Pilippi 2 - ꞌBuuk cĩ Thõõth cĩ Nyekuci

Aaut hĩ Krĩstõ

¹ Akũtannuung Krĩstõ ngagiita nẽ amammaayanuung mĩnnani cĩnnẽẽnĩ. Arummuung Lorii cĩ Nyekuci ngagiita nẽ uꞌthuuttu ꞌgoonogu.

² Nẽẽthĩ ꞌyioko, adiim aaꞌnyaangu niig nganĩĩt haccamanoothĩk jurrung ꞌgõõlaa ꞌcĩ arũmeennu lõꞌngõõc hĩ ngaatĩ ammĩnannu ꞌgoonogu. Ũrũmĩt ꞌthinneeti nẽ idticattoou hõdẽĩ.

³ Ma hĩĩgĩnnu muruꞌthiook nẽ ma hathĩngõõnyaneeku ꞌgoonogu. Irritatta eleeti cugguung hĩĩtõ hĩdĩcĩg nẽ icittu ꞌgoonogu haauto hĩcĩ ĩllõõannuung ngagiita.

⁴ Abũnnaa aallaku ꞌgoonogu hĩcĩ occa aallaku eleeti cugguung.

⁵ Aanytĩk muhẽẽnĩt cunuung hudukto hĩcĩ Yeesu Krĩstõ thõng.

⁶ Tananga baa ĩĩn Krĩstõ Nyekuc dĩdĩ, baa hõllõngaa aaꞌnyĩk nẽẽ ẽlẽ cĩnnĩ hudukto hĩ Nyekuc thõng.

⁷ Baa hinnia ẽlẽmana nẽẽ ꞌgii vẽlẽk ꞌcĩ ĩĩnnĩ Nyekuc, nẽ ikia aau hĩ dticciannioohiti nẽ ittirria hĩ ẽẽtĩ cĩ holli õõ.

⁸ Ma baa aau nẽẽ hĩ ẽẽtĩ ꞌcĩ holli õõ, ikia õbõdaaĩ nẽẽ ẽlẽ cĩnnĩ hĩĩ hĩdĩca, nẽ ĩthĩk thõõth ĩꞌthõng hẽlẽm daahĩth cĩ hurucceeo buúk.

⁹ Nĩngĩtĩ aaꞌnyĩkĩ Nyekuci ĩnõõnnõ nĩngĩtĩ cobbi gẽrrẽẽt cĩ bulẽẽttõ nẽ akateek ꞌthaar ꞌcĩg ĩllõõan ꞌthaarriok vẽlẽk.

¹⁰ Hátĩ hakatit eeta vẽlẽk, ꞌcĩg aattĩg hẽẽtahujjieen hĩ ꞌcĩg aattĩg loota nĩnga hĩ ꞌcĩg aattĩg looccaa cĩ miningu huruꞌnyia ꞌthaarĩĩ cĩg Yeesu,

¹¹ nẽẽthĩ, aduha hatĩ eeta vẽlẽk aĩ ĩĩn Yeesu Krĩstõ Makayyioohit bulẽẽttaa cĩ Nyekuc Bangeet.

Lanyit looccaa nĩĩcĩ

¹² ꞌGotoonoga hĩ ngoonoga, baa gõõng athĩkneennu niig baa gõõng harũmĩ hĩ ngagiita. Hĩ ꞌyioko hĩĩna naa ꞌrẽẽn hĩ ngagiit ko, ĩthĩktõ gẽrrẽẽt hĩllõõan. Nẽẽthĩ hoti ho, tẽẽlꞌthĩta hĩ barritẽẽtta, aaut ꞌgõõlaa ꞌcĩ ẽtẽrꞌtha aĩ, ĩĩn elliaanĩtĩ cunuung dĩdĩ.

¹³ Hĩnĩngĩtĩ adticanni Nyekuci hĩ ngagiit, haaꞌnyuung accamatta tabiinit nẽ aaꞌnyuung ꞌtirriani ꞌcĩ uuluyyu ngaatĩ adĩmannu thõõth ꞌcĩ accamana nẽẽnĩ.

¹⁴ Ĩdticanit thooꞌthiok vẽlẽk ꞌgõõlaa ꞌcĩ hõllõngaa ongoongoyyu hode ẽppẽhanoonnu thõng,

¹⁵ hátĩ ĩmmĩrĩt nẽ iittu lõhõlĩ cĩg Nyekuci ꞌcĩg tẽllĩg ꞌcĩg aitiõõ ꞌthẽccanĩ tõõ. Aattiyyu niig looccaa cĩ eet ꞌcĩg ĩĩn ꞌloorriak ꞌcĩg abathĩ, nẽẽthĩ, aanytĩk thooꞌthiok ꞌcĩg abũnnaa ꞌcĩg adĩmannu niig ko, hatalanyit haauto hĩ mũnyũnya.

¹⁶ Uꞌthuutti thõõth ꞌcĩ aꞌnyaha rũgẽt jurrung, hátĩ ma õbõda Krĩstõ, hirriani hatĩ naa gẽrrẽẽt haini, ĩko baa hõllõngaa hadticannii haaga, ĩko baa abũnnaa dtiici caannẽẽnĩ.

¹⁷ Aaĩ lemiiniti cunuung hĩ dtiic cunuung hĩ ꞌgaarrieeniti ꞌcĩ aaꞌnyĩhoothĩk Nyekuc. Tananga hudduuttoothĩk biyyieeta cĩgannĩg buúk hĩ ꞌgaarrieenit hõdẽĩ, hatali hatĩ gẽrrẽẽt hĩ ngagiita.

¹⁸ Nẽ ꞌgõõlaa ꞌcĩ aduhõõ thõng, occa haccamanoothĩk hĩ nganĩĩt hõdẽĩ.

Timotteeo hĩ Epavorodito

¹⁹ Má adiim Makayyioohiti Yeesu, hammuhi hĩꞌthõõa hatĩ naa Timotteeo hĩdĩĩkoothong, hikia hẽhẽẽrõnaahuung ngagiita. Nẽ hatĩ aaꞌnya nẽẽ nganĩĩt haccamanoothĩk ngaatĩ aku aduhaaka authet ꞌcĩ aattiyyu niiga.

²⁰ Aitiõõ eet umwaa ꞌcĩ haꞌnyahi naa ꞌcĩ aallakuung ngagiit hĩ nẽẽ tõõ.

²¹ Aallak eeta ũgẽẽgĩ thooꞌthiok ꞌcĩg adiim nẽẽgĩ, hõllõngaa aallak thõõth cĩ Yeesu Krĩstõ.

²² Nẽẽthĩ, agayyu niig ĩĩn Timotteeo eet ꞌcĩ aaĩ hutuno. Hidticattooa naag hĩ ĩnõõnnõ hĩ loholeec caannẽẽnĩ, ngaatĩ hĩꞌthaanĩka nyeemuut ꞌcĩ abũnnaa eet.

²³ Nẽẽthĩ hoti ho, hammuhi hĩꞌthõõakuung hatĩ ĩnõõnnõ hĩdĩĩkoothong, hatĩ hũmmũda ꞌgii ꞌcĩ hatĩ aku edeeꞌnyiakaa nganĩĩta.

²⁴ Nẽ haga naa dĩdĩ haini, ẽlẽmaaka hatĩ Makayyioohiti nganĩĩt buúk hikia hĩdĩĩkoothong.

²⁵ Hammuhi occa abũnnaa ngaatĩ hĩꞌthõõakuung ngagiit Epavorodito hõbõda hĩ ngagiit tarĩ, ĩĩn nẽẽ ꞌgõtõna, dticciannioohit nẽ ĩĩ ũũrũtaac ꞌcĩ hadticaniinna hõdẽĩ, ꞌcĩ ĩĩn ꞌthooyyiahit cunuung baa ĩꞌthõõannnu niig hikia hũꞌthũũtta nganĩĩta.

²⁶ Hĩꞌthõõakuung naa ngagiit ĩnõõnnõ, hĩnĩngĩtĩ baa abũraneek nẽẽ ngaatĩ aku acĩnnuung ngagiita, baa ommoꞌthi nẽẽ gẽrrẽẽt, hĩnĩngĩtĩ aga aĩ, udukiaahuung ngagiit nyeemuut cĩ mõõrĩth cĩnnĩ.

²⁷ Nẽ dĩdĩ, baa õmmõõrĩ Epavorodito gẽrrẽẽt hõbõhĩ hadaak. Nẽ baa ammaannĩk Nyekuci ĩnõõnnõ hĩ nganĩĩt buúk, hẽẽlawaa nganĩĩt mothiitta cobbi.

²⁸ Nẽẽthĩ hoti ho, hidiima ꞌthẽk hĩꞌthõõahuung Epavorodito hõbõda hĩ ngagiit tarĩ, hátĩ ma icittu ĩnõõnnõ tarĩ, atallu hatĩ nẽ ikia ĩĩ hĩdĩc nganĩĩt buúk puppudi.

²⁹ Iita ũrũmtĩ hĩ ĩnõõnnõ hõrggẽẽnaa cunuung lõꞌngõõc hĩ lemmioohiti cĩ Makayyiookto nẽ itingollieeu eet ꞌcĩ aaĩ hĩ nẽẽnĩ,

³⁰ hĩnĩngĩtĩ baa õbõhĩ Epavorodito adaak thõõthaa cĩ dtiic cĩ Krĩstõ, ikia ẽlẽmana nẽẽ rũgẽt cĩnnĩ hidticaneeha nganĩĩt thõõth ꞌcĩ occa baa hõllõngaa adĩmaneekaangu niig nganĩĩt, hĩnĩngĩtĩ iiginnu ꞌrẽẽttĩg.