Yõaannẽ 11 - ꞌBuuk cĩ Thõõth cĩ Nyekuci

Daahĩth cĩ Laaꞌtharõ

¹ Baa aaĩ eet umwaa ꞌcĩ õmmõõrĩ ꞌcĩ haĩ Laaꞌtharõ õlõõ ꞌcĩ haĩ Bẽthani, arũmĩ hĩ ngõõnõgĩ ꞌramma, haĩ umwa Maria nẽ hĩĩtõ umwa Maarta.

² Maria ciee õmmõõrĩ ꞌgotonnia Laaꞌtharõ ho, ĩnõõnnõ baa uud ꞌthoo cĩg Makayyiooktak ngõõrraa ꞌcĩ õꞌngõlĩ ẽmmẽdĩ nẽ upuppuucan ĩmaa cĩgĩnnĩg.

³ Nĩngĩtĩ ĩꞌthõõĩkĩ ngoonoggia Yeesu nyeemuut annẽẽkĩ, “Makayyioohit, õmmõõrĩ ꞌgoonu gõõng ammĩnani.”

⁴ Ma baa athĩhĩ Yeesu nyeemuut icci ho, ikia õthõõth ĩĩ, “Aitiõõ hatĩ mõõrĩthĩ ciee hõllõngaa adtuurnik daahĩtha dioo. Ĩĩn hatĩ bulẽẽnĩt cĩ Nyekuci, hátĩ hubuluthi Ngeerĩnĩ daahĩtha nĩĩcĩ.”

⁵ Baa ammĩnan Yeesu Maarta hĩ ngõõnĩ hĩ Laaꞌtharõ.

⁶ Nẽẽthĩ, ma baa athĩhĩ nẽẽ aĩ õmmõõrĩ Laaꞌtharõ ho, ikia aau nẽẽ ngaatĩ baa aayyi ho waathinniook ꞌramma.

⁷ Nĩngĩtĩ annẽẽkĩ Yeesu nuyyiook cĩgĩnnĩg, “Hoboddiooth nõõ hõõt ĩĩcĩ looc cĩ ꞌJudeea.”

⁸ Ẽdẽcĩ nuyyiooha cĩgĩnnĩg ĩnõõnnõ anneek, “ꞌLimmannioohit, iyyia nõõ atab õhõdaanni eeta cĩg ꞌJudeei nganiit biyyiẽẽnĩ aa ꞌyiohoothong nẽ ꞌyioko idiim obodoothu ĩĩca tarĩ?”

⁹ Ẽdẽcĩ Yeesu aĩ, “Hõllõngaa nooyyia aꞌnyak waathĩnĩ ꞌthaaꞌnya õmmõtõ hĩ ꞌramma? Aitiõõ ẽẽtĩ ꞌcĩ õvvõ waath hõllõngaa ẽttẽẽd looc, hĩnĩngĩtĩ acĩnĩ nẽẽ lanyitaa cĩ looc nicci.

¹⁰ Má õvvõ ẽẽtĩ baal, aga ngaatĩ adaacanĩ ĩnõõnnõ ꞌgiimwaa hẽttẽẽd looc, hĩnĩngĩtĩ aitiõõ lanyit tõõ.”

¹¹ Ma urutaa ꞌcĩ uduhaaĩ Yeesu thõõth icci ẽlẽk, ikia õthõõth nẽẽ ĩĩ, “Oongi ꞌgõõnẽẽtĩ cĩnaac Laaꞌtharõ haaga, nẽẽthĩ, hõkõ naa hũũk hittiran ĩnõõnnõ hĩtĩnga.”

¹² Ẽdẽcĩ nuyyiooha anneek, “Makayyioohit, má oongi Laaꞌtharõ thõng, occa hatĩ aku abũnnaa.”

¹³ Baa õthõõth Yeesu thõõth ꞌcĩ daahĩth cĩ Laaꞌtharõ, ammuk hinnia nuyyiooha cĩgĩnnĩg aĩ, õthõõth nẽẽ ũꞌnyaak dĩdĩ.

¹⁴ Ma ho, ikia uduhaak Yeesu ĩhõõggõ cũrũmũũm ĩĩnnĩk, “Hõlõ, adaak Laaꞌtharõ!

¹⁵ Nẽ hĩnĩngĩtĩ ngagiita, hatali naa ngaatĩ haitõõnnĩ ĩĩca tõõ, hátĩ iita aꞌnyahit niig lemiinit. Nẽẽthĩ ꞌyioko, hõõt hĩcĩnĩt ĩnõõnnõ.”

¹⁶ Ma ho ẽdẽc Tomaaꞌthio ꞌcĩ haĩ ꞌthaar ũgĩ Diidimo, nĩngĩ gõõng haĩ naag hũũhũꞌnya, uduhaak ꞌgõõnõgĩ ĩĩnnĩk, “Hõõt naag buúk hadaahit hõdẽĩ hĩ Yeesu.”

Amammaayan Yeesu ngõõnõgĩ Laaꞌtharõ

¹⁷ Ma baa õdõlan Yeesu ꞌtaaũn cĩ Bẽthani, ikia ũmmũda ngaatĩ adaõõĩ Laaꞌtharõ aꞌnyak waathinniook ꞌwec ꞌloohatõõ.

¹⁸ Baa ꞌrẽẽn Bẽthani hĩ ꞌJeruꞌthalẽm, aꞌnyak maaĩlꞌnya ꞌramma.

¹⁹ Baa mẽẽlĩg eeta cĩg ꞌJudeei ꞌcĩg au amammaayan Maarta hĩ Maria ulwaanaa cĩ ꞌgõtõnõõnĩ.

²⁰ Ma baa athĩhĩ Maarta aĩ ikia Yeesu ho, ikia ĩtĩnga ũũk ithirriaman ĩnõõnnõ. Nẽẽthĩ, baa ũũnnĩk nẽẽ Maria õlõ.

²¹ Ma ho, ikia ĩĩnnĩk Maarta Yeesu, “Makayyioohit, ꞌyioko baa au nii ngaati, occa baa hõllõngaa adaahĩ ꞌgõtõna.

²² Nẽẽthĩ nẽẽꞌthẽk ꞌyioko buúk, haga naa aaꞌnyi hatĩ Nyekuci ꞌgii vẽlẽk ꞌcĩ ajini nii hĩ ĩnõõnnõ.”

²³ Ẽdẽcĩ Yeesu Marta anneek, “Arũgna hatĩ ꞌgotonu tarĩ.”

²⁴ Ẽdẽcĩ Maarta aĩ, “Dĩdĩ, arũgna hatĩ Laaꞌtharõ tarĩ hatĩ ũrũgta eeta vẽlẽk, kõr cĩ decciaanĩt cĩ lootu.”

²⁵ Ẽdẽcĩ Yeesu tarĩ aĩ, “Nganĩĩt ꞌcĩ harũgtha eet daahĩtha nẽ haaꞌnyĩha rũgẽt. Ẽẽtĩ ꞌcĩ ẽlẽmma nganĩĩt tananga hadaak, arũgĩ hatĩnĩ.

²⁶ Nẽ ẽẽtĩ ꞌcĩ arũgĩ, hĩnĩngĩtĩ ẽlẽmĩ thõõth caannĩ, hõllõngaa hatĩ adaahĩ ũdũt. Elemi nii thõõth icci?”

²⁷ Ẽdẽcĩ Maarta anneek, “Eei, helemi Makayyioohit! Helemi naa ngaatĩ ĩĩnnĩ nii Krĩstõ Ngeertĩ Nyekuci, baa hammuka naag haĩnna aku hatĩ looccaa nĩĩcĩ.”

²⁸ Ma baa uduha Maarta thõõth icci ẽlẽk, ikia õbõdõõthĩ ũũk ũtũvva ngõõnĩ Maria ngadiiha nẽ ĩĩnnĩk, “Aaĩ ꞌlimmannioohiti ngaati, adiimmi nganiita.”

²⁹ Ma baa athĩhĩ Maria thõõth icci ho, ĩtĩnga hĩdĩĩkoothong ũũk ĩcĩn Yeesu.

³⁰ Baa nga hõdõlan Yeesu õlõ, hĩnĩngĩtĩ baa nga aayyiaa nẽẽ ngaatĩ baa õõ õmmõtõõnĩ hĩ Maarta.

³¹ Ma baa adtuuha eeta cĩg ꞌJudeei ꞌcĩg baag amammaayan Maria ꞌcieetõõ, ꞌgõõl ꞌcĩ ĩꞌngaannĩ nẽẽ hataman nẽ uduhun battaala ho, unuyyiõõthĩ ĩnõõnnõ muhẽẽttaa ꞌcĩ aĩnnĩ, õkõ mõnõ hatĩ alu nẽẽ waanyaa cĩ Laaꞌtharõ thõng.

³² Ma baa õdõlan Maria nĩngĩtĩ aayyi Yeesu ho, ikia ẽttẽẽd looc ꞌthõõnĩĩ cĩg Yeesu nẽ ĩĩnnĩk ĩnõõnnõ, “Makayyioohit, má baa au nii ngaati, occa ꞌyioko baa hõllõngaa adaahĩ ꞌgõtõna.”

³³ Ma baa adtuuha Yeesu Maria hĩ eet cĩg ꞌJudeei ꞌcĩg õõkõra hĩ ĩnõõnnõ ngaatĩ arruuẽnĩ ho, ikia uhum thõõth ciee Yeesu ꞌthĩnĩt gẽrrẽẽt.

³⁴ Ma ho, ijin nẽẽ ĩhõõggõ ĩĩnnĩk, “Adayyu baa Laaꞌtharõ ngaana?” Ẽdẽcĩ nẽẽg ĩnõõnnõ anneek, “Makayyioohit, ijjia hõõt hĩcĩnĩt.”

³⁵ Nĩngĩtĩ alui Yeesu.

³⁶ Ma nĩngaata othoothito eeta cĩg ꞌJudeei ĩĩtõ, “Ĩcĩnĩt nõõ ngaatĩ ammĩnanĩ Yeesu Laaꞌtharõ!”

³⁷ Baa õthõõth hinnia ũgẽẽgĩ aĩ, “Hõllõngaa nooyyia baa aaꞌnyĩk Yeesu rubenniaahit hĩcĩnĩ nẽ baa hõllõngaa alaam nẽẽ daahĩth ꞌcĩ Laaꞌtharõ inni?”

Ũrũgũtha Yeesu Laaꞌtharõ daahĩtha

³⁸ Baa alĩĩlĩ Yeesu thõõth cĩ daahĩth cĩ Laaꞌtharõ gẽrrẽẽt, baa õdõlan nẽẽ waany ꞌcĩ acciꞌthiaa lõbaraba nẽ ũꞌnyũũgĩ biyyia.

³⁹ Ma nĩngaata, uduhaak Yeesu ĩhõõggõ ĩĩnnĩk, “Eꞌnyeehit bẽẽ nicci.” Ẽdẽcĩ hinnia Maarta Yeesu anneek, “Makayyioohit, õtõngõl ꞌyioko ẽlẽ cĩnnĩ gẽrrẽẽt, hĩnĩngĩtĩ baa adaĩ nẽẽ ibiaali ꞌrĩng, aꞌnyak ꞌyioko waathinniook ꞌwec.”

⁴⁰ Ẽdẽcĩ Yeesu ĩnõõnnõ anneek, “Nga nooyyia huduhaahii naa nganiit hiinnihi, má aꞌnyahi lemiinit, acini hatĩ bulẽẽnĩt cĩ Nyekuci?”

⁴¹ Nĩngĩtĩ ẽꞌnyẽẽhĩ eeta bẽẽ. Ma ho, ĩcĩnõõthĩ Yeesu hẽẽtkujjieen nẽ alaõ ĩĩ, “Ĩlaallẽ Baaba ngaatĩ athĩkna nganĩĩta.

⁴² Haga naa gõõng athĩknaa nii nganĩĩt hõdõõkõthĩ, nẽẽthĩ, haduha thõõth icci, hĩnĩngĩtĩ eet ꞌcĩg harũmeenna ngaati ho, hátĩ helemit nẽẽg ngaatĩ ĩꞌthõõanna nii nganĩĩta.”

⁴³ Ma baa uduha Yeesu thõõth icci ẽlẽk, ikia ũtũvvõ nẽẽ moloohaa cobbi ĩĩ, “Laaꞌtharõ, duhuna battaala!”

⁴⁴ Nĩngĩtĩ aduknaanĩ ẽẽtĩ baa adaak ẽlẽk ko battaala. Baa ecebbi athĩna cĩgĩnnĩg hĩ ꞌthoo ceremwaanĩĩ ꞌcĩg gõõng amũmmũũraniini daakiaha. Baa aaĩ cẽrẽm umwaa ꞌcĩ ammũt muum cĩnnĩ buúk. Nĩngĩtĩ annẽẽkĩ Yeesu eet, “Oogtĩk ĩnõõnnõ ꞌgõõl hũũk.”

Atabit uruhit makayyiooha cĩg ꞌJudeei Yeesu

⁴⁵ Iita elemit eeta cĩg ꞌJudeei ꞌcĩg mẽẽlĩg ꞌcĩg baag au acĩn Maria Yeesu, hĩnĩngĩtĩ ĩcĩnĩt nẽẽg thooꞌthiok baag adĩman nẽẽnĩ.

⁴⁶ Baa hinnia õõ aduhaak eeta cĩg ꞌJudeei ũgẽẽgĩ Variꞌtheei thooꞌthiok ꞌcĩg baag adĩman Yeesu.

⁴⁷ Nĩngĩtĩ alũtẽẽnĩ makayyiooha cĩg paadĩrꞌnyaannu hĩ Variꞌtheei hĩ lothippit ꞌcĩ makayyioohu nẽ utuvvuyyia mõtõõnĩt lokihooa nẽ utuhanit thõõth ĩĩtõ, “Hadĩman occa hutuno? Adtican ẽẽtĩ ciee thooꞌthiok ꞌcĩg mẽẽlĩg ꞌcĩg ĩnaat eeta.

⁴⁸ Má hũũnnĩk eet icci haau hoti, ẽlẽmĩ hatĩ eeta vẽlẽk ĩnõõnnõ nẽ hatĩ iita ĩꞌthaanito ũũrũtana cĩg ꞌRooma ꞌCieeth cĩ Nyekuci hĩ looc cĩnaac vẽlẽk.”

⁴⁹ Baa aaĩ ẽẽtĩ umwaa ꞌcĩ haĩ Kaĩava. Baa ĩĩn nẽẽ paadĩr cobbi irkit niccia. Nĩngĩtĩ annẽẽkĩ nẽẽ ꞌgõõnõgĩ, “Aitiõõ ꞌgii ꞌcĩ agayyu niig tõõ!

⁵⁰ Hõllõngaa agayyu niig ngaatĩ occa mẽẽn hatĩ adaahĩ ẽẽtĩ hõdẽẽthõng, hĩnĩngĩtĩ eet vẽlẽk, hĩllõõan ngaatĩ occa acuddiaanĩ eeta looc vẽlẽk?”

⁵¹ Baa hõllõngaa aduha Kaĩava thõõth icci ẽmmẽn. Hĩnĩngĩtĩ baa ĩĩn nẽẽ paadĩr cobbi irkit niccia, ikia eteretheek Nyekuci ĩnõõnnõ huduha hĩĩ, adaahĩ hatĩ Yeesu, hĩnĩngĩtĩ eet cĩg ꞌJudeei vẽlẽk.

⁵² Nẽẽthĩ nẽẽꞌthẽk, hõllõngaa occa adaahĩ Yeesu, hĩnĩngĩtĩ eet cĩg ꞌJudeei diooni, baa adaahĩ nẽẽ, hĩnĩngĩtĩ eet cĩg Nyekuci ꞌcĩg ĩꞌthanothoothĩk looc nicci vẽlẽk, hátĩ hũlũta nẽẽ ĩhõõggõ vẽlẽk ngaatĩ hõdẽẽthõng.

⁵³ Nganĩngĩtĩ kõr niccia, iꞌthiattaaĩ makayyiooha cĩg ꞌJudeei utuhanit ꞌgõõl ꞌcĩ hatĩ aruhi Yeesu.

⁵⁴ Hĩnĩngĩtĩ thooꞌthiok iccig, iittiõõ Yeesu hõllõngaa õvvõ lothippitaa cĩ ꞌJudeei. Baa nẽ ikia ũũk nẽẽ ĩĩcĩ looc umwa ꞌcĩ õbõhõõ hĩ horu ꞌcĩ õdõhõhĩĩ kak, ĩĩcĩ õlõ umwa ꞌcĩ haĩ Evaraim, ngaatĩ baa õõ aattiyyi hĩ nuyyiook cĩgĩnnĩg.

⁵⁵ Ma baa õbõhĩ Kõrra cĩ Haangittõõ cĩ ꞌJudeei, iita õõt ũtũũnyĩtõ eeta ꞌcĩg mẽẽlĩg ꞌcĩg au olooyyiohĩ ꞌJeruꞌthalẽma, eleeti cĩggĩĩng nyattallioohĩĩ cĩggĩĩng, hũkũmattoothĩk nga hõdõlan Kõrra cĩ Haangittõõ.

⁵⁶ Baa aalla adiim makayyiooha cĩg ꞌJudeei Yeesu noho. Ma baa abĩlĩ nẽẽg ngaatĩ õbõhõõ hĩ halang cĩ ꞌCieeth cĩ Nyekuci ho, iita ijitto ẽmmẽn ĩĩtõ, “Ammuku niig ainnu ne? Hõllõngaa occa hatĩ aku Yeesu kõrraa cobbi ho ũdũt?”

⁵⁷ Nẽẽthĩ, baa ĩꞌthõõcõ makayyiooha cĩg paadĩrꞌnyaannu hĩ Variꞌtheei nyeemuut ꞌcĩ aĩ, má udtuuha eet umwaa nĩngĩtĩ aayyi Yeesu, aꞌnyĩĩk huduha hatĩ haggamĩ.