ꞌRooma 11 - ꞌBuuk cĩ Thõõth cĩ Nyekuci

Nga hũtũbũr Nyekuci eet cĩgĩnnĩg

¹ Nẽẽthĩ, hajini naa thõõth ꞌcĩ haini, abũrĩ baa Nyekuci eet cĩgĩnnĩg? Aitiõõ ũdũt! Hĩĩnĩ nõõ naa eet cĩ Ĩꞌthĩraẽlĩ, ꞌcĩ hakuu hattũũgaa cĩ Abũrahamĩ, cĩ habuccieet cĩ Benyemiino.

² Baa hõllõngaa abũrĩ Nyekuci, eet cĩgĩnnĩg baag ẽbẽra nẽẽ ĩĩcĩ oou. Hõllõngaa nooyyia agayyu niig thõõth baa aduha ꞌBuuhi cĩ Nyekuci aĩ, baa ĩĩlaleek põrõvẽtaacĩ Eliijja Nyekuc hĩnĩngĩtĩ eet cĩg Ĩꞌthĩraẽlĩ baa anneek,

³ “Makayyioohit, uruhit eeta põrõvẽtaaꞌnya cugunnig nẽ ĩꞌthaanito altaarĩꞌnya ꞌcĩg ĩbboorini ꞌgaarriẽẽna cugunnẽẽgĩ, ĩĩ nganĩĩt dioo ꞌcĩ nga hidiongani nẽ idiimito urukta nganĩĩt buúk”?

⁴ Baa hinnia aduhaak Makayyioohiti Eliijja anneek, “Nga haꞌnyahi naa nuyyiook aalibꞌnya tũkĩramma ꞌcĩg hõllõngaa ala ꞌBaal.”

⁵ Nẽẽthĩ, aaĩ thõõth noho buúk waathinnioohĩĩ nĩĩcĩg. Nga idiongan eeta ꞌcĩg Ĩꞌthĩraẽlĩ ꞌcĩg abadtẽc ꞌcĩg nga anũ ĩnõõnnõ, hĩnĩngĩtĩ baa tarbal Nyekuci hĩ ĩhõõggõ.

⁶ Baa aaĩ thõõth ciee hoti, hĩnĩngĩtĩ tarbalꞌthẽẽt cĩ Nyekuci ꞌcĩ hõllõngaa ũũlũ eet umwaanĩ nẽ hõllõngaa, hĩnĩngĩtĩ dtiicanĩ ũgĩ ꞌcĩg abũnnaa ꞌcĩg adĩman nẽẽgĩ. Occa baa hõllõngaa adĩmanni noho, hiittiõõ tarbalꞌthẽẽt cĩ Nyekuci tõõ.

⁷ Aĩ thõõth ciee nẽẽ, eet cĩg Ĩꞌthĩraẽlĩ ꞌcĩg abadtẽc haaga ꞌcĩg eberriaa ꞌcĩg ummuddia thõõth ꞌcĩ baa attarraaban nẽẽg vẽlẽk ko. Nẽ aaꞌnyĩk Nyekuci ũgĩ hidiitti ooti pĩd,

⁸ aaĩ hĩcĩ aduha ꞌBuuhi cĩ Nyekuci aĩ, “Baa aaꞌnyĩk Nyekuci ĩhõõggõ hatagguutho, hátĩ hĩĩtõ hõllõngaa acĩnĩ, nẽ ĩdĩĩt ĩĩn cĩggĩĩng hiittiõõ hõllõngaa athĩknĩ.”

⁹ Nĩngĩtĩ õthõõthĩ habuui Daavide aĩnnĩ, “Edettiõõĩ ꞌgẽẽn cĩnĩĩng, haggam ĩhõõggõ, hátĩ huukti nẽẽgĩ.

¹⁰ Ũmmũtĩt hẽbẽrĩ cĩggĩĩng! Ma haaꞌnyiku hĩcĩttĩ. Itihiicit bahucci cĩggĩĩng ijjiõõnnĩĩ cĩg adĩddĩngĩĩ ĩcĩg occa hõllõngaa odoꞌngi.”

Eelliaa hatĩ eeta ꞌcĩg hõllõngaa ĩĩn ꞌJudeei

¹¹ Haini ꞌyioko naa ũtũbũrĩt eeta cĩg Ĩꞌthĩraẽlĩ Nyekuc ũdũt? Aitiõõ ũdũt! Aaꞌnyĩk thõõth ꞌcĩ abũrrĩ nẽẽg Nyekuc, heellia eeta ꞌcĩg hõllõngaa ĩĩn ꞌJudeei nẽ aaꞌnyĩk thõõth ciee eet ꞌcĩg Ĩꞌthĩraẽlĩ hiinanit ĩhõõggõ.

¹² Nẽẽthĩ, má ẽẽl eet cĩg loonyin vẽlẽk ꞌthẽccanĩ ꞌcĩ abũrrĩ eeta cĩg ꞌJudeei thõõth cĩ Nyekuci, ĩĩn occa hatĩ ꞌgattanĩ cĩ Nyekuci hutuno, hatĩ oboddia nẽẽg hĩ ĩnõõnnõ tarĩ!

¹³ Hothoothikuung naa ngagiit eet ꞌcĩg hõllõngaa iiginnu ꞌJudeei. Hõlõ, hĩcĩ hĩĩnĩ naa ꞌthooyyiahit cĩ eet ꞌcĩg hõllõngaa ĩĩn ꞌJudeei ho, haccamanoothihi hatĩ hĩnĩngĩtĩ dtiic caannĩ ho,

¹⁴ haꞌnyahi muhẽẽnĩt ꞌcĩ abũnnaa hoti, haĩ haaꞌnyĩk eet cĩgannĩg ũgĩ hiinanit ngaatĩ eellianĩ.

¹⁵ Baa ũtũbũrĩt eeta cĩg Ĩꞌthĩraẽlĩ Nyekuc, iita elemit eeta ꞌcĩg hõllõngaa ĩĩn ꞌJudeei ĩnõõnnõ. Nẽẽthĩ hoti ho, ma hatĩ ma ikia ẽlẽm Nyekuci eet cĩg Ĩꞌthĩraẽlĩ, aaĩ hatĩ hĩcĩ arũgtha nẽẽ daakiak.

¹⁶ Má abũnnaa tũkanĩ ꞌcĩ oꞌngoꞌnyi, abũnnaa hatĩ ũbũnẽẽta vẽlẽk. Nẽ má ẽllẽẽmĩth cõrrẽẽna cĩg hẽẽtak, ẽllẽẽmĩth thĩ hatĩ tabana buúk.

¹⁷ Aattiyyu niig eeta ꞌcĩg hõllõngaa ĩĩgĩnnu ꞌJudeei hĩ tabana cĩg hẽẽt cĩ oliv cĩ moru, ꞌcĩg baag adũũppanoothĩk hõdẽĩ hĩ taba ꞌcĩg oliv ꞌcĩ atiboolanni thõng. Irigiꞌthu niig nĩngĩtĩ taba baag eꞌngeddoothĩk tuu. Nẽ hĩnĩngĩtĩ thõõth icci, iita othollu niig ꞌgẽẽn ꞌcĩ abũnnaa ꞌcĩ aku cõrrẽẽnĩĩ cĩg hẽẽt cĩ oliv cĩ Nyekuci.

¹⁸ Nẽẽthĩ, ma hirriannu, hĩnĩngĩtĩ taba tĩko. Má adĩmannu noho, ummuhit thõõth icci. Hõllõngaa aaꞌnyĩku niig correenit hĩtĩlĩth, correenit ꞌcĩ aaꞌnyuung ngagiit ĩtĩlĩthĩt ko.

¹⁹ Horoong hatĩ ammuku niig ainnu, “Baa eꞌngeddoothĩk tabana nicciag tuu, hátĩ hirigith naa nĩngĩtĩ nĩĩng.”

²⁰ Ĩĩn nẽẽꞌthẽk thõõth niccia thõõth dĩdĩ. Nẽẽthĩ, baa eꞌngeddoothĩk nẽẽg tuu, hĩnĩngĩtĩ baa aitiõõ nẽẽg hõllõngaa ẽlẽmĩ Nyekuc nẽ aattiyyu niig ngaatĩ aattiyyu ho, hĩnĩngĩtĩ aꞌnyaku lemiinit hĩ ĩnõõnnõ. Nẽẽthĩ ma hirriannu thõng, itingolli Nyekuc.

²¹ Má baa hetengedeek Nyekuci taba nicciag tuu, occa baa hõllõngaa adĩman noho hĩ ngagiit buúk.

²² Nẽẽthĩ hoti ho, ummuhit tarbalꞌthẽẽt hĩ kõmĩĩth cĩ Nyekuci. Kõmĩĩth hĩ eet ꞌcĩg etteedito looc, nẽẽthĩ tarbalꞌthẽẽt hĩ ngagiita, hatĩ aallannu niig tarbalꞌthẽẽtaa cĩnnĩ. Má aitiõõ, occa hinnia hatĩ eꞌngeddoothiku niig buúk tuu.

²³ Má iꞌthiattaaĩ eeta cĩg Ĩꞌthĩraẽlĩ aꞌnyahit lemiinit, aku hatĩ ẽlẽmĩ Nyekuci ĩhõõggõ tarĩ. Aꞌnyak Nyekuci makaaꞌthĩt ꞌcĩ õbõdaanĩ ĩhõõggõ tarĩ.

²⁴ Baa iiginnu niig taba ꞌcĩg eꞌngeddoothĩk tuu hẽẽtaa ꞌcĩ ĩĩn oliv cĩ moru ho. Má baa hidiim hĩdĩman Nyekuci ꞌgiimwa ꞌcĩ gõõng nga hedeeꞌnyia hõdõõkõthĩ, ꞌgõõlaa ꞌcĩ aarĩkĩ taba hẽẽtaa cĩ oliv ꞌcĩ atiboolanni thõng ko, accamanoothĩk hatĩ nẽẽ ngaatĩ õbõdẽẽkĩ taba baag oou, hẽẽtaa baa nĩĩng.

Eelliaa hatĩ eeta cĩg Ĩꞌthĩraẽlĩ

²⁵ ꞌGotoonoga hĩ ngoonoga, hõllõngaa hadiimmuung naa ngagiit eet ꞌcĩg hõllõngaa iiginnu eet cĩg ꞌJudeei ho, irriattĩ eleeti cugguung. Hẽdtẽbanaakuung hatĩ naa thõõth ꞌcĩ ammiꞌthi baa eet cĩg Ĩꞌthĩraẽlĩ. Baa iita ĩĩtõ ũgẽẽgĩ ꞌloorriak nẽ aalla hatĩ nẽẽg noho ĩꞌthõng hũllũngattaa eeta ꞌcĩg hõllõngaa ĩĩn ꞌJudeei.

²⁶ ꞌGõõlaa ꞌcĩ aduhõõ thõng, eelliaa hatĩ eeta cĩg Ĩꞌthĩraẽlĩ vẽlẽk, hĩcĩ aduha Nyekuci ꞌBuuhaa cĩnnĩ aĩ, “Aku hatĩ eet umwaa ꞌtaaũnaa cĩ ꞌThionĩ hikia hẽẽla eeta. Nẽ hatĩ iittiõõ lohollia cĩg Yakobo hõllõngaa adĩman thooꞌthiok ꞌcĩg abathĩ.

²⁷ Lõhõt caannĩ ꞌcĩ hatĩ hadaka naag hĩ ĩhõõggõ cieeni, hatĩ hittik ꞌthẽccanẽẽt cĩggĩĩng battaala.”

²⁸ Mẽẽlĩg eeta cĩg Ĩꞌthĩraẽlĩ ꞌcĩg ꞌyioko ĩĩn mĩrõk cĩg nyeemuut ꞌcĩ abũnnaa nẽ abũnnaa thõõth ciee hĩ ngagiit eet ꞌcĩg hõllõngaa iiginnu ꞌJudeei. Nẽ nga ĩĩn nẽẽg eet ꞌcĩg ammĩnan Nyekuci noho, hĩnĩngĩtĩ baa ẽbẽra nẽẽ hĩbaangĩ cĩggĩĩng Abũrahaamõ hĩ Iꞌthaako hĩ Yakobo.

²⁹ Hõllõngaa õbõdĩ Nyekuci ꞌbaaninit baa aaꞌnyĩk nẽẽ eeta nẽ nga hataarõthĩ eet baag ẽbẽra nẽẽnĩ.

³⁰ Baa gõõng aburru niig eeta ꞌcĩg hõllõngaa iiginnu ꞌJudeei Nyekuc nẽ ꞌyioko, atamaatihuung nẽẽ ngagiit hĩnĩngĩtĩ ũtũbũrĩt eeta cĩg Ĩꞌthĩraẽlĩ ĩnõõnnõ,

³¹ nĩngĩtĩ ꞌyioko au ĩllõõrrĩ nẽẽg buúk aĩ, hátĩ hummuddiaawa nẽẽg buúk tamaati cĩ Nyekuci, haau hĩ thõõth baa ammaannikuung Nyekuci ngagiita.

³² Baa ũtũbũrĩt eeta vẽlẽk thõõth cĩ Nyekuci, ĩnõõ ꞌcĩ adĩmanĩ nẽẽ ĩhõõggõ hĩ eeta ꞌcĩg ĩĩn baabuuthnya ho. Hátĩ hatamaatĩk ĩhõõggõ vẽlẽk.

Hĩdĩhĩthĩt Nyekuc

³³ Nganĩ ꞌcĩ occa attĩman baliinit hĩ ꞌgẽẽnyĩth cĩ Nyekuci? Nganĩ ꞌcĩ occa aga muhẽẽnĩt cĩnnĩ hode nganĩ ꞌcĩ occa ẽddẽẽba ꞌgii ꞌcĩ adtican nẽẽnĩ?

³⁴ “Nganĩ baa ꞌcĩ aga muhẽẽnĩt cĩ Makayyiookto? Hode nganĩ baa ꞌcĩ ĩĩn tilooyyiohit cĩnnĩ?”

³⁵ “Nganĩ baa ꞌcĩ aaꞌnyĩk Nyekuc ꞌbaaninit umwa, hátĩ hũdũman Nyekuci ĩnõõnnõ?”

³⁶ Au hẽlẽggĩ vẽlẽk hĩ Makayyioohit. Nẽ baa ẽhẽnytaa hẽlẽggĩ vẽlẽk, hĩnĩngĩtĩ ĩnõõnnõ nẽ hatĩ obodoothi hĩ ĩnõõnnõ. Hĩdĩhĩthĩt Makayyioohit ooo! Aamẽn.