Maatteeo 8 - ꞌBuuk cĩ Thõõth cĩ Nyekuci

Aaꞌnyĩk Yeesu eet ꞌcĩ adak helleggeri hũbũna

¹ Ma baa ulluuccia Yeesu muura hujjieen, ikia ũnũ lothippiti cobbi gẽrrẽẽt ĩnõõnnõ.

² Ma nĩngaata, uppwaannak ĩnõõnnõ eet umwaa ꞌcĩ adak helleggeri nẽ ikia akat huruꞌnyia muumaa cĩnnĩ nẽ ĩĩnnĩk, “Makayyioohit, má adiimi, aꞌnyaa hũbũna.”

³ Nĩngĩtĩ ataadĩkĩ Yeesu aꞌthiit cĩnnĩ ẽllaa cĩ eet nicci nẽ ĩĩnnĩk, “Hadiimmii naa nganiit bũna.” Nĩngĩtĩ aꞌnginõõꞌthĩ helleggeri noho matadaꞌnyak.

⁴ Ma ho, ĩĩnnĩk Yeesu ĩnõõnnõ, “Ma haduhaahi eet umwa thõõth icci. Deceek bĩĩt teretheek paadĩr ẽlẽ cunni nẽ aaꞌnyĩhuu ĩnõõnnõ ꞌbaaninit baa aduha Mũũꞌtha, hátĩ hagaacõ eeta ngaatĩ ũbũnaĩĩ nii dĩdĩ.”

Lemiinit cĩ ꞌgaalac cĩ ũũrũta

⁵ Ma baa õdõlan Yeesu Kapernaum, ũꞌthũkũcoothĩk ꞌgaalacĩ cĩ ũũrũta ĩnõõnnõ adiim eliinit.

⁶ Baa aduhaak nẽẽ Yeesu anneek, “Makayyioohit, appĩĩrna dticciannioohiti caannĩ umwaa õlõ gẽrrẽẽt halallia ẽlẽ.”

⁷ Nĩngĩtĩ annẽẽkĩ Yeesu ĩnõõnnõ, “Hakuu hatĩ hẽẽla ĩnõõnnõ hũbũna.”

⁸ Anneek hinnia ꞌgaalacĩ Yeesu, “Makayyioohit, hõllõngaa hũũppani naa ngaatĩ occa haꞌnyahaanni nganiit õlõõ caannĩ. Duha nẽẽ nii thõõth haaga, hátĩ hũbũna dticciannioohiti caannẽẽnĩ.

⁹ Hĩĩnĩ naa buúk ꞌgaalac ꞌcĩ haꞌnyahi makayyiook cĩgannĩg nẽ hĩĩnĩ eet ꞌcĩ haggami ũũrũta. Má hanneehi ũũrũtaac umwa, ‘Bĩtõ,’ õkõ ꞌthẽk hĩcĩ haduhaahi naana nẽ má hanneehi umwa, ‘Ijjia,’ aku ꞌthẽk hĩcĩ hanneehi naa ho. Má hanneehi dticciannioohit caannĩ, ‘Dĩman ꞌgiimwa,’ adtican ꞌthẽk ꞌgõõlaa tĩho.”

¹⁰ Ma baa athĩhĩ Yeesu thõõth icci ho, ukuleek ꞌjieen gẽrrẽẽt, nĩngĩtĩ annẽẽkĩ eet ꞌcĩg baag anũ ĩnõõnnõ, “Haduhaakuung dĩdĩ, nga hũmmũda eet ꞌcĩ aꞌnyak lemiinit ꞌcĩ aaĩ hoti eetinii cĩg Ĩꞌthĩraẽlĩ.

¹¹ Nẽ hanneekuung mẽẽlĩg hatĩ eeta ꞌcĩg au loonyinii cĩg uruto hĩ ꞌcĩg au ĩĩcĩ õkõlõõthĩkĩ kõrra, hiita hũrũmtĩ hĩ Abũrahaamõ hĩ Iꞌthaako hĩ Yakobo, ngaatĩ adahĩ karrama habuccieetaa cĩ hẽẽtkujjieen.

¹² Nẽẽthĩ, eeta ꞌcĩg occa baa aattĩg habuccieetaa cĩ hẽẽtkujjieen, iggiaoothĩk hatĩ battaala muguratõõ hĩccĩnĩt luulu nẽ adahit nyĩgĩt huciitha.”

¹³ Nĩngĩtĩ annẽẽkĩ Yeesu ꞌgaalac cĩ ũũrũta, “Bĩtõ! Adĩmanni ꞌthẽk hatĩ thõõth hĩcĩ elemu nii ho.” Nẽ baa ũbũna dticciannioohiti cĩnnĩ ho ꞌthaa niccia noho.

Aaꞌnyĩk Yeesu eet ꞌcĩg mẽẽlĩg hũbũttaathõ

¹⁴ Ma baa ikia uduhun Yeesu ꞌcieeth cĩ Pẽẽtũrũ, õkõ hinnia adtuuha inyitti Pẽẽtũrũ oongi loota aĩ ẽlẽ lõbbĩĩ lõbbĩĩ.

¹⁵ Ma nĩngaata, ikia uhum Yeesu aꞌthiit cĩ inyitti Pẽẽtũrũ ho, nĩngĩtĩ alahanẽẽkĩ abuurꞌthet ĩnõõnnõ hĩtĩnga hidticaneek Yeesu ꞌgẽẽn.

¹⁶ Ma ꞌjiaatĩn niccia, aꞌnyaktaak eeta Yeesu eet ꞌcĩg aꞌnyak loriẽẽt ꞌcĩg abathĩ. Baa iiggia nẽẽ loriẽẽt ꞌcĩg abathĩ ꞌtirriaanaa cĩ thõõth ꞌcĩ aduha nẽẽnĩ nẽ aaꞌnyĩk eet ꞌcĩg baag õmmõõrĩ vẽlẽk hũbũttaathõ.

¹⁷ Baa adticanni thõõth ciee hẽdẽcaak thõõth baa aduha põrõvẽtaacĩ Iꞌthaia aĩ, “Iiggia nẽẽ mooriꞌthiook cĩggaang vẽlẽk nẽ aaꞌnyeet ngagĩĩt hũbũttayyia.”

Pĩĩrnanĩt ꞌcĩ hanũĩ Yeesu

¹⁸ Ma baa adtuuha Yeesu lothippit ngaatĩ irriamanẽẽkĩ ĩnõõnnõ ho, ikia uduhaak nuyyiook cĩgĩnnĩg habaaktĩ hõõt dhoortaa cĩ bũlũc cĩ ꞌGalileea.

¹⁹ Ma ho, ikia ꞌlimmannioohiti cĩ nyattal cĩ Mũũꞌtha ĩĩnnĩk ĩnõõnnõ, “ꞌLimmannioohit, hanuyyii naa nganiit ꞌgoolliohĩ vẽlẽk ĩcĩg õkõõĩ.”

²⁰ Ẽdẽcĩ Yeesu anneek, “Aꞌnyak irrieerrwaana ꞌlõõhĩt nẽ aꞌnyahit hĩbaallĩ ꞌcieethi cĩggĩĩng, nẽẽthĩ aitiõõ Ngeertĩ Eeto nĩngĩtĩ oongiyyi haaga tõõ.”

²¹ Ma nĩngaata, ĩĩnnĩk nuyyioohiti umwaa tarĩ Yeesu, “Makayyioohit, ĩꞌnya nõõ hũũk hada nyakangaan caannĩ nẽ hikia hunuii nganiita.”

²² Ẽdẽcĩ Yeesu ĩnõõnnõ anneek, “Nũaa nganĩĩta, aꞌnyĩĩk daakiak hadaacõ eleeti cĩggĩĩng ẽmmẽn.”

Abĩllĩ Yeesu ngõõt

²³ Nĩngĩtĩ õtõdĩ Yeesu hĩ nuyyiook cĩgĩnnĩg haahũl.

²⁴ Ma nĩngaata, ĩtĩngaayyia ngõõtĩ umwaa hĩdĩĩkoothong ꞌcĩ attiran gẽrrẽẽt ꞌcĩ õmmõõnnĩ bũlũc hiꞌngoꞌthiaak maama haahũlatõõ. Nẽẽthĩ, baa hinnia ammũdeek oongi Yeesu thõng.

²⁵ Nĩngĩtĩ õõ attirani nuyyiooha ĩnõõnnõ annẽẽkĩ, “Makayyioohit, eleeta! Hõõt hutududdi naaga!”

²⁶ Ẽdẽcĩ Yeesu ĩhõõggõ anneek, “Niig eeta ꞌcĩg aꞌnyaku lemiinit ꞌcĩ hidici haaga ho, itieelinnu inni?” Ma ho, ĩtĩnga Yeesu nẽ eggerenyeek ngõõt hĩ maam hĩbĩlĩt. Nĩngĩtĩ au abĩllĩ dĩdĩ hĩĩ lõõcĩ ꞌthĩĩ.

²⁷ Baa abulan nuyyiook thõõth ciee gẽrrẽẽt nẽ ijitto ĩĩtõ, “Eet occa gõõng ꞌcĩ aattĩ aaĩ hutuno ciee athĩhĩ ngõõtĩ hĩ maam ko?”

Eet ꞌramma ꞌcĩg aꞌnyak loriẽẽt ꞌcĩg abathĩ

²⁸ Ma urutaa ꞌcĩ abaahõĩ Yeesu bũlũc, ikia õdõlan dẽmẽt ngaatĩ õbõhõõ hĩ looc cĩ ꞌGadarene, nĩngĩtĩ ẽdẽcĩ ꞌgõõla. Ma ho, iita ommottio hĩ eet ũgĩ ꞌramma ꞌcĩg aꞌnyak loriẽẽt ꞌcĩg abathĩ. Baa au eeta cieeg ngaatĩ adaiini daakiaha. Nẽ baa aꞌthĩlan nẽẽg gẽrrẽẽt hiittiõõ eet ꞌcĩ ẽttẽẽd ꞌgõõlaa tĩho tõõ.

²⁹ Ma ho, eggerenyit ĩĩtõ, “Adiimi nii hĩ ngagĩĩt neegi Ngeertĩ Nyekuci? Ikia nii uukeet ngagĩĩt nga hũttũbanoothĩk kõrra baa eberriaa ꞌcĩ hatĩ ukẽẽttõ?”

³⁰ Baa ẽgĩ tẽẽnyĩ cĩ ꞌngõõhĩꞌnyannu ꞌrẽẽna hĩdĩhĩdĩĩc.

³¹ Nĩngĩtĩ ĩĩlalẽẽkĩ loriẽẽta ꞌcĩg abathĩ ho Yeesu annẽẽkĩ, “Má itiggiaeet ngagĩĩta, ꞌthooĩheet nuun hoottia tẽẽnyaa cĩ ꞌngõõhĩꞌnyannu hata.”

³² Ma ho, ĩĩnnĩk Yeesu ĩhõõggõ, “Õõtõ!” Nĩngĩtĩ aduknaanĩ loriẽẽta ꞌcĩg abathĩ ho eleetinii cĩg eet ꞌcĩg ĩĩn ꞌramma ho battaala, nẽ edeccieek tẽẽnyaa cĩ ꞌngõõhĩꞌnyannu, nĩngĩtĩ uumuroothĩkĩ ꞌthilla hedeccieek bũlũcatõõ hutududdi hĩĩ lõõcĩ ꞌthĩĩ.

³³ Ma nĩngaata, ukulit tũhayyiooha cĩg ꞌngõõhĩꞌnyannu ho, õõt uduktaak eet ꞌtaaũna thõõth icci hĩ thõõth cĩ eet ꞌcĩg ĩĩn ꞌramma ꞌcĩg aꞌnyak loriẽẽt ꞌcĩg abathĩ ho.

³⁴ Nĩngĩtĩ allũnganniaanĩ eeta vẽlẽk ꞌtaaũna hõõt hommottio hĩ Yeesu. Ma baa adtuuha nẽẽg ĩnõõnnõ ho, iita ĩĩlallieek ĩnõõnnõ hũtũngeek looc cĩnĩĩng.