Terethiinit 1 - ꞌBuuk cĩ Thõõth cĩ Nyekuci

Eterꞌtheek Yeesu Yõaannẽ thooꞌthiok cĩg horumwa

¹ Thõõth ꞌcĩ aduhaak Nyekuci Yeesu Krĩstõ, hátĩ huduhaak dticcianniook cĩgĩnnĩg thooꞌthiok ꞌcĩg occa au hĩdĩĩkoothong. Nĩngĩtĩ ĩꞌthõõanĩ Krĩstõ aajĩlõ cĩnnĩ hikia huduhaak nyeemuut dticciannioohit cĩnnĩ Yõaannẽ.

² Nẽ ikia uduha Yõaannẽ thooꞌthiok vẽlẽk ꞌcĩg baag acĩn nẽẽ nyeemuutaa cĩ Nyekuci, hĩ thooꞌthiok vẽlẽk ꞌcĩg baag aduha Yeesu Krĩstõ, hĩ ꞌcĩg adĩmanĩ.

³ Aggatan hatĩ Nyekuci eet vẽlẽk ꞌcĩg agiilik ꞌgõõnõgĩ thõõth ꞌcĩ aduha Nyekuci ꞌbuuhaa cĩ ho nẽ aggatan hatĩ Nyekuci eet ꞌcĩg athĩhĩ nẽ elemit thõõth ꞌcĩ adukiaa ꞌbuuhaa cĩ. Õbõhĩ kõrra ꞌcĩ hatĩ au edeeꞌnyianĩ thooꞌthioha cieeg vẽlẽk.

Ĩꞌtha Yõaannẽ lemmiook

⁴ Halaiinnuung naa Yõaannẽ ngagiit lothippiꞌnya cĩg lemmioohu ꞌcieethinii cĩg laiittak, ꞌcĩg iiginnu tũkĩramma looccaa cĩ Aaꞌthia. Aggatanuung Nyekuci ꞌcĩ aaĩ ꞌyioko, ꞌcĩ baa aalla baarkit hĩ ꞌcĩ hatĩ aku horumwa, ĩĩtõ tarbalĩg nẽ aauttu lõꞌngõõc hĩ loriẽẽt ꞌcĩg ĩĩn tũkĩramma, ꞌcĩg aattĩg muumaa cĩ Nyekuci nẽ irriamatteek dtaaba cĩnnĩ.

⁵ Aꞌnyĩĩk Yeesu Krĩstõ ꞌcĩ aduhaakeet thõõth ꞌcĩ ĩĩn dĩdĩ cĩ Maacõnĩ, haaꞌnyuung ngagiit ĩĩtõ tarbalĩg nẽ aꞌnyaktu authet ꞌcĩ aattiyyu lõꞌngõõc. Baa Yeesu ꞌcĩ atiman ngaatĩ arũgnaanĩ daahĩtha nẽ aggam habuẽẽt vẽlẽk cĩg looc nicci. Ammĩnanneet Yeesu Krĩstõ ngagĩĩt nẽ õõgaeet ꞌthẽccanẽẽtĩĩ, biyyiẽẽtĩĩ cĩgĩnnĩg.

⁶ Aaꞌnyeet nẽẽ hĩĩtõ habuẽẽt hĩ paadĩrꞌnya hĩ eet ꞌcĩg hadticanoothĩk Nyekuc Maaꞌnyĩ. Aꞌnyĩĩk hubuli nẽẽ haꞌnyak ꞌtirrian ꞌcĩ aalla ooo! Aamẽn.

⁷ Ĩcĩnĩt da ꞌyioko! Õõkõra nẽẽ hĩ diith hẽẽtahujjieen, acĩn hatĩ eeta vẽlẽk ĩnõõnnõ, nẽ ꞌthẽk adtuuha hatĩ eeta baag acuhan ĩnõõnnõ buúk. Alu hatĩ eeta vẽlẽk loota nĩnga ĩnõõnnõ. Dĩdĩ, aaĩ hatĩ thõõth cieeni! Aamẽn.

⁸ Õthõõth Makayyioohiti Nyekuci aĩ, “Nganĩĩt ꞌcĩ hiꞌthianaanĩ nẽ hudtuura. Baa haalla haaĩ baangaani nẽ nga haalla noho nẽ hakuu hatĩ tarĩ. Nganĩĩt ꞌTirriannioohit ꞌcĩ hĩllõõani vẽlẽk.”

Eet ꞌcĩ aaĩ hĩ Ngeertĩ Eeto

⁹ Nganĩĩt ꞌgotonu Yõaannẽ ꞌcĩ hĩĩnĩ ꞌthooyyiahit cĩ Krĩstõ, hõthõl naag hĩ ngagiit temeethi cĩ ꞌcannan ꞌcĩ ammũda eeta cĩg habuccieet cĩ Nyekuci thõng. Baa hiiggiaoothihi naa dtuungaa cĩ Patamo, hĩnĩngĩtĩ hirriooni thõõth cĩ Nyekuci hĩ thõõth ꞌcĩ ĩĩn dĩdĩ, baa ẽtẽrꞌtha Krĩstõ.

¹⁰ Ma baa kõr ꞌcĩ halaiinna naag lemmiooha, ikia aggama Lorii ꞌcĩ Ẽllẽẽmĩth nganĩĩt nẽ hĩthĩha molook cobbi ꞌcĩ ẽggẽrẽny ĩĩcĩ bahuc caannĩ haau hĩ mõlõõhĩ cĩ tũũrĩõ.

¹¹ Othoothĩkaa mõlõõhĩ tĩho anneeka, “Teheedĩk ꞌbuuhatõõ thooꞌthiok ꞌcĩg acini nii vẽlẽk nẽ ĩꞌthooihuu lothippiꞌnya cĩg lemmiook ꞌcĩg ĩĩn tũkĩramma ho. ꞌThooĩk Eevvetho hĩ Thĩmĩrna hĩ Pẽrgamo hĩ Thiatira hĩ Thaardith hĩ Viladelvia hĩ Laodicea.”

¹² Ma habbuudi haĩ hĩcĩn eet ꞌcĩ othoothĩkaa ho, hadtuuha hinnia ꞌthĩĩk tũkĩramma ꞌcĩg ĩĩn ꞌdaab, ꞌcĩg aꞌnyak ꞌlõõmẽẽt.

¹³ Nẽ hõrggẽẽnaa cĩ ꞌthĩĩk tũkĩramma ꞌcĩg aꞌnyak ꞌlõõmẽẽt niccig ko, abĩlĩ eet umwaa ꞌcĩ aaĩ hĩ Ngeertĩ Eeto ahimit cẽrẽm ꞌcĩ uuni õkõ ꞌthoo nẽ ammarũũk cẽrẽm ꞌcĩ ĩĩn ꞌdaab ĩyyõõaa cĩnnĩ.

¹⁴ Õõr õõ hĩ ĩma cĩgĩnnĩg haauto hĩ ĩmana cĩg aꞌtheetak nẽ udukto hĩ diith ꞌcĩ õõrĩ nẽ aauto hẽbẽrĩ cĩgĩnnĩg buúk hĩ lanyit cĩ ꞌgwoyyio.

¹⁵ Attalĩth ꞌthoona cĩgĩnnĩg haauto hĩ ꞌthĩĩha ꞌcĩg maattĩg ꞌcĩg ĩwaaddi lohippongora nẽ õrõk mõlõõhĩ cĩnnĩ hĩ maama ꞌcĩg arik thõng.

¹⁶ Aggam nẽẽ mũnyũny tũkĩramma, attiaa cĩnnĩ ĩcobbi nẽ uluba nyetuboot ꞌcĩ ꞌlẽhẽdĩ ũtũũgaa cĩnnĩ, attalĩth muum cĩnnĩ haau hĩ kõrra gõõng aara.

¹⁷ Ma baa hadtuuha ĩnõõnnõ ho, hẽttẽẽda looc ꞌthõõnĩĩ cĩgĩnnĩg haau hĩ ẽẽtĩ ꞌcĩ hadaaha ẽlẽk. Nĩngĩtĩ ataadĩka aꞌthiit cĩnnĩ cobbi nẽ ĩnnĩhaa, “Ma hiꞌngolli! Nganĩĩt ꞌcĩ hiꞌthianẽẽkĩ hẽlẽggĩ vẽlẽk nẽ nganĩĩt ꞌcĩ hadtuurna.

¹⁸ Nganĩĩt ꞌcĩ harugi, baa hadaaha, nẽ ꞌyioko, hũrũga ũdũt nẽ haꞌnyahi mũhũtẽẽt ꞌcĩg daahĩthaak hĩ cĩg looc cĩ daakiahu.

¹⁹ “Tẽhẽẽd thooꞌthiok vẽlẽk ꞌcĩg acĩnĩ nii ho loota, hĩ hẽlẽggĩ ꞌcĩg aattĩg ꞌyioko, hĩ hẽlẽggĩ ꞌcĩg hatĩ au urutaa ꞌcĩ thooꞌthiok iccig.

²⁰ Haduhaakii ꞌyioko thõõth cĩ mũnyũny ꞌcĩg ĩĩn tũkĩramma, ꞌcĩg acini nii aattĩg ĩĩcĩ aꞌthiit caannĩ cobbi ho, hĩ ꞌthĩĩk tũkĩramma ꞌcĩg ĩĩn ꞌdaab, ꞌcĩg aꞌnyak ꞌlõõmẽẽt ko buúk. Abĩllĩ mũnyũnya ꞌcĩg ĩĩn tũkĩramma ho nĩngĩtĩ aajĩlẽẽt cĩg lothippiꞌnya cĩg lemmioohu, ꞌcĩg ĩĩn tũkĩramma ho nẽ ibilli ꞌthĩĩha ꞌcĩg ĩĩn tũkĩramma ꞌcĩg aꞌnyak ꞌlõõmẽẽt ko, nĩngĩtĩ lothippiꞌnya cĩg lemmioohu.”