Tiito 2 - ꞌBuuk cĩ Thõõth cĩ Nyekuci

ꞌLimman cĩ eet cũũmõ cũũmõ

¹ Nẽ nii Tiito, ꞌlimman thõõth ꞌcĩ õõkõrõõ hĩ ꞌlimman ꞌcĩ ĩĩn dĩdĩ.

² ꞌLimman eet ꞌcĩg obbitig hillimanit ngaatĩ aꞌthũũnnĩ eleeti cĩggĩĩng, aꞌnyĩĩk haꞌnyahit authet ꞌcĩ iꞌngoliini eeta ĩhõõggõ, abũnnaa aꞌnyak lemiinit ꞌcĩ ĩĩn dĩdĩ hĩ mĩnnan hĩ ꞌgõõl ꞌcĩ ẽmmẽẽꞌthĩ thooꞌthiok.

³ Nẽ ꞌgõõlaa nĩĩcĩ dioo, ꞌlimman morwak buúk, haauto ꞌgõõlaa ꞌcĩ accamana Nyekuci. Aꞌnyĩĩk hiittiõõ hõllõngaa addangaak eet umwa haaga nẽ ma hahuddu mẽrtĩ gẽrrẽẽt. Aꞌnyĩĩk hillimanit thõõth ꞌcĩ abũnnaa cĩ Nyekuci.

⁴ Occa alliman nẽẽg ngaaĩ ꞌcĩg ĩĩn carama hĩmmĩnanit maaccwa hĩ lõhõlĩ cĩggĩĩng,

⁵ hátĩ huꞌthuutti eleeti nẽ ũtũbũrĩt thooꞌthiok ꞌcĩg ĩĩn ꞌriiring, hĩĩtõ ngaaĩ ꞌcĩg aꞌthũũnnĩ olooyyiok cĩggĩĩng nẽ ĩthĩhĩt thooꞌthiok cĩg maaccwa cĩggĩĩng, hátĩ hiittiõõ eeta ꞌcĩg õthõõth thõõth cĩ Nyekuci ꞌbuth tõõ.

⁶ Nẽ ꞌgõõlaa nĩĩcĩ dioo, kũttan nyahaappanĩt huꞌthuutti eleeti cĩggĩĩng jurrung.

⁷ Nẽ nii buúk, ꞌrĩccana ngaatĩ ẽtẽrꞌthẽẽkĩ eet ꞌgõõl ꞌcĩ adĩmanĩĩ thõõth ꞌcĩ abũnnaa. ꞌLimman eet ꞌthĩnĩta dĩdĩ hĩ ꞌgõõlaa ꞌcĩ õkõmmĩ eeta.

⁸ ꞌLimmaneek eet thõõth cĩ Nyekuci ꞌcĩ ĩĩn dĩdĩ jurrung, hátĩ hiittiõõ hõllõngaa ẽppẽhan eet umwaanĩ. Aꞌngaaõn hatĩ mĩrõha cugunnig, hĩnĩngĩtĩ aitiõõ thõõth ꞌcĩ abathĩ ꞌcĩ ammũda hĩ nganiit hode hĩ ngagĩĩt tõõ.

⁹ ꞌLimman appahacaaꞌnya buúk hĩthĩhĩt thooꞌthiok cĩg makayyiook cĩggĩĩng nẽ idticattoothĩk ĩhõõggõ jurrung, abathĩ ngaatĩ ẽdẽcõõnĩ hĩ ĩhõõggõ thõng,

¹⁰ hode ĩgõrĩth hẽlẽggĩ cĩggĩĩng. Abũnnaa ĩĩn nẽẽg eet ꞌcĩg iꞌngolli thooꞌthiok cĩg makayyiook cĩggĩĩng, hátĩ haanytĩk ꞌlimman cĩ Nyekuc ꞌcĩ ĩĩn Ellioohit cĩnaac hubuluthi.

¹¹ Hĩnĩngĩtĩ eteretheeheet bũnnai cĩ Nyekuci ꞌgõõl ꞌcĩ eellianĩ eeta vẽlẽk bũnnaiitta cĩnnĩ.

¹² Allimanneet thõõth cĩ Nyekuci ꞌcĩ abũnnaa, hũtũbũrĩt thooꞌthiok ꞌcĩg ĩĩn ꞌriiring cĩg looc nicci nẽ huꞌthuutti eleeti cĩggaac hũnnẽẽc ꞌlimman cĩ Nyekuci dioo, hĩcĩ adiim nẽẽnĩ;

¹³ nga haꞌnyak muhẽẽnĩt ꞌcĩ hẽrẽẽĩ kõr cĩ decciaanĩt cĩ lootu ꞌcĩ hatĩ edeeꞌnyianĩ bulẽẽnĩtĩ cĩ Yeesu Krĩstõ ꞌcĩ ĩĩn Nyekuc hĩ Ellioohit cĩnaac.

¹⁴ Baa ẽlẽmana nẽẽ ẽlẽ cĩnnĩ hadaak hĩnĩngĩtĩ ngagĩĩta, hátĩ hõõgaeet ꞌthẽccanẽẽtĩ vẽlẽk nẽ aaꞌnyeet hĩĩtõ eet cĩgĩnnĩg ꞌcĩg ũtũũnyeet nẽẽ hĩĩtõ eet cĩgĩnnĩg, ꞌcĩg hadiim hadtican thooꞌthiok ꞌcĩg abũnnaa dĩdĩ.

¹⁵ Nẽẽthĩ, hẽlẽggĩ ꞌcĩg occa allimani nii cieegi, tilo ĩhõõggõ thooꞌthiohĩĩ ꞌcĩg abathĩ makaaꞌthĩta vẽlẽk nẽ eteretheehu ĩhõõggõ thooꞌthiok ꞌcĩg abũnnaa. Nẽẽthĩ, ma haaꞌnyihi eet umwa hatamaaciina.