Terethiinit 5 - ꞌBuuk cĩ Thõõth cĩ Nyekuci

Mĩꞌnyõõn hĩ ꞌBuuk

¹ Nẽ hudtuuha ꞌbuuk attiaa cobbi ĩĩcĩ eet ꞌcĩ aaĩ dtaabawa ho, ꞌcĩ eheeddi ĩĩttõõ hĩ battaala vẽlẽk nẽ idili ꞌgoolliok tũkĩramma.

² Nẽ tarĩ hĩcĩna aajĩlõ cobbi ꞌcĩ attiran gẽrrẽẽt ꞌcĩ ẽggẽrẽny aĩ, “Nganĩ ꞌcĩ ũũlũ ngaatĩ avvahanĩ ꞌbuuk icci adili ho nẽ ubbuuha?”

³ Baa aitiõõ eet umwaa loota nĩnga hode hẽẽtahujjieen, hode ꞌthẽẽmĩtõõ, ꞌcĩ occa abbuuk nẽ itigiil ꞌbuuk nicci tõõ.

⁴ Ma ho, hutuluua gẽrrẽẽt, hĩnĩngĩtĩ baa aitiõõ ẽẽtĩ ꞌcĩ ammuddiaa ꞌcĩ occa ũũppan ngaatĩ abbuuhi nẽ itigiil ꞌbuuk nicci tõõ.

⁵ Ma ho, õthõõthahaa makayyioohiti umwaa hõrggẽẽnaa cĩ makayyiook ꞌcĩg ĩĩn hẽẽn ꞌramma hĩ ꞌwec ko ĩĩnnĩhaa, “Ma halu! Cĩĩn nõõnĩ, aaĩ ẽẽtĩ ꞌcĩ attiran ꞌcĩ haĩ ꞌMaa, ĩnõõ Yeesu ꞌcĩ arrittiaa habuccieetaa cĩ ꞌJuuda, hattũũgaa cĩ habu Daavide ꞌcĩ ĩllõõana. Ĩnõõnnõ dioo ꞌcĩ occa aga ngaatĩ avvahanĩ ꞌbuuk ꞌcĩ adili ꞌgoolliok tũkĩramma ho nẽ ubbuuha.”

⁶ Ma nĩngaata, hudtuuha Mĩꞌnyõõn, abĩlĩ hõrggẽẽnaa cĩ dtaabaõ, irriamaneek hẽlẽggĩ ꞌcĩg ĩĩn ꞌwec ꞌcĩg arũgĩ, hĩ makayyiook ꞌcĩg ĩĩn hẽẽn ꞌramma hĩ ꞌwec, haau hĩ ẽẽtĩ baa aruhi. Baa aꞌnyak nẽẽ otto tũkĩramma hĩ hẽbẽrĩ tũkĩramma buúk, ꞌcĩg ĩĩn loriẽẽt tũkĩramma cĩg Nyekuci, ꞌcĩg ĩꞌthõõak nẽẽ looc vẽlẽk.

⁷ Aku Mĩꞌnyõõn noho, nẽ aggama ꞌbuuk ĩĩcĩ aꞌthiit cobbi cĩ eet ꞌcĩ iccioloongan dtaabawa.

⁸ Ma baa aggama nẽẽ ꞌbuuk nicci ho, uruhit hẽlẽggĩ ꞌcĩg arũgĩ ĩĩn ꞌwec hĩ makayyiook ꞌcĩg ĩĩn hẽẽn ꞌramma hĩ ꞌwec ko, looc nẽ akattieek Mĩꞌnyõõn huruꞌnyia. Baa aꞌnyak nẽẽg vẽlẽk addungẽẽt hĩ lohilihilit ꞌcĩg ĩĩn ꞌdaab, ꞌcĩg abbĩꞌthĩĩ mõhõõkacĩ ꞌcĩ ĩĩn laiinit cĩ eet cĩg Nyekuci.

⁹ Nẽ ebenit nẽẽg tẽgẽl ꞌcĩ ĩĩn ngeju ꞌcĩ aĩ, “Nganiit dioo ꞌcĩ occa õkõõĩ ꞌbuuk nẽ avvahanuu dilẽẽnĩt cĩnnĩ, hĩnĩngĩtĩ baa aruhi niina, iita eellia biyyieeta cugunnig eet hĩĩtõ eet cĩg Nyekuci habuccieeꞌnyanĩ hĩ utugeetinii ꞌcĩg õthõõth eeta vẽlẽk cũũmõ cũũmõ hĩ eet loonyini vẽlẽk.

¹⁰ Aaꞌnyĩhuu nii ĩhõõggõ hiita hĩĩtõ habuẽẽt hĩ paadĩrꞌnya ꞌcĩg adticanoothĩk Nyekuc. Aggam hatĩ nẽẽg looc nicci.”

¹¹ Ma tarĩ ho, hĩthĩha molook cĩ aajĩlẽẽt ꞌcĩg mẽẽlĩg ꞌrĩĩng ꞌcĩg ĩĩn aalibꞌnya hĩ millioꞌnya, ebenni nẽ irriamatteek dtaaba cobbi ho, hĩ hẽlẽggĩ ꞌcĩg ĩĩn ꞌwec ꞌcĩg arũgĩ ho, hĩ makayyiook ꞌcĩg ĩĩn hẽẽn ꞌramma hĩ ꞌwec ko.

¹² Baa ebenni nẽẽg moloohaa cobbi aĩ, “Adiim Mĩꞌnyõõn baa aruhi haggam ꞌtirrian hĩ baliinit hĩ ꞌgẽẽnyĩth hĩ tingoli hĩ bulẽẽnĩt hĩ dĩhĩthẽẽnĩt.”

¹³ Ma nĩngaata, hĩthĩha hẽlẽggĩ vẽlẽk ꞌcĩg aattĩg hẽẽtahujjieen hĩ loota hĩ ꞌthẽẽmĩtõõ, looccaa cĩ miningu hĩ bũlũccwaanĩtõõ vẽlẽk ebenni aĩ, “Hadihiꞌthii nganiit gẽrrẽẽt ꞌcĩ aaĩ dtaabawa ho hĩ Mĩꞌnyõõn, aꞌnyĩĩk haau dĩhĩthẽẽnĩtĩ hĩ tẽẽlꞌthĩt hĩ bulẽẽnĩt hĩ ꞌtirrian vẽlẽk hĩ nganiit ooo.”

¹⁴ Nĩngĩtĩ ẽdẽcĩ hẽlẽggĩ ꞌcĩg arũgĩ ĩĩn ꞌwec ko aĩnnĩ, “Aamẽn!” Ma ho, akatit makayyiooha ꞌcĩg ĩĩn hẽẽn ꞌramma hĩ ꞌwec ko huruꞌnyia nẽ alaacõ Nyekuc hĩ Mĩꞌnyõõn.