Terethiinit 13 - ꞌBuuk cĩ Thõõth cĩ Nyekuci

Nyaharahaakꞌnya ꞌramma

¹ Ma ho, hudtuuha nyaharahaak umwa ꞌcĩ adukna bũlũcatõõ ꞌcĩ aꞌnyak ooti tũkĩramma hĩ otto õmmõtõ. Aꞌnyak otto ꞌcĩg ĩĩn tũkĩramma ho vẽlẽk tẽmẽdẽhĩt nẽ eteheeddi ꞌthaara ꞌcĩg õdõõm Nyekuc ootinii ꞌcĩg ĩĩn õmmõtõ ho vẽlẽk.

² Nẽ nyaharahaahĩ ꞌcĩ hacini naa ho, aꞌnyak ẽlẽ hĩ hẽẽlangĩ nẽ aattĩg ꞌthoona hĩcĩg nyemumuuak nẽ aꞌnyak ũtũg hĩ ꞌmaa. Ma ho, aaꞌnyĩk ꞌbuuhi dtaaba hĩ ꞌtirrian hĩ makaaꞌthĩt cĩnnĩ vẽlẽk, nyaharahaak nicci.

³ Baa aꞌnyak õõ cĩ nyaharahaak nicci umwaa carrahula cobbi gẽrrẽẽt, ꞌcĩ occa hõllõngaa alalĩ, nẽẽthĩ, baa ikia alala. Ma ho, ikia ubulan thõõth ciee eet vẽlẽk loota nĩnga, nĩngĩtĩ anũĩ nẽẽg nyaharahaak nicci.

⁴ Baa au ala eeta ꞌbuuk nicci, hĩnĩngĩtĩ aaꞌnyĩk nẽẽ nyaharahaak makaaꞌthĩt cĩnnĩ. Nĩngĩtĩ au alaĩ eeta nyaharahaak buúk aĩnnĩ, “Nganĩ ꞌcĩ aduhõõ hĩ nyaharahaak icci nẽ nganĩ ꞌcĩ occa aruhõõ hĩ ĩnõõnnõ ho?”

⁵ Ma ho, ẽlẽmaahĩ Nyekuci nyaharahaak nicci hõdõõm ĩnõõnnõ nẽ aaꞌnyĩk hidticanõõĩ makaaꞌthĩt cĩnnĩ ho nyĩlõhĩ hẽẽn ꞌwec hĩ ꞌramma.

⁶ Nẽ ikia õdõõm nyaharahaahĩ nicciee Nyekuc, hĩ ꞌthaar cĩgĩnnĩg hĩ õlõ cĩnnĩ hĩ eet vẽlẽk ꞌcĩg arũmĩ hĩ ĩnõõnnõ hẽẽtahujjieen.

⁷ Ma ho, ikia ẽlẽmaahĩ Nyekuci nyaharahaak nicci hurukto hĩ eet cĩgĩnnĩg, hátĩ hĩllõõan nẽẽ ĩhõõggõ. Nẽ baa aaꞌnyĩk Nyekuci nyaharahaak nicci buúk, makaaꞌthĩt ꞌcĩ aggamĩ looc eetini noho hĩ habuccieeꞌnya hĩ hattũũgẽt vẽlẽk.

⁸ Nĩngĩtĩ au alaĩ eeta vẽlẽk cĩg looc nicci nyaharahaak nicci, eeta baag hõllõngaa eheeddi ꞌthaara cĩggĩĩng ꞌBuuhaa cĩ Mĩꞌnyõõn baa aruhi baa nga heteheꞌnyiaa lõõcĩ.

⁹ Nẽ ẽẽtĩ ꞌcĩ aꞌnyahi ĩĩna, thĩhõõ jurrung.

¹⁰ Má adiim Nyekuci eet umwa haggamĩ hũũk baabuutha, aggammi ꞌthẽk hatĩnĩ, nẽ má adiim Nyekuci eet umwa huruhi, aruhi ꞌthẽk hatĩnĩ. Aĩ thõõth ciee nẽẽ, aaꞌnyĩk eet cĩg Nyekuci hetemeethito ꞌcannan nẽ elemit thõõth cĩnnĩ.

Nyaharahaak ꞌcĩ ĩĩn ꞌramma

¹¹ Ma ho, hudtuuha nyaharahaak umwa tarĩ, ꞌcĩ adukna loota nĩnga, ꞌcĩ aꞌnyak otto ꞌramma hĩ mĩꞌnyõõna, ngaatĩ õthõõthõnĩ hĩ ꞌbuuk ꞌcĩ aꞌthĩlan ko.

¹² Adticaniini nẽẽ ꞌtirrian cĩ nyaharahaak baa oou baa aꞌnyak ngatubeenit õõa ꞌcĩ alal ẽlẽk. Nẽ ĩttĩnganeek eet makaaꞌthĩtaa cĩnnĩ loota nĩnga, halaacõ nyaharahaak baa oou.

¹³ Nẽ baa adtican nyaharahaahĩ ciee hẽlẽggĩ ꞌcĩg ĩnaat eeta, gõõng aaꞌnyĩk ꞌgwoo hikia hẽẽtahujjieen hõdõlan looc, ẽbẽk eeta noho.

¹⁴ Baa ĩggõõl nyaharahaahĩ nicciee eet loota nĩnga, ngaatĩ adĩmanẽẽkĩ eet thooꞌthiok ꞌcĩg ĩnaat eeta cĩg nyaharahaak baa oou. Ma nĩngaata, ikia uduhaak eet hẽtẽhẽnyta ꞌthooura cĩ nyaharahaak ꞌcĩ baa hõllõngaa adaahĩ, baa ĩĩn botohit baa acuhanni nyetuboota.

¹⁵ Ma ho, ẽlẽmaahĩ Nyekuci ĩnõõnnõ hũtũbbeek ꞌlaũk ꞌthooura nicci, hátĩ hõthõõth. Nẽ eeta vẽlẽk ꞌcĩg abũrĩ ngaatĩ alaĩ ꞌthooura nicci, aruhi hadaahito.

¹⁶ Ma nĩngaata, ikia ĩttĩnganeek nyaharahaahĩ ciee eet vẽlẽk ꞌcĩg abuli hode hõllõngaa abuli, balliook hĩ hullaha, appahacaaꞌnya hĩ eet ꞌcĩg hõllõngaa ĩĩn appahacaaꞌnya, hamacaaranit muumti hode athĩn cĩggĩĩng ꞌcĩg obbitig.

¹⁷ Nẽ ẽẽtĩ ꞌcĩ hõllõngaa aꞌnyak nyamacaar nicci, aitiõõ hõllõngaa aaꞌnyĩhoothĩk ĩnõõnnõ hũtũũõĩ ijjio cĩgĩnnĩg, hode hũtũũwa ijjio ũgĩ buúk. Ĩĩn nyamacaar nicciee ꞌthaar cĩg nyaharahaak nicci hĩ ꞌliimira ꞌcĩ ꞌthaar cĩgĩnnĩg.

¹⁸ Adiim eggeenyi, hátĩ gaa ꞌliimira cĩ nyaharahaak nicci! Nẽẽthĩ, ma eggeenyi, occa aga ngaatĩ adticanĩĩ thõõth icci. Ĩĩn ꞌliimira cĩ nyaharahaak nicci ꞌmiiaꞌnya tõrkõnõn hĩ hẽẽn tõrkõnõn hĩ tõrkõnõn (666) nẽ ĩĩn ꞌliimira ciee cĩ nyaharahaahõ.