Pilippi 4 - ꞌBuuk cĩ Thõõth cĩ Nyekuci

¹ Nẽẽthĩ hoti ho, ꞌgotoonoga hĩ ngoonoga ꞌcĩg hammĩnani, aallattia uꞌthuutti thõõth cĩ Makayyiookto jurrung. Hammĩnannuung naa ngagiit nẽ hadiimi hakuu hacinnuunga. Hirriani naa hõdõõkõthĩ nẽ hatala, hĩnĩngĩtĩ ngagiita.

Akũtan Paaulo nuyyiook cĩg Makayyiooktak

² Niig Euodia hĩ Thĩntice, ĩĩgĩnnu niig eet cĩg Makayyiooktak, halayyuung ibilli thõõth cunuung ꞌcĩ ẽppẽhanoonnu ho.

³ Nẽ nii ꞌgõõna cĩ ꞌthĩnĩtõ ꞌcĩ hadticanni hõdẽĩ ho, halayyii ẽẽl ngaaĩ nicciaag ĩĩn ꞌramma hataa. Baa hadticaniinna hõdẽĩ hĩ ĩhõõggõ ngaatĩ hallimanna nyeemuut ꞌcĩ abũnnaa. Baa adticanni nẽẽg hõdẽĩ hĩ Kelementiino hĩ dticcianniook ũgĩ cĩgannĩg, ꞌcĩg eteheeddi ꞌthaarrioha cĩggĩĩng ꞌbuuhaa cĩ rũgẽtõ.

⁴ Accamattoothĩk hõdõõkõthĩ, hĩnĩngĩtĩ Makayyioohit! Hõbõdẽẽkĩ tarĩ haini, accamattoothĩk.

⁵ Ĩĩtõ tarbalĩg hĩ eet vẽlẽk hõdõõkõthĩ, hĩnĩngĩtĩ aku hatĩ Makayyioohiti hĩdĩĩkoothong.

⁶ Ma hapuppuddu, hĩnĩngĩtĩ ꞌgiimwa, alaac Nyekuc thooꞌthiok vẽlẽk. Alaac ĩnõõnnõ ꞌthinneetinii ꞌcĩg anneeku ĩlaallẽ.

⁷ Nẽ amũdaannu hatĩ ganõn cĩ Nyekuci, ꞌcĩ ĩllõõan ꞌgii vẽlẽk ꞌcĩ occa aga eeta. Aꞌthũũnnĩ hatĩ ganõnĩ cĩnnĩ muhẽẽnĩt cĩ ꞌthinneeti cugguung, hĩcĩ aattiyyu niig hõdẽĩ hĩ Yeesu Krĩstõ ho.

⁸ Nẽẽthĩ ꞌyioko, ꞌgotoonoga hĩ ngoonoga, thõõthaa ꞌcĩ adtuurna, ummuhit thooꞌthiok ꞌcĩg ĩĩn dĩdĩ hĩ thooꞌthiok ꞌcĩg hiꞌngolli hĩ thooꞌthiok ꞌcĩg aũlanĩ, hĩ thooꞌthiok ꞌcĩg tẽllĩg hĩ thooꞌthiok cĩg occa hammĩnanĩ hĩ thooꞌthiok ꞌcĩg accamana ꞌthinneeti. Ummuhit thooꞌthiok ꞌcĩg ẽllẽẽmĩth gẽrrẽẽt ꞌcĩg occa hadĩhĩthĩ.

⁹ Agayyu niig ꞌlimman baa haaꞌnyuung naana nẽ agayyu thooꞌthiok baag athĩknaangu niig nganĩĩt hothoothi nẽ ĩcĩttaangu nganĩĩt ngaatĩ hadĩmanĩĩ. Ũnnẽẽc terethiinit baalannĩ. Nẽ hatĩ aau Nyekuci cĩ ganõõnõ hĩ ngagiita.

Atalĩ Paaulo lemmiook cĩg Pilippi

¹⁰ Aaꞌnya nganĩĩt Makayyioohiti haccamanoothĩk gẽrrẽẽt, hĩnĩngĩtĩ eelliaangu aattĩ niig nganĩĩta. Nẽ dĩdĩ, baa gõõng ammukaangu niig nganĩĩt hõdõõkõthĩ, nẽẽthĩ, baa aitiõõ ꞌgõõl ꞌcĩ occa ẽtẽrꞌthaannu tõõ.

¹¹ Hõllõngaa hothoothi naa thõõth icci hĩcĩ hadiimi ꞌgiimwa, hĩnĩngĩtĩ hillimmana naa ngaatĩ haaꞌnyĩkĩĩ ꞌgii ꞌcĩ haꞌnyahi hũũppanaanĩ.

¹² Haga naa ꞌgõõl ꞌcĩ occa harũgnĩ, tananga hiꞌthihi ꞌgii ꞌcĩ occa hadahi hode abatan ꞌgẽẽna. Nẽ hillimmana ꞌgõõl ꞌcĩ harũgnĩ korrioohĩ vẽlẽk, tananga haꞌnyari hode adaka magĩthĩ, hode haꞌnyahi ꞌgẽẽn ꞌcĩ maka hode ꞌcĩ abadtẽc haaga.

¹³ Occa hadticani ꞌgii vẽlẽk, hĩnĩngĩtĩ Krĩstõ ꞌcĩ aaꞌnya nganĩĩt ꞌtirrian ko.

¹⁴ Nẽ baa abũnnayyu niig ngaatĩ ẽẽllaangu nganĩĩt baa haaĩ pĩĩrnatta.

¹⁵ ꞌGotoonoga hĩ ngoonoga cĩg Pilippi, ammuhooꞌthu niig aaĩ baa hutuno baa hiꞌthianaanĩ naa ngaatĩ hirrioonĩ nyeemuut ꞌcĩ abũnnaa looccaa cĩ Maccedoonia. Ma baa hĩtĩngaawa nĩngaata, baa lothippit cunuung cĩ lemmioohu dioo baa ẽẽllaangu nganĩĩta.

¹⁶ Tananga baa nga haaĩ naa ꞌtaaũnaa ĩĩcĩ Tẽꞌthaloonika, baa ĩꞌthõõakaangu eliinit tabattĩ hiriiri.

¹⁷ Hothoothi naa hoti hõllõngaa, hĩnĩngĩtĩ hadiimi ꞌbaaninit umwa hĩ ngagiita, nẽẽthĩ, hadiimmuung naa ngagiit ummuddia dũman cĩ tarbalꞌthẽẽt cunuung.

¹⁸ Nẽ ꞌyioko, haꞌnyaha naa ꞌgii vẽlẽk ꞌcĩ hadiimi hĩllõõan. Aanytaangu niig nganĩĩt ꞌbaaninit ꞌcĩ maka baa ĩꞌthõõakaangu haꞌnyahaaha Epavorodito. Aaĩ ꞌbaaniniti ciee hĩ ꞌgaarrieeniti ꞌcĩ õꞌngõlĩ ẽmmẽdĩ ꞌcĩ accamana Nyekuci.

¹⁹ Hala naa Nyekuc, hátĩ haaꞌnyuung ꞌgii vẽlẽk ꞌcĩ adiimmu ꞌgattaanaa ꞌcĩ ĩllõõan vẽlẽk ĩĩcĩ aku hĩ Yeesu Krĩstõ.

²⁰ Aꞌnyĩĩk Nyekuc Baangeet cĩnaac hĩdĩhĩthĩ ooo. Aamẽn.

ꞌThaainit ꞌcĩ adtuurna

²¹ Ĩꞌthaayyihaangu eet vẽlẽk cĩg Krĩstõ. Ĩꞌthaayyuung nuyyiooha cĩg Makayyiooktak ꞌcĩg harũmẽẽnna ngaati buúk ngagiita.

²² Ĩꞌthaayyuung eeta cĩg Nyekuci vẽlẽk, ettebehini dticcianniook cĩg õlõ cĩ habu cobbi cĩ ꞌRooma.

²³ Aꞌnyĩĩk bũnnai cĩ Makayyioohit Yeesu Krĩstõ haau hĩ ngagiita. Aamẽn.