌriiring nẽ iittiõõ eeta hõllõngaa ẽlẽmaakĩ ĩnõõnnõ hadak ꞌgẽẽn cĩ Kõr cĩ Haangittõõ.

²⁹ Nĩngĩtĩ aduknaanĩ Pĩlaatõ aku ajini ĩhõõggõ annẽẽkĩ, “Abillu niig eet icci thooꞌthiohĩĩ ĩĩgag?”

³⁰ Ẽdẽcĩ nẽẽg aĩ, “Má hiittiõõ nẽẽ hõllõngaa ĩĩn eet ꞌcĩ ĩĩn ꞌloorriahit, occa hõllõngaa haꞌnyahaaki nganiita.”

³¹ Nĩngĩtĩ aduhaakĩ Pĩlaatõ ĩhõõggõ annẽẽkĩ, “Ootti nẽ õõt etteeddu thõõth cĩnnĩ niig ẽmmẽn nyattaalaa cunuung.” Ẽdẽcĩ lothippiti cĩ eet cĩg ꞌJudeei aĩ, “Hõllõngaa haꞌnyaka naag ꞌtirrian ꞌcĩ haruka eet umwa.”

³² Baa edeeꞌnyia thõõth ciee, hátĩ hẽtẽrẽtha thooꞌthiok baag aduha Yeesu, hĩnĩngĩtĩ daahĩth ꞌcĩ hatĩ õkõ adaaknĩ nẽẽ hiita hĩĩtõ dĩdĩ.

³³ Ma ho, õbõdõõthĩ Pĩlaatõ ꞌcieethaa cĩnnĩ nẽ ũtũvva Yeesu nẽ ũũk ijin ĩnõõnnõ ĩĩnnĩk, “Ĩĩnĩ nii habu cĩ ꞌJudeei?”

³⁴ Ẽdẽcĩ Yeesu Pĩlaatõ anneek, “Ajinnaa ꞌthẽk õõa cunni ẽmmẽn hode aduhaaki ẽẽtĩ ꞌcĩ ꞌrĩĩng thõõth caannĩ ho?”

³⁵ Nĩngĩtĩ aĩĩnnĩ Pĩlaatõ, “Aga nii ngaatĩ hõllõngaa hĩĩnnĩ naa ꞌJudeeinit! Eet cugunnig ẽmmẽn hĩ makayyiook cĩg paadĩrꞌnyaannu ꞌcĩg aꞌnyahaanni nganiit hĩ nganĩĩta. Ne baa ꞌcĩ ẽꞌthẽcani nii ho?”

³⁶ Ma ho, ẽdẽc Yeesu ĩĩnnĩk, “Hõllõngaa ĩĩn habuccieet caannĩ cĩ looc nicci. Má baa hĩĩ habuccieet caannĩ cĩ looc nicci, occa baa iita eelliawaa dticcianniooha cĩgannĩg nganĩĩt, hiittiõõ hõllõngaa aggamma eeta cĩg ꞌJudeei. Nẽẽthĩ ꞌyioko, aku habuccieet caannĩ looccaa umwaanĩ.”

³⁷ Nĩngĩtĩ aĩnnĩ Pĩlaatõ, “Ĩĩnĩ thĩ mĩĩ ꞌthẽk habu!” Ẽdẽcĩ Yeesu anneek, “Ẽbẽaneehi ngaatĩ aĩnnĩ hĩĩnĩ naa habu. Nẽ dĩdĩ, baa harrittia naa, hĩnĩngĩtĩ thõõth icci nẽ baa thõõth icci ꞌcĩ hakuuni naa loota nĩnga ho, hátĩ hĩĩ hebereec cĩ thõõth ꞌcĩ ĩĩn dĩdĩ. Nẽ eeta vẽlẽk ꞌcĩg ammĩnan thõõth ꞌcĩ ĩĩn dĩdĩ, athĩhĩ thõõth caannĩ.”

Etteedothoothĩk Yeesu daahĩth

³⁸ Baa ajin Pĩlaatõ Yeesu anneek, “Thõõth iina ꞌcĩ ĩĩn dĩdĩ ho?” Ma nĩngaata, õbõdõõthĩ Pĩlaatõ battaala nẽ ũũk uduhaak eeta cĩg ꞌJudeei ĩĩnnĩk, “Ammĩrĩ ẽẽtĩ ciee nga hẽꞌthẽcan thõõth umwa ũdũt.

³⁹ Nẽẽthĩ, gõõng aꞌnyaku niig nyepitee ꞌcĩ ajinnangu nganĩĩt hõõgahuung baabutheenit umwa irkita, Kõrraa cĩ Haangittõõ. Adiimmaangu ꞌyioko niig nganĩĩt hõõgahuung, ‘habu cĩ ꞌJudeei ho’?”

⁴⁰ Ẽggẽrẽny hinnia eeta cĩg ꞌJudeei aĩ, “Aitiõõ, ma hõõgakeet ĩnõõnnõ! Õgaaheet Barabbath!” Baa ĩĩn Barabbath joreeyyiahit.