ꞌRooma 16 - ꞌBuuk cĩ Thõõth cĩ Nyekuci

Ĩꞌtha Paaulo lemmiook

¹ Hadiimi haduhaakuung dtiic ꞌcĩ abũnnaa ꞌcĩ baa adĩman ngõõnẽẽtĩ cĩnaac Voebe, ꞌcĩ ĩĩn dticciannioohit cĩ lothippit cĩ lemmioohu ꞌtaaũnaa cĩ Cencerea.

² Halayyuung naa ngagiit elemit ĩnõõnnõ ꞌthaarĩĩ cĩg Makayyiooktak, ꞌgõõlaa ꞌcĩ abũnnaa ĩcĩ lemmioohu nẽ aanytĩk eliinit vẽlẽk ꞌcĩ horoong adiim nẽẽ hĩ ngagiita, hĩnĩngĩtĩ gõõng ẽẽl nẽẽ eet ꞌcĩg mẽẽlĩg gẽrrẽẽt hĩ nganĩĩt buúk.

³ Ĩꞌthaac Piriciilla hĩ Akwila, gõõng hadticaniinna hõdẽĩ dtiicaa cĩ Yeesu Krĩstõ.

⁴ Baa adhuk nẽẽg rũgẽt cĩnĩĩng, hĩnĩngĩtĩ nganĩĩta. Nẽẽthĩ, hõllõngaa hĩnĩngĩtĩ nganĩĩt dioo, adhuk hĩnĩngĩtĩ lothippiꞌnya cĩg lemmiook cĩg eet ꞌcĩg hõllõngaa ĩĩn ꞌJudeei ꞌcĩg anneek ĩhõõggõ ĩlaallẽ.

⁵ Ĩꞌthaayyihaangu lothippit cĩ lemmiook gõõng õmmõtõõ ꞌcieethaa cĩnĩĩng. Ĩꞌthaayyihaangu ꞌgõõna Epeneto baa atiman ngaatĩ ẽlẽmmĩ Krĩstõ ĩĩcĩ oou looccaa cĩ Aaꞌthia.

⁶ Ĩꞌthaac Maria baa adticanni gẽrrẽẽt, hĩnĩngĩtĩ ngagiita.

⁷ Ĩꞌthaac Androniko hĩ Junia, ittioonniok cĩgannĩg baag hababuuthaniinna hõdẽĩ. Ĩĩn nẽẽg eet ꞌcĩg obbitig ꞌthooyyiahĩ nẽ baa itimanit ngaatĩ ẽlẽmmĩ Krĩstõ õõa caannĩ.

⁸ Ĩꞌthaayyihaangu Ampiliato, ꞌcĩ hammĩnani ꞌthaarĩĩ cĩg Makayyiooktak.

⁹ Ĩꞌthaac Urbaanõ ꞌgooneet baa gõõng hadticanni hõdẽĩ, hĩnĩngĩtĩ Krĩstõ nẽ ĩꞌthaayyu Thaakith buúk ꞌgõõna cĩ ꞌthĩnĩtõ.

¹⁰ Ĩꞌthaac Appeele, baa ĩttĩmanĩ nẽ ummuddia ngaatĩ ĩĩnnĩ lemmioohit ꞌcĩ õkõmĩ lemiittaa nẽ ẽlẽm Krĩstõ ĩnõõnnõ. Ĩꞌthaac eet cĩg halang cĩ Arithtobulo.

¹¹ Ĩꞌthaac Herodiõõnẽ ittioonniohit caannĩ. Ĩꞌthaac eet cĩg halang cĩ Nariciꞌthio ꞌcĩg ẽlẽmĩ Makayyioohit.

¹² Ĩꞌthaac ngoonogeet Tirivẽna hĩ Tirivoꞌtha, baag ĩĩn dticcianniook cĩg Makayyiooktak. Ĩꞌthaac Perthith buúk ꞌgõõna cĩ ꞌthĩnĩtõ, ngaa baa adticanni gẽrrẽẽt ꞌthaarĩĩ cĩg Makayyiooktak.

¹³ Ĩꞌthaac ꞌRuuvo baa eberriaa ꞌthaarĩĩ cĩg Makayyiooktak hĩ aattĩnnĩ baa ĩĩn morwahit caannĩ buúk.

¹⁴ Ĩꞌthaac Athinkrito, hĩ Velegonẽ hĩ Hẽẽrmẽ, hĩ Patoroba, hĩ Hẽẽrma hĩ lemmiook ꞌcĩg arũmĩ hĩ ĩhõõggõ.

¹⁵ Ĩꞌthaac Vilologo, hĩ Jullia hĩ Nereo hĩ ngõõnĩ, hĩ Olimpath hĩ lemmiook vẽlẽk ꞌcĩg arũmĩ hĩ ĩhõõggõ.

¹⁶ Ĩꞌthaac lothippiꞌnya cĩg lemmioohu hõrggẽẽnaa cunuung gẽrrẽẽt. Ĩꞌthaayyuung lemmiooha vẽlẽk cĩg Krĩstõ ꞌtaaũnnioohĩĩ cĩg mẽẽlĩg ngagiita.

¹⁷ Halayyuung naa ngagiit ꞌgotoonoga hĩ ngoonoga, uꞌthuutti eleeti eetinii ꞌcĩg ĩkõõtha ngẽrõõnĩt hõrggẽẽnaa cunuung nẽ õhõrrattuung ngagiit ꞌgõõlaa ꞌcĩ hõllõngaa õõkõrõõ hĩ ꞌlimman baa allimannu niiga. Ĩĩtõ ꞌrẽẽttĩg hĩ ĩhõõggõ.

¹⁸ Hĩnĩngĩtĩ eeta ꞌcĩg aattĩg noho, hõllõngaa adticanoothĩk Krĩstõ Makayyioohit cĩnaac, nẽẽthĩ hinnia, adticanoothĩk nẽẽg ꞌgii ꞌcĩ accamana nẽẽgĩ. Ĩggõõl nẽẽg eet ꞌcĩg aggiithi ooti thooꞌthiohĩĩ ꞌcĩg ẽmmẽdĩ.

¹⁹ Baa ĩthĩhĩt eeta vẽlẽk lemiinit cunuung nẽ haccamanoothihi naa gẽrrẽẽt, hĩnĩngĩtĩ ngagiita, nẽẽthĩ, hadiimmuung naa ngagiit eggeenyit thõõthaa ꞌcĩ abũnnaa nẽ ĩmmĩrru thõõthaa ꞌcĩ abathĩ.

²⁰ Ĩllõõan hatĩ Nyekuci ꞌcĩ aaꞌnyeet ganõn ꞌThĩttaan nẽ iittiõõ makaaꞌthĩt ꞌcĩ occa ĩllõõannuung ꞌThĩttaanĩ tõõ. Aꞌnyĩĩk bũnnai cĩ Makayyioohit cĩnaac Yeesu Krĩstõ haau hĩ ngagiita.

²¹ Ĩꞌthaayyuung Timotteeo dticciannioohiti ꞌcĩ baa hadticaniinna hõdẽĩ, hĩ Luuccio hĩ ꞌJaathon hĩ Thothipater ittioonniok cĩgannĩg ꞌcĩg ĩĩn ꞌJudeei.

²² Nganĩĩt ꞌTerthio teheeddiohit cĩ Paaulo ꞌcĩ heheedi waraga icci ho nẽ hĩꞌthaayyuung naa buúk ngagiit ꞌthaarĩĩ cĩg Makayyiooktak.

²³ Ĩꞌthaayyuung ꞌGaio ẽẽtĩ ꞌcĩ callĩ ꞌthĩnĩt ꞌcĩ aꞌthũũnna nganĩĩt hĩ lothippit cĩ lemmioohu vẽlẽk ngaati ngagiita. Nẽ ĩꞌthaayyuung Erathto ꞌcĩ itiangĩth ꞌrabbẽẽt cĩg ꞌtaaũnaak hĩ ꞌgotooneet Kwaarto buúk ngagiita.

²⁴ Aꞌnyĩĩk bũnnai cĩ Makayyioohit cĩnaac Yeesu Krĩstõ, haau hĩ ngagiit vẽlẽk. Aamẽn.

²⁵ Ĩdĩhĩthĩt Nyekuc! Occa aaꞌnyuung nẽẽ ngagiit ittiranit nyeemuutaa caannĩ ĩcĩ abũnnaa, ĩcĩ ĩĩn nyeemuut cĩ Yeesu Krĩstõ. Hĩnĩngĩtĩ baa ammiꞌthi nyeemuut ciee irkiꞌnyia ꞌcĩg mẽẽlĩg ꞌrĩng.

²⁶ Nẽẽthĩ ꞌyioko, hĩ baa aduha põrõvẽtaaꞌnya nẽ tarĩ hĩ baa aduha Nyekuci ꞌcĩ arũgĩ ũdũt, ikia agaĩ nyeemuut ciee hĩ eet ꞌcĩg hõllõngaa ĩĩn ꞌJudeei loonyini vẽlẽk, hátĩ helemit nẽẽg buúk nẽ ĩthĩhĩt ĩnõõnnõ.

²⁷ Nẽẽthĩ ꞌyioko, hĩnĩngĩtĩ Yeesu Krĩstõ, occa hadĩhĩth naag Nyekuc ꞌcĩ ĩĩn ꞌgeeꞌnyiahit dioo ooo! Aamẽn.