Pilippi 1 - ꞌBuuk cĩ Thõõth cĩ Nyekuci

ꞌThaainit hĩ laiinit cĩ Paaulo

¹ Waraga ꞌcĩ aku hĩ nganĩĩt Paaulo hĩ Timotteeo ꞌcĩg hĩĩgĩnna dticcianniook cĩg Yeesu Krĩstõ cieeni. Eheedothoothĩk waraga ciee eet vẽlẽk cĩg Nyekuci ꞌcĩg ĩĩn nuyyiook cĩg Yeesu Krĩstõ ꞌtaaũnaa cĩ Pilippi, hĩ makayyiook cugguung hĩ elliook cĩggĩĩng.

² Halayyi naa haini, aꞌnyĩĩk Nyekuc Baangeet hĩ Makayyioohit Yeesu Krĩstõ, hĩĩtõ tarbalĩg hĩ ngagiit nẽ aggatattuung ngagiit ganõõna!

Alaiini Paaulo lemmiook cĩg Pilippi

³ Hanneehi naa Nyekuc hõdõõkõthĩ ĩlaallẽ hatĩ hammuhaannuung ngagiita.

⁴ Ma halayyi naana, halaiinnuung ngagiit vẽlẽk hõdõõkõthĩ taliitta,

⁵ hĩnĩngĩtĩ gõõng otholeekaangu niig nganĩĩt ngaatĩ hallimanẽẽkĩ eet nyeemuut ꞌcĩ abũnnaa cĩ Krĩstõ, nganĩngĩ baa athiknu ĩĩcĩ oou ĩꞌthõng hĩĩ noho.

⁶ Nẽ haga naa Nyekuc baa iꞌthianaanĩ dtiic icci abũnnaa hõrggẽẽnaa cunuung ko, aalla hatĩ adticanoothi dtiic cĩnnĩ ho, ĩꞌthõng hũttũbanoothĩk kõrra ꞌcĩ hatĩ õbõdaanĩ Yeesu Krĩstõ.

⁷ Hammuhaannuung naa ngagiit ꞌthĩnĩtaa caannĩ gẽrrẽẽt. Nẽẽthĩ hoti ho, abũnnaa hĩ nganĩĩt ngaatĩ haarikuung ngagiit vẽlẽk ꞌthĩnĩt ꞌgõõlaa cĩ. Baa otholeekaangu niig nganĩĩt bũnnai cĩ Nyekuci, baa haaĩ baabuutha, hĩ thõõth ꞌcĩ heteiini thõõth ꞌcĩ ĩĩn dĩdĩ hĩ nyeemuut ꞌcĩ abũnnaa.

⁸ Nyekuc ꞌcĩ aga dĩdĩ, ngaatĩ hadiim hakuu hacinnuung naa ngagiita. Aga nẽẽ ngaatĩ haꞌthuunnuung naa ngagiit, hĩcĩ aꞌthuunnuung Yeesu Krĩstõ ngagiita.

⁹ Halayyi naa, hátĩ haala hĩtĩlĩth mĩnnanĩ cunuung hũũk ĩĩcĩ oou nẽ agayyu nẽ tarĩ ĩthĩktu jurrung.

¹⁰ Hĩnĩngĩtĩ hadiimmuung naa ngagiit agaac ꞌgõõl ꞌcĩ ẽbẽraannu thooꞌthiok ꞌcĩg aũlanĩ, hátĩ nuun aꞌnyahit rũgẽt ꞌcĩ tẽllĩ nẽ iittu eet ꞌcĩg ammĩrru, ĩꞌthõng kõr ꞌcĩ hatĩ õbõdaanĩ Krĩstõ.

¹¹ Aaꞌnyuung hatĩ Yeesu Krĩstõ aallattia idticanit dtiicanĩ ꞌcĩg abũnnaa, ꞌcĩg aꞌnyahaak Nyekuc bulẽẽnĩt hĩ dĩhĩthẽẽnĩt.

Ĩꞌthanothoothĩk nyeemuut ꞌcĩ abũnnaa looc

¹² Nẽẽthĩ ꞌyioko, ꞌgotoonoga hĩ ngoonoga, hadiimmuung naa ngagiit agaac ngaatĩ ẽẽlĩ pĩĩrnanĩtĩ baa adhukiaaka nganĩĩt ngaati nyeemuut ꞌcĩ abũnnaa hĩꞌthanothoothĩk looc.

¹³ Hĩnĩngĩtĩ thõõth icci, iita agaacõ athegereeꞌnya ꞌcĩg ẽbẽk õlõ cĩ habu cĩ ꞌRooma hĩ eet ũgĩ vẽlẽk, ngaatĩ hecebiini naa, hĩnĩngĩtĩ hadticanoothihi Krĩstõ.

¹⁴ Nẽẽthĩ ꞌyioko, hĩnĩngĩtĩ hecebbi naa baabuutha, iita okomit nuyyiook cĩg Makayyiooktak ꞌthinneeti nẽ ĩꞌthĩlanit ngaatĩ irriõõnĩ nyeemuut cĩ Nyekuci.

¹⁵ Ĩĩn dĩdĩ, aattĩg eeta ũgẽẽgĩ ꞌcĩg alliman thõõth cĩ Krĩstõ ꞌgõõlaa ꞌcĩ iinanneet ngagĩĩt nẽ ẽggẽrẽnytõõ, hĩnĩngĩtĩ ngagĩĩta nẽ tarĩ illimattõõ ũgẽẽgĩ ꞌthinneetinii ꞌcĩg abũnnaa.

¹⁶ Eeta ꞌcĩg alliman nyeemuut ꞌcĩ abũnnaa ꞌthinneetinii ꞌcĩg ĩĩn dĩdĩ, ammĩnan nẽẽg Krĩstõ nẽ agaacõ ĩĩtõ, haaĩ naa ngaati, hátĩ hẽtẽẽõĩ nyeemuut cĩnnĩ ꞌcĩ abũnnaa.

¹⁷ Nẽẽthĩ, eeta ꞌcĩg iinannaa nganĩĩta, alliman nyeemuut cĩ Krĩstõ ꞌgõõlaa ꞌcĩ himmaarrianõõnna hĩ nganĩĩt ꞌlimman. Adiim aĩnanaaka nẽẽg nganĩĩt pĩĩrnanĩt, nga haaĩ baabuuthatõõ.

¹⁸ Nẽẽthĩ, ne ꞌcĩ abathĩ hatĩ irrioon eeta nyeemuut cĩ Krĩstõ? Thõõth ꞌcĩ aaddi dioo, ꞌcĩ illimanõõĩ thõõth cĩ Krĩstõ ꞌgoolliohĩ vẽlẽk, tananga muhẽẽttaa ꞌcĩ abũnnaa hode ĩcĩ abathĩ. Nẽ hĩnĩngĩtĩ thõõth cĩ ꞌlimman icci, haccamanoothĩha naana. Eei, haalla hatĩ naa haccamanoothihi,

Abuluth Paaulo Yeesu rũgẽta hĩ daahĩtha

¹⁹ hĩnĩngĩtĩ haga naa laiittaa cunuung hĩ eliinit ꞌcĩ aku hĩ Lori cĩ Yeesu Krĩstõ, ꞌgii baa adĩmanoothĩkaa nganĩĩta, aku hatĩ ũũkcĩ hĩĩ thõõth ꞌcĩ heellianĩĩ naana.

²⁰ Hammuhuneehi naa haini, hõllõngaa hatĩ haꞌngaoni ũdũt, nẽẽthĩ, aalla hatĩ õkõmĩ nganĩĩt ꞌthĩnĩt, hĩnĩngĩtĩ Krĩstõ, haau hĩ gõõng hõdõõkõthĩ. Nẽ haga naa haini, aꞌnyahaak hatĩ rũgẽtĩ caannĩ Krĩstõ bulẽẽnĩt, tananga harugi hode hadaahi.

²¹ Má harugi naana, harugi, hĩnĩngĩtĩ hidticanoothĩk Krĩstõ nẽ má hadaahi, mẽẽn ngaatĩ occa hadaaknĩ, hĩnĩngĩtĩ harũmeenna hatĩ hĩ ĩnõõnnõ.

²² Nẽẽthĩ, má haalla harugi naa ẽllaa, occa hatĩ hadticani dtiicanĩ ꞌcĩg abũnnaa. Nẽẽthĩ, hõllõngaa haga iina ꞌcĩ occa hẽbẽra.

²³ Ẽꞌngẽrra nganĩĩt thooꞌthioha ꞌcĩg ĩĩn ꞌramma ho hõrggẽẽna. Habũraneehi ngaatĩ hammũdõõthĩkĩĩ Krĩstõ, thõõth ꞌcĩ occa abũnnaa gẽrrẽẽt hĩ nganĩĩt niccia.

²⁴ Nẽẽthĩ, mẽẽn ngaatĩ haalla harũgnĩ, hátĩ heeluung ngagiita.

²⁵ Hĩnĩngĩtĩ hagawa thõõth icci, haga naa haini haalla hatĩ harugi nẽ harũmĩ hatĩ hĩ ngagiit vẽlẽk, hátĩ heeluung ngagiit ĩtĩlĩthĩt nẽ accamattoothihu, hĩnĩngĩtĩ lemiinit cunuung,

²⁶ ĩnõõ cĩ hátĩ, ma hikia hẽhẽẽrõnaahuung tarĩ, au hatĩ irriannu niig Yeesu Krĩstõ gẽrrẽẽt nẽ accamattoothihu, hĩnĩngĩtĩ nganĩĩta.

²⁷ Thooꞌthiohĩ vẽlẽk, aaut ꞌgõõlaa ꞌcĩ aꞌnyahaaku nyeemuut ꞌcĩ abũnnaa cĩ Krĩstõ bulẽẽnĩt. Tananga hẽhẽẽrõnaakuung hode aitiõõ, hathĩkna hatĩ aĩ, aꞌnyaku niig vẽlẽk muhẽẽnĩt ꞌgõõla hõdẽẽthõng. Nẽ hatĩ hagawa hĩĩna, adticaniinnu niig vẽlẽk hõdẽĩ nẽ attĩmannu gẽrrẽẽt ngaatĩ aꞌnyahaannu eet ũgĩ hiita helemit nyeemuut ꞌcĩ abũnnaa,

²⁸ ꞌgõõlaa ꞌcĩ hõllõngaa iꞌngoliinnu mĩrõk cugguung ũdũt. Ĩĩn ciee terethiinit hĩ ĩhõõggõ ꞌcĩ aĩ, aitiõõ hatĩ hõllõngaa ẽẽla Nyekuci ĩhõõggõ, ẽẽlannuung hatĩ nẽẽ ngagiita,

²⁹ nẽ aggatanuunga. Hõllõngaa aggatannuung, hĩnĩngĩtĩ aꞌnyaku niig lemiinit hĩ Krĩstõ diooni, nẽẽthĩ, aggatannuung, hĩnĩngĩtĩ accananiinnu niig buúk, hĩnĩngĩtĩ ĩnõõnnõ.

³⁰ Baa ĩcĩttaangu niig nganĩĩt ngaatĩ haccananiini nẽ aalla athiknu aĩ, nga haccanannii noho. Nẽẽthĩ ꞌyioko, accanattĩ niig buúk ꞌgõõlaa baa haccananiini naana.