ꞌThianaattõ 1 - ꞌBuuk cĩ Thõõth cĩ Nyekuci

ꞌGõõl ꞌcĩ ẽhẽnytaanĩ Nyekuci looc

¹ Baa ꞌthianaatta, baa ẽhẽnyta Nyekuci hẽẽtkujjieen hĩ looc.

² Nẽẽthĩ, baa nga hẽtẽhẽnya Nyekuci hẽẽtkujjieen hĩ looc, baa hiꞌthihi ꞌgii ꞌcĩ aaĩ loota nĩnga. Baa muguur dioo hĩ maam ꞌcĩg ũdaan looc. Nẽ baa awanĩt Lorii cĩ Nyekuci maamĩ hujjieen.

³ Ma ho, õthõõth Nyekuci ĩĩ, “Aꞌnyĩĩk lanyit haara.” Nĩngĩtĩ aaranĩ lanyit nĩĩcĩ noho.

⁴ Ma baa adtuuha Nyekuci ngaatĩ abũnnayyĩ lanyit ko, ikia ẽꞌngẽr lanyit hĩ muguur haauto cũũmõ cũũmõ

⁵ nẽ akateek lanyit ꞌthaar ꞌcĩg kaĩ “Waathĩn,” nẽ akateek muguur ꞌthaar ꞌcĩg kaĩ, “Baalin.” Nĩngĩtĩ aku aayyi ꞌjiaatĩnĩ hĩ loohoth kõr ꞌcĩ oou.

⁶ Ma ho, õthõõth Nyekuci tarĩ ĩĩ, “Aꞌnyĩĩk haau nĩngĩtĩ ẽꞌngẽr maam hĩĩtõ ꞌgoolliok ꞌramma, maam cĩg lokoru hĩ maam cĩg lootu.”

⁷ Nĩngĩtĩ aarĩkĩ Nyekuci nĩngĩtĩ ẽꞌngẽr maam cĩg lokoru hĩ cĩg lootu haauto cũũmõ cũũmõ. Nẽ baa ꞌthẽk aau noho dĩdĩ.

⁸ Ma ngaati, ikia akateek Nyekuci nĩngĩtĩ ẽꞌngẽr maam cĩg lokoru hĩ cĩg lootu ho ĩĩnnĩk, “Hẽẽtkujjieen.” Nẽ baa iita aauto ꞌjiaatĩnĩ hĩ loohoth kõr ꞌcĩ ĩĩn ꞌramma.

⁹ Nẽ tarĩ ikia õthõõth Nyekuci ĩĩ, “Aꞌnyĩĩk maam ꞌcĩg aattĩg loota hollooddik ngaatĩ hõdẽẽthõng, hátĩ hẽdẽẽnyta ꞌthẽẽma.” Nẽ baa ĩdĩmanĩ noho dĩdĩ.

¹⁰ Nĩngĩtĩ akannẽẽkĩ Nyekuci ꞌthẽẽm annẽẽkĩ, “Looc,” nẽ akateek maam ĩĩnnĩk, “Bũlũc.” Nẽ baa udtuuha Nyekuci ngaatĩ abũnnayyĩ hẽlẽggĩ cieeg vẽlẽk.

¹¹ Ma nĩngaata, õthõõth Nyekuci tarĩ ĩĩ, “Aꞌnyĩĩk hẽẽn hĩ artĩ hĩ haal ꞌcĩg aattĩg cũũmõ cũũmõ hubuꞌthia.” Nẽ baa ĩdĩmanĩ noho dĩdĩ.

¹² Nĩngĩtĩ abũthaanĩ hẽẽna, hẽẽn ꞌcĩg abbiiri ꞌcĩg aꞌnyak bura cũũmõ cũũmõ. Nẽ baa udtuuha Nyekuci ngaatĩ abũnnayyĩ hẽlẽggĩ cieeg vẽlẽk.

¹³ Ma nĩngaata, iita aauto ꞌjiaatĩnĩ hĩ loohoth kõr ꞌcĩ ĩĩn iyyio.

¹⁴ Ma ho, õthõõth Nyekuci tarĩ ĩĩ, “Aꞌnyĩĩk hẽlẽggĩ ꞌcĩg alanyĩt haauto hẽẽtahujjieen, heꞌngerit waathĩn hĩ baalin, hátĩ hetereꞌthia ꞌgoolliok ꞌcĩg iꞌthianaanĩ waathinniooha hĩ irkiꞌnyia hĩ korriook ꞌcĩg iꞌthianaanĩ tagĩĩthĩ hĩ ũrraat hĩ lõõlõ hĩ lõmmõõtĩn.

¹⁵ Nẽ aꞌnyĩĩk ĩhõõggõ hẽdẽẽnyta hẽẽtahujjieen, hátĩ hũttũhũlĩt looc.” Nẽ baa ĩdĩmanĩ noho dĩdĩ.

¹⁶ Nĩngĩtĩ ẽhẽnytaanĩ Nyekuci kõr haara waath nẽ ẽtẽhẽnya nyĩlõk haara baal. Baa nẽ ẽtẽhẽnya nẽẽ mũnyũny buúk.

¹⁷ Nĩngĩtĩ aarĩkĩ nẽẽ kõr hĩ nyĩlõk hẽẽtahujjieen hũttũhũlĩt looc,

¹⁸ nẽ ikia aarĩk kõr haara waath nẽ aaꞌnyĩk nyĩlõk haara baal, heꞌngerit lanyit hĩ muguur. Nẽ baa udtuuha Nyekuci ngaatĩ abũnnayyĩ hẽlẽggĩ cieeg vẽlẽk.

¹⁹ Ma ho, iita aauto ꞌjiaatĩnĩ hĩ loohoth kõr ꞌcĩ ĩĩn ꞌwec.

²⁰ Ma ho, õthõõth Nyekuci tarĩ ĩĩ, “Aꞌnyĩĩk hẽlẽggĩ ꞌcĩg mẽẽlĩg ꞌrĩng ꞌcĩg arũgĩ, haauto maamĩtõõ nẽ aꞌnyĩĩk hĩbaallĩ hivvirit hẽẽtahujjieen.”

²¹ Ma nĩngaata, ikia ẽtẽhẽnya Nyekuci hẽlẽggĩ vẽlẽk ꞌcĩg arũgĩ ꞌcĩg õvvõ maamĩtõõ, hĩ idiꞌngwa ꞌcĩg obbitig vẽlẽk maamĩtõõ ꞌcĩg aattĩg cũũmõ cũũmõ, hĩ hĩbaallĩ ꞌcĩg aattĩg cũũmõ cũũmõ ꞌcĩg alilliaan hẽẽtahujjieen. Nẽ baa udtuuha Nyekuci ngaatĩ abũnnayyĩ hẽlẽggĩ cieeg vẽlẽk.

²² Ma ho, ikia aggatan Nyekuci ĩhõõggõ nẽ ĩĩ, “Ittirit ĩĩtõ mẽẽlĩg maamĩtõõ nẽ aꞌnyĩĩk hĩbaallĩ buúk hittirit hĩbbĩtĩt looc.”

²³ Nẽ baa iita aauto ꞌjiaatĩnĩ hĩ loohoth, kõr ꞌcĩ ĩĩn ꞌtur.

²⁴ Nẽ ikia õthõõth Nyekuci tarĩ ĩĩ, “Aꞌnyĩĩk idiꞌngwa cĩg moru hĩ cĩg olu hẽdẽẽnyta loota, idiꞌngwa ꞌcĩg obbitig hĩ ꞌcĩg kidicig vẽlẽk cũũmõ cũũmõ.” Nẽ baa ĩdĩmanĩ noho dĩdĩ.

²⁵ Nĩngĩtĩ ẽhẽnytaanĩ Nyekuci idiꞌngwa cĩg moru ꞌcĩg aattĩg cũũmõ cũũmõ, hĩ cĩg olu buúk ꞌcĩg aattĩg cũũmõ cũũmõ, hĩ hẽlẽggĩ vẽlẽk ꞌcĩg kidicig ꞌcĩg õvvõ loota. Nẽ baa udtuuha Nyekuci ngaatĩ abũnnayyĩ hẽlẽggĩ cieeg vẽlẽk.

²⁶ Nẽ õthõõth Nyekuci tarĩ ĩĩ, “Nẽẽthĩ ꞌyioko, hẽtẽhẽnyta thĩ eet ꞌcĩ aaĩ hĩ naaga, hátĩ hũꞌthũũtĩ ulugo hĩ hĩbaallĩ hĩ idiꞌngwa ꞌcĩg obbitig hĩ ꞌcĩg hidicig vẽlẽk ꞌcĩg õvvõ loota.”

²⁷ Nĩngĩtĩ ẽhẽnytaanĩ Nyekuci eet ꞌcĩ maacĩ hĩ ngaa ꞌcĩ ngayyi haauto hĩ nẽẽnĩ.

²⁸ Ikia aggatan nẽẽ ĩhõõggõ ĩĩnnĩk, “Ittirria lõhõlĩ ꞌcĩg mẽẽlĩg, hátĩ hiita haggamit looc, hĩ ulugo ꞌcĩg aattĩg bũlũcatõõ, hĩ hĩbaallĩ cĩg hẽẽtkujjieen hĩ idiꞌngwa cĩg lootu vẽlẽk.”

²⁹ Nẽ õthõõth Nyekuci tarĩ ĩĩ, “Haaꞌnyuung naa haal hĩ hẽẽn ꞌcĩg abbiiri vẽlẽk hĩĩ ꞌgẽẽn cunuung.

³⁰ Nẽ haaꞌnyĩha idiꞌngwa hĩ hĩbaallĩ hĩ hẽlẽggĩ vẽlẽk ꞌcĩg õvvõ hĩ ꞌcĩg õgõlĩt loota, hẽgẽẽcõ arteenit hĩ bõllõõk.” Nẽ baa ĩdĩmanĩ noho dĩdĩ.

³¹ Ma ho, ikia udtuuha Nyekuci ngaatĩ abũnnayyĩ hẽlẽggĩ baag ẽhẽnyta nẽẽ ho vẽlẽk. Nẽ baa iita aauto ꞌjiaatĩnĩ hĩ loohoth kõr ꞌcĩ ĩĩn tõrkõnõn.