Terethiinit 18 - ꞌBuuk cĩ Thõõth cĩ Nyekuci

Irribanĩ ꞌtaaũnĩ cĩ Babiloonnia

¹ Ma urutaa cĩ thooꞌthiok iccig vẽlẽk, hudtuuha aajĩlõ umwa ꞌcĩ alluuccia hẽẽtahujjieen ꞌcĩ aꞌnyak ꞌtirriani cobbi gẽrrẽẽt nẽ aara ẽlẽ cĩnnĩ hũttũhũl looc vẽlẽk, hĩnĩngĩtĩ bulẽẽnĩt.

² Ma ho, ikia ẽggẽrẽny aajĩlõ tĩho gẽrrẽẽt ĩĩ, “Ĩꞌthaanĩ Babiloonnia ꞌtaaũnĩ cobbi hirribanĩ hĩĩ ꞌthĩĩ! Ikia ĩĩ õlõ cĩ loriẽẽt ꞌcĩg abathĩ, nẽ aautti loriẽẽta ꞌcĩg abathĩ hĩ hĩbaallĩ hĩ idiꞌngwa ꞌcĩg abathĩ vẽlẽk.

³ Ũhũdĩt loonyini vẽlẽk viino cĩ thooꞌthiok cĩgĩnnĩg ꞌcĩg ĩĩn ꞌriiring. Iita atagguutho habuẽẽta cĩg looc vẽlẽk hĩ ngaa nicci. Nẽ tarĩ, iita aballio tũjaarrioha cĩg looc nicci vẽlẽk buúk, hĩnĩngĩtĩ ngaa nicci.”

⁴ Ma ho, hĩthĩha molook umwa ꞌcĩ aku hẽẽtahujjieen ꞌcĩ õthõõth aĩ, “Niig eeta cĩgannẽẽgĩ, uduhutta battaala ꞌtaaũnaa cĩ Babiloonnia, hátĩ hiittiõõ hõllõngaa othollu ꞌthẽccanẽẽt hĩ ĩnõõnnõ, nẽ tarĩ, hátĩ hiittiõõ hõllõngaa uukennu hõdẽĩ hĩ ĩnõõnnõ.

⁵ Hĩnĩngĩtĩ athaddi ꞌthẽccanẽẽta cĩg Babiloonnia gẽrrẽẽt ũdũt hõdõlanit hẽẽtkujjieen, nẽ agaõõthĩ Nyekuci ꞌthẽccanẽẽt cĩgĩnnĩg.

⁶ Dĩmaneek ngaa nicci thooꞌthiok baag adĩmaneek nẽẽ buúk eet. Uuk ĩnõõnnõ hakattio hĩ ꞌthẽccanẽẽt cĩgĩnnĩg. Uuk ĩnõõnnõ ukẽẽttaa ꞌcĩ ũũppan ꞌthẽccanẽẽt cĩgĩnnĩg.

⁷ Aꞌnyĩĩk ĩnõõnnõ ukẽẽnĩt hĩ huciith ꞌcĩ ĩllõõanĩ, hĩ baa abuluth nẽẽ ẽlẽ cĩnnĩ nẽ abalõ. Aĩ nẽẽ ꞌthĩnĩtaa cĩnnĩ nẽẽ, ‘Haayyi naa dtaaba nẽ hĩĩnĩ habu ꞌcĩ ngayyi, hõllõngaa hĩĩnĩ ngaatĩbõyyĩ nẽ hõllõngaa hatĩ homoꞌthi ũdũt.’

⁸ Nẽẽthĩ hoti ho, atinya hatĩ nẽẽ ꞌcannan hĩ magĩth hĩ daahĩth kõr hõdẽẽthõng haaga. Aaĩ hatĩ nẽẽ ulwaanaa cobbi gẽrrẽẽt. Atũũth hatĩ ꞌgwaa ẽlẽ cĩnnĩ hĩĩ ꞌthĩĩ, hĩnĩngĩtĩ ẽttẽẽd Makayyioohiti Nyekuci ꞌTirriannioohiti thõõth cĩnnĩ ẽlẽk.”

⁹ “Au hatĩ alu habuẽẽta cĩg lootu vẽlẽk baag oogin nẽ accamattoothĩk hĩ ngaa nicci, ngaatĩ acĩnĩ ꞌgwoo hĩ bũrrẽt ꞌcĩ atũũthẽnĩ ngaa niccieeni.

¹⁰ Aaꞌnyĩk hatĩ pĩĩrnanĩtĩ cĩ ꞌtaaũn nicci obbi ho ĩhõõggõ hitingolli nẽ ibillia ꞌrẽẽna nẽ ĩĩtõ, “ ‘Pĩĩrnanĩt tĩhathini nicciee ꞌtaaũn cobbi ho! Babiloonnia, ꞌtaaũn cobbi ꞌcĩ attiranĩ! Aku cuddiaanĩtĩ cunni ꞌthaa hõdẽẽthõng haaga!’

¹¹ “Alu hatĩ tũjaarrioha cĩg looc nicci vẽlẽk ĩnõõnnõ, hĩnĩngĩtĩ iittiõõ hatĩ ẽẽtĩ ꞌcĩ nga ũũt ijjio cĩggĩĩng tõõ.

¹² Iittiõõ hatĩ eeta ꞌcĩg nga ũũt ꞌdaab, hĩ maccĩrẽẽn hĩ tẽllẽẽn ꞌcĩg attalĩth hĩ pẽalꞌnya hĩ ceremwa ꞌcĩg ẽllẽẽmĩth hĩ buuya ꞌcĩ ꞌrẽggẽẽ hĩ cẽrẽm ꞌcĩ ahĩggĩrĩĩ hĩ cẽrẽm ꞌcĩ marihi hĩ abaauꞌnya hĩ hẽlẽggĩ ꞌcĩg adĩmanniaa nyĩgĩtẽẽ cĩg oꞌngollwaanu hĩ abaauꞌnya ꞌcĩg õkõmĩ ngaatĩ hũũtanĩ hĩ ꞌthĩĩk hĩ biyyiẽẽn ꞌcĩg attaalĩth tõõ.

¹³ Iittiõõ hatĩ ẽẽtĩ ꞌcĩ nga ũũt hẽlẽggĩ ꞌcĩg aaꞌnyĩk ꞌgẽẽn hẽmmẽd hĩ mõhõõkac hode viino hode ngõõrrõ cĩ olivi hode haala hode ꞌgẽẽmẽ hode tĩĩna hode aꞌtha hode ẽẽtha hode nyangõõllẽẽꞌnya hode ꞌgadiggadiꞌnya hode appahacaaꞌnya tõõ.

¹⁴ “Nẽ urruuyyio nẽẽg ĩĩtõ, ‘Babiloonnia! Iliittiaii hẽlẽggĩ baag abũraneehi nii vẽlẽk, ammanyanĩ ꞌcannani hĩ bulẽẽnĩt cunni ũdũt.’

¹⁵ Baa aballio tũjaarrioha gẽrrẽẽt, hĩnĩngĩtĩ ꞌtaaũn cĩ Babiloonnia obbi ho. Ma baa acĩn nẽẽg pĩĩrnanĩt cĩnnĩ ho, iita utullẽẽcõ nẽẽg nẽ ibillia ꞌrẽẽna

¹⁶ nẽ ĩĩtõ, “ ‘Pĩĩrnanĩt hĩ ꞌtaaũn cobbi cĩ Babiloonnia, baa gõõng ahimti ceremwaanĩĩ ꞌcĩg anyũttĩĩ ĩcĩg ꞌthorrialĩk, nẽ itihim maccĩrẽẽn ꞌcĩg attalĩth ꞌcĩg adĩmanniaa ꞌdaaba hĩ biyyiẽẽnĩĩ ꞌcĩg ĩĩn tẽllẽẽn hĩ pẽalꞌnya.

¹⁷ Iꞌnginõõthĩ baliiniti cĩ ꞌtaaũn nicci obbi ho, kõr ꞌcĩ odoyyii noho matadaꞌnyak.’ “Nẽ ꞌgaala cĩg haahũlaak, hĩ ꞌthũaahĩt hĩ eet vẽlẽk ꞌcĩg õtõd haahũl hĩ tũjaarriok cĩg bũlũccwaanu vẽlẽk, ibillia ꞌrẽẽna.

¹⁸ Ma baa ĩcĩttõõthĩ nẽẽg bũrrẽt ꞌcĩ atũũthẽnĩ ꞌtaaũnĩ nicciee obbi ho, iita eggerenyit nẽẽg ĩĩtõ, ‘Baa aitiõõ ꞌtaaũnĩ loota nĩnga vẽlẽk cobbi gẽrrẽẽt, ꞌcĩ ĩllõõan icci tõõ.’

¹⁹ “Ma nĩngaata, atuꞌthaanĩk hatĩ nẽẽg ooti cĩggĩĩng tuduhaac nẽ aauto ulwaana nẽ othoothito ĩĩtõ, “ ‘Pĩĩrnanĩt hĩ ꞌtaaũn cobbi cĩ Babiloonnia! Aballio eeta vẽlẽk baag aꞌnyak haahũlĩt bũlũccwaanĩ, hẽlẽggẽẽnnĩĩ cĩg ꞌtaaũn nicci obbi ho. Ma hĩdĩĩkoothong, iꞌnginõõthĩ ꞌtaaũnĩ nicciee obbi ho kõr ꞌcĩ odoyyii.

²⁰ Accamattoothĩk niig eeta cĩg Nyekuci hẽẽtahujjieen hĩ ꞌthooyyiak hĩ põrõvẽtaaꞌnya cĩgĩnnĩg vẽlẽk, hĩnĩngĩtĩ uuk Nyekuci ꞌtaaũn nicci hakattio hĩ ꞌgõõl baa adĩmannuung nẽẽ ngagiit buúk.’ ”

²¹ Ma nĩngaata, õdõnga aajĩlõ umwaa ꞌcĩ attiran gẽrrẽẽt bẽẽ cobbi nẽ udhuheek ꞌtirriaana bũlũcatõõ, nẽ õthõõth ĩĩ, “ꞌGõõl ꞌcĩ hatĩ ĩꞌthaanini ꞌtaaũnĩ cĩ Babiloonnia ciee hiittiõõ hõllõngaa edeeꞌnyia tarĩ.

²² Iittiõõ hatĩ addungẽẽta hĩ benniook hĩ loboruẽẽt hĩ tũũrẽn ꞌcĩg nga athĩknĩ hĩ nganiit tarĩ tõõ. Iittiõõ hatĩ dticcianniooha ꞌcĩg nga ẽhẽnyĩt dũkaanĩt hĩ nganiit tarĩ tõõ, nẽ iittiõõ hatĩ hirriẽẽta ꞌcĩg nga athĩknĩ hĩ nganiit tarĩ tõõ.

²³ Iittiõõ hatĩ ꞌloomo ꞌcĩ nga alanyĩt hĩ nganiit tarĩ tõõ. Iittiõõ hatĩ mõlõõhĩ cĩ nyattaraanõ, hõllõngaa athĩknĩ hĩ nganiit tarĩ. Baa ĩĩn tũjaarrioha cugunnig eet ꞌcĩg obbitig gẽrrẽẽt loota nĩnga. Nẽ ngarĩꞌthẽẽt cunni ho, ikia aaꞌnyĩk eet cĩg loonyin vẽlẽk harahanit.

²⁴ Baa nganiit ꞌcĩ aĩnanaa eet baag ĩĩn põrõvẽtaaꞌnya, hĩ eet ꞌcĩg ẽllẽẽmĩth cĩg Nyekuci, hĩ eet vẽlẽk baag aruhi loota nĩnga, hudduutti biyyieeta loota.”