ꞌRooma 12 - ꞌBuuk cĩ Thõõth cĩ Nyekuci

ꞌGaarrieenit ꞌcĩ arũgĩ

¹ Nẽẽthĩ niig ꞌgotoonoga hĩ ngoonoga, halayyuung naa ngagiit tamaatittaa cĩ Nyekuci, aanytĩk eleeti cugguung haauto hĩ ꞌgaarriẽẽna ꞌcĩg arũgĩ, hĩĩ tẽllĩg haccamana Nyekuci, ĩĩn ciee ꞌgõõl ꞌcĩ occa alaiinnu niiga.

² Ma nga hanuyyu thooꞌthiok cĩg looc nicci tarĩ, nẽẽthĩ ũtũkẽẽc muhẽẽnĩt cĩ ꞌthinneeti cugguung hĩĩtõ ngeju. Ĩnõõ ꞌcĩ hatĩ uuluyyu ngaatĩ attĩmannu nẽ ummuddiaau tabiinit cĩ Nyekuci, ngaatĩ abũnnayyĩ hĩllõõan.

³ Hĩnĩngĩtĩ bũnnai baa aaꞌnyĩhoothĩkaa nganĩĩta, haduhaakuung naa ngagiit vẽlẽk hanneekuung, ma hathĩngõõnyannu gẽrrẽẽt, nẽẽthĩ ummuhit eleeti cugguung ꞌgõõlaa ꞌcĩ abũnnaa, ꞌgõõlaa ꞌcĩ attĩmaneeku lemiinit baa aaꞌnyuung Nyekuci ngagiita.

⁴ Aaĩ ꞌthẽk hĩcĩ haꞌnyak naag ẽlẽ hõdẽẽthõng hĩ dhooriꞌnya cũũmõ cũũmõ nẽ dhooriꞌnya cieeg vẽlẽk, hõllõngaa aduhõõ dtiici cĩnĩĩng thõng.

⁵ Nẽẽthĩ, haattĩg naag buúk noho. Hĩĩgĩn naag mẽẽlĩg nẽ harummiaa hĩĩgĩn ẽlẽ hõdẽẽthõng hĩ Krĩstõ nẽ dhooriꞌnya cieeg vẽlẽk, ĩĩn cĩg ꞌgõõnõgĩ vẽlẽk.

⁶ Bũnnaiittaa cĩnnĩ, aaꞌnyeet ngagĩĩt Nyekuci hõdẽĩ hõdẽĩ ꞌbaaninit hidticattõõĩ jurrung. Má occa haduha thõõth ꞌcĩ hatĩ aku horumwa, occa hatĩ hadĩman hĩcĩ aduha lemiiniti ꞌcĩ haꞌnyak naaga.

⁷ Má occa hadticanoothĩk eet ũgĩ, hidticattoothĩk. Má ĩĩn ꞌlimman, occa hallimanni.

⁸ Má haga ngaatĩ halũllũũmanẽẽkĩ ꞌgoonogeet thõõth ꞌcĩ abũnnaa, hũlũllũũmatteek ĩhõõggõ thooꞌthiok tĩko. Má haga ngaatĩ hõhõaakĩ ꞌgoonogeet hẽlẽggĩ ũgĩ, hohoyyiaak ꞌgõõlaa ꞌcĩ abũnnaa. Má hĩĩgĩn naag makayyiook, hũtũhaac eet ꞌgõõlaa ꞌcĩ abũnnaa. Má ĩĩn thõõth ꞌcĩ hammaannĩkĩ eeta, hatamaattik taliitta.

Mĩnnan

⁹ Aꞌnyĩĩk mĩnnan ꞌcĩ ammĩnannu niig ꞌgoonogu hĩĩ dĩdĩ. Ũtũbũrĩt thooꞌthiok vẽlẽk ꞌcĩg abathĩ nẽ uꞌthuuttu ꞌgii vẽlẽk ꞌcĩ abũnnaa.

¹⁰ Ĩmmĩnanit ꞌgoonogu haauto hĩ ꞌgotoonogu hĩ ngoonogu nẽ ubuluꞌthu ĩhõõggõ hĩllõõanit eleeti cugguung.

¹¹ Idticattõ gẽrrẽẽt nẽ ma hĩĩgĩnnu nyamuttiook. Ĩrrĩcatta ngaatĩ anuyyu Lori ꞌcĩ Ẽllẽẽmĩth nẽ idticattoothihu Makayyioohit.

¹² Aanytĩk muhẽẽnĩt cunuung ꞌcĩ abũnnaa haaꞌnyuung ngagiit accamattoothĩk. Etemeethit pĩĩrnanĩt korrioohĩĩ ꞌcĩg abathĩ nẽ ma habĩllu laiinit.

¹³ Uꞌthuutti pĩĩrnattiaak cĩg Nyekuci nẽ aanytĩhu hẽẽrõn hiita olooyyiohĩĩ cugguung.

¹⁴ Alaac Nyekuc haggatan eet ꞌcĩg adĩmannuung ngagiit ꞌbuth. Alaac ĩnõõnnõ haggatan ĩhõõggõ thõng, hiittiõõ hõllõngaa accĩĩn thõng.

¹⁵ Accamattoothĩk hĩ eet ꞌcĩg accamanoothĩhĩ nẽ utuluuyyu hĩ eet ꞌcĩg alu.

¹⁶ Aaut jurrung hĩ eet vẽlẽk. Ma hathĩngõõnyannu nẽ iittu eggeeꞌnyu ĩllõõannu ꞌgoonogu. Ookorrio hĩ eet vẽlẽk lõꞌngõõc.

¹⁷ Ma haruhaannu oolo hĩ eet ꞌcĩ adĩmannuung ngagiit ꞌbuth. Nẽ ĩdĩmanit thooꞌthiok ꞌcĩg ammuk eeta vẽlẽk aĩ abũnnaa.

¹⁸ Ĩttĩmanit gẽrrẽẽt ngaatĩ aattiyyu lõꞌngõõc hĩ eet vẽlẽk.

¹⁹ ꞌGotoonoga hĩ ngoonoga, ma haruhaannu oolo. Aanytĩk Nyekuc huruha oolo nẽẽnĩ. Aĩ Nyekuci, “Nganĩĩt Nyekuc ꞌcĩ occa haruha oolo.”

²⁰ Õthõõth tarĩ ꞌBuuhi cĩ Nyekuci aĩ, “Má adak mĩrõk cugunnig magĩthĩ, aꞌnyĩĩk ꞌgiimwa hadahit. Nẽ má aam kõrra, aꞌnyĩĩk maam huhuddi. Aduhõõ hatĩ thõõth ciee hĩ ngaatĩ haaꞌnyĩkĩĩ ĩhõõggõ haꞌngaaonit thõng.”

²¹ Ma haaꞌnyihi bathi hĩllõõanii nganiita, ꞌlõõan bathi ꞌgõõlaa ꞌcĩ adĩmanĩĩ thõõth ꞌcĩ abũnnaa.