ꞌRooma 6 - ꞌBuuk cĩ Thõõth cĩ Nyekuci

Aꞌnyaha ꞌthẽccanĩ daahĩth nẽ aꞌnyaha Krĩstõ rũgẽt

¹ Hõthõõth occa ꞌyioko haĩ ne? Haraac ꞌyioko hẽꞌthẽcattõ noho, hátĩ hĩttõõrĩ bũnnai?

² Aitiõõ ũdũt! Hĩnĩngĩtĩ ꞌthẽccan, haauto naag hĩ eeta ꞌcĩg hadaahito ẽlẽk nẽ occa nga haalla harũgĩ naag ꞌthẽccaana hutuno?

³ Hõllõngaa agayyu niig aĩ, eeta vẽlẽk ꞌcĩg õthõl baattithimo cĩ Yeesu Krĩstõ, õthõl daahĩth cĩnnĩ buúk?

⁴ Baa haggam naag baattithimo, baa haauto naag hĩ eeta ꞌcĩg hadaahito nẽ hadayyi hĩ Krĩstõ. Nẽ hĩ baa arũgthaa Krĩstõ daahĩtha bulẽẽttaa cĩ Nyekuc Maaꞌnyĩ, hau hatĩ haꞌnyak naag buúk rũgẽt ꞌcĩ ĩĩn ngeju.

⁵ Má baa hũrũmtĩ naag hĩ Yeesu daahĩthaa cĩnnĩ, occa hatĩ harũmĩ naag hĩ ĩnõõnnõ buúk kõr ꞌcĩ arũgnaanĩ nẽẽnĩ.

⁶ Haga naag haĩ, otoddoyyioothĩk eleeti baaggaac ꞌrẽẽttĩg hurucceea hĩ Yeesu. Baa adĩmanni thõõth ciee, hátĩ hiittiõõ eleeti cĩggaac hõllõngaa ĩĩn appahacaaꞌnya cĩg ꞌthẽccaanak tarĩ.

⁷ Hĩnĩngĩtĩ ma hadaahĩ naag hõdẽĩ hĩ Krĩstõ, hiita hõõgta naag ꞌtirriaanaa cĩ ꞌthẽccaanõ.

⁸ Nẽẽthĩ ꞌyioko, má baa hadaahĩ naag hõdẽĩ hĩ Krĩstõ, hẽlẽmĩ naag haĩ harũgĩ hatĩ naag buúk hĩ ĩnõõnnõ.

⁹ Hĩnĩngĩtĩ hagaacõ naag ngaanĩngĩtĩ arũgnaanĩ Krĩstõ daahĩtha, iittiõõ nẽẽ hõllõngaa occa adaahĩ tarĩ, iittiõõ daahĩthĩ hõllõngaa occa anyamũũtana ĩnõõnnõ.

¹⁰ Baa adaahĩ nẽẽnĩ, baa adaahĩ, hátĩ hĩꞌthaan ꞌtirrian cĩ ꞌthẽccaanõ. Nẽẽthĩ, rũgẽtĩ ꞌcĩ arũgnĩ nẽẽ ho, arũgĩ hĩnĩngĩtĩ bulẽẽnĩt cĩ Nyekuci.

¹¹ ꞌGõõla hõdẽẽthõng, ma nga haaꞌnyiku eleeti cugguung haggamuung ꞌthẽccanĩ. Nẽẽthĩ hinnia, aaꞌnyuung Yeesu Krĩstõ ngagiit rũgẽt nẽ aauttu ꞌgõõlaa ꞌcĩ accamana Nyekuci.

¹² Nẽẽthĩ hoti ho, ma haaꞌnyiku ꞌthẽccan haggam eleeti cugguung ꞌcĩg adaahĩ ho, hátĩ hiittiõõ hõllõngaa abũraneeku thooꞌthiok cĩgĩnnĩg ꞌcĩg abathĩ.

¹³ Ma haaꞌnyiku ꞌgoolliok ũgĩ cĩg eleeti cugguung ꞌthẽccan, aanytĩk eleeti cugguung Nyekuc, hĩ eeta ꞌcĩg ũrũgta daahĩtha nẽ aanytĩhu eleeti cugguung hĩ ĩnõõnnõ, hátĩ ĩdĩmanit thooꞌthiok ꞌcĩg abũnnaa.

¹⁴ Iitiõõ ꞌthẽccanĩ hõllõngaa aggammuung ngagiit tarĩ, hĩnĩngĩtĩ hõllõngaa aggammuung ngagiit nyattalĩ, nẽẽthĩ, aauttu niig lõꞌngõõc bũnnaiittaa cĩ Nyekuci.

Appahacaaꞌnya ꞌcĩg adtican thõõth ꞌcĩ accamana Nyekuci

¹⁵ Aĩ occa ꞌthẽk thooꞌthioha cieeg vẽlẽk ne? Ĩcca occa ꞌthẽk hara ꞌthẽccan, hĩnĩngĩtĩ hõllõngaa aggammeet nyattalĩ, nẽẽthĩ hinnia, aggammeet bũnnai? Aitiõõ ũdũt!

¹⁶ Hõllõngaa agayyu niig ngaatĩ iiginnu appahacaaꞌnya cĩg hẽlẽggĩ ꞌcĩg athiknu niiga? Occa iiginnu niig appahacaaꞌnya cĩg ꞌthẽccaanak nẽ adaaktu, hode occa iiginnu appahacaaꞌnya ꞌcĩg athiknu Nyekuc, ꞌcĩ hatĩ aaꞌnyuung ngagiit ũbũttaath rũgẽtaa cunuung.

¹⁷ Nẽẽthĩ ꞌyioko, ĩlaallẽ hĩ Nyekuc, tananga baa gõõng ĩĩgĩnnu niig appahacaaꞌnya cĩg ꞌthẽccaanak, iita ithiktu niig ꞌlimman baa allimanoothikuung ngagiita.

¹⁸ Baa õõgtau niig ꞌthẽccaana nẽ ꞌyioko iita iittu appahacaaꞌnya ꞌcĩg adĩmannu thooꞌthiok ꞌcĩg abũnnaa.

¹⁹ Hothoothi naa hoti, hĩnĩngĩtĩ hõllõngaa attirannu niiga. Hĩ baa gõõng aalla aaꞌnyiku eleeti cugguung hĩĩtõ appahacaaꞌnya cĩg thooꞌthiok ꞌcĩg ĩĩn ꞌriiring hĩ ꞌcĩg abathĩ, nẽẽthĩ ꞌyioko, aanytĩk ĩhõõggõ hĩĩtõ appahacaaꞌnya cĩg thõõth ꞌcĩ abũnnaa ꞌcĩ okooyyuung thõõthaa ꞌcĩ ẽllẽẽmĩthĩ.

²⁰ Baa nga iiginnu niig appahacaaꞌnya cĩg ꞌthẽccaanak, baa hõllõngaa adiim accamanaannu Nyekuc.

²¹ ꞌYioko baa bũnnai iina ꞌcĩ baa ꞌthẽk ammũdaannu niig korrioohĩĩ nĩĩcag, hẽlẽggẽẽnnĩĩ ꞌcĩg ꞌyioko aaꞌnyuung ngagiit ngaaoni ho? Aĩnanaakuung ngagiit hẽlẽggĩ tĩko daahĩth.

²² Nẽẽthĩ ꞌyioko, hĩcĩ õõgtau niig ꞌthẽccaana nẽ iittu appahacaaꞌnya cĩg Nyekuci ho, ikia ꞌbaaniniti baa ammũdaannu niig ko, uukuung ngagiit thõõthaa ꞌcĩ ẽllẽẽmĩth hĩ rũgẽtaa ꞌcĩ aalla ooo.

²³ Hĩnĩngĩtĩ, dũman cĩ ꞌthẽccaanõ daahĩthĩ, nẽẽthĩ, ꞌbaaninit cĩ Nyekuci, rũgẽtĩ ꞌcĩ aalla ooo, hĩ Yeesu Krĩstõ Makayyioohit cĩnaac.