Terethiinit 4 - ꞌBuuk cĩ Thõõth cĩ Nyekuci

Laiinit halangatõõ cĩ Nyekuci

¹ Ma nĩngaata, hĩcĩna hattũũg cĩ õlõ cĩ Nyekuci hẽẽtahujjieen ubbuuhi nẽ ikia mõlõõhĩ ꞌcĩ baa hĩthĩha ĩĩcĩ oou ẽlẽk, ẽggẽrꞌnya hĩ tũũrĩ nẽ ĩnnĩhaa, “Ijjia da ngaati, hátĩ heteretheehii thooꞌthiok ꞌcĩg hatĩ edeeꞌnyia urutaa cĩ thooꞌthiok iccig.”

² Ma hĩdĩĩkoothong, hudtuuha Lori ĩĩcĩ muum caannĩ hĩ dtaaba cĩ hẽẽtkujjieen, ꞌcĩ iccioloonganĩ ẽẽtĩ umwaanĩ.

³ Nẽ aaĩ ẽlẽ cĩ eet ꞌcĩ aayyi dtaaba ho, hĩ biyyiẽẽna ꞌcĩg attalĩth ꞌcĩg haĩ ꞌJatheper hĩ karnelia nẽ irriamaneek lanyit dtaaba ꞌcĩ aayyi nẽẽ ho, haau hĩ tõõlõngẽẽcĩ ꞌcĩ aaĩ hĩ bẽẽ ꞌcĩ haĩ ẽmẽral.

⁴ Baa irriamaneek dtaaba ꞌcĩ aayyi nẽẽ ho, dtaabĩta ũgẽẽgĩ tarĩ, ꞌcĩg ĩĩn hẽẽn ꞌramma hĩ ꞌwec ꞌcĩg aattiyyi makayyiooha ũgẽẽgĩ ꞌcĩg ĩĩn hẽẽn ꞌramma hĩ ꞌwec buúk, ꞌcĩg ahimit ceremwa ꞌcĩg õõppẽr nẽ aꞌnyahit tẽmẽdẽhĩt ꞌcĩg attalĩth ꞌcĩg adĩmanniaa ꞌdaaba.

⁵ Nẽ dtaabawa nĩĩcĩ, ammadĩ lõõcĩ nẽ ẽggẽrẽny bõrõhẽẽcĩ gẽrrẽẽt. Ĩĩcĩ muum cĩ dtaaba nicci, alanyĩt ꞌgwoyyiẽẽna tũkĩramma ꞌcĩg ĩĩn Loriẽẽt cĩg Nyekuci.

⁶ Nẽ ĩĩcĩ muum cĩ dtaaba nicci, attalĩth ꞌgiimwa ꞌcĩ aĩ ꞌthalak ꞌthalak hĩ maama cĩg hidiowwaak. Nẽ irriamaneek dtaaba nicci hẽlẽggĩ ũgẽẽgĩ ꞌcĩg arũgĩ ĩĩn ꞌwec, ꞌcĩg aꞌnyak hẽbẽrĩ muumtini hĩ ĩĩcĩ deeccwaanu vẽlẽk.

⁷ Edeeꞌnyia ꞌgiimwaa ꞌcĩ arũgĩ ꞌcĩ oou, aaĩ hĩ ꞌmaa nẽ anũẽẽkĩ ꞌcĩ aaĩ hĩ olĩ nẽ ꞌcĩ ĩĩn iyyio, aꞌnyak muum hĩ ẽẽtĩ nẽ ꞌcĩ ĩĩn ꞌwec, aaĩ hĩ ꞌthuuti ꞌcĩ alilliaan thõng.

⁸ Nẽ aꞌnyak hẽlẽggĩ ꞌcĩg arũgĩ ĩĩn ꞌwec ko vẽlẽk, havvuuto tõrkõnõn. Havvuutõnĩĩ nĩĩcĩg, aꞌnyak hẽbẽrĩ ĩĩttõõ hĩ battaala vẽlẽk nẽ aalla ebenni hẽlẽggĩ niccieeg arũgĩ ho, baalin hĩ waathĩn aĩ, “Ẽllẽẽmĩth, ẽllẽẽmĩth, ẽllẽẽmĩth, Makayyioohiti Nyekuci ꞌTirriannioohiti ꞌcĩ ĩllõõan vẽlẽk, baa aaĩ ĩĩcĩ oou nẽ aaĩ ꞌyioko nẽ õbõda hatĩ tarĩ.”

⁹ Baa aalla ebeneek hẽlẽggĩ niccieeg arũgĩ ho, eet ꞌcĩ aaĩ dtaabawa ho, tegellwa ꞌcĩg adĩkꞌthĩ ĩnõõnnõ hĩ ꞌcĩg abulꞌthĩ eet ꞌcĩ aalla arũgĩ ooo ho nẽ ĩĩttĩk ĩnõõnnõ ĩlaallẽ.

¹⁰ Ma ho, akatit makayyiooha ꞌcĩg ĩĩn hẽẽn ꞌramma hĩ ꞌwec ko huruꞌnyia nẽ alaacõ Nyekuc ꞌcĩ aaĩ dtaabawa nẽ ĩĩn nẽẽ Nyekuc ꞌcĩ aalla ooo. Nẽ itikta tẽmẽdẽhĩt cĩggĩĩng aarrik loota muumaa ꞌcĩ dtaaba nicci nẽ ĩĩtõ,

¹¹ “Makayyioohit hĩ Nyekuc cĩnaang, iini nii eet ꞌcĩ occa aaꞌnyĩhoothikii dĩhĩthẽẽnĩtĩ hĩ bulẽẽnĩt hĩ ꞌtirrian vẽlẽk, hĩnĩngĩtĩ baa ẽhẽnyta nii hẽlẽggĩ vẽlẽk, baa ẽtẽhẽnytaa nẽẽg tabiittaa cunni, nẽ aaꞌnyĩhuu ĩhõõggõ rũgẽt.”