ꞌRooma 10 - ꞌBuuk cĩ Thõõth cĩ Nyekuci

¹ ꞌGotoonoga hĩ ngoonoga, abũraneek nganĩĩt ꞌthĩnĩt nẽ hala naa Nyekuc, hátĩ horoong heellia eeta cĩg Ĩꞌthĩraẽlĩ.

² Hĩnĩngĩtĩ occa haduha naa haini, ammĩnan nẽẽg Nyekuc, nẽẽthĩ hinnia, mĩnnanĩ cĩnĩĩng ko, hõllõngaa aku hĩ ꞌgẽẽnyĩth.

³ Hĩnĩngĩtĩ hõllõngaa aga eeta cĩg Ĩꞌthĩraẽlĩ ꞌgõõl cĩ bũnnai ꞌcĩ aku hĩ Nyekuc nẽ idiimito ngaatĩ ammũdaanĩ ꞌgõõl ꞌcĩ bũnnai cĩnĩĩng ẽmmẽn nẽ ũtũbũrĩt bũnnai cĩ Nyekuci.

⁴ Ikia ũttũbaneek Krĩstõ dtiic baa aaꞌnyĩhõõthĩkĩ eet nyattalĩ. Hĩnĩngĩtĩ thõõth icci, eeta vẽlẽk ꞌcĩg ẽlẽmĩ ĩnõõnnõ, ikia aaꞌnyĩk Nyekuci ĩhõõggõ hũbũttaathõ.

Occa eelliaa eeta vẽlẽk

⁵ Baa ẽdtẽbana põrõvẽtaacĩ Mũũꞌtha bũnnai ꞌcĩ aku nyattaala ꞌgõõlaa ꞌcĩ aĩ, “Ẽẽtĩ ꞌcĩ aꞌthũũnnĩ nyattal icci, arũgnĩ hatĩ nẽẽ nyattal.”

⁶ Nẽẽthĩ, aduha bũnnai ꞌcĩ aku lemiitta aĩ, “Ma hothooꞌthu ꞌthinneetinitõõ hainnu, ‘Nganĩ ꞌcĩ occa õtõd hẽẽtahujjieen?’ ” Nĩngĩtĩ aĩ, hũũk haꞌnyaha Krĩstõ loota.

⁷ Hode occa ajin aĩ, “Nganĩ ꞌcĩ occa allũũcĩ õkõ looccaa cĩ daakiahu?” hũũk hũrũgũtha Krĩstõ daahĩtha.

⁸ Nẽẽthĩ, aĩ thõõth ciee ne? Aĩ, “Õbõhĩ nyeemuut hĩ nganiit aau ojoonu, aau ũtũũga hĩ ꞌthĩnĩtaa cunni.” Nẽ aduhõõ nyeemuut ciee hĩ lemiinit ꞌcĩ hirrioonna naag ko thõng, thõõth cĩ lemiinit ꞌcĩ hirrioonna naag ko niccia.

⁹ Hĩnĩngĩtĩ má uduha nii ũtũũgaa cunni iinu, “Ĩĩn Yeesu Makayyioohit,” nẽ elemu ꞌthĩnĩtaa cunni iinu, baa arũgtha Nyekuci ĩnõõnnõ daahĩtha, eellia hatĩnĩ.

¹⁰ Hĩnĩngĩtĩ má elemi nii ꞌthĩnĩtaa cunni aini, aaꞌnyi hatĩ Nyekuci bũna nẽ má uduha nii lemiinit hĩ Krĩstõ ũtũgaa cunni, eellia thĩ niina.

¹¹ Hĩcĩ aduha ꞌBuuhi cĩ Nyekuci aĩ, “Ẽẽtĩ ꞌcĩ ẽlẽmĩ ĩnõõnnõ, hõllõngaa hatĩ aggam ngaaoni ũdũt.”

¹² Hĩnĩngĩtĩ aduhõõ eeta ꞌcĩg ĩĩn ꞌJudeei hĩ eet ꞌcĩg hõllõngaa ĩĩn ꞌJudeei thõng, Makayyioohit hõdẽẽthõng dioo ꞌcĩ ĩĩn Makayyioohit cĩ eet vẽlẽk nẽ aggatan eet vẽlẽk gẽrrẽẽt ꞌcĩg ẽlẽmĩ ĩnõõnnõ.

¹³ Hĩnĩngĩtĩ, “Eeta vẽlẽk ꞌcĩg ẽlẽmĩ Makayyioohit, eelliaa hatĩnĩ.”

¹⁴ Nẽ occa ẽlẽmĩ nẽẽg eet ꞌcĩ nga hagaacõ hutuno? Occa ẽlẽmĩ nẽẽg eet ꞌcĩ nga hĩthĩhĩt hutuno? Nẽ occa athĩhĩ nẽẽg hatĩ aitiõõ ẽẽtĩ ꞌcĩ irrioonĩk ĩhõõggõ tõõ hutuno?

¹⁵ Occa irrioonĩk nẽẽg eet hutuno hatĩ nga hĩꞌthooyyii nẽẽgĩ? Hĩcĩ eheeddi ꞌBuuhaa cĩ Nyekuci aĩ, “Ĩĩn occa ꞌlẽẽmĩthĩ cĩ ꞌthoo cĩg eet ꞌcĩg aꞌnyaha nyeemuut ꞌcĩ abũnnaa hutuno?”

¹⁶ Nẽẽthĩ, baa hõllõngaa ẽlẽmĩ eeta cĩg Ĩꞌthĩraẽlĩ vẽlẽk nyeemuut ꞌcĩ abũnnaa ho. Hĩnĩngĩtĩ baa ajin põrõvẽtaacĩ Iꞌthaia Makayyioohit anneek, “Nganĩ baa ꞌcĩ ẽlẽm nyeemuut cĩnaang?”

¹⁷ Nẽẽthĩ, aku lemiiniti, hĩnĩngĩtĩ thĩhẽẽnĩt cĩ nyeemuut ꞌcĩ abũnnaa nẽ aduha nyeemuut ciee thõõth cĩ Krĩstõ.

¹⁸ Nẽẽthĩ ꞌyioko, haini naa, nga baa hĩthĩhĩt eeta cĩg Ĩꞌthĩraẽlĩ? Aitiõõ ũdũt, ĩthĩhĩta! Aduha ꞌBuuhi cĩ Nyekuci aĩ, “Baa udukia nyeemuut loonyini vẽlẽk loota nĩnga. Baa irriõõnĩ looc vẽlẽk.”

¹⁹ Nẽẽthĩ, hijino hĩĩna, athĩknĩ baa ꞌthẽk eeta cĩg Ĩꞌthĩraẽlĩ jurrung? Eei, baa athĩknĩ, tananga korrioohĩĩ baag Mũũꞌtha, baa õthõõth Nyekuci aĩ, “Haaꞌnyihi hatĩ naa Ĩꞌthĩraẽl hiinanit eet ꞌcĩg hõllõngaa aꞌnyak looc. Haaꞌnyihi hatĩ naa ĩhõõggõ hiliilliyyieek eet ꞌcĩg hõllõngaa aga ꞌgiimwa.”

²⁰ Baa hõllõngaa itieelli põrõvẽtaacĩ Iꞌthaia ngaatĩ aduhaanĩ thõõth cĩ Makayyiookto aĩnnĩ, “Baa ummuddiaawa eeta baag hõllõngaa adiimma nganĩĩta. Nẽ huppwaannaha eet baag hõllõngaa ajinna nganĩĩta.”

²¹ Nẽẽthĩ, õthõõth Nyekuci eet cĩg Ĩꞌthĩraẽlĩ aĩ, “Waathĩn hũtũrũũr, hodongi naa athĩn cĩgannĩg hẽẽtahujjieen, hĩnĩngĩtĩ eet ꞌcĩg hõllõngaa athĩknĩ nẽ ũtũbũrĩt Nyekuc.”