Terethiinit 10 - ꞌBuuk cĩ Thõõth cĩ Nyekuci

Aajĩlõ hĩ ꞌbuuk ꞌcĩ hidici

¹ Nẽ hudtuuha aajĩlõ umwa ꞌcĩ attiran gẽrrẽẽt ꞌcĩ alluuccia hẽẽtahujjieen aku loota. Baa ammũta ĩnõõnnõ diith nẽ ohoorranoothĩk tõõlõngẽẽcĩ õõ cĩnnĩ. Baa aara muum cĩnnĩ haau hĩ kõrra nẽ aꞌnyak ꞌthoo ꞌcĩg aattĩg hĩ lanyit cĩ ꞌgwoyyio.

² Baa aꞌnyak nẽẽ ꞌbuuk ꞌcĩ hidici ꞌcĩ ubbuuhi ẽlẽk attiaa cĩnnĩ. Baa abĩlĩ nẽẽ aarĩk ꞌthooc cĩ aꞌthiit cobbi bũlũcatõõ nẽ ataadĩk ꞌthooc ꞌcĩ hidici ꞌthẽẽmĩ lokora.

³ Ẽggẽrẽny nẽẽ moloohaa cobbi ĩĩcĩ aaĩ hĩ gõõng arruukan ꞌmaa nẽ ma ẽggẽrẽny ko, iita eggerenyit bõrõhẽẽna ꞌcĩg ĩĩn tũkĩramma ho buúk.

⁴ Ma baa ĩbĩlĩt molookwaana cĩg bõrõhẽẽn ꞌcĩg ĩĩn tũkĩramma ho nẽ haĩ hẽtẽhẽẽd thõõth ꞌcĩ aduha nẽẽg ko loota, anneeka hinnia mõlõõhĩ umwaa hẽẽtahujjieen nẽẽ, “Ma heheedi thooꞌthiok nicciag loota, migithõõĩ.”

⁵ Ma ho, hudtuuha aajĩlõ aa aarĩk ꞌthooc hõdẽẽthõng bũlũcatõõ nẽ aarĩk umwa ꞌthẽẽmĩ lokora, õdõng aꞌthiit cĩnnĩ cobbi ꞌjieena.

⁶ Nẽ ũbũtan aajĩlõ ꞌthaarĩĩ cĩg Nyekuc ꞌcĩ ẽhẽnyta hẽẽtkujjieen hĩ looc hĩ hẽlẽggĩ vẽlẽk ꞌcĩg arũgĩ ooo ĩĩ, “Iittiõõ Nyekuci hõllõngaa ereeyyi tarĩ.”

⁷ Uduhaak Nyekuci eet baag ĩĩn põrõvẽtaaꞌnya cĩgĩnnĩg thooꞌthiok baag ammiꞌthi nga hagayyi, hatĩ ũttũbaneek aajĩlõ ꞌcĩ ĩĩn tũkĩramma ngaatĩ adtahĩ tũũrĩ cĩnnĩ.

⁸ Nẽ õthõõthahaa mõlõõhĩ aa hẽẽtkujjieen tarĩ ĩnnĩhaa, “Bĩĩt ꞌgama ꞌbuuk ꞌcĩ ubbuuhi hata, ꞌcĩ aꞌnyak aajĩlõ ꞌcĩ abĩlĩ nẽ ataadĩk ꞌthooc hõdẽẽthõng bũlũcatõõ nẽ aarĩk umwa ꞌthẽẽmĩ lokora hata.”

⁹ Ma ho, heejehoothĩha aajĩlõ nicci nẽ hĩĩnnĩha, aꞌnyaa ꞌbuuk ꞌcĩ hidici ho. Ẽdẽcca hinnia anneeka, “Eri ꞌbuuk icci dahõ, ẽmmẽdĩ hatĩ ũtũũgatõõ aaĩ hĩ lõtẽẽcĩ ma hẽẽngatõõ õkõ ammũccarĩĩ.”

¹⁰ Ma ho, haggama aajĩlõ nicci ꞌbuuk nẽ ma hadahi ho, ẽmmẽdĩ hinnia ũtũũgatõõ aĩ ꞌlĩĩ ꞌlĩĩ aaĩ hĩ lõtẽẽcĩ, ma haku ho, ũũkcĩ hinnia hũmmũccar hẽẽngatõõ.

¹¹ Nĩngĩtĩ anneeka mõlõõhĩ nicciee, “Tẽrẽth eet thooꞌthiok ꞌcĩg hatĩ au. Duhaak ꞌthẽk ĩhõõggõ vẽlẽk tarĩ, loonyinii cĩggĩĩng hĩ eet ꞌcĩg õthõõth thooꞌthiohĩ cũũmõ cũũmõ, hõdẽĩ hĩ habuẽẽt cĩggĩĩng vẽlẽk.”