Terethiinit 6 - ꞌBuuk cĩ Thõõth cĩ Nyekuci

Ubbuuk Yeesu ꞌbuuk

¹ Ma ho, hudtuuha Mĩꞌnyõõn ngaatĩ avvahanĩ waraga ꞌcĩ oou waragẽẽtĩĩ ĩbaag ĩĩn tũkĩramma adili doollianga nẽ hĩthĩha molook ꞌcĩ oou hẽlẽggẽẽnnĩĩ ꞌcĩg ĩĩn ꞌwec arũgĩ ho, ẽggẽrẽny hĩ bõrõhẽẽcĩ aĩ, “Ijjia!”

² Ma ho, hĩcĩna ꞌthukannioohit cĩ nyangõõllẽẽ ꞌcĩ õõrĩ, aꞌnyak irigi nẽ itihim temedek ꞌcĩ baa aaꞌnyĩhoothĩk ĩnõõnnõ nẽ nga adiim ngaatĩ ĩllõõanĩ noho.

³ Ma baa awaanyana Mĩꞌnyõõn doolliang ꞌcĩ adil waraga ꞌcĩ ĩĩn ꞌramma ho, ẽdẽcĩ ꞌgii ꞌcĩ arũgĩ ꞌcĩ ĩĩn ꞌramma ho aĩ, “Ijjia!”

⁴ Ma ho, uppwaanna nyangõõllẽẽ ꞌcĩ marihẽẽnĩ, õtõd ꞌthukannioohiti ꞌcĩ aaꞌnyĩhoothĩk ꞌtirriani ꞌcĩ attihaanĩ jõrẽẽn loota nĩnga, hátĩ hurukto eeta ẽmmẽn nẽ baa aaꞌnyĩhoothĩk ĩnõõnnõ nyetuboot cobbi buúk.

⁵ Ma nĩngaata, awaanyana Mĩꞌnyõõn doolliang ꞌcĩ ĩĩn iyyio. Ma ho, ẽdẽc ꞌgii ꞌcĩ arũgĩ ꞌcĩ ĩĩn iyyio ho ĩĩ, “Duhuna!” Nĩngĩtĩ akuuni nyangõõllẽẽ ꞌcĩ holliẽẽnĩ, ẽcẽrma eet ꞌcĩ aꞌnyak ꞌraatil attia.

⁶ Nẽ hĩthĩha molook ꞌcĩ aku hõrggẽẽnaa cĩ hẽlẽggĩ ꞌcĩg arũgĩ ĩĩn ꞌwec ko nẽ õthõõth ĩĩ, “Ũũppan lokirriaacĩ cĩ ꞌgẽẽmẽ cĩ dtiic cĩ kõr hõdẽẽthõng hode lokirriaaꞌnya iyyio cĩg haal ꞌcĩg haĩ ꞌbarli, dũman cĩ dtiic ꞌcĩ õkõmĩ cĩ kõr hõdẽẽthõng. Nẽ ma hurangannu ngõõrrõ cĩ olivi hode cĩ viinoo.”

⁷ Ma baa awaanyan Mĩꞌnyõõn doolliang ꞌcĩ ĩĩn ꞌwec ko, ẽdẽcĩ ꞌgii ꞌcĩ arũgĩ ꞌcĩ ĩĩn ꞌwec ko aĩ, “Ijjia!”

⁸ Hĩcĩnootha looc hẽẽtahujjieen nẽ hudtuuha nyangõõllẽẽ ꞌcĩ ꞌthõllĩ. Haĩ ꞌthaar cĩg ꞌthukanniooktak, Daahĩth nẽ ũnũa Habuccieet cĩ Daahĩthõõ ĩnõõnnõ uruta. Baa aaꞌnyĩhoothĩk ĩhõõggõ makaaꞌthĩt ꞌcĩ aggamĩ dhoorit ꞌcĩ abadtẽc loota nĩnga nẽ uruhit eet nyetubooꞌnyanĩ hĩ magĩꞌthiõõhĩ hĩ mooriꞌthioohĩ nẽ uruhit eet hẽlẽggẽẽnnĩĩ ꞌcĩg arũgĩ ĩcĩg moru.

⁹ Ma baa awaanyan Mĩꞌnyõõn doolliang ꞌcĩ ĩĩn ꞌtur ko, hadtuuha hinnia loriẽẽt ꞌcĩg aattĩg altaarĩa loota cĩg eet baag aruhi vẽlẽk, hĩnĩngĩtĩ baa ẽlẽmĩ nẽẽg nẽ othoothito thõõth cĩ Nyekuci.

¹⁰ Ẽggẽrẽny nẽẽg moloohaa cobbi aĩ, “Makayyioohit ꞌcĩ elleemi nẽ iinu dĩdĩ, hõllõngaa aruha oolo, nẽ etteedu nẽ uuku eet baag arukeet ngagĩĩt thõng inni?”

¹¹ Baa aanytĩhoothĩk eet ꞌcĩg urukti vẽlẽk ceremwaana ꞌcĩg õõrẽẽgĩ. Baa adukiaak ĩhõõggõ thõõth hiyyiomanit nõõ hĩdĩhĩdĩĩc, ĩꞌthõng hũttũbanoothĩk ꞌliimira cĩ ꞌgõtõõnõgĩ hĩ ngõõnõgĩ cĩggĩĩng, ꞌcĩg ĩĩn dticcianniook cĩg Yeesu ꞌcĩg hatĩ nga aruhi, ꞌcĩg nga hummuddioothĩk ĩhõõggõ.

¹² Ma baa awaanyan Mĩꞌnyõõn doolliang ꞌcĩ ĩĩn tõrkõnõn ko, ikia uluba hirihidtihi cobbi gẽrrẽẽt nẽ ũtũhũĩ kõrra hĩĩ hollia haau hĩ cẽrẽm ꞌcĩ holliẽẽnĩ nẽ ũtũhũĩ nyĩlõhĩ hĩĩ marik, hudukto hĩ biyyi.

¹³ Ma ho, udhukta mũnyũnya hiita looc, haauto hĩ ꞌmũũnĩ ꞌcĩg arurra ngõõtĩ nga hibbiirito.

¹⁴ Ma ho, iꞌnginõõthĩ hẽẽtkujjieen. Ma nĩngaata, eejehit muurrioha hĩ dtuunganĩ nga gõõng aattiyyi.

¹⁵ Ma ngaati, iita utuguꞌthi habuẽẽta cĩg lootu hĩ makayyiook hĩ ꞌgaala cĩg ũũrũta hĩ balliook hĩ eet ꞌcĩg tiirik, hĩ appahacaaꞌnya hĩ eet baag hõllõngaa ĩĩn appahacaaꞌnya vẽlẽk, ilomẽẽtĩtõõ hĩ biyyiẽẽnĩ muurriohĩtõõ.

¹⁶ Ma ho, urruuyõĩ nẽẽg muurriok hĩ biyyiẽẽn ĩĩttĩk, “Irribatteetu nẽ utugunyteetu. Ma haaꞌnyiku hĩcĩneet ẽẽtĩ ꞌcĩ iccioloongan dtaabawa nẽ utugunyteetu, hiittiõõ hõllõngaa alĩĩllĩkeet Mĩꞌnyõõna.

¹⁷ Hĩnĩngĩtĩ ikia aattĩ kõrra cĩ liilii cĩnĩĩng, nẽ nganĩ occa hatĩ ꞌcĩ akannẽẽkĩ hĩ ĩnõõnnõ ho?”