Yõaannẽ 1 - ꞌBuuk cĩ Thõõth cĩ Nyekuci

Thõõth cĩ rũgẽtõ

¹ Baa ꞌthianaatta, baa aaĩ Thõõtha. Baa arũmĩ Thõõth hĩ Nyekuc nẽ baa ĩĩn Thõõth Nyekuc.

² Baa arũmĩ Thõõth hĩ Nyekuc baa ꞌthianaatta.

³ Baa ẽhẽnytaa hẽlẽggĩ vẽlẽk Thõõthaa nĩĩcĩ. Má baa hiittiõõ nẽẽ tõõ, aitiõõ baa ꞌgii ꞌcĩ ẽhẽnytaa tõõ.

⁴ Baa aaĩ rũgẽtĩ hĩ ĩnõõnnõ nẽ baa ĩĩn rũgẽtĩ niccia lanyit cĩ eetu.

⁵ Nẽ lanyit cieeni, ĩĩn lanyit ꞌcĩ aara muguratõõ, nẽ hõllõngaa occa adĩĩt muguuri lanyit icci ũdũt.

⁶ Ma ho, ĩꞌthõõa Nyekuci eet ꞌcĩ haĩ Yõaannẽ,

⁷ ꞌcĩ baa aku aduhaak eet lanyit nicci, hátĩ helemit eeta vẽlẽk ĩnõõnnõ.

⁸ Baa hõllõngaa ĩĩn Yõaannẽ lanyit, baa ĩĩn nẽẽ eet ꞌcĩ ĩꞌthooyyiaa haaga, hikia huduhaak eet lanyit nicci.

⁹ Lanyit ꞌcĩ ĩĩn dĩdĩ, ꞌcĩ aku aara hĩ eet vẽlẽk ko, aku hĩ eet loota nĩnga.

¹⁰ Baa aaĩ Thõõth loota nĩnga, tananga baa ẽhẽnyta nẽẽ looc, baa hinnia aitiõõ ẽẽtĩ ꞌcĩ aga ĩnõõnnõ tõõ.

¹¹ Baa aku nẽẽ looccaa cĩnnĩ nẽ hõllõngaa ẽlẽmĩ eeta cĩgĩnnĩg ĩnõõnnõ.

¹² Baa nẽẽꞌthẽk aattĩg eeta ũgẽẽgĩ ꞌcĩg ẽlẽmĩ ĩnõõnnõ nẽ ĩthĩhĩt thõõth cĩnnĩ, nĩngĩtĩ aaꞌnyĩkĩ nẽẽ ĩhõõggõ hiita hĩĩtõ lõhõlĩ cĩg Nyekuci.

¹³ Baa hõllõngaa ĩĩn nẽẽg lõhõlĩ cĩg Nyekuci hĩgõõng arrita eeta lõhõlĩ cĩggĩĩng, baa Nyekuc ꞌcĩ aaꞌnyĩk ĩhõõggõ hittirria hiita hĩĩtõ lõhõlĩ cĩgĩnnĩg ko.

¹⁴ Ma nĩngaata, ikia Thõõth baa ĩĩn lanyit ĩĩ eet nẽ hũrũmtĩ hĩ ngagĩĩt hõdẽĩ loota nĩnga. Hiita hĩcĩnĩt naag bulẽẽnĩt cĩnnĩ dĩdĩ, bulẽẽnĩt cĩ Ngeertĩ Nyekuc Maaꞌnyĩ ꞌcĩ odoyyii. Aꞌnyahaakeet nẽẽ ngagĩĩt loota nĩnga, bũnnai hĩ thõõth vẽlẽk ꞌcĩ ĩĩn dĩdĩ, ꞌcĩ aku hĩ Nyekuc.

¹⁵ Baa irrioon Yõaannẽ thõõth cĩnnĩ nẽ ẽggẽrẽny ĩĩ, “Eet baa haduhaakuung naa baa haini, ‘Anũaanna hatĩ eet umwaa ꞌcĩ ĩllõõannaa nganĩĩta, hĩnĩngĩtĩ baa aau nẽẽ ẽlẽk, baa nga hittirria naana.’ ”

¹⁶ Hĩnĩngĩtĩ makaaꞌthĩt cĩ bũnnai cĩnnĩ, hiita hummuddia naag vẽlẽk ꞌgattan tabattĩ mẽẽlĩg.

¹⁷ Baa aaꞌnyĩk Nyekuci eet nyattal cĩnnĩ, eetaa ꞌcĩ haĩ Mũũꞌtha, nẽ ikia bũnnai hĩ thõõth ꞌcĩ ĩĩn dĩdĩ hĩ Yeesu Krĩstõ.

¹⁸ Nga hĩcĩn eet umwaa Nyekuc, Ngeerĩnĩ ꞌcĩ odoyyii dioo, ꞌcĩ ĩĩn Nyekuc dĩdĩ nẽ õbõhõõ hĩ Maaꞌnyĩ ꞌcĩ etereꞌtheet ngagĩĩt hagaac Nyekuc.

Õthõõth Yõaannẽ Batitta thõõth cĩ Yeesu

¹⁹ Baa ĩꞌthõ makayyiooha cĩg ꞌJudeei ꞌJeruꞌthalẽma, paadĩrꞌnya hĩ eet cĩg hattũũg cĩ ꞌLeevi, hõõt hijinit Yõaannẽ hĩĩttĩk, eet ꞌcĩ nganĩ nii.

²⁰ Baa hõllõngaa abũrĩ Yõaannẽ ngaatĩ õthõõthõnĩ hĩ ĩhõõggõ, nĩngĩtĩ ẽdẽcĩ ĩhõõggõ annẽẽkĩ, “Hõllõngaa hĩĩnĩ naa Krĩstõ.”

²¹ Nẽ ijinit tarĩ paadĩrꞌnya hĩ eet cĩg hattũũg cĩ ꞌLeevi ĩnõõnnõ ĩĩttĩk, “Eet iina thĩ nii, Eliijja?” Ẽdẽcĩ nẽẽ ĩhõõggõ anneek, “Aitiõõ naa hõllõngaa hĩĩnĩ Eliijja.” Nĩngĩtĩ ajini nẽẽg Yõaannẽ tarĩ annẽẽkĩ, “Ĩĩnĩ thĩ nii põrõvẽtaac?” Ẽdẽcĩ nẽẽ aĩ, “Aitiõõ tõõ.”

²² Ma baa uruta, ijinit nẽẽg ĩnõõnnõ tarĩ ĩĩttĩk, “Nganĩ nii, hátĩ hoottia huduktaaha eet ꞌcĩg ĩꞌthõõanneet ngagĩĩt ko thõõth cunni?”

²³ Ma ho, attacan Yõaannẽ ĩhõõggõ thõõthaa cĩ põrõvẽtaac Iꞌthaia ĩĩnnĩk, “Hĩĩnĩ naa molook ꞌcĩ ẽggẽrẽny horrwatõõ umwaanĩ ĩcĩ õdõhõhĩĩ kak aĩ, ‘Ũkũmatteek ꞌgõõl cĩ Makayyiookto hũũlan!’ ”

²⁴ Baa ĩꞌthooyyi Variꞌtheei ũgẽẽgĩ hõõt hĩ Yõaannẽ,

²⁵ nẽ õõt ijinit ĩnõõnnõ ĩĩttĩk, “Aggameehi nii eet baattithimo inni, hatĩ hõllõngaa ĩĩnĩ nii Krĩstõ hode Eliijja hode põrõvẽtaac?”

²⁶ Ẽdẽcĩ Yõaannẽ ĩhõõggõ anneek, “Haggameehi naa eet baattithimo maamĩ haaga, nẽẽthĩ, aaĩ eet umwaa hõrggẽẽnaa cunuung, ꞌcĩ hõllõngaa agayyu niiga.

²⁷ Tananga baa huwwatta naa ĩĩcĩ oou, hõllõngaa occa hũũlũ ngaatĩ hõõgĩ lõhamũcĩ cĩg caawa cĩgĩnnĩg.”

²⁸ Baa aduha Yõaannẽ thõõth icci, baa aggameek nẽẽ eet baattithimo ĩĩcĩ uruto cĩ hidioo cĩ ꞌJõrdanĩ, looccaa cĩ Bẽthani.

Ĩĩn Yeesu mĩꞌnyõõn cĩ Nyekuci

²⁹ Ma loohoth cĩnnĩ, udtuuha Yõaannẽ Yeesu ngaatĩ akuuni hĩ ĩnõõnnõ, nĩngĩtĩ õthõõthĩ Yõaannẽ aĩnnĩ, “Ĩcĩnĩt Mĩꞌnyõõn cĩ Nyekuci ꞌcĩ attik ꞌthẽccanẽẽt cĩg eetuk!

³⁰ Eet baa haduhaakuung naa hanneekuung, ‘Aku hatĩ eet umwaa ꞌcĩ ꞌrĩĩng ꞌcĩ ĩllõõannaa nganĩĩt, hĩnĩngĩtĩ baa aau nẽẽ ĩĩcĩ oou, baa nga hittirria naana.’

³¹ Baa nga haga naa ĩnõõnnõ nẽ haggameekuung naa ngagiit baattithimo maamĩ, hátĩ hagaacõ eeta cĩg Ĩꞌthĩraẽlĩ vẽlẽk ĩnõõnnõ.”

³² Nĩngĩtĩ aduhaanĩ Yõaannẽ thõõth umwa aĩnnĩ, “Baa hacini Lori ꞌcĩ Ẽllẽẽmĩth, ngaatĩ alluuccianĩ hẽẽtahujjieen, ꞌcĩ aaĩ hĩ bõllõõĩ nẽ ikia ĩbĩl ẽllaa cĩnnĩ.

³³ Occa baa nga haga naa ĩnõõnnõ, hiittiõõ ngaatĩ aduhaaka ẽẽtĩ baa ĩꞌthõõannaa nganĩĩt hikia haggameek eet baattithimo maamĩ anneeka, ‘Ẽẽtĩ ꞌcĩ acini alluucciak Lorii ꞌcĩ Ẽllẽẽmĩth nẽ ikia ĩbĩl ẽllaa cĩnnĩ ho, ĩnõõnnõ ꞌcĩ hatĩ aggameek eet baattithimo Loriiaa ꞌcĩ Ẽllẽẽmĩth ko.’

³⁴ Hĩcĩna ĩnõõnnõ dĩdĩ nẽ hagawa ngaatĩ ĩĩnnĩ nẽẽ Ngeertĩ Nyekuci.”

Ẽbẽra Yeesu nuyyiook cĩgĩnnĩg ꞌcĩg oou

³⁵ Ma hĩ loohoth cĩnnĩ tarĩ, iita aauto Yõaannẽ hĩ nuyyiook cĩgĩnnĩg ꞌramma nĩngaata.

³⁶ Ma baa adtuuha nẽẽ Yeesu ngaatĩ õvvõõĩ nĩngaata ho, õthõõth nẽẽ ĩĩ, “Ĩcĩnĩt Mĩꞌnyõõn cĩ Nyekuci!”

³⁷ Ma baa athĩhĩ nuyyiooha ꞌcĩg ĩĩn ꞌramma thõõth icci ho, iita unuyyiõõthĩ Yeesu.

³⁸ Ma baa abbuudi Yeesu ho, adtuuha hinnia nuyyiook ꞌcĩg ĩĩn ꞌramma ho ngaatĩ anũĩ ĩnõõnnõ, nĩngĩtĩ ajini ĩhõõggõ annẽẽkĩ, “Anũyyiaangu inni?” Ẽdẽcĩ nẽẽg Yeesu anneek, “Rabbi, nĩngĩtĩ aayyi nii ho inoo?” Aĩ thõõth ꞌcĩ aĩ “Rabbi” ho Ebereeiyyi, “ꞌLimmannioohit.”

³⁹ Ẽdẽcĩ Yeesu ĩhõõggõ anneek, “Iita ĩcĩnĩt!” Baa ĩĩ ꞌthaa ꞌwec baa iggiingi kõrra ꞌcĩ õõkõrĩ nẽẽg hĩ Yeesu õõ acĩnĩ nĩngĩtĩ aayyi nẽẽ ho. Nĩngĩtĩ arũmẽẽnĩ hĩ ĩnõõnnõ nĩngaata hutub.

⁴⁰ Eetinii ꞌcĩg baag ĩĩn ꞌramma ĩcĩg athĩhĩ thõõth cĩ Yõaannẽ nẽ ookorit hĩ Yeesu ho, ĩnõõnnõ Andrea, ꞌgõtõnĩ ꞌThimõõnẽ Pẽẽtũrũ.

⁴¹ ꞌGii ꞌcĩ baa adĩman Andrea ĩĩcĩ oou, baa adiimothi nẽẽ ꞌgõtõnĩ ꞌThimõõnẽ nẽ uduhaak ĩnõõnnõ ĩĩnnĩk, “Hummuddiaawa naag habu ꞌcĩ ẽbẽra Nyekuci, ꞌcĩ haĩ ꞌthaar ũgĩ Krĩstõ.”

⁴² Ma nĩngaata, ikia ũũhĩ Andrea ꞌgõtõnĩ Pẽẽtũrũ hĩ Yeesu. Ma ho, udtuuha Yeesu Pẽẽtũrũ nẽ ĩĩnnĩk, “Ĩĩnĩ nii ꞌThimõõnẽ ngeertĩ Yõaannẽ. Hĩĩtõ hatĩ ꞌthaar cugunnig, ꞌCeeva, nĩngĩtĩ aĩ, Pẽẽtũrũ.”

Ẽbẽra Yeesu Pilippo hĩ Nathaniele

⁴³ Ma loohoth cĩnnĩ, ĩtĩnga Yeesu ũũk ĩĩcĩ ꞌGalileea. Ma baa ommottio hĩ Pilippo, uduhaak ĩnõõnnõ ĩĩnnĩk, “Ijjia nũaa nganĩĩta.”

⁴⁴ Baa au Pilippo hĩ Andrea hĩ Pẽẽtũrũ ꞌtaaũnaa cĩ Beꞌthaida.

⁴⁵ Nĩngĩtĩ ammũdaanĩ Pilippo Nathaniele nẽ uduhaak ĩĩnnĩk, “Hummuddiaawa eet baa ẽhẽẽd Mũũꞌtha nyattaala nẽ eteheedito põrõvẽtaaꞌnya buúk ĩĩtõ, Yeesu cĩ Naaꞌtharẽtĩ ngeertĩ Yothebo.”

⁴⁶ Nĩngĩtĩ ajini Nathaniele ĩnõõnnõ annẽẽkĩ, “Occa ꞌthẽk aku ꞌgiimwa ꞌcĩ abũnnaa Naaꞌtharẽta?” Ẽdẽcĩ Pilippo ĩnõõnnõ anneek, “Ijjia thĩ da cĩnõ.”

⁴⁷ Ma baa acĩn Yeesu Nathaniele aku obokii ho, ikia õthõõth ĩnõõnnõ ĩĩ, “Eet ꞌcĩ ĩĩn Ĩꞌthĩraẽleenit dẽẽdẽ cieeni, ꞌcĩ hõllõngaa ĩĩn oloꞌngiaahit.”

⁴⁸ Ẽdẽcĩ Nathaniele ĩnõõnnõ anneek, “Agayyaa nii nganĩĩt hutuno?” Ẽdẽcĩ Yeesu anneek, “Hacinnii naa nganiit aa nga hutuvvii Pilippo, iccioloongani ꞌmũũnĩca uruta.”

⁴⁹ Nĩngĩtĩ õthõõthĩ Nathaniele aĩnnĩ, “ꞌLimmannioohit! Ĩĩnĩ nii Ngeertĩ Nyekuci, habu cĩ Ĩꞌthĩraẽlĩ!”

⁵⁰ Ma ho, ĩĩnnĩk Yeesu ĩnõõnnõ, “Elemi nii thõõth caannĩ, hĩnĩngĩtĩ hanneekii, iyyia hacciinnii aa iccioloongani ꞌmũũnĩca uruta. Acini hatĩ nii hẽlẽggĩ ꞌcĩg ĩllõõan thooꞌthiok iccig.”

⁵¹ Ma nĩngaata, õthõõth Yeesu ĩĩ, “Haduhaakuung dĩdĩ, acinnu hatĩ hẽẽtkujjieen ngaatĩ abbuuhẽnĩ nẽ udtuuktau aajĩlẽẽt cĩg Nyekuci, ngaatĩ õtõdĩ nẽ ulluucciak Ngeertĩ Eeto.”