Yõaannẽ 10 - ꞌBuuk cĩ Thõõth cĩ Nyekuci

Tũhayyioohit ꞌcĩ abũnnaa hĩ aꞌtha cĩgĩnnĩg

¹ Baa õthõõth Yeesu aĩ, “Haduhaakuung dĩdĩ, ẽẽtĩ ꞌcĩ hõllõngaa aduhun logguur cĩ aꞌthaannu hattũũgaa cobbi nẽ ĩꞌngõtha araana ꞌgõõlaa umwaanĩ huduhuna ĩĩttõõ, ĩĩn nẽẽ igorriaahit.

² Ẽẽtĩ ꞌcĩ adukna hattũũgaa cobbi, ĩĩn tũhayyioohit cĩ aꞌthaannu.

³ Abbuuhik bekioohiti cĩ hattuugu tũhayyioohit cĩ aꞌthaannu hattũũg nẽ ĩthĩhĩt aꞌtha molook cĩnnĩ. Avvĩ tũhayyioohiti aꞌtha cĩgĩnnĩg ꞌthaarĩĩ cĩggĩĩng cũũmõ cũũmõ nẽ ĩꞌngĩdeek geyyia.

⁴ Ma baa aꞌnyaha nẽẽ aꞌtha cĩgĩnnĩg vẽlẽk battaala, ikia utuanẽẽhĩ nẽẽ ĩhõõggõ nẽ ũnnẽẽcõ aꞌtha cĩgĩnnĩg ĩnõõnnõ uruta, hĩnĩngĩtĩ aga aꞌtha molook cĩnnĩ.

⁵ Aitiõõ hatĩ aꞌtha hõllõngaa occa anũ eet ꞌcĩ ꞌrĩĩng, avvir hinnia hatĩ thõng, hĩnĩngĩtĩ hõllõngaa aga nẽẽg molook cĩ eet ꞌcĩ ꞌrĩĩng.”

⁶ Baa aduhaak Yeesu eet dtẽẽllẽn iccig awantoothĩk ko, aitiõõ hinnia hõllõngaa athĩhĩ eeta thõõth ꞌcĩ aduhaak Yeesu ĩhõõggõ ho buúk.

Ĩĩn Yeesu tũhayyioohit ꞌcĩ abũnnaa

⁷ Ma ho, uduhaak Yeesu eet tarĩ ĩĩnnĩk, “Haduhaakuung dĩdĩ, hĩĩnĩ naa hattũũg cobbi cĩ aꞌthaannu.

⁸ Eeta vẽlẽk baag uwwattaa hĩ nganĩĩta, ĩĩn igorriaak hĩ ꞌloorriak nẽ baa hõllõngaa athĩhĩ aꞌtha ĩhõõggõ.

⁹ Hĩĩnĩ naa hattũũg cobbi. Ẽẽtĩ ꞌcĩ adukna hĩ nganĩĩta, eelliaa hatĩnĩ. Adukna hatĩ nẽẽ hattũũg cobbi nẽ uduhun ũũk battaala, hĩ aꞌthẽẽtĩ ꞌcĩ õkõ ẽgĩ mudduuny.

¹⁰ “Dtiic cĩ igorriaaktõ dioo ꞌcĩ aku ĩgõrꞌthĩ aꞌtha nẽ ucuhana nẽ ĩꞌthaan thõng. Nẽẽthĩ, dtiic caannĩ ꞌcĩ hakuu haaꞌnyĩkĩĩ aꞌtha rũgẽt vẽlẽk ꞌcĩ aalla ooo.

¹¹ Hĩĩnĩ naa tũhayyioohit ꞌcĩ abũnnaa. Ẽlẽmana tũhayyioohiti ꞌcĩ abũnnaa, rũgẽt cĩnnĩ, hĩnĩngĩtĩ aꞌtha cĩgĩnnĩg.

¹² Aitiõõ tũhayyioohiti ꞌcĩ adũmanniaa thõng, hõllõngaa ĩĩn baattĩ aꞌthaannu. Nẽ ma udtuuha nẽẽ huduumot, ũũnnĩk hinnia hatĩ aꞌtha ẽmmẽn nẽ ivvira. Nẽ ikia adak huduumotĩ aꞌtha nẽ ĩꞌthaan ĩhõõggõ.

¹³ Avvir hatĩ ẽẽtĩ, hĩnĩngĩtĩ ĩĩn nẽẽ tũhayyioohit ꞌcĩ adũmanniaa thõng nẽ hõllõngaa aallak aꞌtha buúk.

¹⁴ “Hĩĩnĩ naa tũhayyioohit ꞌcĩ abũnnaa. Haga naa aꞌtha cĩgannĩg nẽ agayyia aꞌtha cĩgannĩg buúk nganĩĩta.

¹⁵ Hĩcĩ agayya nganĩĩt Baaba, haga naa buúk ĩnõõnnõ. Nẽ hẽlẽmanaa naa rũgẽt caannĩ, hĩnĩngĩtĩ aꞌtha cĩgannĩg.

¹⁶ Haꞌnyahi naa aꞌtha ũgĩ ꞌcĩg nga aitiõõ logguuratõõ cĩ tõõ. Hadiimi hatĩ halũta ĩhõõggõ buúk hiita logguuratõõ cĩ. Athĩhĩ hatĩ nẽẽg molook caannĩ, ĩĩn hatĩ nyalõmaar hõdẽẽthõng nẽ ĩĩ tũhayyioohiti hõdẽẽthõng.

¹⁷ “Ammĩnannaa Baaba nganĩĩt, hĩnĩngĩtĩ hẽlẽmanaa naa rũgẽt caannĩ hadaahõ nẽ hatĩ hikia hũrũga tarĩ.

¹⁸ Aitiõõ ẽẽtĩ ꞌcĩ aggamaanna nganĩĩt rũgẽt caannĩ tõõ. Hẽlẽmanaa naa rũgẽt caannĩ ẽmmẽn. Haꞌnyahi naa makaaꞌthĩt ꞌcĩ hẽlẽmanaanĩ rũgẽt caannĩ nẽ hõbõdaaĩ tarĩ, hĩ baa aduhaaka Baaba.”

¹⁹ Ma thooꞌthiohĩĩ cĩg vẽlẽk, iita eꞌngerrio eeta cĩg ꞌJudeei tarĩ.

²⁰ Baa aĩ eeta ꞌcĩg mẽẽlĩg, “Eet ꞌcĩ aꞌnyak lori ꞌcĩ abathĩ niccieeni nẽ adak maangõnĩ! Inni ĩthĩhĩt ĩnõõnnõ ho?”

²¹ Nẽẽthĩ, baa õthõõth eeta ũgẽẽgĩ aĩ, “Aitiõõ ẽẽtĩ ꞌcĩ aꞌnyak lori ꞌcĩ abathĩ hõllõngaa occa õthõõth hoti. Occa gõõng aaꞌnyĩk lorii ꞌcĩ abathĩ eet ꞌcĩ rubenĩ hĩcĩnĩ hutuno?”

Ũtũbũrĩt eeta cĩg ꞌJudeei Yeesu

²² Ma baa ĩĩ lõõcĩ tagĩĩth, baa aaĩ Yeesu ꞌJeruꞌthalẽma, adak Karrama ꞌcĩ Aggataniini ꞌCieeth cĩ Nyekuci.

²³ Kõr niccia, baa õvvõ Yeesu halaangatõõ cĩ ꞌCieeth cĩ Nyekuci, ꞌThĩĩmaa cĩ ꞌThõlõmõõnẽ.

²⁴ Ma nĩngaata, uluttiaak eeta cĩg ꞌJudeei ĩnõõnnõ nẽ ijinit ĩĩttĩk, “Ammiꞌthẽẽnĩ thõõth ĩꞌthõng ningina? Má ĩĩnĩ Krĩstõ, duhaaheet cũrũmũũm.”

²⁵ Ẽdẽcĩ Yeesu ĩhõõggõ anneek, “Ma baa huduhaahuung ẽlẽk nẽ aalla hõllõngaa ẽlẽmmaangu noho. Thooꞌthioha ꞌcĩg hadticani naa ꞌcĩg ĩnaat eeta ꞌthaarĩĩ cĩg Baaba ho, õthõõꞌtha nganĩĩta.

²⁶ Nẽẽthĩ, aitiõõ niig hõllõngaa ẽlẽmmaangu nganĩĩt, hĩnĩngĩtĩ hõllõngaa iiginnu niig aꞌtha cĩgannĩg.

²⁷ Athĩhĩ aꞌtha cĩgannĩg molook caannĩ nẽ hagawa naa ĩhõõggõ nẽ unuyyia nẽẽg nganĩĩta.

²⁸ Haaꞌnyihi naa aꞌtha rũgẽt ꞌcĩ aalla ooo nẽ aitiõõ hatĩ nẽẽg hõllõngaa adaahĩ ũdũt. Nẽ aitiõõ eet ꞌcĩ occa avvucanaanna nganĩĩt ĩhõõggõ athĩnĩĩ cĩgannĩg tõõ.

²⁹ Ĩllõõan Baaba baa aaꞌnya nganĩĩt ĩhõõggõ vẽlẽk. Aitiõõ ẽẽtĩ ꞌcĩ occa avvucana ĩhõõggõ athĩnĩĩ cĩgĩnnĩg tõõ.

³⁰ Hĩĩgĩnna naag hĩ Baaba hõdẽẽthõng.”

³¹ Ma nĩngaata noho, uuratta makayyiooha cĩg ꞌJudeei biyyiẽẽn ꞌcĩg adiim õhõdaanĩ Yeesu.

³² Anneek hinnia Yeesu ĩhõõggõ, “Baa hĩdĩmana naa thooꞌthiok ꞌcĩg mẽẽlĩg ꞌcĩg ĩnaat eeta hõrggẽẽnaa cunuung, ꞌcĩg au hĩ Baaba. Nẽẽthĩ ꞌyioko, thooꞌthiok iigia ꞌcĩg adiim õhõdaannaangu niig nganĩĩt ko?”

³³ Ẽdẽcĩ eeta cĩg ꞌJudeei Yeesu anneek, “Hõllõngaa hadiimma naag hõhõdaanni nganiit, hĩnĩngĩtĩ thooꞌthiok iccig. Hadiimma hõhõdaanni, hĩnĩngĩtĩ odoomi nii Nyekuc, ẽẽtĩ ꞌcĩ holli õõ haaga nẽ idiim aarihuu ẽlẽ cunni hĩĩ Nyekuc.”

³⁴ Ẽdẽcĩ Yeesu eet cĩg ꞌJudeei anneek, “Hõllõngaa nooyyia eheeddi nyattaalaa cunuung aĩ Nyekuci, ‘Iiginnu niig nyekuꞌnya?’

³⁵ Hõllõngaa occa ẽppẽhanoonnu niig hĩ ꞌBuuk cĩ Nyekuci. Nẽẽthĩ, baa aũ Nyekuci eet tĩko anneek, ‘nyekuꞌnya.’

³⁶ Inni ahaddiahaangu ĩĩttĩhaangu hadĩmani ꞌthẽccan ꞌcĩ abathĩ dtẽc ngaatĩ haĩnnĩ, hĩĩnĩ Ngeertĩ Nyekuci ho? Nẽ nẽẽ tarĩ, Baaba ꞌcĩ baa ẽbẽraanna nganĩĩt nẽ ĩꞌthõõawaa hikia loota nĩnga ho.

³⁷ Má hõllõngaa hadĩmani naa thõõth hĩ baa adĩman Baaba, ma thĩ nga hẽlẽmmaangu nganĩĩta.

³⁸ Nẽẽthĩ, má hadĩmani naa thooꞌthiok ꞌcĩg adĩman Baaba, tananga hiittiõõ hõllõngaa ẽlẽmmaangu nganĩĩta, elemit ꞌthĩ nẽẽ thooꞌthiok ꞌcĩg ĩnaat eeta ho, hátĩ agaac ĩĩtõ, aaĩ Baaba hĩ nganĩĩta nẽ haau naa hĩ ĩnõõnnõ.”

³⁹ Ma nĩngaata, idiimito eeta cĩg ꞌJudeei aggamit Yeesu tarĩ, alĩĩta hinnia Yeesu ĩhõõggõ thõng.

⁴⁰ Ma ho, abaahĩ Yeesu hidioo cĩ ꞌJõrdanĩ baakĩta, ngaatĩ baa aggamẽẽkĩ Yõaannẽ eet baattithimo baa waathinnioohĩĩ ꞌcĩg oou.

⁴¹ Nĩngĩtĩ auuni eeta ꞌcĩg mẽẽlĩg hĩ ĩnõõnnõ nẽ ĩĩtõ, “Tananga nga hĩdĩman Yõaannẽ thõõth umwa ꞌcĩ ĩnaat eeta, baa nẽ ikia ĩĩ thõõth ꞌcĩ aduha nẽẽ, hĩnĩngĩtĩ Yeesu ho dĩdĩ.”

⁴² Ma nĩngaata, iita elemit eeta ꞌcĩg mẽẽlĩg thõõth cĩ Yeesu.