Terethiinit 15 - ꞌBuuk cĩ Thõõth cĩ Nyekuci

Aajĩlẽẽt tũkĩramma hĩ ꞌthereeni tũkĩramma

¹ Ma uruta, hudtuuha ꞌgiimwa hẽẽtahujjieen ꞌcĩ abulan eet nẽ ĩĩ tiir gẽrrẽẽt. Ma ho, iita aajĩlẽẽta tũkĩramma ꞌcĩg aꞌnyaha ꞌthereeni tũkĩramma ꞌcĩg adtuurna nẽ ma edeccia ꞌthereeni cieegi, ũttũbanoothĩk thĩ liilii cĩ Nyekuci.

² Ma ho, hudtuuha ꞌgiimwa ꞌcĩ attalĩth aaĩ hĩ gĩlaathĩ ꞌcĩ maka ĩĩkĩ bũlũc nẽ õꞌngõõtanoothĩk hĩ ꞌgwoo. Baa abĩlĩ eeta baag ĩllõõan nyaharahaak hĩ ꞌthooura hĩ ꞌliimira ꞌcĩ ẽtẽrꞌtha ꞌthaar cĩg nyaharahaahõ, gĩlaathaa ꞌcĩ maka ĩĩkĩ bũlũc ko. Baa aggam nẽẽg vẽlẽk addungẽẽt, ꞌcĩg baag aaꞌnyĩk Nyekuci ĩhõõggõ.

³ Nẽ ebenit tẽgẽl cĩ Mũũꞌtha baa ĩĩn dticciannioohit cĩ Nyekuci nẽ ebenit tẽgẽl cĩ Mĩꞌnyõõnak buúk ĩĩtõ, “Makayyioohit Nyekuc ꞌTirriannioohit ꞌcĩ ĩllõõani vẽlẽk, abulanneet thooꞌthioha ꞌcĩg adticani nii ꞌcĩg ĩĩn dĩdĩ. Aggami nii eet vẽlẽk jurrung, nii Habuui cĩ irkiꞌnyia vẽlẽk ko.

⁴ Makayyioohit, nganĩ occa ꞌcĩ hõllõngaa iꞌngoliinni nganiit nẽ ubuluth ꞌthaar cugunnig? Hĩnĩngĩtĩ nganiit dioo ꞌcĩ elleemi. Au hatĩ eeta cĩg loonyin vẽlẽk alayyi nganiita, hĩnĩngĩtĩ ẽdẽẽnyta dtiicanĩ cugunnig ꞌcĩg ẽllẽẽmĩth ko ẽlẽk.”

⁵ Ma uruta, hudtuuha ꞌCieeth cĩ Nyekuci hẽẽtahujjieen abbuuhi haau ngaburuur.

⁶ Ma ho, uduhutta aajĩlẽẽta baag ĩĩn tũkĩramma ho, ꞌCieetõõ cĩ Nyekuci battaala, aꞌnyaha ꞌthereeni tũkĩramma buúk. Baa ahimit nẽẽg ceremwa ꞌcĩg õõppẽr nẽ amarũũhĩtõ ceremwa ꞌcĩg ĩĩn ꞌdaab iyyõõtini.

⁷ Ma nĩngaata, ikia ꞌgiimwaa ꞌcĩ arũgĩ hõrggẽẽnaa cĩ hẽlẽggĩ ꞌcĩg ĩĩn ꞌwec ko, eꞌngereek aajĩlẽẽt niccig lohilihilit ꞌcĩg ĩĩn ꞌdaab. Baa abbĩꞌthĩĩ liilii cĩ Nyekuc ꞌcĩ arũgĩ ooo, lohilihilitii nĩĩcĩg.

⁸ Ma ngaati, ũmmũlũũnyan bũrrẽtĩ ꞌCieeth cĩ Nyekuci, ꞌcĩ aku bulẽẽtta hĩ ꞌtirrianaa cĩ Nyekuci. Nẽ baa aitiõõ ẽẽtĩ ꞌcĩ aduhun ꞌCieeth cĩ Nyekuci ho tõõ, ĩꞌthõng hedecciaak aajĩlẽẽta ꞌcĩg ĩĩn tũkĩramma ho, ngaatĩ uumurẽẽkĩ ꞌthereeni ꞌcĩg ĩĩn tũkĩramma ho, battaala ꞌCieethaa cĩ Nyekuci.