Tiito 3 - ꞌBuuk cĩ Thõõth cĩ Nyekuci

Ĩdĩmanit eet vẽlẽk jurrung

¹ Duhaak eet cugunnig hĩthĩhĩt thõõth ꞌcĩ aduha makayyiooha cĩg ꞌgaala, hiittiõõ hõllõngaa õjõthẽẽkĩ thõõth cĩnĩĩng. Aꞌnyĩĩk hũkũmattoothĩk nẽẽg hatĩ hĩdĩmanit thõõth ꞌcĩ abũnnaa hõdõõkõthĩ,

² duhaak anneek ma hongomĩttu ꞌgoonogu, ĩĩtõ tarbalĩg nẽ ummuktu ĩhõõggõ ĩĩcĩ oou, ma hathĩngõõnyannu hĩ eet vẽlẽk hõdõõkõthĩ.

³ Baa gõõng haggiithi naag hõjõthẽẽkĩ thõõth cĩ Nyekuci, hĩnĩngĩtĩ hõllõngaa haga nẽ hĩĩtõ appahacaaꞌnya ꞌcĩg habũraneek thooꞌthiok ꞌcĩg abathĩ ꞌcĩg iggoolleet ngagĩĩta. Baa gõõng hĩĩgĩn eet ꞌcĩg habathĩ nẽ halĩĩlĩ hẽlẽggĩ cĩg eetuk, aaburreekeet eeta nẽ haaburreek naag buúk eet vẽlẽk.

⁴ Nẽẽthĩ, ma baa edeeꞌnyia tarbalꞌthẽẽt hĩ mĩnnan cĩ Nyekuc Ellioohit cĩnaac,

⁵ ikia eeleet nẽẽ ngagĩĩta, hõllõngaa hĩnĩngĩtĩ thõõth umwa ꞌcĩ abũnnaa ꞌcĩ hadtican naaga, aku ẽẽlanneet hĩnĩngĩtĩ ammaannĩkeet ngagĩĩt nẽ ũtũũny ꞌthẽccanẽẽt cĩggaac vẽlẽk. Aaꞌnyeet nẽẽ ngagĩĩt hittirria tarĩ nẽ haꞌnyahit rũgẽt ꞌcĩ ĩĩn ngeju Loriiaa ꞌcĩ Ẽllẽẽmĩthĩ,

⁶ ĩcĩ aaꞌnyeet haggatattĩ jurrung, hĩnĩngĩtĩ Ellioohit cĩnaac Yeesu Krĩstõ,

⁷ hátĩ helemeet Nyekuci ngagĩĩt bũnnaiittaa cĩnnĩ nẽ horumwa hummuddia rũgẽt ꞌcĩ aalla ooo õlõõ cĩnnĩ.

⁸ Thõõth ꞌcĩ ĩĩn dĩdĩ cieeni, thooꞌthiok ꞌcĩg abũnnaa cieeg hĩ eet vẽlẽk. ꞌRĩccana ꞌlimmaneek eet hũnnẽẽcõ thooꞌthiok iccig, hátĩ hidticanit eeta ꞌcĩg ẽlẽmĩ thõõth cĩ Nyekuci, thooꞌthiok ꞌcĩ abũnnaa.

ꞌGõõl ꞌcĩ arũmẽẽnĩ lemmiooha lõꞌngõõc

⁹ Aitiõõ hõllõngaa abũnnaa ngaatĩ haruhõõnĩ hoti, hĩnĩngĩtĩ hõllõngaa eelleet jõrẽẽĩ nẽ ma hẽppẽhanoonnu ꞌthaarriok cĩg nyakangaaꞌnya cugguung baangaani, hode hegernyoonnu hode aruhoonnu thõõth cĩ nyattal cĩ Mũũꞌtha. Abathĩ thõõth ꞌcĩ hẽggẽrnyõõnĩ hode haruhõõnĩ hoti.

¹⁰ ꞌRioonĩk eet ꞌcĩg attiha jore tabattĩ ꞌramma, ma urutaa cĩnnĩ, ma nga hedecoothihi tarĩ.

¹¹ Ẽꞌngẽjĩ eet ꞌcĩg aattĩg noho ho ooti, aduha ꞌthẽccanẽẽta cĩggĩĩng bathi cĩnĩĩng ko ẽmmẽn.

Thõõth ꞌcĩ adtuurna

¹² Hĩꞌthõõa naa Artema hode Ticiko hikia hĩ nganiita. Ma õdõlaniina, tĩngaayyia nĩĩcĩ noho hiita hommottio ꞌtaaũnaa cĩ Nikopoli, haĩ hũũk haau tagĩĩth icci ĩĩca.

¹³ Ma ĩtĩngaacõ ꞌThẽẽna, ẽẽtĩ ꞌcĩ ĩĩn ꞌgaadĩ hataa hĩ Appoolo, ẽẽl ĩhõõggõ ꞌgiiaa vẽlẽk ĩcĩ adiim nẽẽg hẽẽrõnaa cĩnĩĩng, hátĩ hiittiõõ hõllõngaa appĩĩrna ꞌgõõla.

¹⁴ Abũnnaa adticanni eeta cĩggaac jurrung, hátĩ haꞌnyahit hẽlẽggĩ vẽlẽk ꞌcĩg adiim nẽẽgĩ, hĩnĩngĩtĩ abathĩ ngaatĩ ĩĩnĩ nẽẽg nyamuttiook.

¹⁵ Ĩꞌthaayyi eeta ꞌcĩg harũmeenna hĩ nganĩĩt ngaati vẽlẽk nganiita. ꞌThaa eet vẽlẽk ꞌcĩg ammĩnanneet ngagĩĩt lemiittaa cĩ Nyekuci. Nẽ aꞌnyĩĩk Nyekuc haaꞌnyuung bũnnai ngagiit vẽlẽk!