ꞌRooma 8 - ꞌBuuk cĩ Thõõth cĩ Nyekuci

Rũgẽt Loriiaa cĩ Nyekuci

¹ Nẽẽthĩ ꞌyioko, iittiõõ thõõth ꞌcĩ etteedothoothĩk eet ꞌcĩg ũrũmtĩ hĩ Yeesu Krĩstõ tõõ,

² hĩnĩngĩtĩ aaꞌnyuung hatĩ Lorii ꞌcĩ Ẽllẽẽmĩth ngagiit rũgẽt ꞌcĩ aku hĩ Yeesu Krĩstõ nẽ õõgauung ꞌthẽccaana hĩ daahĩtha.

³ Hõllõngaa occa adĩman nyattalĩ cĩ Mũũꞌtha thõõth icci, hĩnĩngĩtĩ aaꞌnyĩk thõõth ꞌcĩ habũranẽẽkĩ naag nyattal, hiittiõõ hõllõngaa attiranĩ. Nẽẽthĩ, baa õõgauung ngagiit Nyekuci, ngaatĩ ĩꞌthõõanĩ Ngeerĩnĩ hikia haau hĩ naag ꞌthẽccanniooha nẽ ĩĩ ꞌgaarrieenit cĩ ꞌthẽccanẽẽt cĩggaac. Adticaniini Nyekuci ẽlẽ cĩ Yeesu habathanĩ ꞌthẽccan.

⁴ Baa adĩman Nyekuci hoti, hátĩ hĩdĩmanit thõõth ꞌcĩ adiimmeet nyattalĩ hidticanit ꞌgõõlaa ꞌcĩ hathĩknĩ Lori ꞌcĩ Ẽllẽẽmĩthĩ, hĩllõõan ngaatĩ hathĩknĩ thooꞌthiok ꞌcĩg habũraneek naaga.

⁵ Eeta ꞌcĩg aggam muhẽẽnĩtĩ cĩ ꞌthẽccaanõ, ammuk thõõth cĩ eleeti cĩggĩĩng diooni. Nẽ eeta ꞌcĩg aggam Lorii ꞌcĩ Ẽllẽẽmĩthĩ, ammuk thooꞌthiok cĩg Lori ꞌcĩ Ẽllẽẽmĩthĩ.

⁶ Aꞌnyaha muhẽẽnĩtĩ cĩ eet ꞌcĩ ĩĩn ꞌthẽccannioohit daahĩth, nẽẽthĩ, muhẽẽnĩtĩ cĩ eet ꞌcĩ aggam Lorii, ĩĩn rũgẽt hĩ ganõn.

⁷ Aaburreek muhẽẽnĩtĩ cĩ ꞌthẽccaanõ hõdõõkõthĩ Nyekuc. Hõllõngaa ẽlẽmĩ nyattal cĩ Nyekuci nẽ hõllõngaa occa adĩman noho ũdũt.

⁸ Eeta ꞌcĩg aggam ꞌthẽccanẽẽta cĩggĩĩng, hõllõngaa aaꞌnyĩk Nyekuc haccamanoothĩk.

⁹ Nẽẽthĩ, ꞌgõõlaa umwaanĩ, iittiõõ niig hõllõngaa aggammuung ꞌthẽccanẽẽta cugguung, nẽẽthĩ hinnia, aggammuung ngagiit Lorii, hatĩ aaĩ Lorii cĩ Nyekuci hĩ ngagiita. Nẽ má hõllõngaa aꞌnyak ẽẽtĩ umwaa Lori cĩ Krĩstõ, aitiõõ nẽẽ hõllõngaa ĩĩn eet cĩ Krĩstõ.

¹⁰ Nẽẽthĩ, má aaĩ Krĩstõ hĩ nganiita, arũgĩ hatĩ lorii cunni, hĩnĩngĩtĩ bũnnai cĩ Nyekuci, tananga adaahĩ ẽlẽ cunni, hĩnĩngĩtĩ ꞌthẽccan.

¹¹ Nẽ má aaĩ Lorii cĩ Nyekuc baa arũgtha Yeesu daahĩtha hĩ ngagiita, aaꞌnyĩk hatĩ Nyekuci baa arũgtha Krĩstõ daahĩtha eleeti cugguung ꞌcĩg occa adaahĩ ho, rũgẽt Loriiaa cĩnnĩ ĩcĩ aaĩ hĩ ngagiita.

¹² ꞌGotoonoga hĩ ngoonoga, occa hõllõngaa harũgĩ naag, hátĩ hidticanit thooꞌthiok ꞌcĩg abũraneek eleeti cĩggaac.

¹³ Má arũgnu niig hĩnĩngĩtĩ ꞌthẽccanẽẽt cugguung, adaaknu hatĩnĩ, nẽẽthĩ, má ũtũngteehu niig ꞌthẽccanẽẽt cĩg ẽllaak ꞌtirriaanaa cĩ Loriio, arũgnu hatĩnĩ,

¹⁴ hĩnĩngĩtĩ eeta ꞌcĩg ũũha Lorii ꞌcĩ Nyekuci, ĩĩn nẽẽg lõhõlĩ cĩg Nyekuci.

¹⁵ Aitiõõ Lorii cĩ Nyekuci hõllõngaa aaꞌnyeet ngagĩĩt hĩĩtõ appahacaaꞌnya ꞌcĩg hiꞌngolli Nyekuc. Nẽẽthĩ hinnia, hiita hĩĩtõ naag lõhõlĩ cĩgĩnnĩg nẽ hũtũvvẽẽcõ ĩnõõnnõ hĩĩttĩk Baangeet cĩnaac.

¹⁶ Aaꞌnyeet Lorii cĩ Nyekuci hagaac dĩdĩ hĩĩtõ, hĩĩgĩn naag lõhõlĩ cĩg Nyekuci.

¹⁷ Nẽ ꞌyioko má hĩĩtõ naag lõhõlĩ cĩg Nyekuci hõdẽĩ hĩ Krĩstõ, hau harigith naag ꞌgattan ꞌcĩ aaꞌnyeet Nyekuci, hĩ baa arigith Krĩstõ buúk ꞌgattan nẽ má hõthõl naag hĩ Yeesu pĩĩrnanĩt cĩnnĩ dĩdĩ, hõthõl hatĩ naag hĩ ĩnõõnnõ bulẽẽnĩt cĩnnĩ buúk.

Bulẽẽnĩt cĩ horumwa

¹⁸ Maka bulẽẽnĩtĩ ꞌcĩ hatĩ eterꞌtheekeet Nyekuci ngagĩĩt ĩllõõan pĩĩrnanĩt ꞌcĩ ꞌyioko haꞌnyak naag ko.

¹⁹ Abũraneek hẽlẽggĩ vẽlẽk baag ẽhẽnyta Nyekuci kõr ꞌcĩ hatĩ ẽbẽraanĩ Nyekuci eet cĩgĩnnĩg.

²⁰ Nẽẽthĩ hinnia, nga hatalmaanyattĩ hẽlẽggĩ vẽlẽk baag ẽhẽnyta Nyekuci, hõllõngaa hĩnĩngĩtĩ adiim nẽẽg haauto noho. Baa ẽhẽnyta Nyekuci ĩhõõggõ hoti, muhẽẽttaa

²¹ ꞌcĩ hatĩ ooggianĩ hẽlẽggĩ vẽlẽk ꞌcannaana baag ẽhẽnyta nẽẽnĩ, hiittiõõ hõllõngaa acuddiaa hẽlẽggĩ cieegi nẽ iita otholit bulẽẽnĩt ꞌcĩ ooggianĩ lohollia cĩg Nyekuci.

²² Haga naag haĩ, baa aguran hẽlẽggĩ vẽlẽk baag ẽhẽnyta Nyekuci huciitha, haauto hĩ ngaa ꞌcĩ attur ꞌgoonnia, hĩĩ kõr kĩ niccieeni.

²³ Aaꞌnyeet Lorii ngagĩĩt hagaac dĩdĩ authet ꞌcĩ hatĩ hõõ haattiyyi naag horumwa. Nẽẽthĩ ꞌyioko, haguran naag ꞌthinneetinitõõ muguruur, nga hẽrẽ Nyekuc heteretheeheet aĩ, hiita hĩĩtõ naag lõhõlĩ cĩgĩnnĩg. Aĩ thõõth ciee nẽẽ, ooggiaa hatĩ eleeti cĩggaac buúk haauto lõꞌngõõc.

²⁴ Hĩnĩngĩtĩ muhẽẽttaa ꞌcĩ abũnnaa ho, hiita heellia naaga. Nẽẽthĩ, ma edeeꞌnyia muhẽẽnĩtĩ ꞌcĩ abũnnaa ho, iittiõõ hõllõngaa ĩĩn muhẽẽnĩt ꞌcĩ abũnnaa dĩdĩ. Nganĩ ꞌcĩ aꞌnyak muhẽẽnĩt ꞌcĩ abũnnaa ꞌgiiaa ꞌcĩ aꞌnyak nẽẽ ẽlẽk?

²⁵ Nẽẽthĩ, má haarĩk naag muhẽẽnĩt ꞌcĩ abũnnaa ꞌgiiaa ꞌcĩ nga haꞌnyahit, hẽrẽẽc ĩnõõnnõ temeethitta.

²⁶ Nẽ ꞌgõõlaa ĩcĩ dioo, eelleet Lorii ngagĩĩt hittiranit. Hõllõngaa haga naag ꞌgii ꞌcĩ hala ho, nẽẽthĩ hinnianĩ, alaiinneet Lorii nẽẽ dẽẽdẽ, guraanaa ꞌcĩ occa hõllõngaa haduha utugeetini.

²⁷ Nẽ Nyekuci ꞌcĩ aga ꞌthinneeti cĩggaac, aga muhẽẽnĩt cĩ Loriio buúk. Hĩnĩngĩtĩ alaiini Lorii eet ꞌcĩg aꞌnyak lemiinit tabiittaa cĩ Nyekuci.

Hiꞌthihi ꞌgii ꞌcĩ occa eꞌngerreet ngagĩĩt mĩnnaanaa cĩ Nyekuci

²⁸ Nẽ haga naag buúk haĩ hẽlẽggẽẽnnĩ vẽlẽk, adtican Nyekuci ꞌgii ꞌcĩ abũnnaa, hĩnĩngĩtĩ eet ꞌcĩg ammĩnan ĩnõõnnõ, baag avvaa tabiittaa cĩnnĩ.

²⁹ Hĩnĩngĩtĩ eeta baag aga Nyekuci ngaanĩngĩtĩ baarkit, ikia ẽbẽra nẽẽ ĩhõõggõ hiita haauto hĩ Ngeerĩnẽẽnĩ, hátĩ hikia haau nẽẽ hĩ loholeec ꞌcĩ oou ꞌgotoonoginnii hĩ ngoonogiinni ĩĩcĩg mẽẽlĩg.

³⁰ Nĩngĩtĩ ẽlẽmmĩ Nyekuci eet baag ẽbẽra nẽẽ baa ĩĩcĩ oou ẽlẽk nẽ otholit bulẽẽnĩt cĩnnĩ hĩ ĩhõõggõ.

³¹ Hẽdẽcĩ occa ꞌyioko thõõth icci haĩ ne? Má ĩĩn Nyekuci Nyekuc cĩnaac, nganĩ ꞌcĩ occa adĩmanneet ngagĩĩt ꞌbuth?

³² Baa hõllõngaa ẽdẽnĩ Nyekuci Ngeerĩnĩ, nẽẽthĩ, baa aaꞌnyeet nẽẽ ĩnõõnnõ ngagĩĩta. Má baa adĩman Nyekuci hoti, ĩcca occa hatĩ hõllõngaa aaꞌnyeet nẽẽ hẽlẽggĩ vẽlẽk haaga?

³³ Nganĩ hatĩ ꞌcĩ etteedĩk eet baag ẽbẽra Nyekuci ẽlẽk thõõth? Aitiõõ ũdũt, hĩnĩngĩtĩ ẽlẽm Nyekuci ĩhõõggõ.

³⁴ Aitiõõ eet ꞌcĩ occa etteedĩkeet ngagĩĩt thõõth tõõ, hĩnĩngĩtĩ baa adaak Yeesu Krĩstõ nẽ ũrũga daahĩtha, hĩnĩngĩtĩ ngagĩĩta nẽ iccioloongan bulẽẽtta, attiaa cobbi ĩĩcĩ Nyekuci nẽ alaiinneet ngagĩĩta.

³⁵ Nganĩ ꞌcĩ occa eꞌngerreet ngagĩĩt mĩnnaanaa cĩ Krĩstõ? Eꞌngerreet occa pĩĩrnanĩtĩ hode ukẽẽnĩtĩ hode nyarõnĩ hode arriẽẽꞌthĩta hode bathi hode jõrẽẽĩ?

³⁶ Hĩcĩ eheeddi ꞌBuuhaa cĩ Nyekuci aĩ, “Hĩnĩngĩtĩ nganiit Nyekuc, hiita hummuddiawa naag daahĩth waathinniook vẽlẽk. Haautta naag hĩ aꞌtha ꞌcĩg õõt etteeddi thõng.”

³⁷ Hẽlẽggẽẽnnĩĩ cĩg vẽlẽk, hĩllõõanito naag, hĩnĩngĩtĩ Krĩstõ ꞌcĩ ammĩnanneet ngagĩĩta.

³⁸ Aitiõõ ꞌgii ꞌcĩ occa eꞌngerreet ngagĩĩt mĩnnaanaa cĩ Nyekuci tõõ, hĩnĩngĩtĩ haga naag dĩdĩ haĩ, hõllõngaa daahĩth hode rũgẽt, hõllõngaa aajĩlẽẽt hode loriẽẽt ꞌcĩg abathĩ, hõllõngaa kõr nicci hode horumwa, hode ꞌtirrian umwa,

³⁹ ꞌcĩ aku hẽẽtahujjieen hode ꞌtirrian ꞌcĩ aku loota, ꞌcĩ eꞌngerreet ngagĩĩt mĩnnaanaa cĩ Nyekuci. Hiꞌthihi ꞌgii ꞌcĩ occa eꞌngerreet ngagĩĩt hẽlẽggẽẽnnĩĩ vẽlẽk ĩĩcĩg ẽhẽnytaa mĩnnaanaa cĩ Nyekuci, hĩnĩngĩtĩ Yeesu Krĩstõ Makayyioohit cĩnaac.