Terethiinit 8 - ꞌBuuk cĩ Thõõth cĩ Nyekuci

Awaanyana Mĩꞌnyõõn doolliang ꞌcĩ ĩĩn tũkĩramma

¹ Ma baa awaanyan Mĩꞌnyõõn doolliang ꞌcĩ ĩĩn tũkĩramma ho, ikia ĩjjaahõ lõõcĩ hẽẽtahujjieen õlõõ cĩ Nyekuci hĩdĩhĩdĩĩc ꞌthaa ꞌcĩ ĩĩn ꞌnuth.

² Nẽ hĩcĩna aajĩlẽẽt ꞌcĩg ĩĩn tũkĩramma abĩlĩ muumaa cĩ Nyekuci ho, ngaatĩ aaꞌnyĩhõõthĩkĩ tũũrẽna hõdẽĩ hõdẽĩ.

³ Ma ho, uppwaanna aajĩlõ umwaa ꞌcĩ aꞌnyaha lohilihili ꞌcĩ ẽhẽnytaa ꞌdaaba ꞌcĩ ĩwaadini mõhõõkac nẽ ikia ĩbĩl altaarĩa. Baa aaꞌnyĩhoothĩk aajĩlõ mõhõõkacĩ ꞌcĩ maka ꞌcĩ ĩĩn ꞌbaaninit hĩ laiinit cĩ eet cĩg Nyekuci altaarĩaa ꞌcĩ ĩĩn ꞌdaab, muumaa cĩ dtaaba cĩ Makayyiookto.

⁴ Nĩngĩtĩ ĩꞌngaannĩ bũrrẽtĩ cĩ mõhõõkacõõ hĩ laiinit cĩ eet cĩg Nyekuci, athĩnĩĩ cĩg aajĩlõ nicci nẽ õtõd ũũk hẽẽtahujjieen muumaa cĩ Nyekuci.

⁵ Ma nĩngaata, ittiha aajĩlõ lohilihili cĩ mõhõõkacõõ nẽ ũttũhũla ꞌgwoo altaarĩa nẽ ammarkiihak looc. Ma ho, ikia ẽggẽrẽny tammu nẽ ammad gẽrrẽẽt hĩ hirihidtik cobbi ꞌcĩ õmmõõnnĩ looc vẽlẽk.

Tũũrẽn ꞌcĩg oou ꞌcĩg ĩĩn ꞌwec

⁶ Ma ho, ũkũmattoothĩk aajĩlẽẽta ꞌcĩg ĩĩn tũkĩramma ho ngaatĩ adtahĩ tũũrẽn cĩggĩĩng.

⁷ Ma baa adtahĩ aajĩlõ ꞌcĩ oou tũũrĩ cĩnnĩ ho, adhukiaa hinnia tẽllẽẽna hĩ ꞌgwoo ꞌcĩ õꞌngõõtanni hĩ biyyi, hiita loota nĩnga nẽ ũtũũthĩ lõõcĩ ĩĩcĩ odoyyii hĩ hẽẽn hĩ arteenit vẽlẽk hĩĩ ꞌthĩĩ.

⁸ Ma adtahĩ aajĩlõ ꞌcĩ ĩĩn ꞌramma tũũrĩ cĩnnĩ ho, ikia udhukia ꞌgwaa umwaa ꞌcĩ ĩĩkĩ muur nẽ udhuhoothĩk bũlũcatõõ nẽ ũtũhũĩ bũlũc ĩĩcĩ odoyyii ĩĩ biyyi,

⁹ nĩngĩtĩ adaaknĩ hẽlẽggĩ ꞌcĩg gõõng arũgĩ bũlũcatõõ ĩĩcĩ odoyyii hĩ ꞌthĩĩ nẽ ilibti haahũlĩta ꞌcĩg aattĩg bũlũcatõõ ĩĩcĩ odoyyii buúk hĩ ꞌthĩĩ.

¹⁰ Ma baa adtahĩ aajĩlõ ꞌcĩ ĩĩn iyyio tũũrĩ cĩnnĩ ho, udhukia mũꞌnyaac umwaa cobbi ꞌrĩng ꞌcĩ alanyĩt aaĩ hĩ batarria nẽ udhuhoothĩk hidiowwẽẽn hĩ ũꞌngĩ cĩggĩĩng ĩĩcĩ odoyyii.

¹¹ Baa haĩ ꞌthaar cĩg mũꞌnyaac nicci Hahati nẽ utuhuyyi maama ĩĩcĩ odoyyii ahahatit dtum nẽ iita adaahito eeta ꞌcĩg mẽẽlĩg ꞌrĩng, hĩnĩngĩtĩ hahati cĩ maam niccig.

¹² Ma baa adtak aajĩlõ ꞌcĩ ĩĩn ꞌwec tũũrĩ cĩnnĩ ho, ikia ammanyanĩ lanyit cĩ korro ĩĩcĩ odoyyii nẽ ammanyanĩ lanyit cĩ nyĩlooho buúk ĩĩcĩ odoyyii nẽ iita ammanyattĩ mũnyũnya ũgẽẽgĩ buúk ĩĩcĩ odoyyii nẽ iita ĩĩtõ nẽẽg vẽlẽk muguur ĩĩcĩ odoyyii. Ma baa waath, aitiõõ kõrra hõllõngaa aara ꞌthaaꞌnya ꞌwec nẽ aitiõõ nyĩlõhĩ buúk hõllõngaa aara baal ꞌthaaꞌnya ꞌwec.

¹³ Ma ho, hĩcĩna ꞌthuuti umwa ꞌcĩ alilliaan hẽẽtahujjieen ẽggẽrẽny gẽrrẽẽt aĩ, “Pĩĩrnanĩt, pĩĩrnanĩt, pĩĩrnanĩt cobbi gẽrrẽẽt hĩ eet cĩg looc nicci, hatĩ adtahit aajĩlẽẽta ꞌcĩg ĩĩn iyyio ꞌcĩg adtuurna tũũrẽn cĩggĩĩng.”