Pilippi 3 - ꞌBuuk cĩ Thõõth cĩ Nyekuci

ꞌGõõl ꞌcĩ elemmeet Nyekuci

¹ ꞌGotoonoga hĩ ngoonoga, thõõthaa ꞌcĩ adtuurna vẽlẽk, accamattoothĩk, hĩnĩngĩtĩ iittu niig eet cĩg Makayyiooktak. Hõllõngaa hahari naa ngaatĩ hẽhẽẽdakuung ngagiit thõõth baa ĩĩcĩ oou tarĩ nẽ dĩdĩ, hẽhẽẽdakuung hĩnĩngĩtĩ bũnnai cunuung.

² Ĩcĩnĩt eet ꞌcĩg aattĩg hĩ eeta ꞌcĩg hõllõngaa ĩĩn lemmiook hataa jurrung, ĩĩn nẽẽg ꞌthẽccanniook nẽ anneekuung adiim etteeddu eleeti, hátĩ eellia.

³ Hĩnĩngĩtĩ ngagĩĩt dẽẽdẽ ꞌcĩg halayyi Loriiaa cĩ Nyekuci ꞌcĩg etteeddi ꞌthinneeti Loriia dĩdĩ. Hirrianĩ naag thooꞌthiok baag ĩdĩmaneeheet Yeesu Krĩstõ ngagĩĩt ẽlẽk. Hõllõngaa hirrian, hĩnĩngĩtĩ hẽlẽggĩ ꞌcĩg hĩdĩmanit naaga,

⁴ tananga haꞌnyahi naa thooꞌthiok ꞌcĩg occa hirrianĩ. Má irrian eet umwaa, hĩnĩngĩtĩ thooꞌthiok ꞌcĩg ĩdĩman nẽẽnĩ, haꞌnyahi naa ꞌcĩg ĩllõõan cĩg eet tĩho.

⁵ Baa etteeddi nganĩĩt ẽlẽ baa nga haꞌnyahi waathinniook turkiyyio haaga. Hĩĩnĩ eet cĩ Ĩꞌthĩraẽlĩ pir cĩ habuccieet cĩ Benyemiino. Nẽ tarĩ hĩĩnĩ Ebereeinit dẽẽdẽ hõrggẽẽnaa cĩ Ebereei vẽlẽk. Nẽ baa hĩĩnĩ Variꞌtheenit ꞌcĩ haꞌthũũnnĩ nyattal cĩ Mũũꞌtha jurrung.

⁶ Nẽ baa hẽmmẽdaanĩ naa ngaatĩ hẽhẽcĩ lothippit cĩ lemmiook cĩg Krĩstõ ũgĩ nẽ huruha ũgĩ. Baa hadĩmani naa thooꞌthiok vẽlẽk ꞌcĩg adiim nyattalĩ jurrung hammuhi hinnia haini, hátĩ haccamanoothĩk Nyekuci.

⁷ Nẽẽthĩ ꞌyioko, eteretheeha Krĩstõ nganĩĩt ngaatĩ ĩĩnnĩ thõõth baa gõõng hammuhi naa haini tiir, thõõth umwa haaga.

⁸ Nẽ dĩdĩ, ĩllõõan thõõth ꞌcĩ hagaĩ Makayyioohit Yeesu Krĩstõ ꞌgii vẽlẽk. Ĩnõõ baa hacĩnĩ naa hẽlẽggĩ vẽlẽk hĩ tahaha haaga, hátĩ hũnũ Krĩstõ,

⁹ nẽ hĩĩna eet cĩnnĩ. Hõllõngaa occa ẽlẽmma Nyekuci nganĩĩt ngaatĩ habũnnayyĩĩ ꞌgõõlaa ꞌcĩ hanũĩ nyattal, hĩnĩngĩtĩ ꞌgõõl ꞌcĩ elemmeet Nyekuci ngagĩĩt hũbũttaath, aaĩ lemiitta.

¹⁰ Hadiimi haga naa Krĩstõ hĩ ꞌtirrian cĩ Nyekuc baa arũgtha ĩnõõnnõ daahĩtha. Hadiimi haccanannii naa buúk hĩ baa accananni nẽẽnĩ nẽ hadaaha hĩ baa adaahĩ nẽẽnĩ,

¹¹ hátĩ hũrũga naa buúk ꞌgõõlẽẽ umwaanĩ, hĩ baa arũgna nẽẽnĩ.

Iret ꞌcĩ hammũdaanĩ rũgẽt ꞌcĩ nga aayyiaa ĩĩcĩ oou

¹² Aitiõõ naa hõllõngaa haini, hũmmũda hẽlẽggĩ iccig vẽlẽk hode haini hẽdẽcaaha dtiic cĩ Nyekuci. Nẽẽthĩ, nga ꞌthẽk harriiꞌnyi ĩꞌthõng haau ꞌgõõlaa ꞌcĩ adiimma Yeesu Krĩstõ kõr baa aũyyaanĩ.

¹³ ꞌGotoonoga hĩ ngoonoga, nga hẽdẽcaak naa dtiic icci, nẽẽthĩ ꞌthẽk, nga hodonnoothihi noho. Hataarothi hẽlẽggĩ ꞌcĩg allacattĩ nẽ hĩrrĩcanaa ꞌcĩg nga aattiyyiaa ĩĩcĩ oou.

¹⁴ Havviri naa, hátĩ hẽdẽcaak iret nẽ hátĩ hũmmũda dũman ꞌcĩ avvaanna Nyekuci hũũk hẽẽtahujjieen, hĩnĩngĩtĩ ꞌgii ꞌcĩ adĩman Yeesu Krĩstõ.

¹⁵ Aꞌnyĩĩk eet vẽlẽk ꞌcĩg okomit lemiitta, helemit thooꞌthiok iccig. Nẽ má hõllõngaa elemmu thõõth umwa, haga naa aaꞌnyuung hatĩ Nyekuci agaac thõõth tĩho.

¹⁶ Nẽẽthĩ ꞌyioko, adiim occa haalla haꞌthũũnnĩ naag thõõth ꞌcĩ ĩĩn dĩdĩ ꞌcĩ haꞌnyahit ẽlẽk ko.

¹⁷ ꞌGotoonoga hĩ ngoonoga, hadiimmuung naa ngagiit aaut hĩ naana nẽ ĩcĩtta thõõth hĩ eet baag anũ terethiinit cĩnaang.

¹⁸ Baa gõõng hiloottuung naa ngagiit tabattĩ mẽẽlĩg nẽ hõbõdẽẽkĩ tarĩ, tilaalõnĩ hẽbẽrẽẽnnĩĩ cĩgannĩg hanneekuung, mẽẽlĩg eeta ꞌcĩg ĩĩn mĩrõk cĩg hurucce cĩ Krĩstõ.

¹⁹ Hanneekuung, aduhoothĩk hatĩ nẽẽg ꞌgwoyyiaa ꞌcĩ aalla ũdũt! Ala nẽẽg hẽlẽggĩ ꞌcĩg abũraneek eleeti cĩggĩĩng hĩĩ nyekuc cĩnĩĩng nẽ irrianit, hĩnĩngĩtĩ thooꞌthiok ꞌcĩg abathĩ ꞌcĩg adĩman nẽẽgĩ. Hẽlẽggĩ vẽlẽk ꞌcĩg ammuk nẽẽgĩ, ĩĩn hẽlẽggĩ cĩg looc nicci.

²⁰ Nẽẽthĩ, hĩĩgĩn naag eet cĩg hẽẽtkujjieen ngaatĩ aayyi Yeesu Krĩstõ. Nẽ habũraneek naag ngaatĩ hẽrẽĩ ĩnõõnnõ hõbõda hĩĩ Ellioohit cĩnaac.

²¹ Õkõõĩ hatĩ nẽẽ eleeti cĩggaac ꞌcĩg hõllõngaa attiran ꞌcĩg adaahĩ ho nẽ ũtũhũ ĩhõõggõ hĩĩtõ eleeti ꞌcĩg abuli haauto hĩ ẽlẽ cĩnnẽẽnĩ, makaaꞌthĩtaa ꞌcĩ hatĩ aggamĩ nẽẽ hẽlẽggĩ vẽlẽk.