Terethiinit 17 - ꞌBuuk cĩ Thõõth cĩ Nyekuci

Ngaa ꞌcĩ ĩĩn ꞌwaaꞌngiahit hĩ Nyaharahaak

¹ Ma ho, ikia aajĩlõ umwaa ꞌcĩ ĩĩn tũkĩramma ꞌcĩ baa ĩꞌthaanĩk ꞌthẽrẽt ꞌcĩ aꞌnyak lohilihiliiaa cĩnnĩ looc vẽlẽk ĩnnĩhaa, “Ijjia da ngaati, hatĩ heteretheehii ꞌgõõl ꞌcĩ hatĩ õkõ uuki Nyekuci ngaa ꞌcĩ ĩĩn ꞌwaaꞌngiahit cobbi gẽrrẽẽt, ꞌcĩ iccioloongan bũlũccwaanĩĩ ꞌcĩg mẽẽlĩg.

² Atagguutho nẽẽ hĩ habuẽẽt vẽlẽk loota nĩnga. Nẽ ngaaoni cĩnnẽẽnĩ, aau hĩcĩ eet ꞌcĩg ahũd viino hũdũũtĩtõ nẽ idticanit thooꞌthiok ꞌcĩg ĩĩn ꞌriiring loota nĩnga.”

³ Nĩngĩtĩ õkõõyya aajĩlõ Loriia horrwatõõ ꞌcĩ õdõhõhĩĩ kak. Ma ĩĩca, hũũk hĩcĩna ngaa umwa ꞌcĩ iccioloonganĩ nyaharahaak ꞌcĩ marihi ꞌcĩ aꞌnyak ooti tũkĩramma hĩ otto õmmõtõ nẽ baa eheedothoothĩk doominiti ꞌcĩ õdõõmĩ Nyekuc ẽlẽ cĩnnĩ hũtũrũũr.

⁴ Nẽ baa ahimit ngaa nicciee ceremwa ꞌcĩg ẽllẽẽmĩth ꞌcĩg ꞌthorrialĩk nẽ ĩĩtõ marihik nẽ aꞌnyak dihidok ꞌcĩg attalĩth ꞌcĩg adĩmanniaa ꞌdaaba nẽ tarĩ, aꞌnyak biyyiẽẽn ꞌcĩg aaddi hĩ pẽalꞌnya. Aꞌnyak nẽẽ hooppo ꞌcĩ ĩĩn ꞌdaab athĩnĩĩ cĩgĩnnĩg, ꞌcĩ abbĩꞌthĩĩ hẽlẽggĩ ꞌcĩg õꞌngõlĩ ĩĩn ꞌriiring ꞌcĩg gõõng adĩman nẽẽnĩ.

⁵ Nẽ muumaa cĩnnĩ, eheedothoothĩk ꞌthaara ꞌgõõlaa ꞌcĩ ammiꞌthi ꞌcĩg aĩ, Hĩĩnĩ naa ꞌtaaũn cobbi cĩ Babiloonnia, aattĩ thooꞌthiok vẽlẽk ꞌcĩg ĩĩn ꞌriiring loota nĩnga. Nẽ hĩĩnĩ aattĩ hẽlẽggĩ vẽlẽk ꞌcĩg abathĩ gẽrrẽẽt loota nĩnga.

⁶ Nẽ ma hadtuuha, adũũtĩ ngaa tĩho gẽrrẽẽt, hĩnĩngĩtĩ biyyi ꞌcĩg acũdaanĩ nẽẽ eet baag ẽlẽmana eleeti cĩggĩĩng anũĩ Yeesu. Nẽ baa abulannaa thõõth ciee gẽrrẽẽt ũdũt.

⁷ Ma ho, ĩnnĩhaa aajĩlõ nẽẽ, “Akuleehi ꞌjieen noho inni? Hẽddẽẽbakii hatĩ naa thõõth cĩ ngaa nicci nẽ hẽddẽẽbahii thõõth ꞌcĩ ammiꞌthi cĩ nyaharahaak ꞌcĩ aꞌnyak ooti tũkĩramma hĩ otto õmmõtõ, ꞌcĩg iccioloonganĩ nga nicciee ho buúk.

⁸ Ĩĩn nyaharahaahĩ ꞌcĩ baa acini nii ho, nyaharahaak ꞌcĩ baa arũgĩ baarkit nẽ ꞌyioko, adaaha, adukna hatĩ ꞌloohatõõ cĩ daahĩthõõ nẽ ũũk uduhoothĩha. Nẽ eeta ꞌcĩg looc nicci, ꞌcĩg baag nga heteheeddi ꞌthaara cĩggĩĩng ꞌbuuhaa cĩ rũgẽtõ baa nga heteheꞌnyiaa lõõcĩ, akuleek hatĩ ꞌjieen ngaatĩ uppwaannanĩ nyaharahaahĩ baa adaak ẽlẽk.

⁹ “Aga ẽẽtĩ ꞌcĩ ẽggẽẽnyĩth aĩ, ĩĩn ooti ꞌcĩg ĩĩn tũkĩramma ꞌcĩg iccioloonganĩ ngaa nicciee ho, muurriok tũkĩramma nẽ tarĩ, ĩthakꞌthoothĩk ooti cieeg buúk habuẽẽt ꞌcĩg ĩĩn tũkĩramma ho.

¹⁰ Adaahito habuẽẽta ꞌcĩg ĩĩn ꞌtur ẽlẽk nẽ nga aaĩ hõdẽĩ, ꞌcĩ nga aggam looc ꞌyioko nẽ nga hatĩ aku umwaanĩ. Nẽ má ikia tĩho, aku hatĩ aggam looc hĩdĩhĩdĩĩc haaga nẽ iꞌnginõõthĩ.

¹¹ Nẽ nyaharahaahĩ baa adtuuha nii arũgĩ nẽ ꞌyioko iꞌnginõõthĩ ho, ĩĩn habu ꞌcĩ ĩĩn turkiyyio, urutaa cĩ habuẽẽt ꞌcĩg ĩĩn tũkĩramma ho, aruhi hatĩ nẽẽ buúk, hiꞌnginõõthĩ haaga.

¹² “Nẽ otto ꞌcĩg ĩĩn õmmõtõ ho, ĩĩn habuẽẽt õmmõtõ ũgĩ tarĩ, ꞌcĩg hatĩ au aggam habuẽẽꞌthĩt cĩnĩĩng hĩ nyaharahaak hõdẽĩ kõr hõdẽẽthõng haaga.

¹³ Ẽlẽmĩ hatĩ nẽẽg vẽlẽk ngaatĩ aaꞌnyĩkĩ nyaharahaak nicci ꞌtirrian hĩ makaaꞌthĩt cĩnĩĩng.

¹⁴ Nẽ aak hatĩ habuẽẽta niccieeg vẽlẽk jore ꞌcĩ õõ aruhõõnĩ hĩ Mĩꞌnyõõn. Ĩllõõan hatĩ Mĩꞌnyõõn ĩhõõggõ, hĩnĩngĩtĩ ĩĩn nẽẽ Makayyioohit cĩ makayyioohu nẽ ĩĩ Habu cĩ habuẽẽt vẽlẽk. Arũmĩ hatĩ Mĩꞌnyõõn hĩ eet baag avva nẽẽ nẽ ẽbẽra, hĩnĩngĩtĩ baa athĩhĩ nẽẽg ĩnõõnnõ nẽ uꞌthuutti thõõth cĩnnĩ.”

¹⁵ Nẽ ĩnnĩhaa aajĩlõ nẽẽ, “Bũlũccwaana ꞌcĩg acini nii iccioloonganĩ ngaa ꞌcĩ ĩĩn ꞌwaaꞌngiahit ko, ĩthakꞌthoothĩk lothippit cĩ habuccieeꞌnyanu hĩ hattũũgẽt cĩg loonyin vẽlẽk ꞌcĩg õthõõth thooꞌthiohĩ cũũmõ cũũmõ.

¹⁶ Aku hatĩ nyaharahaahĩ ꞌcĩ aꞌnyak otto ꞌcĩg ĩĩn õmmõtõ ho, iꞌthianaanĩ ngaatĩ aaburrẽẽkĩ ngaa ꞌcĩ hõllõngaa aꞌngaaõn buúk ko. Appũrcca hatĩ nẽẽg ceremwa ꞌcĩg ahimit ngaa nicciee ho vẽlẽk nẽ ũtũngteek ĩnõõnnõ haau ngũtũtũũny nẽ hatĩ adahit ẽlẽ cĩnnĩ nẽ itikta thuruthur cĩg ẽlẽ cĩnnĩ ho, udhukteek ꞌgwoyyiatõõ hutuuꞌthi hĩĩ ꞌthĩĩ.

¹⁷ Nyekuc ꞌcĩ aaꞌnyĩk habuẽẽt niccig hõdõĩ muhẽẽnĩtĩ cĩnĩĩng, ĩnõõ ꞌcĩ ẽlẽmaakĩ nẽẽg vẽlẽk ꞌtirrian cĩnĩĩng nyaharahaak nicci ho. Adĩman ꞌthẽk hatĩ nẽẽg noho ĩꞌthõng, hikia thõõth baa aduha Nyekuci hĩĩ dĩdĩ.

¹⁸ “Nẽ ngaa ꞌcĩ adtuuha nii ho, ĩthakꞌthoothĩk ꞌtaaũn cobbi ꞌcĩ aggam habuẽẽt cĩg lootu vẽlẽk.”