ꞌRooma 3 - ꞌBuuk cĩ Thõõth cĩ Nyekuci

Aꞌthũũnnĩ Nyekuci thõõth ꞌcĩ aduha

¹ Bũnnai thĩ ꞌcĩ hĩĩgĩnnĩ ꞌJudeeinit ko inoo? Hode bũnnai ꞌcĩ etteedini eleeti ho inoo?

² Nẽ dĩdĩ, maka ꞌbaaniniti! Ĩĩcĩ oou, baa aaꞌnyĩhoothĩk ĩhõõggõ thooꞌthioha cĩg Nyekuci huꞌthuutti.

³ Má hatĩ ma aitiõõ eeta ũgẽẽgĩ hõllõngaa aꞌnyak lemiinit, ĩcca occa aaꞌnyĩk thõõth ꞌcĩ aitiõõnnĩ ĩhõõggõ lemiiniti tõõ ho, hudhukia thõõth ꞌcĩ aduha Nyekuci ho haaga?

⁴ Aitiõõ ũdũt! Aꞌnyĩĩk Nyekuc hĩĩ dĩdĩ nẽ ĩĩtõ eeta vẽlẽk oloꞌngiaak. Hĩcĩ eheeddi ꞌBuuhaa cĩ Nyekuci aĩ, “Aga hatĩ eeta ngaatĩ aũlanĩ thõõth ꞌcĩ aduha niina, nẽ hatĩ ĩllõõanuu thõõth lokihoa.”

⁵ Nẽẽthĩ, má uppulana bathi cĩnaac bũnnai cĩ Nyekuci battaala, ĩcca occa ꞌyioko hõthõõth haĩ ne? Occa ꞌyioko hatĩ abathĩ hĩ Nyekuc ngaatĩ alĩĩllĩ nẽ uukeet ngagĩĩta? Hothoothi naa hĩ gõõng õthõõth eeta.

⁶ Nẽẽthĩ hoti ho, ẽttẽẽd Nyekuci thooꞌthiok cĩg eetuk ꞌgõõlaa ꞌcĩ aũlanĩ! Má baa haau nohota, occa baa ẽttẽẽd Nyekuci thõõth cĩ lootu hutuno?

⁷ Occa ꞌthẽk õthõõth eet umwaa aĩ, “Má aaꞌnyĩk õlõng caannĩ ho thõõth cĩ Nyekuci hĩĩ dĩdĩ nẽ ĩttõõr bulẽẽnĩt cĩnnĩ, aalla thĩ nga õthõõꞌtha Nyekuci aĩ, hĩĩnĩ ꞌthẽccannioohit noho inni?”

⁸ Ongomĩtteet eeta ũgẽẽgĩ ngagĩĩt õõlõng aĩ haĩnna naag, “Hĩdĩmanit thõõth ꞌcĩ abathĩ, hátĩ hummuddiaaĩ thõõth ꞌcĩ abũnnaa!” Nẽẽthĩ, abũnnaa Nyekuci, uuk ꞌthẽk hatĩ nẽẽ ĩhõõggõ thooꞌthiohĩĩ cĩggĩĩng ko buúk.

Aitiõõ ẽẽtĩ ꞌcĩ abũnnaa tõõ

⁹ Hõthõõth occa ꞌthẽk ꞌyioko thõõth icci haĩ ne? Haĩ hĩĩgĩn naag ꞌJudeei mẽẽttĩg? Aitiõõ ũdũt! Hĩnĩngĩtĩ hagaacõ naag ẽlẽk ngaatĩ aduhõõnĩ eeta ꞌcĩg ĩĩn ꞌJudeei hĩ ꞌcĩg hõllõngaa ĩĩn ꞌJudeei ꞌthẽccanẽẽtĩĩ cĩggĩĩng thõng.

¹⁰ Hĩcĩ eheeddi ꞌBuuhaa cĩ Nyekuci aĩ, “Aitiõõ ẽẽtĩ ꞌcĩ abũnnaa tõõ, hiꞌthihi tananga hõdẽẽthõng haaga;

¹¹ Aitiõõ ẽẽtĩ ꞌcĩ aga Nyekuc jurrung tõõ, aitiõõ ẽẽtĩ ꞌcĩ adiim ĩnõõnnõ tõõ.

¹² Ũtũbũrĩt eeta vẽlẽk Nyekuc, nẽ iita abaꞌthiõõthĩ nẽẽg vẽlẽk; iittiõõ ẽẽtĩ ꞌcĩ nga adtican thõõth ꞌcĩ abũnnaa tõõ, hiꞌthihi hõdẽẽthõng haaga buúk.

¹³ Aattĩg loggoorwaana cĩggĩĩng hĩ ꞌlõõhĩta ꞌcĩg aattĩg ngaburuur cĩg eet ꞌcĩg adaahito ẽlẽk; nẽ ẽmmẽdda utugeeti cĩggĩĩng ngaatĩ õthõõthĩ thooꞌthiok ꞌcĩg ĩĩn õlõng diooni.” “Abathĩ thooꞌthioha ꞌcĩg õthõõth nẽẽg aattĩg hĩ madõõtĩ cĩ hũkaatõ.”

¹⁴ “Abbĩꞌthĩĩ ꞌcĩĩnẽnĩtĩ utugeetinii cĩggĩĩng hĩ ngaꞌngari ooo haaga.”

¹⁵ “Obokii hĩ ĩhõõggõ ngaatĩ aruhi eet hĩdĩĩkoothong.

¹⁶ Aĩnanaak nẽẽg eet ꞌcannan nẽ ẽꞌthẽcanit ijjio cĩg eetuk ꞌgoolliohĩĩ cĩg õvvõõĩ,

¹⁷ nẽ ẽrẽk ꞌgõõl ꞌcĩ aattiyyi lõꞌngõõc.”

¹⁸ “Aitiõõ tẽẽlꞌthĩtĩ cĩ Nyekuci hõrggẽẽnaa cĩnĩĩng tõõ,”

¹⁹ Nẽẽthĩ ꞌyioko, hagaacõ naag haĩ, ꞌgii vẽlẽk ꞌcĩ aduha nyattalĩ, aduhaak eet ꞌcĩg aattĩg nyattaalatõõ, hátĩ hiittiõõ ẽẽtĩ ꞌcĩ aĩ, nga haga Nyekuc tõõ nẽ ẽtẽrẽtha Nyekuci ngaatĩ ĩĩnnĩ eeta cĩg looc nicci vẽlẽk ꞌthẽccanniook.

²⁰ Nẽẽthĩ hoti ho, aitiõõ hatĩ ẽẽtĩ ꞌcĩ adukiaa aĩ abũnnaa muumaa cĩ Nyekuci tõõ, hatĩ anũ nẽẽ nyattal. Nẽẽthĩ, hĩnĩngĩtĩ nyattal, hiita hagaacõ naag ꞌthẽccan.

ꞌGõõl ꞌcĩ ẽlẽmmĩ Nyekuci eeta

²¹ Nẽẽthĩ ꞌyioko, eteretheeheet Nyekuci ngagĩĩt ꞌgõõl ꞌcĩ aaꞌnyeet ngagĩĩt hũbũttaath hĩ ĩnõõnnõ. Aduha nyattalĩ hĩ põrõvẽtaaꞌnya ꞌgõõl ꞌcĩ aku elemmeet Nyekuci ngagĩĩta nẽ hõllõngaa, hĩnĩngĩtĩ hanũ nyattal cĩ Mũũꞌtha.

²² Nẽẽthĩ hoti ho, aku bũnnai hĩ Nyekuc, hĩnĩngĩtĩ athĩhĩ Yeesu Krĩstõ ĩnõõnnõ. Nẽ ꞌyioko, iita umuddia eeta vẽlẽk ꞌcĩg ẽlẽmĩ Yeesu bũnnai. Aitiõõ Nyekuci hõllõngaa ahal eeta,

²³ hĩnĩngĩtĩ ẽꞌthẽcattõõ eeta vẽlẽk nẽ udhukta nẽẽg vẽlẽk, iittiõõ ẽẽtĩ ꞌcĩ ammũda bulẽẽnĩt cĩ Nyekuci tõõ,

²⁴ nẽ ikia õõgaeet Nyekuci ngagĩĩt vẽlẽk bũnnaiittaa cĩnnĩ, hĩnĩngĩtĩ elliaanĩt baa aku hĩ Yeesu Krĩstõ.

²⁵ Baa aaꞌnyĩk Nyekuci Yeesu hikia hĩĩ ꞌgaarrieenit ꞌcĩ ũũnnõthõõthĩkĩ ꞌthẽccanẽẽta, hĩnĩngĩtĩ lemiinit biyyiẽẽtĩĩ cĩgĩnnĩg. Baa adĩman nẽẽ hoti, hẽtẽrẽtha bũnnai cĩnnĩ, hĩnĩngĩtĩ temeethi cĩnnĩ ꞌcĩ hõllõngaa uuki eet baag ĩĩcĩ oou, hĩnĩngĩtĩ ꞌthẽccanẽẽt cĩggĩĩng.

²⁶ Baa adĩman Nyekuci hoti, hátĩ hẽtẽrẽtha bũnnai cĩnnĩ kõr nicci noho nẽ uduha ĩĩ, ĩmmĩrĩt ꞌthẽccanniooha, hĩnĩngĩtĩ baa athĩhĩ Yeesu Nyekuc.

²⁷ Ne ꞌyioko ꞌrianĩĩth tĩho inoo? Hiꞌthihi. Hirrian occa naag, hĩnĩngĩtĩ hanũ nyattal? Aitiõõ! Hirrian naag hĩnĩngĩtĩ lemiinit.

²⁸ Hĩnĩngĩtĩ haga naag ẽlẽmĩ Nyekuci eet, hĩnĩngĩtĩ lemiinit nẽ hõllõngaa ẽlẽmĩ, hĩnĩngĩtĩ anũ nyattal.

²⁹ Ĩĩn Nyekuci Nyekuc cĩ ꞌJudeei diooni? Hõllõngaa ĩĩn nẽẽ Nyekuc cĩ eet ꞌcĩg hõllõngaa ĩĩn ꞌJudeei buúk? Eei, ĩĩn nẽẽ Nyekuc cĩ eet ꞌcĩg hõllõngaa ĩĩn ꞌJudeei buúk!

³⁰ Hĩnĩngĩtĩ aaĩ Nyekuci hõdẽẽthõng diooni, ꞌcĩ hatĩ ẽlẽmĩ eet ꞌcĩg etteeddi eleeti cĩg eet ꞌcĩg maacĩg hĩ ꞌcĩg hõllõngaa etteeddi eleeti, lemiittaa nĩĩcĩ dioo noho.

³¹ Occa ꞌyioko ꞌthẽk hadhuha naag nyattal, hĩnĩngĩtĩ lemiinit icci? Aitiõõ ũdũt! Huꞌthuutti nẽẽ naag nyattal hõkõm.