Terethiinit 14 - ꞌBuuk cĩ Thõõth cĩ Nyekuci

Mĩꞌnyõõn hĩ nuyyiook cĩgĩnnĩg

¹ Nẽ hudtuuha Mĩꞌnyõõn abĩllĩ muuraa ꞌcĩ haĩ ꞌThion, arũmĩ hĩ eet ꞌcĩg ĩĩn aalibꞌnya ꞌmiia hõdẽĩ hĩ hẽẽn ꞌwec hĩ ꞌwec (144,000), ꞌcĩg aꞌnyak ꞌthaar cĩgĩnnĩg hĩ cĩg Maacõnĩ muumtinii cĩggĩĩng.

² Ma ho, hĩthĩha molook umwa ꞌcĩ aku hẽẽtahujjieen ꞌcĩ ẽggẽrẽny hĩ maama cĩg tawaanak, hode aaĩ hĩgõõng ĩccaayyi bõrõhẽẽcĩ hatĩ atĩĩlĩ tammu nẽ gõõng õrõk hĩ addungẽẽta ꞌcĩg aruk benniooha.

³ Nẽ ẽbẽnĩ tẽgẽl ꞌcĩ ĩĩn ngeju muumaa cĩ dtaaba cĩ Nyekuci hĩ muumaa cĩ idiꞌngwa baag ĩĩn ꞌwec ko buúk, hĩ makayyiook. Baa hiꞌthihi eet ꞌcĩ aga tẽgẽl nicci ũdũt. Aga tẽgẽl tĩho eeta ꞌcĩg ĩĩn aalibꞌnya ꞌmiia hõdẽĩ hĩ hẽẽn ꞌwec hĩ ꞌwec (144,000) ko diooni, eet baag eelliaa loota nĩnga.

⁴ Baa ĩĩn nẽẽg vẽlẽk eet ꞌcĩg tẽllĩg ꞌthinneeti, ꞌcĩg nga hatagguutho hĩ ngaaĩ tahatak. Nẽ anũ Mĩꞌnyõõn ooo, ꞌgõõlaa ꞌcĩ õkõõĩ, hĩnĩngĩtĩ baa eelliaa nẽẽg hõrggẽẽnaa cĩ eet vẽlẽk loota nĩnga, hátĩ haanytĩhoothĩk Nyekuc hĩ Mĩꞌnyõõn, hĩĩtõ ꞌbaaninit cĩnĩĩng ꞌcĩ oou.

⁵ Eet ꞌthẽk ꞌcĩg nga hoolongit ũdũt nẽ occa hõllõngaa aꞌngaaꞌnyi haaga.

Thooꞌthiok cĩg aajĩlẽẽt ꞌcĩg ĩĩn iyyio

⁶ Ma ho, hudtuuha aajĩlõ umwa ꞌcĩ alilliaan hẽẽtahujjieen, aꞌnyaha nyeemuut ꞌcĩ abũnnaa ꞌcĩ aalla ũdũt cĩ Nyekuci, ꞌcĩ aku aduhaak loonyin hĩ habuccieeꞌnya hĩ hattũũgẽt vẽlẽk ꞌcĩg õthõõth thooꞌthiohĩ cũũmõ cũũmõ loota nĩnga.

⁷ Baa ẽggẽrẽny aajĩlõ ciee gẽrrẽẽt aĩ, “Itingolli Nyekuc nẽ alaac ĩnõõnnõ! Õbõhĩ kõrra ꞌcĩ aku ẽttẽẽdĩ nẽẽ thooꞌthiok cĩg eetuk. Alaac ĩnõõnnõ, hĩnĩngĩtĩ baa ẽhẽnyta nẽẽ hẽẽtkujjieen hĩ looc, hĩ bũlũccwa hĩ hidiowwẽẽn vẽlẽk.”

⁸ Nẽ ũnũa aajĩlõ nicci ꞌgoonnia umwaa ꞌcĩ ĩĩn ꞌramma ꞌcĩ ẽggẽrẽny aĩ, “Irribanĩ ꞌtaaũnĩ cobbi cĩ Babiloonnia! Hĩnĩngĩtĩ aaꞌnyĩk eet vẽlẽk hũdũũtĩtõ mẽrtaa cĩ viinoo nẽ ĩdĩmanit thooꞌthiok ꞌcĩg ĩĩn ꞌriiring, ꞌcĩg ooginni hĩ ngaaĩ tahatak. Nẽẽthĩ ꞌyioko, ĩlĩĩlĩ Nyekuci nẽ irriban Babiloonnia.”

⁹ Ma ho, ũnũa aajĩlõ ꞌcĩ adtuurna ꞌcĩ ĩĩn iyyio nẽ ẽggẽrẽny nẽẽ buúk ĩĩ, “Ẽẽtĩ ꞌcĩ ala nyaharahaak hĩ ꞌthooura cĩnnĩ nẽ ẽlẽm ngaatĩ aarĩkĩ nyamacaar cĩ nyaharahaahõ muuma, hode attiaa cĩnnĩ,

¹⁰ ahũd hatĩ nẽẽ viino ꞌcĩ adduuttiak battaali lĩĩlĩẽẽttaa cĩ Nyekuci. Accananni hatĩ nẽẽ ꞌgwoyyiatõõ ꞌcĩ aaburii padtahac, ẽbẽk Mĩꞌnyõõn hĩ aajĩlẽẽt cĩgĩnnĩg ꞌcĩg ẽllẽẽmĩth noho.

¹¹ Má ala ẽẽtĩ umwaa nyaharahaak hĩ ꞌthooura cĩnnĩ nẽ ẽlẽm nyamacaarwa cĩg ꞌthaar cĩgĩnnĩg, accananni hatĩ nẽẽ baalin hĩ waathĩn. Nẽ ĩꞌngaathĩ hatĩ bũrrẽtĩ cĩ ꞌcannan cĩnnĩ ho, hũũk hẽẽtahujjieen ooo haaga nẽ hõllõngaa hatĩ iyyioman ꞌcannaana ũdũt.”

¹² Aĩ thõõth ciee, adiim ẽmmẽẽthĩ eeta cĩg Nyekuci ꞌcannan nẽ uꞌthuutti tilooinit cĩ Nyekuci ho nẽ uꞌthuutti lemiinit cĩnĩĩng hĩ Yeesu ũdũt.

¹³ Nĩngĩtĩ hathĩknĩ molook cĩ aku hẽẽtahujjieen aĩ, “Tẽhẽẽd thõõth icci loota. Iꞌthianaanĩ kõr nicci, aggatan hatĩ Makayyioohiti eet ꞌcĩg adaahĩ, hĩnĩngĩtĩ ẽlẽmĩ nẽẽg ĩnõõnnõ.” Ẽdẽcĩ Lorii ꞌcĩ Ẽllẽẽmĩthĩ aĩ, “Eei, ammũda hatĩ nẽẽg ꞌyiomman dtiicaa cĩnĩĩng õkõmĩ ho nẽ tarĩ, hatĩ aaꞌnyĩhoothĩk ĩhõõggõ ꞌbaaniniti ꞌcĩ adũman dtiic cĩnĩĩng.”

Ibbiir lõõcĩ nẽ ajanĩ

¹⁴ Ma ho, hudtuuha eet umwa ꞌcĩ aaĩ hĩ Ngeertĩ Eeto, iccioloongan diithaa ꞌcĩ õõppẽr nẽ itihim temedek ꞌcĩ ĩĩn ꞌdaab nẽ aggam thẽrẽthẽrẽ cĩ janiitto attiaa cĩnnĩ.

¹⁵ Ma ho, uduhuna aajĩlõ umwaa battaala ꞌCieethaa cĩ Nyekuci, ꞌcĩ eggerꞌnyeek eet ꞌcĩ iccioloongan diitha ho anneek, “ꞌThianaaĩ janiinit thẽrẽthẽrẽaa cunni ꞌlẽhẽdĩ ho, hĩnĩngĩtĩ ibbiir mana nẽ ũttũbanoothĩk kõrra cĩ janiitto loota nĩnga.”

¹⁶ Nĩngĩtĩ attihaanĩ ẽẽtĩ ꞌcĩ iccioloongan diitha ho, thẽrẽthẽrẽ cĩnnĩ nẽ iꞌthianaaĩ ajan looc ꞌcĩ ibbiir ko.

¹⁷ Ma ho, uduhuna aajĩlõ umwaa tarĩ, battaala ꞌCieetõõ cĩ Nyekuci hẽẽtahujjieen, ꞌcĩ aꞌnyak thẽrẽthẽrẽ ꞌcĩ ꞌlẽhẽdĩ buúk cĩ janiitto.

¹⁸ Ma uruta, uduhuna aajĩlõ umwaa altaarĩa, ꞌcĩ aꞌnyak ꞌtirrian ꞌcĩ aggamĩ ꞌgwoo ꞌcĩ aruhi looc nẽ uduhaak aajĩlõ umwa ĩĩnnĩk, “ꞌTiha thẽrẽthẽrẽ cunni ꞌcĩ ꞌlẽhẽdĩ hataa nẽ ajanĩ hẽẽn cĩg viinoaak loota nĩnga, hĩnĩngĩtĩ ibbiirito.”

¹⁹ Nĩngĩtĩ ẽttẽẽdĩ aajĩlõ viino ꞌcĩg abbiiri ho, thẽrẽthẽrẽaa cĩnnĩ. Ma nĩngaata, ũlũteek aajĩlõ nicciee viino ꞌcĩ abbiiri ho ꞌloohatõõ ꞌcĩ ammacciini, hĩĩ terethiinit cĩ liilii cĩ Nyekuci.

²⁰ Baa aaĩ ꞌlook ꞌcĩ ammacciini viino ho, battaala ngadiihaa cĩ ꞌtaaũn cobbi. Ma baa amaccĩ viino nicciee ho, ariha hinnia biyyieeta. Ma ho, utuhuyyi biyyieeta hĩĩtõ hidioo ꞌcĩ aarĩk hĩĩ uun gẽrrẽẽt, haꞌnyak maaĩlꞌnya ꞌmiia hõdẽĩ hĩ hẽẽn turkiyyio (180) nẽ uuthik occa ũũppan ngaatĩ ammũlũũnyanaanĩ nyangõõllẽẽ.