ꞌRooma 13 - ꞌBuuk cĩ Thõõth cĩ Nyekuci

Itingolli makayyiook

¹ Aꞌnyĩĩk eet vẽlẽk hõdẽĩ hõdẽĩ hitingolli makayyiook ꞌcĩg aggam ĩhõõggõ, hĩnĩngĩtĩ aitiõõ makaaꞌthĩt umwaa tõõ, makaaꞌthĩt baa aarĩk Nyekuci diooni. Nẽ makaaꞌthĩt ꞌcĩ aaĩ loota nĩnga ho, makaaꞌthĩt baa aarĩk Nyekuci diooni.

² Nẽẽthĩ hoti ho, eeta ꞌcĩg abũrĩ makayyiook, abũrĩ nẽẽg makaaꞌthĩt baa aarĩk Nyekuci. Nẽ eeta ꞌcĩg adĩman noho, aĩnanaak hatĩ nẽẽg eleeti cĩggĩĩng ukẽẽnĩt.

³ Hĩnĩngĩtĩ hõllõngaa uuk makayyiooha eet ꞌcĩg adĩman thõõth ꞌcĩ aũlanĩ, nẽẽthĩ uuk nẽẽg eet ꞌcĩg ẽꞌthẽcan thooꞌthiok. Adiimmu niig hiittiõõ hõllõngaa uukuung makayyiooha ꞌcĩg aggammuung ngagiita? Ĩdĩmanit thĩ thooꞌthiok ꞌcĩg aũlanĩ, hátĩ haccamattaauung nẽẽgĩ.

⁴ Hĩnĩngĩtĩ ĩĩn makayyiooha dticcianniook cĩg Nyekuci ꞌcĩg eelluung ngagiita. Nẽẽthĩ, má ẽꞌthẽcannu niig thooꞌthiok, itingolli ĩhõõggõ, hĩnĩngĩtĩ aꞌnyak nẽẽg makaaꞌthĩt ꞌcĩ occa uukuung ngagiita. Ĩĩn nẽẽg dticccianniook cĩg Nyekuci, ꞌcĩg occa uuk eet hetereꞌthia lilii cĩ Nyekuci.

⁵ Nẽẽthĩ hoti ho, abũnnaa ngaatĩ hathĩknĩ makayyiook, hõllõngaa hĩnĩngĩtĩ ukẽẽnĩt diooni, nẽẽthĩ, hĩnĩngĩtĩ ĩĩn thõõth ꞌcĩ aũlan ꞌcĩ occa hadĩmanĩ.

⁶ Ĩnõõ thõõth ꞌcĩ adũmannu niig occoro buúk ko, hĩnĩngĩtĩ ĩĩn makayyiooha dticcianniook cĩg Nyekuci, ꞌcĩg ũũha eet hõdõõkõthĩ.

⁷ Ũdũmatteek makayyiook occoro hode ꞌrabbẽẽt nẽ itingollieeu ĩhõõggõ.

Ĩmmĩnanit ꞌgoonogu

⁸ Aanytĩk mĩnnan hĩĩ dtiic cunuung! Má ammĩnannu niig ꞌgoonogu, ĩdĩmattu niig ꞌgii vẽlẽk ꞌcĩ adiim nyattalĩ.

⁹ Hĩnĩngĩtĩ tilooiniti ꞌcĩ aĩ, “Ma hattihi ngaa cĩ eet umwa, ma haruhi, ma hĩgõrꞌthĩ, ma habũraneehi ꞌgii cĩ eet umwa,” nẽ tilooiniti ciee hĩ ũgĩ vẽlẽk, arummiaa tilooittaa ꞌcĩ aĩ, “Mĩnnan eet ꞌcĩ aaronnu haau hĩcĩ ammĩnani ẽlẽ cunni.”

¹⁰ Hõllõngaa adĩman mĩnnani eet ꞌcĩ haarõõ ꞌbuth. Nẽẽthĩ hoti ho, adtican mĩnnanĩ thooꞌthiok vẽlẽk ꞌcĩg adiim nyattalĩ.

Kõr ꞌcĩ hatĩ õbõdaanĩ Krĩstõ

¹¹ Agayyu niig korriook iigia ꞌcĩg haattiyyi naag ko, nẽẽthĩ hoti ho, adiim occa aattiyyu jurrung. Ma hattumaniinnu, hĩnĩngĩtĩ agayyu niig õbõhĩ kõrra ꞌcĩ hatĩ heellianĩ naaga, hĩllõõan korriook baag hẽlẽmmĩ naag Makayyioohit.

¹² Õbõhĩ edeccia baalini nẽ uppwaanna hatĩ kõrra. Occa hõllõngaa haattĩg naag hĩ eeta ꞌcĩg aattĩg muguuratõõ, hũkũmattoothĩk haaut lanyita.

¹³ Ĩdĩmanit thooꞌthiok ꞌcĩg abũnnaa ꞌcĩg accamana Nyekuci, ma hookoroonnu hĩ eet ꞌcĩg abathĩ, hode aduunnu thõng, ma hattihoonnu tahatak, hode eggerꞌnyoonnu hode ma hiinannu hẽlẽggĩ cĩg eetuk.

¹⁴ Aꞌnyĩĩk Makayyioohit Yeesu Krĩstõ hõbõhĩ hĩ ngagiit, haau hĩ ceremwaana ꞌcĩg ahimittu niiga, hátĩ ũtũngĩt thooꞌthiok ꞌcĩg abũraneek eleeti cugguung.