ꞌRooma 15 - ꞌBuuk cĩ Thõõth cĩ Nyekuci

Aanytĩk ꞌgoonogu haccamattoothĩk

¹ Má õkõmĩ lemiiniti cĩnaac, occa haꞌnyak naag ꞌthinneeti ꞌcĩg makatĩg hĩ nuyyiook cĩg Makayyiooktak ꞌcĩg hõllõngaa attiran lemiiniti cĩnĩĩng. Occa haaꞌnyĩk ĩhõõggõ haccamattoothĩk hĩllõõan ngaatĩ haaꞌnyĩkĩ eleeti cĩggaac haccamattoothĩk.

² Occa haaꞌnyĩk naag eet ꞌcĩg haarõõ haccamattoothĩk, hĩnĩngĩtĩ bũnnai cĩnĩĩng, hátĩ hĩtĩlĩthĩt nẽẽg thõõthaa cĩ Makayyiookto.

³ Tananga Krĩstõ, baa hõllõngaa aaꞌnyĩk nẽẽ ẽlẽ cĩnnĩ haccamanoothĩk. Nẽẽthĩ, hĩcĩ aduha Krĩstõ ꞌBuuhaa cĩ Nyekuci aĩ, “Nyekuc, õdõõmta nganĩĩt buúk eeta baag odoommi nganiita.”

⁴ Hĩnĩngĩtĩ hẽlẽggĩ baag eteheeddi loota ꞌBuuhaa cĩ Nyekuci baa hũnũũk, baa eheeddi hillimatteet ngagĩĩt temeethi hĩ ngaatĩ akũtanneet ngagĩĩt, hátĩ haꞌnyahit muhẽẽnĩt ꞌcĩ abũnnaa.

⁵ Aaꞌnyuung occa hatĩ Nyekuci temeethi hĩ kũttan hĩ lori cĩ rũmẽẽttõ hõrggẽẽnaa cunuung hĩcĩ anuyyu Yeesu Krĩstõ,

⁶ hátĩ ĩdĩhĩthĩt niig Nyekuc Maaꞌnyĩ Makayyioohit cĩnaac Yeesu Krĩstõ, ꞌthĩnĩta hĩ ũtũũga hõdẽẽthõng nuun!

Ĩĩn nyeemuut ꞌcĩ abũnnaa cĩ eet vẽlẽk

⁷ Nẽẽthĩ, elemit ꞌgoonogu ꞌcĩg ĩĩn lemmiook hõrggẽẽnaa cunuung haau hĩ baa elemmuung Krĩstõ ngagiita, hátĩ aꞌnyaktaak Nyekuc bulẽẽnĩt.

⁸ Haduhaakuung hanneekuung, ikia ĩĩ Krĩstõ dticciannioohit cĩ ꞌJudeei, hátĩ hẽtẽrẽtha hĩĩ, ĩĩn Nyekuci dĩdĩ thooꞌthiohĩĩ baag aduhaak maajihi cĩggĩĩng baag abuli.

⁹ Nẽ baa aku Krĩstõ buúk, hátĩ hĩdĩhĩthĩt eeta ꞌcĩg hõllõngaa ĩĩn ꞌJudeei Nyekuc, hĩnĩngĩtĩ amaannĩk nẽẽ ĩhõõggõ. Aaĩ hĩcĩ eheeddi ꞌBuuhaa cĩ Nyekuci aĩ, “Nẽẽthĩ hoti ho, hadihiꞌthii hatĩ naa nganiit hõrggẽẽnaa cĩ eet ꞌcĩg hõllõngaa ĩĩn ꞌJudeei; hebeneehi hatĩ naa ꞌthaar cugunnig tegellwa.”

¹⁰ Nẽ tarĩ, anneek ꞌBuuhi cĩ Nyekuci eet ꞌcĩg hõllõngaa ĩĩn ꞌJudeei nẽẽ, “Accamattoothĩk hĩ eet cĩg Nyekuci.”

¹¹ Nẽ tarĩ ĩĩ, “Ĩdĩhĩthĩt Makayyioohit niig vẽlẽk eeta ꞌcĩg hõllõngaa iiginnu ꞌJudeei. Ũllũngatta niig loonyini vẽlẽk iita ĩdĩhĩthĩt ĩnõõnnõ.”

¹² Aduha põrõvẽtaacĩ Iꞌthaia aĩ, “Alĩꞌtha hatĩ eet umwaa ꞌcĩ aku hattũũgaa cĩ ꞌJeeꞌthe, hikia hĩĩ habu. Aggam hatĩ nẽẽ loonyin nẽ hatĩ aꞌnyahit eeta ꞌcĩg hõllõngaa ĩĩn ꞌJudeei, muhẽẽnĩt ꞌcĩ abũnnaa hĩ ĩnõõnnõ.”

¹³ Hala naa Nyekuc ꞌcĩ aaꞌnyĩk eet muhẽẽnĩt ꞌcĩ abũnnaa, haggatanuung ngagiit accamattoothĩk aaut ganõõna, hĩnĩngĩtĩ lemiinit cunuung. Nẽ aꞌnyĩĩk ꞌtirrian cĩ Lori ꞌcĩ Ẽllẽẽmĩth haaꞌnyuung ngagiit muhẽẽnĩt ꞌcĩ abũnnaa.

Paaulo dticciannioohit cĩ eet ꞌcĩg hõllõngaa ĩĩn ꞌJudeei

¹⁴ Hagawa naa ẽllaa caannĩ ꞌgotoonoga hĩ ngoonoga hĩĩna, aꞌnyaku niig eleetinii cugguung bũnnai hĩ ꞌgẽẽnyĩth ꞌcĩ maka ꞌcĩ occa allimannu ꞌgoonogu ũgĩ ꞌcĩg ĩĩn lemmiook.

¹⁵ Baa hõllõngaa hiteelli naa ngaatĩ hẽhẽẽdakuung ngagiit thõõth haau hĩcĩ heterꞌtheekuung thooꞌthiok tĩko tarĩ, hĩnĩngĩtĩ bũnnai baa aaꞌnya Nyekuci nganĩĩt,

¹⁶ hátĩ hĩĩ dticciannioohit cĩ Yeesu Krĩstõ ꞌcĩ hadticanoothihi eet ꞌcĩg hõllõngaa ĩĩn ꞌJudeei, ꞌcĩ haꞌnyahi dtiic ꞌcĩ hallimanĩĩ nyeemuut ꞌcĩ abũnnaa cĩ Nyekuci, hátĩ hĩĩtõ eeta ꞌcĩg hõllõngaa ĩĩn ꞌJudeei ꞌbaaninit ꞌcĩ ẽlẽmĩ Nyekuci, ꞌcĩ ũtũũny Lorii ꞌcĩ Ẽllẽẽmĩthĩ.

¹⁷ Nẽẽthĩ hoti ho, haccamanoothihi naa hĩnĩngĩtĩ Yeesu Krĩstõ dtiicaa caannĩ hĩ Nyekuc.

¹⁸ Nẽ dĩdĩ thõõth ꞌcĩ hatĩ hothoothi naa vẽlẽk, hothoothi ꞌgõõlaa ꞌcĩ aaꞌnya Krĩstõ hõthõõth nẽ hidticanõõĩ, hátĩ hĩthĩhĩt eeta ꞌcĩg hõllõngaa ĩĩn ꞌJudeei Nyekuc.

¹⁹ Nẽ dĩdĩ, haduha naa ꞌgõõl ꞌcĩ baa adticanĩ Krĩstõ thooꞌthiok ꞌcĩg ĩnaat eeta, ꞌtirriaanaa cĩ Lori ꞌcĩ Ẽllẽẽmĩthĩ. Baa hirrioona naa nyeemuut cĩnnĩ ꞌcĩ abũnnaa, iꞌthianaanĩ ꞌJeruꞌthalẽma ĩꞌthõng hõdõlan looc cĩ Illiriko.

²⁰ Baa gõõng ĩĩn ꞌrianĩĩth caannĩ ꞌcĩ hirrioonĩ nyeemuut ꞌcĩ abũnnaa gẽrrẽẽt, ngaatĩ nga hagaõõĩ Krĩstõ, hátĩ hiittiõõ hõllõngaa hiꞌthianaanĩ dtiic caannĩ dtiicaa ꞌcĩ baa iꞌthianaaĩ eet umwaa ẽlẽk.

²¹ Aaĩ ꞌthẽk hĩcĩ aduha ꞌBuuhi cĩ Nyekuci aĩ, “Eeta ꞌcĩg baag nga hudukiaak thõõth cĩnnẽẽnĩ, acĩn hatĩ ĩnõõnnõ, nẽ eeta ꞌcĩg nga hĩthĩhĩt ĩnõõnnõ, au hatĩ aga ĩnõõnnõ.”

²² Baa gõõng alaamma nganĩĩt dtiici caannĩ ngaatĩ haĩ hikia hicinuung ngagiita.

Ummuk Paaulo ꞌgõõl ꞌcĩ õkõõĩ ꞌRoomattĩ

²³ Nẽẽthĩ ꞌyioko, iittiõõ nĩngĩtĩ nga hadticaniini naa loonyini ĩcĩg tõõ nẽ hĩ baa hadiimi irkiꞌnyia ꞌcĩg mẽẽlĩg ngaatĩ hakuu hacinnuunga,

²⁴ hammuhi occa hadĩmani noho, hatĩ hũũha looccaa cĩ Thĩppania. Haꞌnyahi muhẽẽnĩt ꞌcĩ hẽhẽẽrõnaakuung ngagiit õõaa ꞌcĩ nga hikiaaĩ nĩĩca, hátĩ iita eelliaangu nganĩĩt hẽẽrõnaa caannĩ nĩĩca, urutaa ꞌcĩ hiita haautti hĩ ngagiit hĩdĩhĩdĩĩc.

²⁵ Nẽẽthĩ, nga hikia, adiim hõkõ nõõ ꞌJeruꞌthalẽma haꞌnyahoothĩk lemmiook ꞌbaaninit ĩĩca.

²⁶ Hĩnĩngĩtĩ baa accamanoothĩk lemmiooha cĩg looc cĩ Maccedoonia hĩ cĩg looc cĩ Acaia, ngaatĩ õhõaanĩ ꞌrabbẽẽt ũgĩ, hatĩ heelli pĩĩrnattiaak lemmioohĩĩ cĩg ꞌJeruꞌthalẽmĩ.

²⁷ Baa thõõth ꞌcĩ adiim adĩman nẽẽg cieeni. Nẽẽthĩ, ꞌgõõl ꞌcĩ baa õthõlĩ nẽẽg ꞌrabbẽẽt hĩ eet cĩg ꞌJudeei, aaĩ hinnia hĩcĩ adũmaneek nẽẽg ĩhõõggõ ngabolo, hĩnĩngĩtĩ baa otholit eeta cĩg ꞌJudeei hĩ eet ꞌcĩg hõllõngaa ĩĩn ꞌJudeei, ꞌgattan cĩ Loriio.

²⁸ Nẽ ma hẽdẽcaaha dtiic icci nẽ hagawa ngaatĩ ummuddiaaĩ nẽẽg eliinit icci dĩdĩ, heheeroni hatĩ hõkõ looccaa cĩ Thĩppania nẽ hikia hothohoteehuung hicinuung ngagiit ꞌgõõla.

²⁹ Haga naa haini, ma hikia hĩ ngagiita, haꞌnyaha hatĩ ꞌgattan cobbi gẽrrẽẽt cĩ Yeesu Krĩstõ.

³⁰ ꞌGotoonoga hĩ ngoonoga, halayyuung naa ngagiit ꞌthaarĩĩ cĩg Makayyioohit cĩnaac Yeesu Krĩstõ, hĩ mĩnnaanaa cĩ Lori ꞌcĩ Ẽllẽẽmĩthĩ, othollieehaangu thõõth ꞌcĩ hadiim hakuuni nĩĩca, ngaatĩ alaiinnaangu nganĩĩt hĩ Nyekuc.

³¹ Alayyio, hátĩ heellia naa athĩnĩĩ cĩg eet ꞌcĩg hõllõngaa ĩĩn lemmiook, looccaa cĩ ꞌJudeea, hátĩ horoong hẽlẽmĩ dtiici caannĩ nĩĩca lemmioohĩĩ cĩg ꞌJeruꞌthalẽmĩ,

³² hátĩ horoong ma adiim Nyekuci hikia hĩ ngagiit taliitta nẽ hiita haccamattoothĩk hĩ ngagiit hõdẽĩ.

³³ Halayyi naa haini aꞌnyĩĩk Nyekuc ꞌcĩ aaꞌnyeet ganõn haau hĩ ngagiit vẽlẽk ooo. Aamẽn.