Maatteeo 7 - ꞌBuuk cĩ Thõõth cĩ Nyekuci

Ma hetteediku ꞌgoonogu thooꞌthiok

¹ “Ma hetteediku ꞌgoonogu thõõth, haau hĩcĩ hatĩ aitiõõ Nyekuci hõllõngaa etteedikuung ngagiit buúk thõõth.

² Hĩnĩngĩtĩ etteedikuung hatĩ Nyekuci ngagiit buúk thõõth, ꞌgõõlaa ꞌcĩ gõõng etteediku niig ꞌgoonogu! Adĩmaneekuung hatĩ nẽẽ thõõth ꞌcĩ gõõng adĩmaneeku niig ꞌgoonogu.

³ “Inni cĩĩn nii tahahaac ꞌcĩ mĩllĩꞌnyĩ hebereecaa cĩ ꞌgotonoonu nẽ iittiõõ hõllõngaa acini iggooli ꞌcĩ aaĩ hebereecaa cunni ho?

⁴ Occa gõõng anneehi nii ꞌgotonu, ‘Ĩꞌnya hittihaaii tahahaac ꞌcĩ mĩllĩꞌnyĩ hebereeca,’ nẽ nẽẽ aꞌnyahi nii iggooli hebereecaa cunni hutuno?

⁵ Nii oloꞌngiaahiti, ꞌtiha nõõ iggooli ꞌcĩ aꞌnyahi hebereecaa cunni ho hátĩ cĩnĩ jurrung, nẽẽthĩ hátĩ ittiha tahahaac ꞌcĩ mĩllĩꞌnyĩ hebereecaa cĩ ꞌgotonoonu.

⁶ “Ma haaꞌnyiku ũthũrẽẽt ꞌgii ꞌcĩ aꞌngirannii cĩ Nyekuci. Nẽ ma hadhuheeku ꞌngõõhĩꞌnya pẽalꞌnya. Ma adĩmannu noho, aathĩ hinnia hatĩ ꞌthõõnĩĩ cĩggĩĩng nẽ ĩꞌngoꞌthia hiita hadaktuung ĩĩtõ ꞌthĩĩ.

Ijinit, idiimit nẽ uruktu hattũũg

⁷ “Ijinit, hátĩ haaꞌnyĩhoothĩhuunga. Idiimit, hátĩ ummuddia. Uruhit hattũũg nẽ hatĩ ubbuuhothoothĩhuunga.

⁸ Hĩnĩngĩtĩ ẽẽtĩ ꞌcĩ ajin ꞌgiimwa, aanytĩhoothĩk hatĩnĩ nẽ ẽẽtĩ ꞌcĩ adiim ꞌgiimwa, ammũda hatĩnĩ nẽ abbuuhothoothĩk hatĩ hattũũg eet ꞌcĩ aruhi.

⁹ “Nganĩ occa hõrggẽẽnaa cunuung ꞌcĩ ma ajin ngeerĩnĩ ũbũnĩ aaꞌnyĩk hinnia bẽẽ?

¹⁰ Hode ma ajin ngeerĩnĩ ulugooc aaꞌnyĩk hinnia hũkaat?

¹¹ Má agayyu niig tananga abaꞌthu, ngaatĩ aaꞌnyiku lõhõlĩ cugguung ꞌbaaninit ꞌcĩ abũnnaa, ĩĩn occa hatĩ ꞌbaaniniti ꞌcĩ aaꞌnyĩk Maaꞌnyu cĩ aaĩ hẽẽtahujjieen eet ꞌcĩg ajin ĩnõõnnõ hutuno?

¹² Nẽẽthĩ hẽlẽggẽẽnnĩ vẽlẽk, ĩdĩmatteek ꞌgoonogu thooꞌthiok vẽlẽk ꞌcĩg adiimmu niig hĩdĩmatteehuung nẽẽg ngagiita, hĩnĩngĩtĩ arũma thõõth ciee Nyattal hĩ thõõth cĩ Põrõvẽtaaꞌnyanu vẽlẽk.

Hattũũg ꞌcĩ lũdũcĩ

¹³ “Uduhunit hattũũg ꞌcĩ lũdũcĩ. Hĩnĩngĩtĩ padtac hattũũg hĩ ꞌgõõl ꞌcĩ õkõõĩ eet ĩĩcĩ daahĩthõõ nẽ mẽẽlĩg eeta ꞌcĩg aduhun ngaatĩho.

¹⁴ Nẽẽthĩ, lũdũc hattũũg ꞌcĩ õkõ ĩĩcĩ rũgẽtõ. Nẽ õkõmĩ ngaatĩ hanũĩ ꞌgõõl ꞌcĩ õkõ ĩĩca ho gẽrrẽẽt, nẽ hĩdĩcĩg eeta ꞌcĩg ẽdẽcĩ ꞌgõõl tĩho.

Hẽẽt ꞌcĩ õddõngõtĩ

¹⁵ “Ĩcĩnĩt põrõvẽtaaꞌnya ꞌcĩg ĩĩn oloꞌngiaak jurrung! Hĩnĩngĩtĩ au nẽẽg hĩ ngagiit tarbalĩg haauto hĩ aꞌtha, nẽ ĩko ꞌthinneetinitõõ cĩggĩĩng, aattĩg hĩ huduumwaana ꞌcĩg au arukuung thõng.

¹⁶ Occa agayyu ĩhõõggõ, hĩnĩngĩtĩ thooꞌthiok ꞌcĩg adtican nẽẽgĩ. Nganĩ occa ꞌcĩ adũũca ꞌmũũnĩc cĩĩlkanooca, hode nganĩ ꞌcĩ occa adũũca hõmmõõk hẽẽnĩĩ ꞌcĩg ĩĩn bĩlla?

¹⁷ Hẽẽt ꞌcĩ abũnnaa õddõngta ꞌgẽẽn ꞌcĩ abũnnaa, nẽẽthĩ, õddõngõta hẽẽt ꞌcĩ abathĩ ꞌgẽẽn ꞌcĩ abathĩ.

¹⁸ Aitiõõ hẽẽt ꞌcĩ abũnnaa hõllõngaa occa õddõngta hẽẽt ꞌcĩg abbiiri ꞌcĩg abathĩ nẽ hẽẽt ꞌcĩ abathĩ, hõllõngaa occa õddõngta hẽẽn ꞌcĩg abbiiri ꞌcĩg abũnnaa.

¹⁹ Hẽẽt ꞌcĩ hõllõngaa õddõngta hẽẽn ꞌcĩg abbiiri ꞌcĩg abũnnaa, eꞌngeddoothĩk hatĩ looc nẽ udhuhoothĩk ꞌgwoyyiatõõ.

²⁰ Occa ꞌthẽk agayyu niig põrõvẽtaaꞌnya ꞌcĩg ĩĩn oloꞌngiaak ko, hĩnĩngĩtĩ thooꞌthiok ꞌcĩg adtican nẽẽgĩ.

Tilooinit

²¹ “Hõllõngaa eet vẽlẽk ꞌcĩg aũyya nganĩĩt anneeka, ‘Makayyioohit, Makayyioohit,’ ꞌcĩg hatĩ aduhun habuccieet cĩ hẽẽtkujjieen. Nẽẽthĩ, eet ꞌcĩ adtican dtiic cĩ Nyakangaan caannĩ cĩ hẽẽtkujjieen diooni, ꞌcĩ hatĩ aduhuni.

²² Kõr ꞌcĩ hatĩ etteedini thooꞌthioha, mẽẽlĩg hatĩ eeta ꞌcĩg aũũyya nganĩĩt anneeka, ‘Makayyioohit, Makayyioohit, ma baa tarĩ hirrioonĩka eet ꞌthaarĩĩ cugunnig, hiiggiayyia loriẽẽt ꞌcĩg abathĩ nẽ hidticatta thooꞌthiok ꞌcĩg mẽẽlĩg ꞌcĩg ĩnaat eeta?’

²³ Nẽẽthĩ, haduhaahi hatĩ naa ĩhõõggõ cũrũmũũm hanneehi, ‘Hõllõngaa hagayyuung naa ngagiit ũdũt. Ammanyattĩ ngaati, niig eeta ꞌcĩg adĩmannu thooꞌthiok ꞌcĩg abathĩ dtẽc ko!’

Teheꞌnyiook ꞌcĩg ẽggẽẽnyĩth hĩ ꞌcĩg aggiithi

²⁴ “Nẽẽthĩ hoti ho, ẽẽtĩ ꞌcĩ athĩhĩ thooꞌthiok cĩgannĩg ko nẽ idticanõõĩ, aaĩ nẽẽ hĩ ẽẽtĩ ꞌcĩ ẽggẽẽnyĩth ꞌcĩ ẽhẽnyĩt ꞌcieeth lõbaraba hujjieen.

²⁵ Tananga hĩtĩĩl tammu cobbi ꞌcĩ aku ngõõta, hirik tawanĩ nẽ ĩbbĩtĩt liillioha, huuhan ngõõtĩ hĩdda ꞌcieeth, aalla hatĩ hõllõngaa arribanni, hĩnĩngĩtĩ ẽhẽnytĩ lõbaraba hujjieen.

²⁶ Nẽẽthĩ, ẽẽtĩ ꞌcĩ hõllõngaa athĩhĩ thooꞌthiok cĩgannĩg ko nẽ idticanõõĩ, aaĩ nẽẽ hĩ ꞌgiiꞌthiahiti ꞌcĩ ẽhẽnyĩt ꞌcieeth ngaatĩ ĩĩn hathaac.

²⁷ Ma ikia ĩtĩĩl tammu cobbi hĩbbĩtĩt liillioha, huuhan ngõõtĩ nẽ ĩdda ꞌcieeth niccia, arribanni hatĩ ꞌcieeth niccia hĩĩ lõõcĩ ꞌthĩĩ.”

²⁸ Ma baa ẽdẽcaak Yeesu ngaatĩ aduhaanĩ thooꞌthiok iccig, ikia ubulan lothippit ꞌlimmanĩ cĩnnĩ ho gẽrrẽẽt,

²⁹ hĩnĩngĩtĩ baa alliman nẽẽ eet makaaꞌthĩta nẽ hõllõngaa allimanni hĩ ꞌlimmanniooha cĩg nyattal cĩ Mũũꞌtha.