Terethiinit 9 - ꞌBuuk cĩ Thõõth cĩ Nyekuci

¹ Ma baa adtak aajĩlõ ꞌcĩ ĩĩn ꞌtur tũũrĩ cĩnnĩ, hadtuuha hinnia mũꞌnyaac ngaatĩ adhukiaanĩ hẽẽtahujjieen hikia loota. Nẽ baa aaꞌnyĩhoothĩk mũꞌnyaac nicci mũhũta cĩ ꞌgõõl ꞌcĩ aduhun ꞌloohatõõ ꞌcĩ uuthik hiꞌthihi dtuurnanĩt.

² Ma baa abbuuk nẽẽ hattũũg cĩ ꞌlook nicci ho, aluba bũrrẽtĩ umwaa cobbi gẽrrẽẽt ꞌcĩ aaĩ hĩ gõõng atũũthĩ mõrõ cobbi nẽ ikia ũtũhũ bũrrẽtĩ kõr hĩ ngõõt hĩĩtõ muguur.

³ Ma ho, itigirriaa ꞌgirooc bũrrẽẽtatõõ nĩĩcĩ hũmmũlũũnyan looc nẽ aaꞌnyĩhoothĩk ꞌgirooc ꞌtirriani ꞌcĩ ĩccaaĩ eet, ꞌcĩ aduhõõ hĩ ꞌtirrian ꞌcĩ aꞌnyak nyadokorrooꞌnya thõng.

⁴ Baa adukiaak ꞌgirooc nicci thõõth ꞌcĩ aĩ, ma hegeyyu arteenit hode hẽẽn hĩ hẽlẽggĩ vẽlẽk ꞌcĩg abũtha, abũnnaa ĩccaayyu eet ꞌcĩg hõllõngaa aꞌnyak nyamacaar cĩ Nyekuci muumtinii cĩggĩĩng.

⁵ Nẽ tarĩ, udukiaak ꞌgirooc thõõth ꞌcĩ aĩ, ma haruku ĩhõõggõ thõng, uukit ĩhõõggõ nyĩlõhĩ ꞌtur huciithaa ꞌcĩ aaĩ hĩgõõng ĩccaayyeet nyadokorro.

⁶ Nẽ waathinnioohĩĩ ĩtĩko, adiim hatĩ eeta daahĩth nẽ hõllõngaa ammũda. Ma hatĩ abũraneek nẽẽg daahĩth, alĩĩta hinnia hatĩ daahĩthĩ ĩhõõggõ thõng.

⁷ Baa aaĩ ꞌgirooc nicciee hĩ nyangõõllẽẽꞌnya ꞌcĩg akũmanoothĩk õõ jora nẽ baa ahimit nẽẽg vẽlẽk tẽmẽdẽhĩt ꞌcĩg ĩĩn ꞌdaab nẽ aꞌnyahit muumti ꞌcĩg aattĩg hĩcĩg eetuk.

⁸ Nẽ ĩĩtõ uuttik ĩmana haauto hĩcĩg ngaa ꞌcĩ ngayyi nẽ aꞌnyahit nyĩgĩt ꞌcĩg aattĩg hĩcĩg ꞌmaawak.

⁹ Baa ahimit nẽẽg hilibbwa ꞌcĩg ĩĩn ꞌthĩĩk iyyootinii cĩggĩĩng nẽ eggerenyit havvuuto cĩggĩĩng haauto hĩ ꞌgadiggadiꞌnya ꞌcĩg agurut nyangõõllẽẽꞌnya cĩg ũũrũta ꞌcĩg icciodanoothĩk jore.

¹⁰ Baa aꞌnyak nẽẽg vẽlẽk huulli ꞌcĩg aattĩg hĩ cĩg nyadokorrooꞌnyanu nẽ aꞌnyak ꞌtirriani ꞌcĩ ĩccaaĩ eet hippiirria nyĩlõhĩ ꞌtur.

¹¹ Baa habu cĩnĩĩng aajĩlõ ꞌcĩ ĩĩn makayyioohit cĩ ꞌlook ꞌcĩ uuthik hiꞌthihi dtuurnanĩt ko. Baa haĩ ꞌthaar cĩgĩnnĩg Ebereeiyyi Abaddon nẽ thõõthaa cĩ eet cĩg ꞌGirihi, haĩ Apollion, nĩngĩtĩ aĩ, eet ꞌcĩ acũda hode aggĩĩra eet.

¹² Nẽ thĩ ꞌyioko, allacanĩ pĩĩrnanĩtĩ ꞌcĩ oou nẽ nga au ũgẽẽgĩ ꞌramma ꞌcĩg abathĩ gẽrrẽẽt ũdũt uruta.

¹³ Ma ho, adtak aajĩlõ ꞌcĩ ĩĩn tõrkõnõn tũũrĩ cĩnnĩ, nẽ hĩthĩha molook ꞌcĩ õthõõth õttõõnnĩĩ ꞌcĩg ĩĩn ꞌwec ĩcĩg altaarĩ ꞌcĩ ẽhẽnytaa ꞌdaaba, ꞌcĩ abĩlĩ muumaa cĩ Nyekuci.

¹⁴ Nẽ ĩĩnnĩk mõlõõhĩ nicciee aajĩlõ ꞌcĩ adtak tũũrĩ ho, “Õga aajĩlẽẽt ꞌcĩg ĩĩn ꞌwec ecebbi dẽmẽtaa cĩ hidioo cĩ Euvaratẽthĩ ho.”

¹⁵ Nĩngĩtĩ õõganĩ nẽẽ aajĩlẽẽt ꞌcĩg ecebbi ĩĩn ꞌwec ko nẽ ũkũmattoothĩk ꞌthaa niccia kõr tĩho, nyĩlõk hĩ irkit niccia noho, hátĩ hiita huruhit eet cĩg lootu ĩĩcĩ odoyyii.

¹⁶ Nẽ ngaatĩ hathĩknĩ, baa agiili ũrũtana cĩg nyangõõllẽẽꞌnya ꞌcĩg joraak ĩĩn millioꞌnya ꞌmiiaꞌnya ꞌramma (200,000,000).

¹⁷ Baa hadtuuha naa nyangõõllẽẽꞌnya hĩ ꞌthukanniook cĩggĩĩng aattiyyi nyangõõllẽẽꞌnya. Baa aꞌnyak nyangõõllẽẽꞌnya ooti hĩ ꞌmaaĩta, nẽ uudakta ꞌgwoo hĩ bũrrẽt utugeetinii cĩggĩĩng.

¹⁸ Baa aruk ꞌgwaa hĩ bũrrẽt hĩ ꞌgelemit ꞌcĩ aaburii padtahac ꞌcĩ uudaha nyangõõllẽẽꞌnya niccieeg ko, eet ꞌcĩg mẽẽlĩg loota nĩnga ĩĩcĩ odoyyii.

¹⁹ Nẽ uruhit nyangõõllẽẽꞌnya niccieeg eet ꞌgwoyyiaa hĩ bũrrẽẽtaa ꞌcĩ audaha nẽẽg utugeetinii cĩggĩĩng nẽ uukito eet hadaahito huullinii ꞌcĩg aꞌnyak ooti hĩ hũkaaꞌnya ꞌcĩg abathĩ.

²⁰ Nẽ eeta ꞌcĩg baag nga arũgĩ nẽ hõllõngaa ũũnnĩk ꞌthẽccanẽẽt cĩggĩĩng ko buúk, aalla ala loriẽẽt ꞌcĩg abathĩ noho hĩ hẽlẽggĩ ꞌcĩg aar eeta hĩĩtõ nyekuꞌnya ꞌcĩg adĩmanniaa ꞌdaaba, hĩ maccĩrẽẽnĩ, hĩ biyyiẽẽnĩ, hĩ ꞌcĩg adamanniaa hẽẽnĩ. Nẽ cieeg vẽlẽk, ĩĩn hẽlẽggĩ ꞌcĩg aar eeta hĩĩtõ nyekuꞌnya ꞌcĩg hõllõngaa acĩnĩ hode athĩknĩ hode õvvõ.

²¹ Baa aitiõõ hõllõngaa ũũhũ eeta cieeg ꞌthinneeti cĩggĩĩng hĩ authet ꞌcĩ aruhi eet. Baa aalla ẽlẽmĩ nẽẽg hẽlẽggĩ ꞌcĩg ĩĩn õlõng, hĩ thooꞌthiok cĩg ꞌwaangĩꞌthẽẽtak hĩ ĩgõr cĩnĩĩng.