Yõaannẽ 16 - ꞌBuuk cĩ Thõõth cĩ Nyekuci

¹ “Haduhaakuung naa ngagiit thõõth icci, hátĩ hiittiõõ hõllõngaa itieelinnu.

² Iiggiaeekuung hatĩ eeta ngagiit ꞌCieethaa cĩ Laiitto battaala. Nẽ dĩdĩ, aku hatĩ kõrra ꞌcĩ arukuung ẽẽtĩ umwaa ngagiita nẽ ummuk ĩĩ hadticanoothihi Nyekuc.

³ Adĩman hatĩ nẽẽg thooꞌthiok ꞌcĩg aattĩg hoti, hĩnĩngĩtĩ nga hagaacõ nẽẽg Baaba hode nga hagayyia nganĩĩta.

⁴ Haduhaakuung ꞌyioko naa ngagiit thõõth icci, hátĩ ma ikia kõrra niccia, ammuhooꞌthu hatĩ thõõth baa hiloottuung naa ngagiita.

Dtiic cĩ Lori ꞌcĩ Ẽllẽẽmĩthĩ

⁵ “Nẽẽthĩ ꞌyioko, hobodootha naa hĩ Baaba baa ĩꞌthõõannaa nganĩĩta nẽ hiꞌthihi eet umwa hõrggẽẽnaa cunuung ꞌcĩ ajinna anneeka, ‘Õkẽẽna buúk?’

⁶ Ommothiinnu hinnia, hĩnĩngĩtĩ thooꞌthiok baag haduhaakuung naa ngagiita.

⁷ Nẽẽthĩ haduhaakuung dĩdĩ, hõkõ naa ĩĩmwaanĩ, hĩnĩngĩtĩ bũnnai cunuung. Ma hõllõngaa hõkõ, aitiõõ hatĩ Ellioohiti hõllõngaa aku hĩ ngagiita nẽ má hũũha, hõkõ hatĩ hĩꞌthõõakuung ngagiit ĩnõõnnõ.

⁸ “Aku hatĩ Lorii ꞌcĩ Ẽllẽẽmĩth hikia heteretheek eet cĩg looc nicci, bathi cĩ ꞌthẽccaanõ hĩ bũnnai cĩ Nyekuci, hĩ thõõth ꞌcĩ ẽttẽẽdĩ Nyekuci thooꞌthiok.

⁹ Eterꞌtheek hatĩ Lorii ĩhõõggõ, ngaatĩ ĩĩnnĩ nẽẽg ꞌthẽccanniook, hĩnĩngĩtĩ baa hõllõngaa ẽlẽmma nẽẽg nganĩĩta.

¹⁰ Ẽrẽk ĩhõõggõ bũnnai cĩ Nyekuci, hĩnĩngĩtĩ hõkõ naa hĩ Baaba nẽ hõllõngaa hatĩ acĩnnaangu nganĩĩt tarĩ.

¹¹ Nẽ ẽrẽk ĩhõõggõ ngaatĩ ẽttẽẽdĩ Nyekuci thooꞌthiok, hĩnĩngĩtĩ ẽttẽẽd Nyekuci thõõth cĩ habu cĩ looc nicci ẽlẽk.

¹² “Haꞌnyahi naa thõõth ꞌcĩ maka ꞌcĩ occa haduhaakuunga, ꞌcĩ hõllõngaa uuluyyu ngaatĩ occa athiknu.

¹³ Ma ikia Lorii ꞌcĩ Ẽllẽẽmĩth cĩ thõõth ꞌcĩ ĩĩn dĩdĩ, etereꞌthuung hatĩ agaac thõõth vẽlẽk ꞌcĩ ĩĩn dĩdĩ. Aitiõõ hõllõngaa aduha nẽẽ thõõth cĩnnĩ ẽmmẽn, aduhaakuung hatĩ thõõth ꞌcĩ athĩkna nẽẽ hĩ Baaba diooni nẽ hatĩ uduhaahuung thooꞌthiok ꞌcĩg hatĩ nga au horumwa.

¹⁴ Aꞌnyahaaka hatĩ Lorii nganĩĩt bulẽẽnĩt ngaatĩ aku õkõõĩ nyeemuut caannĩ nẽ ikia uduhaahuung ngagiita.

¹⁵ Ĩĩn hẽlẽggĩ vẽlẽk cĩ Baaba caannĩ. Ĩnõõ ꞌcĩ haĩnnĩ naa, aku hatĩ aduhaakuung Lorii nyeemuut ꞌcĩ athĩkna nẽẽ hĩ nganĩĩt ko.”

Ũũkcĩ hatĩ mothiiniti hĩĩ taliinit

¹⁶ “Iitiõõ hatĩ niig hõllõngaa acĩnnaangu nganĩĩt hĩdĩhĩdĩĩc, ma uruta cĩnnĩ, au hatĩ acĩnnaangu tarĩ.”

¹⁷ Ma ho, ijitto nuyyiooha ũgẽẽgĩ cĩgĩnnĩg nyaagwaana ĩĩtõ, “Aĩ thõõth ꞌcĩ aduha Yeesu ho ne, ngaatĩ aĩnnĩ, ‘Hõllõngaa nõõ hatĩ acĩnnaangu hĩdĩhĩdĩĩc, ma hatĩ uruta nẽ iita ĩcĩttaangu ho,’ ne ꞌcĩ aĩnnĩ nẽẽ, ‘Nga hõkõ hĩ Baaba ho’?”

¹⁸ Baa aalla ajinõõ nuyyiooha aĩ, “Ne ꞌcĩ õthõõth Yeesu aĩ, ‘Hĩdĩhĩdĩĩc ko?’ Erekeet thõõth ꞌcĩ õthõõth nẽẽ ho.”

¹⁹ Ammũdeek baa aga Yeesu ngaatĩ adiim ajini nuyyiooha ĩnõõnnõ thooꞌthiok iccig, nĩngĩtĩ annẽẽkĩ ĩhõõggõ, “Ajinoonnu niig, hĩnĩngĩtĩ thõõth aa haduha naa haini, ‘Hõllõngaa nõõ hatĩ acĩnnaangu hĩdĩhĩdĩĩc nẽ urutaa cĩnnĩ, hiita hĩcĩttõõ tarĩ’?

²⁰ Haduhaakuung dĩdĩ, aluyyu hatĩ nẽ hinnia accamattoothĩk eeta cĩg looc nicci thõng. Ommothiinnu hatĩnĩ nẽ hatĩ ikia ũtũhũĩ mothiiniti cunuung ho ĩĩ taliinit.

²¹ “Ma uttur ngaa umwa ꞌgoonnia, aꞌnyak nẽẽ huciith cobbi. Nẽẽthĩ, ma utuhuyyiaa loholeec ẽlẽk, ikia ataarõthĩ ngaa huciith nẽ accamanoothĩk, hĩnĩngĩtĩ ittiraak nẽẽ loholeec looc nicci.

²² Nẽẽthĩ, aaĩ hatĩ noho buúk hĩ ngagiita. Ĩĩn ꞌyioko ciee ꞌthaa ꞌcĩ ommothiinnu niiga, nẽẽthĩ, nga hatĩ hau hõmmõtõõ tarĩ nẽ thĩ hatĩ accamattoothihu nẽ aitiõõ hatĩ ẽẽtĩ ꞌcĩ aggamaannuung taliinit cunuung ko tõõ.

²³ Kõr niccia, iittiõõ hatĩ ꞌgii ꞌcĩ nga ajinnaangu niig nganĩĩt tõõ. Haduhaakuung dĩdĩ, aaꞌnyuung hatĩ Baaba ꞌgii vẽlẽk ꞌcĩ ajinnu niig ĩnõõnnõ ꞌthaarĩĩ cĩgannĩg.

²⁴ Nga ijinit niig ꞌgiimwa hĩĩ noho ꞌthaarĩĩ cĩgannĩg. Ijinit, hátĩ haaꞌnyĩhoothĩhuunga, nẽẽthĩ hatĩ accamattoothihu ũdũt.

²⁵ “Tananga baa hadticaniini naa thooꞌthiok ꞌcĩg awantoothĩhĩ, aku hatĩ kõrra ꞌcĩ hõllõngaa hadticaniini naa thooꞌthiok ꞌcĩg awantoothĩk ko tarĩ, nẽẽthĩ, haduhaakuung hatĩ cũrũmũũm thõõth cĩ Baaba.

²⁶ Kõr niccia, ajinnu hatĩ niig Baaba ꞌthaarĩĩ cĩgannĩg. Hõllõngaa haini naa hajini hatĩ ĩnõõnnõ, hĩnĩngĩtĩ ngagiita.

²⁷ Aitiõõ, ammĩnannuung ngagiit Baaba, hĩnĩngĩtĩ baa ammĩnannaangu niig nganĩĩta nẽ elemtu ngaatĩ hakuuni naa hĩ Baaba.

²⁸ Baa hakuu naa hĩ Baaba hikia looccaa nĩĩcĩ nẽ ꞌyioko hũtũngeeha naa looc nicci, hobodootha hĩ Baaba.”

²⁹ Ma ho, ĩĩtõ nuyyiooha cĩgĩnnĩg, “Uduhaaheet aattĩ thõõth cũrũmũũm nẽ iittiõõ hõllõngaa aduhaakeet thõõth thooꞌthiohĩĩ ꞌcĩg awantoothĩhĩ.

³⁰ Nẽẽthĩ ꞌyioko, hĩcĩtta ngaatĩ agaĩ thõõth vẽlẽk nẽ iittiõõ eet umwaa ꞌcĩ occa nga ajinni thõõth umwa tarĩ tõõ. Aaꞌnyeet thooꞌthioha cieeg vẽlẽk hẽlẽmta naag hĩĩtta, akuu nii hĩ Nyekuc.”

³¹ Ẽdẽcĩ Yeesu ĩhõõggõ anneek, “Elemtu aattĩ thõõth caannĩ uruta?

³² Nẽẽthĩ, aku hatĩ kõrra nẽ ikia ẽlẽk, ꞌcĩ hatĩ ĩꞌthaaninnu niig õõt olooyyiohĩĩ cugguung hõdẽĩ hõdẽĩ. Ũũnnĩkaangu hatĩ niig nganĩĩt ẽmmẽn. Nẽẽthĩ, hõllõngaa hatĩ haaĩ naa ẽmmẽn, hĩnĩngĩtĩ aaĩ Baaba caannĩ hĩ nganĩĩta.

³³ Baa huduhaahuung naa thõõth icci, hátĩ aaut lõꞌngõõc, hĩnĩngĩtĩ nganĩĩta. Ammũdaannu hatĩ ꞌcannan looccaa nĩĩcĩ. Nẽẽthĩ, aanytĩk ꞌthinneeti cugguung hokomit! Hĩllõõana naa looc nicci.”