ꞌRooma 9 - ꞌBuuk cĩ Thõõth cĩ Nyekuci

Ẽbẽra Nyekuci eet cĩg Ĩꞌthĩraẽlĩ

¹ Hothoothi naa thõõth dĩdĩ cĩ Krĩstõ, hõllõngaa hoolongi thõng, aduha ꞌthĩnĩt caannĩ thõõth icci Loriiaa ꞌcĩ Ẽllẽẽmĩthĩ,

² haꞌnyahi naa mothiinit cobbi gẽrrẽẽt ꞌcĩ hõllõngaa edecciaa ꞌthĩnĩtaa caannĩ.

³ Hĩnĩngĩtĩ occa baa hadiimi naa ẽllaa caannĩ hĩccĩĩnĩ nẽ heꞌngerriooa hĩ Krĩstõ, hatĩ má occa ẽẽla thõõth ciee eet cĩgannĩg

⁴ Ĩꞌthĩraẽl. Hĩnĩngĩtĩ baa ĩĩn nẽẽg eet ꞌcĩg ẽbẽra Nyekuci nẽ eterꞌtheek ĩhõõggõ bulẽẽnĩt cĩnnĩ. Baa adak nẽẽ hĩ ĩhõõggõ lõhõt nẽ aaꞌnyĩk nyattal. Aaꞌnyĩk nẽẽ ĩhõõggõ authet ꞌcĩ alaĩ ĩnõõnnõ nẽ umuddia thooꞌthiok cĩgĩnnĩg ꞌcĩg ĩllõõanĩ.

⁵ Ĩĩn Abũrahamĩ hĩ Iꞌthaako hĩ Yakobo maajihi cĩggĩĩng nẽ baa ĩĩn Yeesu Krĩstõ buúk Ĩꞌthĩraẽleenit hĩ ẽẽtĩ ꞌcĩ holli õõ. Nẽ ĩĩn nẽẽ Nyekuc, ꞌcĩ aggam looc vẽlẽk, hátĩ hĩdĩhĩthĩt eeta ĩnõõnnõ ooo! Aamẽn.

⁶ Nga hudhukia thõõth baa aduha Nyekuci. Hĩnĩngĩtĩ hõllõngaa lõhõlĩ ꞌcĩg Ĩꞌthĩraẽlĩ vẽlẽk ꞌcĩg ĩĩn Ĩꞌthĩraẽl.

⁷ Tananga ĩĩn eeta lõhõlĩ cĩg Abũrahamĩ, hõllõngaa aaꞌnyĩk thõõth ciee ĩhõõggõ vẽlẽk hĩĩtõ lõhõlĩ cĩg Abũrahamĩ dĩdĩ. Hĩnĩngĩtĩ eheeddi ꞌBuuhaa cĩ Nyekuci aĩ, “Iꞌthaako hatĩ ꞌcĩ aku ĩĩn maaꞌnyĩ lõhõlĩ baag aduha Nyekuci.”

⁸ Aĩ thõõth ciee, aitiõõ lohollia cĩg Abũrahamĩ vẽlẽk hõllõngaa ĩĩn lõhõlĩ cĩg Nyekuci.

⁹ Hĩnĩngĩtĩ ꞌgõõl ꞌcĩ baa aduhaanĩ Nyekuci thõõth cieeni, “Ma hõbõda naa irkit cĩ gõlla kõr ꞌcĩ aaĩ hĩ cieeni, hũmmũdeeha hatĩ Thaara ũtũhũa loholeec ꞌcĩ maacĩ.”

¹⁰ Nẽ hõllõngaa thõõth tĩho ciee diooni, nẽẽthĩ, ma baa ũꞌthũwan baangẽẽtĩ cĩnaac Iꞌthaako Rẽbẽka, ikia ũtũhũa Rẽbẽka lõhõlĩ ꞌcĩg ĩĩn heengti.

¹¹ Nẽẽthĩ, baa nga hittirria lohollia ꞌcĩg ĩĩn heengti ho, hode hĩdĩmanit ꞌgiimwa ꞌcĩ abũnnaa hode ꞌcĩ abathĩ, ikia ũmmũda Rẽbẽka nyeemuut umwa hĩ Nyekuc, ꞌcĩ aĩ, ẽbẽra Nyekuci eet hĩnĩngĩtĩ tabiinit cĩnnĩ.

¹² Baa aduhaak Makayyioohiti Rẽbẽka anneek, “Adticanoothĩk hatĩ loholeec cunni cobbi ꞌcĩ hidici.” Baa aduha Makayyioohiti thõõth icci, hátĩ hẽtẽrẽtha hĩĩ, aduha nẽẽ thooꞌthiok cĩgĩnnĩg tabiittaa cĩnnĩ nẽ baa hõllõngaa hĩnĩngĩtĩ ꞌgiimwa ꞌcĩ adĩman nẽẽg ꞌcĩ abũnnaa hode ꞌcĩ abathĩ.

¹³ Hĩcĩ eheeddi ꞌBuuhaa cĩ Nyekuci aĩ, “Hammĩnani naa Yakobo nẽ habureeha Eꞌthaau.”

¹⁴ Occa ꞌyioko hõthõõth haĩ ne? Aitiõõ Nyekuci hõllõngaa abũnnaa? Aitiõõ ũdũt!

¹⁵ Hĩnĩngĩtĩ baa anneek Nyekuci põrõvẽtaac Mũũꞌtha, “Hammaannihi hatĩ naa eet ꞌcĩg hadiimi hammaannihi naana. Hĩĩnĩ hatĩ tarbal hĩ eet ꞌcĩg hadiimi hĩĩnĩ tarbal.”

¹⁶ Nẽẽthĩ hoti ho, arũgĩ hẽlẽggĩ vẽlẽk tamaatittaa cĩ Nyekuci nẽ hõllõngaa hĩnĩngĩtĩ ꞌgii ꞌcĩ adiim hode adtican eeta.

¹⁷ Hĩnĩngĩtĩ baa aduhaak ꞌBuuhi cĩ Nyekuci habu cĩ Ijjibi anneek, “Baa haaꞌnyii naa nganiit ĩĩ habu, hĩnĩngĩtĩ thõõth icci, hátĩ heteretheehii ꞌtirrian caannĩ nẽ ubuluꞌthi ꞌthaara cĩgannĩg looc vẽlẽk.”

¹⁸ Nẽẽthĩ hoti ho, ammaannĩk Nyekuci eet ꞌcĩg adiim ammaannĩk nẽẽnĩ nẽ aaꞌnyĩk ꞌlõõrĩth eet ꞌcĩg adiim nẽẽ hilloorito.

¹⁹ Anneeka hatĩ eet umwaa hõrggẽẽnaa cunuung nẽẽ, “Nga etteedĩkeet Nyekuci ngagĩĩt thõõth noho inni? Hĩnĩngĩtĩ nganĩ ꞌcĩ abũrĩ tabiinit cĩnnĩ ho?”

²⁰ Nẽẽthĩ, nganĩ nii ẽẽtĩ ꞌcĩ occa ajini Nyekuc ko? Occa gõõng ꞌgii ꞌcĩ ẽhẽnytaa, ajin eet ꞌcĩ ẽhẽnyta ĩnõõnnõ ho anneek, “Ẽhẽnytaannaa baa hoti inni?”

²¹ Hõllõngaa occa ẽbẽra teheꞌnyioohiti cĩ ijjioꞌnyaannu ngaatĩ ẽhẽnytaanĩ ijjioꞌnya cĩg dtiicanĩ ꞌcĩg aaddi nẽ ĩĩtõ ũgẽẽgĩ ꞌcĩg dtiicanĩ aag gõõng hõdõõkõthĩ haaga.

²² Baa adiim Nyekuci ẽtẽrꞌtha liilii cĩnnĩ nẽ ẽdẽẽnya ꞌtirrian cĩnnĩ hĩ eet vẽlẽk ꞌcĩg occa adiim aruhi. Nẽẽthĩ hinnianĩ, baa ẽmmẽẽthĩ nẽẽ ĩhõõggõ.

²³ Baa adĩman Nyekuci thõõth icci, aĩ hátĩ hẽtẽrẽtha bulẽẽnĩt cĩnnĩ cobbi, hatĩ ammaannĩk nẽẽ eet ꞌcĩg ẽbẽra nẽẽ, hotholit bulẽẽnĩt cĩnnĩ.

²⁴ Hĩĩgĩn naag eet ꞌcĩg heberriaa ho, eetinii cĩg ꞌJudeei hĩ ĩcĩg hõllõngaa ĩĩn ꞌJudeei,

²⁵ hĩcĩ õthõõth Makayyioohiti eet ꞌcĩg hõllõngaa ĩĩn ꞌJudeei ꞌBuuhaa cĩ põrõvẽtaac Hoꞌthẽa aĩ, “Eeta baag hõllõngaa ĩĩn eet cĩgannĩg, hũtũvva hatĩ ꞌyioko ĩhõõggõ hĩĩnnĩha eet cĩgannĩg. Nẽ hĩmmĩnana eet baag nga hĩmmĩnan ĩĩcĩ oou.”

²⁶ Nẽ, “Baa adukiaak ĩhõõggõ kõr umwa aĩ, ‘Hõllõngaa iiginnu niig eet cĩgannĩg,’ nẽẽthĩ ngaatĩho noho, haĩ hatĩ ĩhõõggõ, ‘Lõhõlĩ cĩg Nyekuc ꞌcĩ arũgĩ.’ ”

²⁷ Baa ẽggẽrẽny põrõvẽtaacĩ Iꞌthaia, hĩnĩngĩtĩ eet cĩg Ĩꞌthĩraẽlĩ aĩ, “Tananga hĩĩtõ mẽẽlĩg lohollia cĩg Ĩꞌthĩraẽlĩ haauto hĩ hathaac ꞌcĩ aaĩ dẽmẽtaa cĩ bũlũcõ, eelliaa hatĩ ꞌcĩg idiongan ꞌcĩg abadtẽc diooni.

²⁸ Hĩnĩngĩtĩ etteedĩk hatĩ Makayyioohiti eet thõõth loota nĩnga hẽdẽcaak hĩdĩĩkoothong.”

²⁹ Baa aduha põrõvẽtaacĩ Iꞌthaia buúk aĩ, “Má baa hiittiõõ Makayyioohiti ꞌTirriannioohiti ꞌcĩ ĩllõõan vẽlẽk ngaatĩ anyiꞌthiaanĩ lõhõlĩ cĩggaac ũgĩ tõõ, occa baa huduktoothĩk haauto hĩ ꞌtaaũnniooha cĩg ꞌThõõdõmĩ hĩ ꞌGõmõõra.”

Ĩꞌthĩraẽl hĩ nyeemuut ꞌcĩ abũnnaa

³⁰ Occa ꞌyioko hõthõõth haĩ ne? Aĩ thõõth ciee, baa hõllõngaa attĩman eeta ꞌcĩg hõllõngaa ĩĩn ꞌJudeei, ngaatĩ ammũdaanĩ ꞌgõõl cĩ bũnnaiitto, nẽẽthĩ, iita ummuddia nẽẽg bũnnai ngaatĩ aꞌnyahĩ nẽẽg lemiinit hĩ Nyekuc.

³¹ Nẽẽthĩ, eeta cĩg Ĩꞌthĩraẽlĩ baag anũ nyattal cĩ thõõth ꞌcĩ aũlanĩ, nga hummuddia buúk.

³² Inni baa? Hĩnĩngĩtĩ baa attĩman nẽẽg, hátĩ hẽlẽm Nyekuci ĩhõõggõ ꞌgõõlaa ꞌcĩ aꞌthũũnnĩ nyattal, hĩllõõan ngaatĩ aꞌnyahĩ lemiinit hĩ Nyekuc. Baa adhuhoothĩk eeta ꞌcĩg Ĩꞌthĩraẽlĩ biyyiaa ꞌcĩ gõõng adaaca eet hetteedito looc.

³³ Hĩcĩ eheeddi ꞌBuuhaa cĩ Nyekuci aĩ, “Ĩcĩnĩt nõõ, haarĩha naa ꞌtaaũnaa cĩ ꞌThionĩ, bẽẽ ꞌcĩ adaaca eet hetteedito looc. Nẽ ẽẽtĩ ꞌcĩ aꞌnyak lemiinit hĩ ĩnõõnnõ, hõllõngaa hatĩ aggam ĩnõõnnõ ngaaoni ũdũt.”